Krótkopowěsće (09.12.15)
Jednotne wupokazy ćěkancam
Berlin. Zwjazkowe knježerstwo je wobzamknyło, ćěkancam po wšej Němskej jednotne wupokazy dać. Tole by lěpšej wuměnje datow mjez zarjadami zaručiło, kaž z Berlina rěkaše. Wotpowědny naćisk zwjazkowy kabinet dźensa schwali. Hłowny zaměr je, pospěšić registraciju požadarjow azyla. Wupokazy maja klětu w lěću po cyłym Zwjazku płaćić.
Mikławšk pěstowarnje wopytał
Worklecy/Smjerdźaca. Zapósłanc CDU w Sakskim krajnym sejmje Alojs Mikławšk je dźensa we wobłuku swojich tradicionalnych dohodownych wopytow pěstowarnjow we Worklecach a Smjerdźacej pobył. Jako překwapjenku měješe wón adwentne swěčki sobu, kotrež móža dźěći samostatnje wudebić, kaž ze dźělenki wuchadźa.
Pokładnja so spěšnje pjelni
Drježdźany. Znowa dobra to powěsć za sakskeho financneho ministra Georga Unlanda (CDU): Swobodny stat změje kónc lěta z 12,76 miliardami eurow prawdźepodobnje wjace dochodow z dawkow hač wočakowane. Prognoza dawkow z lětušeje meje budźe tak wo 320 milionow eurow wyša, zdźěli Unland w Drježdźanach.
VfL Wolfsburg we wosmifinalu
Krótkopowěsće (08.12.15)
Knježerstwo zrěčenje schwaliło
Drježdźany. Sakske statne knježerstwo je mjeztym 3. zrěčenje wo financowanju Załožby za serbski lud schwaliło. Wone płaći za lěta 2016 do 2025 a ma cyłkowny pjenježny wobjim 18,6 milionow eurow wob lěto. Wo tym informowaše ministerka za wědomosć a wuměłstwo dr. Eva-Maria Stange (SPD) nowinarjow dźensa w Drježdźanach.
Klětu kiwa zaso myto
Drježdźany. Rjemjeslniska komora Drježdźany chce klětu pjaty raz wuchodosakske rjemjeslniske zawody wuznamjenić, wopokazuja-li so hladajo na demografiske wuwiće regiona jako do přichoda nastajene. Wšitke zawody, kotrež hižo dlěje hač dwě lěće dźěłaja, móža so wo Myto přichoda w hódnoće 3 000 eurow požadać.
Husace wiki přeprošeja
Rakecy. Husace wiki w Rakecach su wot zahajenja 1. nowembra stajnje derje wopytane. Wulki poskitk słódnych jědźow z husaceho a dalšeho pjeriznoweho mjasa wabi wopytowarjow. Wosebita chłóšćenka su lětsa pražene kołbaski z husaceho mjasa. Rakečanske wiki w zawodźe Eskildsen su wšědnje wot 10 do 19 hodź. wotewrjene a traja hišće hač do 22. decembra.
Turněraj volleyballa přewjedli
Krótkopowěsće (07.12.15)
50 lět Lessingowe dny w katalogu
Kamjenc. Z wjace hač 300 fotami podawa nowa publikacija Kamjenskeho Lessingoweho muzeja přehlad wo stawiznach 50 Lessingowych dnjow wot lěta 1962. Je to zdobom katalog wosebiteje wustajeńcy składnostnje jubileja. Dalši katalog přeproša pod hesłom „Luther – Gellert – Lessing. Fabel in Reformation und Aufklärung“ na jězbu po stawiznach fabule w Němskej.
Wopismo wo rekordźe dóstali
Budyšin. Institut rekordow za Němsku je wčera kralej Wjacławej IV. alias Michaelej Heuselerej wopismo „Najstarše w chronice mjenowane hodowne wiki“ w němskej a serbskej rěči přepodał. Stawizny Budyskich adwentnych wikow sahaja hač do lěta 1348. Tehdy bě Kral Wjacław IV. (1361–1419) městu Budyšinej dowolił mjasowe wiki zarjadować.
