Krótkopowěsće (27.12.16)
Chlěb město praskotakow
Berlin. Pod hesłom „Chlěb město praskotakow“ prosy ewangelski pomocny skutk Chlěb za swět wo pjenježne dary. „Z raketami a praskotakami ničo přećiwo namocy a njesprawnosći na swěće njezdokonješ“, rěka w zdźělence pomocneho skutka. Wón organizuje mjez druhim projekty přećiwo hłodej we wjace hač 90 krajach swěta, kaž zdźěla.
Ratarjam pjenjezy wupłaća
Drježdźany. Sakscy ratarjo dóstanu nětko hač do kónca lěta tak mjenowane direktne wupłaćenja. Cyłkownje 251 milionow eurow jim přewostaja. „Ratarjo maja ćežke lěto za sobu, mjez druhim mlokoweje krizy dla“, zdźěli ratarski minister Thomas Schmidt (CDU). Z pjenjezami chcedźa ratarjam pomhać, zo móhli swoje zličbowanki zapłaćić.
Mjenje płaćenych awtodróhow
Praha. Wobchadny minister Čěskeje republiki Dan Ťok wozjewi, zo wot lěta 2017 syć płaćenych awtodróhow wo něhdźe 100 kilometrow skrótša. Jedna so wosebje wo wotrězki na wobjězdkach Prahi a druhich wjetšich městow, kotrež budźe móžno bjez zapłaćeneho awtodróhoweho nalěpka wužiwać. Nowe rjadowanje ma wodźerjow jězdźidłow wolóžić.
Krótkopowěsće (23.12.16)
CD „Serbski rekwiem“ wušła
Budyšin. CD „Serbski rekwiem“ Korle Awgusta Kocora, kotruž běchu na koncertomaj chóra Lipa a solistow pod nawodom Judith Kubicec w Chrósćicach nahrawali, je wot dźensnišeho na předań. Zynkonošak předawaja w Budyskimaj Smolerjec kniharni a Serbskej kulturnej informaciji, pola Marje Hrjehorjoweje w Róžeńće, Petry Kupcyneje we Worklecach a w klóšterskim wobchodźe.
Gabriel měł zapřimnyć
Budyšin. Zapósłanc CDU w Sakskim krajnym sejmje Marko Šiman w zwisku z planowanym wottwarom dźěłowych městow pola wagonotwarca Bombardier wočakuje, zo zwjazkowy minister za hospodarstwo Sigmar Gabriel (SPD) zapřimnje. Takle móhł prócowanja sakskeho knježerstwa skutkownje podpěrać, rěka w nowinskej zdźělence Šimana. Tramwajki modernizowwali
Krótkopowěsće (22.12.16)
Njetrjebatej telko płaćić
Budyšin/Zhorjelc. Wokrjesaj Budyšin a Zhorjelc njetrjebatej w přichodnymaj lětomaj telko pjenjez regionalnemu wotpadkowemu zwjazkej Ravon přepokazać, kaž bě dotal planowane. Cyłkownje lutujetej wonej štyri miliony eurow, informuje dźensa rozhłosowy sćelak MDR. Ravon bě ze spalernju wotpadkow we Łutach nowe přijomniše zrěčenje za wokrjesaj wujednał.
Trjebaja wjace pomocnikow
Drježdźany. Přiběraceje ličby potrěbnych trjebaja sakske tafle wjace čestnohamtskich pomocnikow. Předewšěm šoferojo awtow, kotřiž žiwidła rozwožuja, su trěbni, zdźěli rěčnik krajneho zwjazka sakskich taflow. Dotal maja w kraju 1 500 čestnohamtskich pomocnikow, kotřiž zwjetša žiwidła rozdźěleja.
Zapłaći Kuba dołh z rumom?
Praha/Havanna. Kuba ma pola Čěskeje republiki hišće wot časa Čěskosłowakskeje dołh něhdźe 250 milionow eurow. Nětko je wona Čěskej njewšědny namjet činiła – mjenowany dołh z dodawanjom ruma wurunać. Wotpłaćić cyłu sumu by wjace hač 23 milionow blešow woznamjenjało. Poskitk je po cyłym swěće wulku kedźbnosć zbudźił.
