Krótkopowěsće (31.05.17)
Dotal najmjenje bjezdźěłnych
Budyšin. W meji bě we wuchodnej Sakskej 20 581 bjezdźěłnych, 1 100 mjenje hač w předměsacu. Zdobom je to najmjeńša ličba wot toho časa, zo agentura za dźěło scyła ličby bjezdźěłnych w kónčinje registruje. Kaž šef Budyskeje dźěłoweje agentury Thomas Berndt dźensa zdźěli, je bjezdźěłnosć w Hornjej Łužicy mjeztym mjeńša hač w někotrych kónčinach starych zwjazkowych krajow.
Wuhlowy atlas wušoł
Choćebuz. Nowy wuhlowy atlas – zhromadny projekt wjacorych wobswětoškitnych organizacijow – je wušoł. W 30stronskim dokumenće přehladnje „myty brunicoweje industrije“ wotkrywaja, kaž awtorojo pišu. Zdobom prezentuja nowe rozrisanja za energijowe zastaranje Sakskeje a dawaja pokiwy za strukturnu změnu we Łužicy.
Wolić kaž w Bayerskej
Krótkopowěsće (30.05.17)
Erwin Sellering wotstupił
Schwerin. Ministerski prezident Mecklenburgsko-Předpomorskeje Erwin Sellering (SPD) je strowotniskich přičin dla wšitke zastojnstwa złožił. Tole zdźěla statna kenclija w Schwerinje. Přičina je dospołnje njejapcy zwěsćeny rak lymfowych žałzow. Za swoju naslědnicu je Sellering zwjazkowu swójbnu ministerku Manuelu Schwesig namjetował.
Dešć woheń zhašał
Choćebuz. Ćežke njewjedro je dźensa wulki woheń w Luboraskej holi sewjernje Choćebuza zhašało. To zdźěla braniborske nutřkowne ministerstwo. Sylne zliwki běchu płomjenja zhašeli. Woheń bě wčera na něhdyšim wojerskim zwučowanišću wudyrił a so spěšnje rozšěrił. Wobornicy pak njesmědźachu stareje municije dla na teren.
Thomas Tuchel woteńdźe
Dortmund. Borussia Dortmund je swojeho trenarja Thomasa Tuchela pušćiła. Jeničce tři dny po dobyću pokala DFB informowaše Tuchel dźensa přez Twitter wo kóncu zhromadneho dźěła z koparskim ligistom. „Sym dźakowny za dwě rjanej lěće połnej dožiwjenjow a rjanych podawkow. Škoda, zo to dale njeńdźe. Přeju klubej wšo dobre.“
Krótkopowěsće (29.05.17)
Tež Serbja so wobdźělili
Berlin. Wčera zakónčeny Němski ewangelski cyrkwinski dźeń w Berlinje měješe tež serbski podźěl. Tak wuhotowachu sobotu w cyrkwi swj. Tomaša němsko-serbski namšu z Janšojskim fararjom Ingolfom Kśenku. Chór Łužyca kemše ze serbskimi kěrlušemi wobrubi. Dešnjanska fararka Katharina Köhlerowa je Łužicu a Serbow předstajiła.
Atentat rekonstruowali
Praha. Składnostnje 75. róčnicy wuspěšneho atentata čěskeho spjećowanskeho hibanja na němskeho protektora Reinharda Heydricha 1942 su sobotu w čěskej stolicy podawk zjawnje předstajili. W Praskej štwórći Libeň móžachu ludźo nadpad z Jendźelskeje z padakami wusadźenych čěskich wojakow na Heydrichowe awto z wulkim zajimom sćěhować. Strach lěsnych wohenjow wulki
Krótkopowěsće (26.05.17)
Banka šuli pjenjezy dariła
Chrósćicy. Kamjenska wotnožka Ludoweje banki Budyšin je Chróšćanskej zakładnej šuli pjenježny dar 305 eurow přewostajiła, zdźěli nawoda kubłanišća Měrko Šmit. Wužiwać chcedźa pjenjezy za wudospołnjenje serbskeje katolskeje kwasneje drasty. 7. junija chcedźa ju we wobłuku programa „Kwasna rewija“ w „Jednoće“ předstajić.
Šmórnu stolicu ze zapisa?