Rěče mjeńšin lěpje škitać
Krótkopowěsće (04.12.15)
W lisće prosy wo pomoc
Pančicy-Kukow. Wosobinski list je wjesnjanosta gmejny Pančicy-Kukow Markus Kreuz (CDU) wčera wšitkim domjacnosćam swojeje komuny připósłał. W nim rozłožuje wón tuchwilnu napjatu situaciju wokoło ćěkancow a skedźbnja na winowatosć komunow, spytać problemy sobu rozrisać. Kreuz wobydlerjow napomina, zo měli gmejnje zdźělić, maja-li móžne swobodne bydlenja a kmane płoniny.
Nowe čisło „Naša Domowina“
Budyšin. Nowe čisło informaciskeho łopjena „Naša Domowina“ informuje mjez druhim wo rozsudźe Lubina a Kalawy, kotrejž prosytej wo přistup k serbskemu sydlenskemu rumej, a wo wobzamknjenjach zašłeho posedźenja Zwjazkoweho předsydstwa Domowiny. Předstajeni su mjez druhim tež lawreaća lětušeho Myta a Čestneho znamješka Domowiny.
Piwarnja dźěłać započała
Krótkopowěsće (03.12.15)
Madźarska skorži přećiwo EU
Budapest. Po Słowakskej chce tež Madźarska přećiwo planowanemu rozrjadowanju ćěkancow po krajach EU z pomocu kwoty skoržić. Wotpowědnu skóržbu chcychu hišće dźensa Europskemu sudnistwu zapodać, rjekny ministerski prezident Viktor Orbán w Budapesće. Słowakska je skóržbu hižo zapodała.
Zwučuja mobilizowanje armeje
Praha. Načolnik generalneho staba čěskeje armeje Josef Bečvář je zdźělił, zo chcedźa mechanizmy mobilizowanja wupruwować. Při tym maja so tež aktiwni rezerwisća do wójska zwołać. Jedna so wo prewentiwnu naprawu jako reakciju na aktualne problemy w zwisku z terorizmom a migraciskej žołmu, kaž čěske medije pisaja.
Myto Wojerowskemu frizerej
Drježdźany. Wojerowski frizerski salon „HaarSchneider“ je dobyćer lětušeho Drježdźanskeho marketingoweho myta. Salon je z poměrnje snadnym budgetom z kedźbyhódnymi akcijemi dobry rozrost docpěł, rěka we wopodstanjenju komisije. Myto su wčera wječor w Drježdźanach přepodali. Za myto nominowany bě tež zawod za twar pjecow w Budyšinje.
Krótkopowěsće (02.12.15)
Přeciwo zasadźenju wójska
Budyšin. W zjawnym lisće předsydźe SPD Sigmarej Gabrielej je so Budyski měšćanski zwjazk strony přećiwo wobdźělenju Zwjazkoweje wobory na wojerskim zasadźenju přećiwo teroristiskej milicy Islamski stat w Syriskej wuprajił. „Nazhonjenja wuča, zo njehodźi so terorizm z bombami a wójnami wotstronić.“ List podpisał je předsyda Hubertus Schwerk.
Zbrašeni kritizuja knježerstwo
Berlin. Składnostnje jutřišeho Mjezynarodneho dnja zbrašenych je Rada zbrašenych Němskeje zwjazkowe knježerstwo kritizowała. Němska njeje směrnicy UNO k prawam zbrašenych dawno hišće zwoprawdźiła, rada zdźěla. „Zajimy zbrašenych dyrbja so často financnopolitiskim zajimam podrjadować.“ Rada zbrašenych žada sej změnu dotalneho kursa.
Mjetarjo SGB w krajnym finalu
Krótkopowěsće (01.12.15)
Protestuja w sakskej stolicy
Drježdźany. Sobudźěłaćerjo twarca chipow Globalfoundries chcedźa sobotu w Drježdźanach přećiwo planowanemu wottwarej dźěłowych městnow demonstrować, kaž industrijne dźěłarnistwo za hórnistwo, chemiju a energiju IG BCE zdźěli. Předewzaće bě spočatk oktobra připowědźiło, zo chcyło 800 z cyłkownje 3 700 městnow šmórnyć.
Mjenje bjezdźěłnych w EU
Luxemburg. Bjezdźěłnosć we 18 krajach europasma je so w oktobru na 10,7 procentow znižiła a je tak na najnišim stawje po januaru 2012. We wšěch 28 statach EU bě wona w oktobru z 9,3 procentami tak niska kaž wot septembra 2009 nic. Tole zdźěla statistiski zarjad Eurostat. Najmjenje bjezdźěłnych je w Němskej (4,5 proc.) a Čěskej (4,7), najwjace w Grjekskej (24,4) a Španiskej (21,6).
