Krótkopowěsće (05.12.16)
Milan Hrabal z nowostki čitał
Praha. Składnostnje stotych narodnin Jurja Brězana čitaše Varnsdorfski spisowaćel Milan Hrabal sobotu w Praskim Serbskim seminarje ze swojeje nowostki „Přiběhy o vodě“. Zakład knihi je němskorěčna publikacija Brězana „Geschichten vom Wasser“, kotruž bě wón zhromadnje z nawodnicu Varnsdorfskeje biblioteki Ilonu Martinovskej přełožił.
Basnje wo słowjanskim herbstwje
Neustadt an der Orla. Publicist dr. Baal Müller z Treuenbrietzena je pod hesłom „Wendische Fahrt“ basnje wo słowjanskim herbstwje wozjewił. Jedyn kapitl knihi, kotruž je nakładnistwo Arnshaugk w Neustadće an der Orla wudało, wěnuje so tež Łužicy. Baal Müller angažuje so na polu słowjanskeho pohanstwa.
Šiman za razniše kontrole
Budyšin. Zapósłanc CDU w Sakskim krajnym sejmje Marko Šiman žada sej hnydomne naprawy přećiwo organizowanym cwólbam, kotrež ludźi ilegalnje do Europy pašuja. Tak měli so po wšej Europje zaso pomjezne kontrole dołhodobnje zawjesć. „Njemóžemy so na Schengenski rum spušćeć“, rěka w pjatk wozjewjenej zdźělence Šimana.
Krótkopowěsće (02.12.16)
Z Merkel diskutować
Jena. Zwjazkowu kanclerku Angelu Merkel (CDU) wočakuja dźensa wječor w Jenje. Tam chce wona na regionalnej konferency z čłonami CDU Durinskeje, Sakskeje, Saksko-Anhaltskeje, Braniborskeje a Berlina wo aktualnych politiskich temach wuradźować. Při tym póńdźe tež wo politiku ćěkancam napřećo a wo rentu. Wočakuja sta wobdźělnikow, ale tež přećiwnych demonstrantow.
Hosćenc „Juwel“ wuznamjenjeny
Korzym. Hosćencej „Juwel“ w Korzymje su požadanu „hwězdu“ spožčili a dom zdobom do lisćiny wusahowacych gurmejowych hosćencow „Guide Michelin“ 2017 přiwzali. Dom z kuchinskim šefom Philippom Liebischom na čole je prěni počesćeny hosćenc w Sakskej, kotryž je zwonka wulkoměstow. Fachowcy wuznamjenichu 292 hosćencow kraja.
Wjace piwa eksportowali
Krótkopowěsće (01.12.16)
Mortwej wjelkaj w Braniborskej
Kopańce. W južnej Braniborskej su mortwej wjelkaj našli. Wutoru bě hajnik na wotžnjatym polu pola Žargonja (Sergen) we wokrjesu Sprjewja-Nysa wjelka našoł, kotryž tam hižo něšto dnjow ležeše. Jeho organy běchu hižo wužrane. Pola Krynicy we wokrjesu Łobjo-Halštrow bě wjelk po zražce z awtom zahinył. Wobě zwěrjeći nětko w instituće přepytuja.
Sakska w geotermiji wodźaca
Drježdźany. Při wužiwanju zemskeje ćopłoty je Sakska po wšej Němskej wodźaca. Loni su dalše 3 376 kilowattow energije přizamknyli. Hladajo na wobydlerstwo je to najwjetši cyłozwjazkowy rozrost, wobswětowe ministerstwo informuje. Na druhim a třećim městnje slědujetej Bayerska a Braniborska. Kraj wužiwanje geotermije spěchuje.
Tójšto njezbožow sněha dla
Krótkopowěsće (30.11.16)
Wobstatk wjelkow pruwować
Drježdźany. Sakski wobswětowy minister Thomas Schmidt (CDU) chcył pruwować dać, hač je kruty škit wjelkow w Němskej w dotalnej formje hišće trěbny. To připowědźa wón w dźensnišim wudaću Sächsische Zeitung. Dotalny škit je tomu polěkował, zo su so wjelki derje rozmnožili. Nětko pak měło zwjazkowe knježerstwo staw a wuwiće jich wobstatka pruwować.