Praha. Natwar nowych, wyšich hač stometrowskich mróčeleškrabakow w Praskej štwórći Pankrác móhł poziciju čěskeje stolicy Prahi w zapisu swětoweho kulturneho namrěwstwa UNESCO wohrozyć. Centrum swětoweho namrěwstwa kaž tež Mjezynarodna rada za pomniki a sydlišća chcetej nětko přepytować, hač njejsu nowe wysokodomy unikatnu Prasku panoramu wobškodźili.
Swjedźeń dróši hač planowane
Drježdźany. Lońši centralny swjedźeń k Dnjej jednoty Němskeje w Sakskej bě dróši hač předwidźane. Swobodny stat wuda za njón něhdźe 6,1 milion eurow, byrnjež běchu naposledk 4,3 miliony zakalkulowali. To zdźěli politikar Lěwicy André Schollbach, kiž bě so w statnej kencliji naprašował.
Krótkopowěsće (24.05.17)
Prapremjera na cyrkwinskim dnju
Berlin. We wobłuku Němskeho ewangelskeho cyrkwinskeho dnja dožiwi kruch komponista Sebastiana Elikowskeho-Winklera „rěč a wěra 2“ swoju prapremjeru jutře na koncerće „Sichtungen“ w Berlinskej cyrkwi swj. Hilžbjety. Prěni dźěl na Jana Kilianowy choral „Zbudźenje za Serbow“ poćahowaceje so kompozicije měješe prapremjeru na wosebitym koncerće spočatk lěta.
Witaja noworjadowanje
Njebjelčicy. Iniciatiwa Serbski sejm wot Sakskeho krajneho sejma wobzamknjenu změnu wysokošulskeho zakonja wuraznje wita. Nětko maja zajimcy ze serbskorěčnymi znajomosćemi spěšniši přistup k wučerskemu studijej. W nowinskej zdźělence žada sej iniciatiwa dalše konkretne kročele, kaž lěpše wuknjenske wuměnjenja na Lipšćanskej uniwersiće.
Domy bomby dla ewakuowali
Krótkopowěsće (23.05.17)
Kabinet so w Praze schadźował
Praha. Składnostnje pjećlětneho wobstaća swojeho kontaktneho běrowa w čěskej stolicy je so sakske krajne knježerstwo z ministerskim prezidentom Stanisławom Tilichom (CDU) dźensa w Praze schadźowało. Hósć posedźenja bě čěski hospodarski minister Pavel Bělobrádek. Kontaktny běrow je w twarjenju Serbskeho seminara zaměstnjeny.
Wabja za wopyt wustajeńcy
Drježdźany. Z informaciskim kašćikom wot dźensnišeho na Drježdźanskim lětanišću za to wabja, Žitawski pokład historiskich narownych taflow wopytać. Přehladka wo „cyle hinašej reformaciji w Hornjej Łužicy“ je hač do apryla 2018 přistupna. Wona wopřijima 80 eksponatow ze 16. a 17. lětstotka.
Projekt šulerjow nominowany
Wostrowc. Mjezynarodny zetkawanski centrum Marijiny doł we Wostrowcu je za lětuše myto UNESCO nominowany, kaž rěčnica Němskeje UNESCO-komisije zdźěla. Při tym dźe wo projekt, z kotrymž młodostni přeslědźa, što móhło so w jich wokolinje na dobro škita klimy a při lutowanju energije wšitko polěpšić. Na projekće wobdźěla so wjace hač sto šulerjow.
Krótkopowěsće (22.05.17)
Jan Malink přednošował
Budyšin. Z wulkim zajimom je wčera popołdnju 30 serbskich a němskich zajimcow wuwjedźenja superintendenta Jana Malinka w Budyskim Serbskim muzeju k 500 lětam serbskeho ewangelskeho žiwjenja sćěhowało. Wodźenje bě poskitk we wobłuku 40. mjezynarodneho dnja muzejow.
Policija pyta za skućićelemi
Choćebuz. Po namócnych rozestajenjach wosrjedź Choćebuza z pjeć zranjenymi pyta policija z wotmachom za skućićelemi. Dotal pozadki njeznaja, kaž rěkaše. Sobotu wječor bě mjez swjećacymi němskimi a wjacorymi syriskimi mužemi k zwadźe dóšło. W tym zwisku so pjeć němskich muži w starobje 28 do 33 lět kałnjenja a rěznjenja dla zrani. Třoch móžachu mjeztym z chorownje pušćić.