Wjace pjenjez ratarjam
Frankfurt n. M. Dźěłarnistwo ratarjow IG twar, ratarstwo a wobswět chcyło wyše mzdy za jedyn milion sobudźěłaćerjow němskeho ratarstwa přesadźić. W dźensa zahajenych jednanjach z dźěłodawarjemi žada sej dźěłarnistwo wo 5,9 procentow wyšu mzdu kaž tež lěpše strowotniske zastaranje a zawěsćenje rentow, kaž wone zdźěla.
Krótkopowěsće (30.11.15)
Wo wliwje němčiny
Budyšin. Zběrnik „Wliwy němčiny na gramatiske struktury słowjanskich rěčow“ je wušoł. W nim jewja so přinoški 30 rěčespytnikow z Němskeje, Pólskeje, Čěskeje, Šwicarskeje a Słowjenskeje k tutej temje na konferency 2011 w Choćebuzu. Dr. Sonja Wölkowa a dr. Hauke Bartels staj knižku zestajałoj. Němčina je jedna z najwažnišich kontaktnych rěčow za słowjanske ludy.
Nowe pomjenowanje referata
Podstupim. W zwjazkowym ministerstwje za wědomosć, slědźenje a kulturu su mjeno referata 14 na „Naležnosće nabožinskich zhromadźenstwow, Serbow a delnjoněmčiny“ změnili. Wopřijeće Serbja so nětk oficialnje jewi, zdobom skedźbnja na tematisce wusko z delnjoserbšćinu zwisowace mjeńšinowe spěchowanje delnjoněmčiny, kaž ministerstwo zdźěla.
Kamjenski zwjazk počesćeny
Krótkopowěsće (27.11.15)
W Hornjej Łužicy wostać
Budyšin. Demografiska změna w Hornjej Łužicy bě tema konferency „Wuwićowe perspektiwy na wsy“ dźensa w Budyskim Kamjentnym domje. Wjac hač 70 wobdźělnikow diskutowaše wo idejach, wotchad ludźi z Łužicy spomalić. Zakład konferency bě naprašowanje mjez młodostnymi w Zhorjelcu, Budyšinje, Wojerecach a na wsach Hornjeje Łužicy.
W nocy žane pjenjezy
Zhorjelc. Pjenježne awtomaty lutowarnje Zhorjelskeho wokrjesa wostanu wot 20 hodź. do 7.30 hodź. zawrjene. Lutowarnja reaguje tak na nadpad z rozbuchlinu w Mikowje pola Niskeje. Nócna posłužba njebudźe mjez druhim móžna w Rěčicach, Hamorje, Rychbachu a Zhorjelcu kaž tež we Wopakej a dalšich filialach Zhorjelskeho wokrjesa.
Wažne dźěło přez mjezu
Praha/Drježdźany. Čěske regiony Karlovy Vary, Ústí nad Labem a Liberec su ze Swobodnym statom Sakskej wosebite zrěčenje podpisali. Po nim móža nětko čěske kaž tež němske wuchowanske ambulancy we woběmaj krajomaj swobodnje skutkować. To polěpša strowotniske zastaranje, mjez druhim blisko statneje mjezy zranjenych sněhakowarjow.
Krótkopowěsće (26.11.15)
Škit mjeńšin rozjimali
Berlin. Mjeńšinowa rada w Němskej chce zwisk k Zwjazkowej radźe zesylnić. Na to dojednachu so zastupnicy Danow, Frizow, Sintow a Romow a Serbow, kotřiž radźe přisłušeja, wčera w Berlinje. Rozjimali su tež stejišćo wobłukoweho dojednanja wo škiće mjeńšin a klětuše dźěłowe ćežišća, zdźěli mjeńšinowy sekretariat. Zetkanju přizamkny so dźensa konferenca.
Budyski zawod nominowany
Drježdźany. Mjez třomi móžnymi kandidatami za lětuše mjeztym 21. Drježdźanske marketingowe myto je tež Budyski zawod za twar pjecow DEBAG. Nimo toho smě so Wojerowski frizerski salon Haarschneider počesćenja nadźijeć, kaž ze zdźělenki Drježdźanskeho marketingoweho kluba wuchadźa. Myto spožča 2. decembra w Drježdźanach.
Pytaja bydlenja za ćěkancow
