Krótkopowěsće (09.02.18)
Narok na status ćěkanca
Budyšin. Ćěkancy ze Syriskeje, kotřiž su ze swojim ćěknjenjom wojersku słužbu abo rezerwowu wojersku słužbu zapowědźeli, maja prawo na spožčenje statusa ćěkanca. To je 5. senat Sakskeho wyšeho zarjadniskeho sudnistwa wčera w Budyšinje we wjacorych padach rozsudźiło. Skóržbnikam bě Zwjazkowy zarjad za migraciju a ćěkancow drje subsidiarny škit připóznał. Wyši škit jako ćěkanc pak bě pobrachowacych wuměnjenjow za to dla wotpokazał.
Křižerjo po nowym mosće
Pančicy-Kukow. Klóšterski a Chróšćanski křižerski procesion móžetej lětsa jutry nowy móst nad Klóšterskej wodu w Pančicach-Kukowje wužiwać. Tole je zastupjer krajneho zarjada za dróhotwar a wobchad wobkrućił, kaž wjesnjanosta Markus Kreuz (CDU) na wčerawšim posedźenju gmejnskeje rady zdźěli. Móst pak budźe jeničce za křižerjow wužiwajomny, za pěškow nic.
Ze słóncom do prózdnin
Krótkopowěsće (08.02.18)
Wo lajskeho sudnika so požadać
Budyšin. Za chłóstanske a młodźinske komory na hamtskich a krajnych sudnistwach w Hornjej Łužicy kaž w cyłej Sakskej přisydnikow pytaja. Wobydlerjo w starobje wot 25 do 70 lět, kotřiž so za to zajimuja, móža so hač do 30. junija wo tele čestnohamtske zastojnstwo požadać. Sakske ministerstwo justicy z toho wuchadźa, zo trjebaja za 2019 zahajacu so hamtsku dobu 4 000 lajskich sudnikow.
Najlěpše naćiski wustajane
Choćebuz. Mytowane naćiski za wuhotowanje „Přistawoweho kwartěra Choćebuz“ při nastawacym wuchodnym jězoru sewjernje Choćebuza móžeš sej hišće hač do kónca měsaca w radnicy při Nowych wikach wobhladać. We wobłuku planowanskeho wubědźowanja bě jury pod nawodom prof. Heinza Naglera dźěła pjeć planowanskich a architekturnych běrowow wuzwoliła.
Slědźić wo domiznje
Krótkopowěsće (07.02.18)
Za nowu sprawnosć premiera
Wochozy/Drježdźany. Sakski ministerski prezident Michael Kretschmer (CDU) je dźensa Wochožansku jamu koncerna LEAG wopytał. W tym zwisku wočakuje frakcija Zelenych w krajnym sejmje nowu sprawnosć premiera nastupajo energijowu a klimowu politiku. „Tak ma wón tež zamołwitosć za nastaty časowy ćišć při trěbnej strukturnej změnje přewzać“, žada sej energijowopolitiski rěčnik frakcije dr. Gerd Lippold.
Kniha nětko tež jendźelskorěčna
Austin. Składnostnje reformaciskeho jubileja loni w Ludowym nakładnistwje Domowina wot Jana Malinka wudata kniha „Pjeć lětstotkow – Serbja a reformacija“ předleži nětko tež w jendźelšćinje. Starałoj stej so wo to Concordia University Press a The Wendish Press. Projekt nastorčił bě David Zersen a je předsłowo jendźelskeho wudaća spisał.
Wulki wuspěch za hudźbnikow
Krótkopowěsće (06.02.18)
Zakituje třělenje wjelkow
Düsseldorf. Naprawy móžneje noweje wulkeje koalicije k třělenju wjelkow městopředsydka CDU Julia Klöckner dźensa w nowinje Rheinische Post zakituje. „We wobchadźenju z wjelkom ma wěstota ludźi najwyšu prioritu. Chcemy, zo so wjelki, kotrež su płoty pastwow přeskočili a ludźom strach načinjeja, wurisaja.“ Wona měni, zo maja so tajke zwěrjata morić.
Zwisk do Zieloneje Góry steji
Zhorjelc. Zielona Góra je dalše město w Pólskej, kotrež móžeš wot minjeneje soboty ze Zhorjelca z ćahom docpěć. Direktny zwisk „Polregio“ wobsteji wšědnje trójce w 9.07, 11.07 a 17.07 hodź. do Zieloneje Góry a wottam w 7.41, 13.44 a 15.45 hodź. Jězba traje něhdźe dwě a poł hodźiny. Předewzaće Länderbahn je nowy zwisk z partnerom Przewozy Regionalne dojednało.
