Krótkopowěsće (06.09.16)
Twar hale so dliji
Niska. Twarske dźěła na nowej lodohokejowej hali w Niskej so dlija. Přičina toho su problemy z twarskim dnom a pobrachowace fachowe firmy, kaž zdźěli Sylke Seidel z Nišćanskeho twarskeho zarjada. Poprawom chcyše město nowotwar w hódnoće 6,7 milionow eurow hač do kónca lěta wotzamknjeny měć.
Program za spěšny internet
Budyšin. Krajny rada wokrjesa Budyšin Michael Harig (CDU) je dźensa spěchowanske přizwolenje za wutwar spěšneho interneta we wokrjesu dóstał. Po analyzy wokrjesneho zarjadnistwa su w nimale wštkich městach a gmejnach wjesne dźěle, kotrež hišće žadyn spěšny internet nimaja. W běhu přichodnych třoch do štyrjoch lět ma so to změnić.
Nowa społnomócnjena
Podstupim. Nowa statna sekretarka za kulturu a wědomosć w braniborskim krajnym knježerstwje budźe prof. dr. Ulrike Gutheil. Wona naslěduje Martina Gorholta (SPD), kiž nětko Kraj Braniborsku pola Zwjazka zastupuje. Prof. Gutheil přewozmje tež funkciju społnomócnjeneje za naležnosće Serbow. 26. septembra chcedźa ju do zastojnstwa zapokazać, ministerstwo informuje.
Krótkopowěsće (05.09.16)
Zmóžnja cyrkwinski azyl
Pančicy-Kukow. Klóšter Marijina hwězda w Pančicach-Kukowje zmóžnja jezidiskej swójbje z Iraka cyrkwinski azyl. Tole wozjewichu na wčerawšich Božich mšach w klóšterskej cyrkwi. Šěsćwosobowej swójbje z dźěsćomaj hrozy wotsunjenje do jich domizny a tam wěry dla smjerć. Sotry konwenta su so tuž rozsudźili, swójbu nachwilnje přiwzać. Štóž chce jej pomhać, njech so w klóštrje přizjewi.
Dohladuja wjac dźěći
Kamjenc. W sakskich dźěćacych dnjowych přebywanišćach dohladuja dale a wjac dźěći. Tole zdźěli dźensa statistiski krajny zarjad ze stejnišćom w Kamjencu. Porno lońšemu je to cyłkownje 7 886 dźěći wjac. 176 824 z 296 170 dohladowanych hišće do šule njechodźi. W Sakskej je 2 928 dźěćacych dnjowych přebywanišćow.
Afghanjanka wopor njeskutka
Wojerecy. 25lětna Afghanjanka, kotruž su we Wojerowskim domje za požadarjow azyla mortwu našli, je so z woporom njeskutka stała. To zdźěli Zhorjelska policija dźensa po jeje obdukciji. Po wšěm zdaću bě 32lětny mandźelski žonu morił, kotrehož su ze štyrjomi dźěćimi w starobje třoch do dźewjeć lět w Madźarskej našli.
Krótkopowěsće (02.09.16)
Łódź polěpša kwalitu wody
Zły Komorow. Po jednym lěće twarskeho časa je saněrowanska łódź Łužiskeje a srjedźoněmskeje towaršnosće hórnistwoweho zarjadnistwa dźensa dźěłać započała. Prěnja stacija je Parcowski jězor na saksko-braniborskej mjezy. Nowowuwita łódź ma kwalitu wody w nowonastatych jězorach wokoło Złeho Komorowa polěpšić. Pozdźišo planuja ju na dalšich wodźiznach łužiskeje jězoriny zasadźić.
Maja 195 wučomnikow
Hamor. 195 młodostnych započina tele dny swoje wukubłanje w koncernje Vattenfall. Wosmjo z nich rozsudźichu so za dualny studij, kaž předewzaće wčera zdźěli. Zo bychu so wučomnicy a wukubłarjo lěpje zeznali, přewjeduja nětko přihotowanski tydźeń.
FDP ma noweho předsydu
Krótkopowěsće (01.09.16)
Přepytuja podhlad njeswěry
Bern. Skandal wo wuhotowanju swětowych koparskich mišterstwow w Němskej dale dźe. Kaž powěsćernja dpa dźensa zdźěli, přepytuje šwicarske statne rěčnistwo přećiwo Franzej Beckenbauerej podhlada njeswěry a płokanja pjenjez dla. Dotal njeje so wón k tomu bliže wuprajił.