Krótkopowěsće (21.12.16)
Nowa internetna strona
Choćebuz. Serbski muzej w Choćebuzu prezentuje so pod www.wendisches-museum.de z nowej internetnej stronu. Zajimcy móža so tam wo stawiznach a aktualnosćach kaž tež wo stawje twarskich dźěłow wobhonić. Planowanu nowu wustajeńcu chcedźa najzašo kónc lěta 2018 wotewrěć. Hižo wot januara je muzej saněrowanskich dźěłow dla zawrjeny.
Zamołwitaj za wjelka
Postupim. Braniborske wobswětowe ministerstwo chce dweju zamołwiteju za wjelki přistajić, kaž su na njedawnej konferency wo wjelku w Podstupimje wozjewili. Jako přičinu mjenuja dale a wjac nadpadow rubježneho zwěrjeća na domjacy skót. Zdobom chce kraj financne srědki k zarunanju škodow ratarjam a plahowarjam skotu zwyšić. W južnej Braniborskej maja 15 wjelčich črjódow.
Muzej z ćežemi
Krótkopowěsće (20.12.16)
Serbja budu pódla
Choćebuz. Uta Hentšelowa z Lubnjowa smě klětu 12. februara zwjazkoweho prezidenta Němskeje sobu wolić. To zdźěla Delnjoserbski rozhłós. Nowu nawodnicu Šule za delnjoserbsku rěč a kulturu je braniborska CDU namjetowała. Zwjazkoweho prezidenta wuzwoli 630 zapósłancow zwjazkoweho sejma a dalšich 630 wobydlerjow ze wšěch zwjazkowych krajow.
Wjace wěstoty na wikach
Drježdźany. Dohodowne wiki w Drježdźanach chcedźa po wčerawšim nadpadźe w Berlinje z přidatnymi betonowymi elementami a zawěrami zawěsćić. Te maja tomu zadźěwać, zo něchtó z awtom na wiki zajědźe, policija w sakskej krajnej stolicy připowědźi. Nimo toho chcedźa wjace wobrónjenych zastojnikow zasadźeć. (Hlej tež 2. stronu)
Wjace ludźi na raka schorje
Krótkopowěsće (19.12.16)
Přećiwo hidźe demonstrowali
Drježdźany. Wjace hač tysac ludźi je wčera w Drježdźanskim Zwingeru přećiwo hidźe na wukrajnikow demonstrowało. Při tym zasadźeše so sakska kultusowa ministerka Brunhild Kurth (CDU) za česćowny wobchad z wukrajnymi sobuwobydlerjemi najebać rěčne mjezy. Tež Drježdźanski wyši měšćanosta Dirk Hilbert (FDP) so wobdźěli.
Twarja nowy elektriski Golf
Drježdźany. W škleńčanej manufakturje awtotwarca Volkswagen w Drježdźanach přihotuja tuchwilu twar noweho elektriskeho Golfa. Spočatk januara maja so produkciske wotběhi pruwować, kaž rěčnik VW dźensa zdźěli. W aprylu potom chcedźa prěnje wozy předać. Spočatnje ma tam wšědnje 35 awtow nastać. Za to maja 300 sobudźěłaćerjow.
Brošurka rozebrana
Drježdźany. Wot sakskeho krajneho knježerstwa wudata brošurka z artiklemi wustawy w arabšćinje je nimale rozebrana. Wot prěnjeho nakłada 15 000 eksemplarow maja runje hišće tysac, informuje socialne ministerstwo w Drježdźanach. Brošurka za požadarjow azyla wobsahuje prěnje 20 artiklow Zakładneho zakonja w němčinje a arabšćinje.
Krótkopowěsće (16.12.16)
Kniha Meškanka zaso na předań
Budyšin. Za krótki čas rozpředata kniha Tima Meškanka „Sorben im Blick der Staatssicherheit. Die Akten der K 5 und des MfS der DDR 1949–1989“ je nětko w druhim nakładźe w Ludowym nakładnistwje Domowina wušła. Z knihu pomha historikar hač do dźensnišeho dnja wobstejace běłe blaki serbskeho stawiznopisa wo času NDR wuswětlić.