Warnowanski stawk wučerjow
Lipsk. Pedagogojo mnohich zakładnych šulow w Sakskej su dźensa dźěło złožili a stawkowali. Potrjechene běchu kubłanišća w Lipsku, Drježdźanach a Kamjenicy. Po informacijach dźěłarnistwa GEW je so wjace wučerjow wobdźěliło, hač běchu wočakowali. Po rešeršach Serbskich Nowin njejsu wučerjo serbskich zakładnych šulow pódla byli.
Westernske městačko wožiwjenje
Krótkopowěsće (29.11.16)
Škarakaj do jastwa
Budyšin. K jastwu dweju a poł lěta resp. třoch lět je Budyske hamtske sudnistwio wčera młodeju muži w starobje 21 lět zasudźiło. Wonaj běštaj w februaru při wohenju w bywšim hotelu „Husarenhof“ dźěło wohnjowych wobornikow myliłoj a so přikazam policije spřećiwjałoj. Do chłostanja zapřija sudnistwo dalše njeskutki, kaž padustwo a zranjenje ćěła.
Wuradźuja wo matematice
Drježdźany. Fachowcy ze wšitkich zwjazkowych krajow a Awstriskeje wuradźuja dźensa a jutře w Drježdźanach wo přichodźe maturitneho pruwowanja w matematice. W srjedźišću steji, kak móhło maturitne pruwowanje w matematice w lěće 2030 wupadać, informuje kultusowe ministerstwo. Zaměr je, nadawki po wšej Němskej dołhodobnje na samsnej runinje přibližić.
Hans-Joachim Wolfram njeboh
Krótkopowěsće (28.11.16)
Z fotami Jürgena Maćija
Drježdźany. Pod hesłom „Pódla był – fotografije z NDRskeho časa“ wustajeja fotografojo Frank Höhler, Thomas Kläber, Georg Krause a Jürgen Maćij tuchwilu w rumnosćach přichodneho NDRskeho muzeja w Drježdźanskim Simmelowym nakupnišću na Albertowym naměsće. Hač do 14. januara je wustajeńca přistupna.
Maja nowu nawodnicu
Choćebuz. Uta Henšelowa stanje so z nowej nawodnicu Šule za delnjoserbsku rěč a kulturu w Choćebuzu. 1. februara wona nowe zastojnstwo nastupi, rozprawja delnjoserbski rozhłós RBB. Lubnjowčanka, kotraž skutkuje hišće jako regionalna rěčnica Domowiny w Delnjej Łužicy, přewozmje nawodnistwo kubłanišća wot Marje Elikowskeje-Winkleroweje, kiž so kónc lěta na wuměnk poda.
Telekom pruwuje nadpad
Berlin/Bonn. Po masiwnych hawarijach internetnych přizamkow Němskeje Telekom předewzaće pruwuje, hač móhło so wo nadpad hackerow zwonka předewzaća jednać. Wotpowědne pokiwy je Telekom wot fachowcow dóstała. Potrjechenych je něhdźe 900 000 internetnych routerow. To su nastroje, kotrež zmóžnjeja zwisk do interneta.
Krótkopowěsće (25.11.16)
Impulsy za region
Choćebuz. Na 7. regionalnym forumje Łužiskeho energijoweho regiona zaběrachu so wčera z wužadanjemi strukturneje změny a z njej zwisowaceje digitalizacije. Runje změny energijoweho hospodarstwa region sylnje trjechja. Tak su zajimcy foruma wčera w Choćebuskim hotelu „Radisson blu“ wo impulsach za přichodne wuwiće rozmyslowali.