Předewzaćelske myto do Załomja
Drježdźany/Załom. Nawodaj Załomskeho zawoda k předźěłanju płodow, nan Maximilian Deharde a syn Werner, staj myto „Sakski předewzaćel lěta 2017“ dóstałoj. Při tym běchu posudźowarjo dobre hospodarske połoženje zawoda runje tak hódnoćili kaž jeju wobchadźenje z přistajenymi a čestnohamtske aktiwity.
Waldschmidt HSV wuchował
Krótkopowěsće (19.05.17)
Třikrajowy festiwal J-O-Ś zahajili
Žitawa. W Zhorjelsko-Žitawskim Gerharta Hauptmannowym dźiwadle su zawčerawšim třikrajowy dźiwadłowy festiwal J-O-Ś zahajili. Mjeno poćahuje so na hory němsko-čěsko-pólskeho třiróžka Ještěd, Oybin a Śnieżku. Hač do 21. meje předstaja dohromady 17 kruchow. Hłownu produkciju bě wyši hrajny nawoda NSLDź Steffen Wolfram přewzał.
Smartphone hižo při snědani
Budyšin. Po naprašowanju chorobneje kasy KKH słuša za młodu generaciju k snědani, zo čitaja mejlki abo sćelu přećelam krótkopowěsće. 62 procentow woprašanych młodostnych w starobje 18 do 29 lět je přiznało, zo při snědani na swój smartphone hladaja. Starša generacija porno tomu radšo dale nowinu čita. Jenož kóždy šesty z 50- do 70lětnych wužiwa samsne medije kaž młodźina.
Bombardier wuradźował
Krótkopowěsće (18.05.17)
Nowelěrowany zakoń schwaleny
Drježdźany. Powołanske akademije po cyłej Sakskej móža wot 1. awgusta 2017 po nowych měritkach dźěłać. Sakski parlament je na swojim wčerawšim posedźenju nowelěrowany zakoń wo powołanskich akademijach wobzamknył. Sakska statna ministerka za wědomosć a wuměłstwo dr. Eva-Maria Stange (SPD) rjekny, zo „sylnja zakoń zamóžnosć wukonow akademijow a jich awtonomiju“.
Žadanje iniciatiwy wobjednali
Podstupim. Braniborski krajny sejm je dźensa žadanje ludoweje iniciatiwy, planowanu wokrjesnu reformu njezwoprawdźić, wobjednał. Knježaca koalicija SPD a Lěwicy bě hižo do posedźenja připowědźiła, zo žadanje wotpokaza. Iniciatiwa bě něhdźe 130 000 podpismow přećiwo nanuzowanemu zjednoćenju wokrjesow a bjezwokrjesnych městow znosyła.
Hraničny měznik wuchowali
Krótkopowěsće (17.05.17)
Sudnicy wuzwoleni
Drježdźany. Sakski krajny sejm je na swojim dźensnišim posedźenju štyrjoch čłonow sakskeho wustawoweho sudnistwa wuzwolił. Jürgena Rühmanna, prezidenta financneho sudnistwa, su w zastojnstwje wiceprezidenta wobkrućili. Wólby běchu trěbne, dokelž podadźa so někotři na wuměnk abo dźewjećlětna wólbna doba so kónči.
Planuja trasu spěšnoćaha
Praha. Čěscy kaž tež sakscy geologojo su w sewjernej Čěskej z prěnimi přepytowanjemi terena w zwisku z planowanym natwarom spěšnoćahoweje čary Praha–Drježdźany započeli. 123kilometrowsku trasu chcedźa w lěće 2028 twarić započeć. Wobstatk budźetej mjez druhim tež 16 a 26 kilometrow dołhej tunlej. Zasadnje wažne tuž je dno geologisce dokładnje přepytować.
Dźěłać kaž na zapadźe
Berlin. Wuchodoněmscy metalownicy nochcedźa dlěje hač 38 hodźin wob tydźeń dźěłać. Tole je 86 procentow přistajenych w Berlinje, Braniborskej a Sakskej při woprašowanju dźěłarnistwa IG metal zwurazniło. 38hodźinske rjadowanje płaći jenož we wuchodoněmskich krajach. Na zapadźe dźěłaja po tarifje 35 hodźin.