Njewěstosć pola Bombardiera
Zhorjelc. Njewěstosć sobudźěłaćerjow wagonotwarca Bombardier hladajo na jich dźěłowe městna traje dale. Dźěłarnistwo IG Metall njewočakuje, zo koncern hišće do hód konkretne ličby wozjewi, kelko dźěłowych městnow chce šmórnyć. W Zhorjelcu a braniborskim Henningsdorfje su dźensa přećiwo planam protestowali, wčera w Budyšinje.
Hackerojo w Sakskej aktiwni
Krótkopowěsće (15.12.16)
Wjace njeskutkow na šulach
Drježdźany. Na sakskich šulach ličba chłostajomnych njeskutkow přiběra. Tole wuchadźa z wotmołwy kultusoweje ministerki Brunhildy Kurth (CDU) na naprašowanje zapósłanče Zelenych Petry Zais. Šulske lěto 2015/16 běchu 3 010 deliktow zličili, 300 wjace hač lěto do toho. Při tym jedna so zwjetša wo padustwa, ranjenje ćěła a wobškodźenja.
Dulig z kritiskim posudkom
Drježdźany. Naměstnik ministerskeho prezidenta Sakskeje Martin Dulig (SPD) posudźuje kritisce wšelake wuwića w swobodnym staće. „Je so tak dołho lutowało, doniž njeje stat hranicu swojeje jednanjakmanosće docpěł. Kraj je přemało wučerjow přistajił a přemało policistow wukubłał“, rjekny Dulig na etatowej debaće w krajnym sejmje.
1,5 milionow wopytowarjow
Drježdźany. Tež mjeztym 582. dohodowne wiki w Drježdźanach wopokazuja so jako wulki magnet. Po trochowanju měšćanskeho zarjadnistwa je dotal něhdźe 1,5 milionow wopytowarjow přišło. Při tym knježeše předewšěm kónc tydźenja wulka tołkańca. Hišće hač do patoržicy tam 233 wikowarjow swoje twory a posłužby poskićuje.
Krótkopowěsće (14.12.16)
Pjenjezy za sakske šule
Berlin/Drježdźany. Zwjazkowe knježerstwo je so dźensa w Berlinje na změnu financneho zrěčenja mjez krajemi a Zwjazkom dojednało. Zapřijaty do toho je tež program wo modernizowanju šulow. Tak móže Zwjazk přichodnje do kubłanišćow w gmejnach inwestować, kotrež nimaja trěbne pjenjezy. Dóńdźe-li k doskónčnemu rozsudej wo změnje, móže Sakska hižo klětu wot lěća 175 milionow eurow za šule nałožić.
Swobodny stat dale inwestuje
Drježdźany. Swobodny stat Sakska chce saněrowanje třoch šulow w Budyskim wokrjesu z cyłkownje 454 000 eurami podpěrać. Wjeselić móža so we Łutach, Zemicach-Tumicach a Radebergu. Tole zdźěli dźensa socialne ministerstwo w Drježdźanach. Pjenjezy su z inwesticiskeho programa „Mosty do přichoda“, z kotrymž hižo wot lěta 1990 infrastrukturne projekty spěchuja.
Dwórnišćowy mision 25 lět
Krótkopowěsće (13.12.16)
Do zastojnstwa powołanej
Budyšin. Za nowu nawodnicu nutřkowneho serwisa krajnoradneho zarjada powoła Budyski wokrjesny sejmik wčera Franzisku Snelinski. Nowa hłownohamtska społnomócnjena za runostajenje wokrjesa budźe Ina Körner. Wona naslěduje Heidemarie Tröger, kotraž so kónc lěta na wuměnk poda.
Zhromadne powětrowe mocy
Praha/Bratislava. Čěska republika a Słowakska planujetej zhromadne zakitowanje powětroweho ruma. We wobłuku NATO unikatny projekt měł čěskim a słowakskim honjakam zmóžnić, tež nad teritorijom tamneho kraja lětać a jeho lětanišća abo kubłanske bazy wužiwać. W padźe potrjeby móhli sej tak powětrowe mocy wobeju krajow pomhać.
Azylowy dom nadpadnyć chcyli