Jara wulki zajim
Pirna. W sakskim statnym lěsnistwje zahaji přichodne dny 48 zajimcow swoje wukubłanje na lěsniskeho hospodarja, mjez nimi šěsć młodych žonow. W přichodnych třoch lětach zeznajomja so woni z najwšelakorišimi nadawkami a wobłukami lěsnistwa, informuje statne lěsnistwo. Zajim, so w statnym předewzaću wukubłać dać, je porno dalšim wukubłanskim směram přeco wulki.
Dyrbja zrěčenje podlěšić
Krótkopowěsće (31.08.16)
Inwestuja do noweho labora
Budyšin. Sakska inwestuje do Budyskeje powołanskeje akademije 5,9 milionow eurow za nowy labor. Tole zdźěli wčera statny managament za imobilije a twarstwo w Drježdźanach. Nowotwar z cyłkownje 1 000 kwadratnymi metrami wužitneje płoniny ma hač k zymskemu semestrej 2017/2018 nastać a studentam moderne techniske wuměnjenja skićić.
Wot lěta 2017 mjenje płaćić
Berlin/Budyšin. Na wodźerjow awtow w Budyskim wokrjesu čaka klětu lěpše zastopnjowanje jich rukowanskeho zawěsćenja. Tole zdźěli dźensa Němska zawěsćenska towaršnosć w Berlinje. Mjez druhim płaći wolóženje tež za Rudnohorinski wokrjes. We wšěch tamnych wokrjesach Sakskeje wostanje wšitko při starym. Zakład zastopnjowanja twori škodowa bilanca po njezbožach.
Zatajany pralěs
Krótkopowěsće (30.08.16)
38 milionow eurow za wokrjes
Budyšin. Wokrjes Budyšin dóstanje we wobłuku programa „Mosty do přichoda“ 38 milionow eurow. Wulki dźěl toho, cyłkownje 25 milionow eurow, je za města a gmejny. Zbytk dóstanje wokrjes, kotryž planuje mjez druhim twar noweje pěstowarnje na Budyskim Třělnišću. Za jednotliwe projekty maja komuny 10 procentow kóštow same přewzać.
Ličba turistow přiběra
Drježdźany/Choćebuz. Turizm na wuchodźe Němskeje zwjesela so nad dale a wjace wopytowarjemi. Tak je so ličba přenocowanjow w Błótach porno lońšemu wo 11,3 procenty stopnjowała. Tole wuchadźa z ličbow Zwjazkoweho statistiskeho zarjada. Mnozy turisća předewšěm z Berlina wužiwaja składnosć a so w Błótach wočerstwjeja.
Přewjeduja naprašowanje
Budyšin. Tele dny je Budyski wokrjes zahajił online-naprašowanje k temje: „Kak derje sće na wulku wodu přihotowani?“ Ze statistiku chce krajnoradny zarjad zwěsćić, hdźe su słabosće nastupajo swójske zawěsćenje. Tak chcedźa zjawnostne dźěło zaměrnje na rozswětlowanje, na lěpše komunikaciske puće a móžne strategije wusměrić.
Krótkopowěsće (29.08.16)
Přistup znowa rjadować
Drježdźany. Přistup k dalewjeducym šulam po 4. lětniku dyrbja w Sakskej po wšěm zdaću znowa rjadować. Tole wuchadźa z wobzamknjenja Drježdźanskeho zarjadniskeho sudnistwa. Sudnicy maja kubłanske poručenje za njedosahacy zakonski zakład. Skoržiłoj staj staršej holcy, kotraž njebě žadany přerězk 2,0 w předmjetach matematika, němčina a wěcna wučba docpěła.
Wo zmysle dawkow zhonili
Drježdźany. Sobudźěłaćerjo financneho zarjada su w běhu jednoho lěta na wjac hač 200 zarjadowanjach we wyšich šulach a gymnazijach šulerjow wo zmysle dawkow informowali. Tak dóstachu wuknjacy zrozumjenje za to, zo su dawki za žiwjenski zakład bytostne, hódnoćeše dźensa sakski financny minister Georg Unland (CDU) zaměr projekta.