Mjeńšinowy běrow wopytał
Berlin. Prezident Schleswigsko-holsteinskeho krajneho sejma Klaus Schlie je běrow štyrjoch awtochtonych narodnych mjeńšin w Berlinje wopytał. Nawoda prezidialneho běrowa Kristian Rieser jeho přewodźeše. Pola nawodnicy mjeńšinoweho běrowa Judith Wałdźic staj so wonaj wo aktualnych nadawkach mjeńšinoweje politiki wobhoniłoj.
Na dwěmaj přehladkomaj pódla
Krótkopowěsće (24.11.16)
Domowina gratulowała
Budyšin. Domowina – Zwjazk Łužiskich Serbow – je Susann Šenkec k wuzwolenju za předsydku rady Załožby za serbski lud gratulowała. „Susann Šenkec je hižo mnohe lěta wuska přewodźerka w prócowanjach k zdźerženju a spěchowanju serbskeje rěče. Sym přeswědčeny, zo wona wočakowanjam Serbow wotpowěduje“, piše předsyda Dawid Statnik.
Fararka nastupi zastojnstwo
Drježdźany. W stawiznach Drježdźanskeje cyrkwje Našeje knjenje zahaji so přichodnu njedźelu nowa doba: Prěni króć změje Boži dom z fararku Angeliku Behnke žonu na čole wosady. Wona budźe zastojnstwo zhromadnje z fararjom Sebastianom Feydtom wukonjeć. 43lětnu Behnke běchu w juniju z wjace hač dźesać požadarjow wuzwolili.
Dobyćer z Budyskeho wokrjesa
Krótkopowěsće (23.11.16)
Krabat jako app wuspytać
Budyšin. „Krabat a potajnstwo serbskeho krala, 1. staw“ předleži wotnětka jako pospytna wersija dyrdomdejskeje kompjuteroweje hry jako app za mobilne nastroje, kaž tablet abo smartphone. Projektna skupina „Rapaki“ je ju w nadawku Załožby za serbski lud wuwiła. Putaca stawizna jedna 1714. Kompletna werzija ma klětu dozhotowjena być.
Šulerskej filmaj dobyłoj
Wojerecy. Hnydom dwójce su Wojerowsku kulturnu fabriku na Festiwalu sakskeho šulerskeho filma wuznamjenili. Prěnje myto dobychu šulerjo 4. lětnika dźěćaceho domu „Při Halštrowskim wobłuku “z projektom „Pućowacy złotak“. 10. lětnik Lessingoweho gymnazija dósta za swój film „Město“, kotryž je zhromadnje z kulturnej fabriku zhotowił, druhe myto.
Nowy předsyda towarstwa
Budyšin. Budyšan Andreas von Geibler je nowy předsyda towarstwa Willkommen in Bautzen. Čłonojo předsydstwa su jeho wuzwolili, po tym zo bě prěni a dotalny předsyda loni załoženeho towarstwa Sven Scheidemantel hižo w oktobrje zastojnstwo złožił. Zdobom je wón tež z towarstwa wustupił.
BVB wosom króć trjechił
Krótkopowěsće (22.11.16)
Ptača gripa so rozpřestrěwa
Drježdźany. Ptača gripa so dale rozpřestrěwa a je mjeztym saksku krajnu stolicu docpěła. Pola dźiwjeje kački, kotruž běchu mortwu při jězoru w Birkwitzu-Pratzschwitzu pola Drježdźan našli, zwěsćichu strašny wirus H5N8, kaž zamołwići z Drježdźan zdźěleja. Mjeztym zarjadowanje wěstotne pasmo nětko je tež psam a kóčkam zakazane.
Wuradźuja wo digitalizaciji
Lipsk. Drobna hospodarska struktura we wuchodnej Němskej je jedyn z hłownych zadźěwkow při dalewuwiću digitalizacije. Najwjetši dźěl swójbnych předewzaćow je z politiskich přičin w prěnjej generaciji a ma mjenje hač 20 přistajenych, zdźěli prezident Zwjazka swójbnych předewzaćelow. W Lipsku wuradźuje dźensa 250 wobdźělnikow wo nowych wuwićach w swójbnych firmach.
Hanjenje prezidenta pochłostać?