Mjenje jězbow po Łobju
Bad Schandau. Trajneje suchoty dla móža łódźe jenož hišće we wobmjezowanej měrje po Łobju jězdźić. Tak sakske parne łódźnistwo zdźěla, zo su jězby mjez Drježdźanami a Bad Schandauwom redukowali. W Drježdźanach je pegel Łobja jenož hišće 70 centimetrow, normalnej stej dwaj metraj.
Krótkopowěsće (26.08.16)
Kral Nižozemskeje přijědźe
Drježdźany. Nižozemski kral Willem-Alexander přijědźe spočatk lěta 2017 do wuchodneje Němskeje. Tole zdźěli prezident Zwjazkoweje rady, sakski premier Stanisław Tilich (CDU), dźensa po zetkanju z monarchom w Den Haagu. Po dotalnym planowanju wopyta Willem-Alexander w februaru Saksku, Saksko-Anhaltsku a Durinsku.
Strach lěsnych wohenjow
Pirna. Horcota a suchota tomu polěkujetej, zo je strach lěsnych wohenjow jara wulki. Na sewjeru Sakskeje a podłu pólskeje mjezy su dźensa najwyši warnowanski schodźenk wukazali, kaž statny lěsniski zawod zdźěla. Tež w Budyskej kónčinje hroža wohenje. Kurić w lěsach je zakazane. Ludźo njesměli awta na suchej trawje wotstajić.
Kolesowarjo a alkohol
Praha. Senat, hornja komora čěskeho parlamenta, je změnu zakonja wo nadróžnym wobchadźe schwaliła. Tak měło kolesowarjam na pućach nišich kategorijow hač do 0,8 promilow alkohola dowolene być. Za wšě tamne jězdźidła płaći dale „nulowa toleranca“. Změnu, za kotruž so tež winicarjo zasadźeja, dyrbi delnja komora hišće schwalić.
Krótkopowěsće (25.08.16)
Tysac swobodnych městnow
Drježdźany. W Sakskej je k zahajenju noweho wukubłanskeho lěta přeco hišće tysac wukubłanskich městnow njewobsadźenych. Najwjace swobodnych městnow maja we wobłukach elektrotechnika, sanitarne, tepjenje, klimowa technika a pola frizerow, rjemjeslniska komora zdźěla. Tež na mulerja, pjekarja, metalotwarca a třěchikryjerja móža so zajimcy hišće wukubłać dać.
Wutwarja wjesny puć
Chrósćicy. Dróhu Michała Hórnika w Chrósćicach chce Budyski wokrjes wot 5. septembra hač do kónca oktobra wutwarić. W tym času budźe wotrězk wot Pomnikoweho puća hač k wotbóčce do Stareje Cyhelnicy dospołnje zawrjeny. Tam wotwoža plesternaki a pokryja jězdnju z asfaltowej worštu. Nimo toho ma so dešćikowa woda porjadnje wotwodźeć.
Wosebity knižny dar
Krótkopowěsće (24.08.16)
Michałkowa hižo njekandiduje
Budyšin. Zapósłanča zwjazkoweho sejma Marja Michałkowa (CDU) njebudźe swójbnych přičin dla za klětuše wólby zwjazkoweho sejma hižo kandidować, kaž wčera zdźěli. Wot lěta 2002 wona za Budyski wólbny wokrjes w zwjazkowym sejmje skutkuje. Jako Serbowka so předewšěm za naležnosće narodnych mjeńšin zasadźa.
Krajiny Brankačkoweje wustajene
Drježdźany. Pod hesłom „pjećkróć KRAJINA“ su tuchwilu w Drježdźanskej galeriji „Himmel“ mólby pjeć wuměłcow widźeć. Nimo Iris Brankačkoweje, kotraž wustaja sydom twórbow, su to Ulrich Eisenfeld, Konrad Henker, Anne Kern a Uwe Peschel. Hač do 1. oktobra je přehladka přistupna.
Serbski podźěl na zapokazanju
Drježdźany. Na sobotnym zapokazanju noweho biskopa Drježdźansko-Mišnjanskeje diecezy Heinricha Timmereversa budźe tež serbski podźěl. Tak wobdźěla so družki na Božej mši, tež jedna próstwa budźe serbska. Chór 1. serbskeje kulturneje brigady swjatočnosć wobrubi. Dale wočakuja 32 biskopow z tu- a wukraja a tysacy wěriwych. Sćelak MDR zapokazanje live wusyła.
Olympisku chorhoj přijeli