Chcedźa komunikaciju polěpšić
Krótkopowěsće (05.02.18)
Wjace filmow na festiwalu
Zhorjelc. Za lětuši 15. nysowy filmowy festiwal, kotryž wotměje so mjezu překročacy wot 15. do 20. meje w třikrajowym róžku, su wjace hač 600 přinoškow – něhdźe 60 wjace hač loni – zapodali. Wosebity fokus leži na paskach z Pólskeje, kotrež njejsu tam kritiskeho wobsaha dla zjawnje spěchowali.
Urban nowy šef sakskeje AfD
Wojerecy. Nowy krajny předsyda sakskeje AfD je Jörg Urban, zdobom předsyda frakcije strony w Sakskim krajnym sejmje. Delegaća kónctydźenskeho zjězda we Wojerecach su jeho do zastojnstwa wuzwolili, po tym zo bě dotalna předsydka Frauke Petry loni w septembru ze strony wustupiła. Urban chcył, zo stanje so AfD při wólbach krajneho sejma 2019 z najsylnišej politiskej mocu kraja.
Angažement za přirodowědu
Krótkopowěsće (02.02.18)
Dalše koło na dobro wsow
Drježdźany. Třeću namołwu „Witalne wjesne jadra a městne srjedźišća we wjesnym rumje“ je sakske ministerstwo za wobswět a ratarstwo dźensa startowało. Z programom podpěruja projekty, wusměrjene na wuwiće wsow, a wudospołnjeja prócowanja we wobłuku regionalneho wuwića Leader. Za lěto 2018 přewostaja Sakska 15 milionow eurow spěchowanskich srědkow.
Nowa železniska karta
Budyšin. Aktualizowana kompaktna karta „Železnicy w Sakskej“ dawa přehlad wo wšěch železniskich čarach w swobodnym staće kaž tež informacije wo tarifach a móžnosće, kontakt nawjazać. Ćišćenku poskićeja wotnětka we wšěch wobchadnych zwjazkach Sakskeje, w ćahach a serwisowych zarjadnišćach, zdźěli dźensa Zaměrowy wobchadny zwjazk Hornja Łužica-Delnja Šleska ZVON.
Hódančko pječa rozłušćene
Krótkopowěsće (01.02.18)
Minority SafePack podpisałoj
Podstupim. Statnej sekretarce w braniborskim knježerstwje Anne Quart a Daniela Trochowski stej wčera iniciatiwu Minority SafePack podpisałoj. „Hdyž rěč a kulturu mjeńšin njewobchowamy, wostanje europska identita abstraktna“, rjekny europska statna sekretarka Anne Quart. Jako čłonka rady Załožby za serbski lud je Daniela Trochowski Braniborčanow namołwiła, iniciatiwu ze swojim podpismom podpěrać.
Roman wo Zejlerju předstajeny
Bogatynia. Knižna premjera druheho romana z historiskeho „serbskeho cyklusa“ Bogatyńskeje spisowaćelki Haliny Barań wotmě so wčera w měšćanskej bibliotece Bogatynje. Angažowana awtorka z wuchodneje Łužicy předstaja w knize „Switanje“ na 200 stronach žiwjenje a tworjenje Handrija Zejlerja, po tym zo bě hižo lěta 2015 biografisku knihu wo Korli Awgusće Kocoru wudała.
Embargo sportowcow zběhnyli
Krótkopowěsće (31.01.18)
Bjezdźěłnosć postupiła
Budyšin. We wuchodnej Sakskej bě w januaru 22 010 bjezdźěłnych, 1 954 wjace hač loni w decembrje (+ 9,7 procentow) a 3 248 mjenje hač před lětom (- 12,9 procentow). Wuwiće wotbłyšćuje sezonalne efekty, wosebje we wot wjedra wotwisnych powołanjach. Nimo toho wuběžachu wobmjezowane dźěłowe městna kónc lěta, rjekny Thomas Bernd, předsyda jednaćelstwa Budyskeje agentury za dźěło.
Žadaja sej dale wutwar A4
Budyšin/Drježdźany. Wobchad na awtodróze A4 mjez Drježdźanami a Zhorjelcom je zašłej lěće wo dźesać procentow přiběrał a dale stupa. To wujewja statistika posudźowarja, kotruž je Alianca hornjołužiskich politikarjow tele dny w Drježdźanach předstajiła. Loni bě čaru cyłkownje 45 000 jězdźidłow wob dźeń wužiwało. Politikarjo wokoło zapósłanca Sakskeho krajneho sejma Marka Šimana (CDU) žadaja sej tuž dale wutwar A4 na šěsć čarow.
Serbšćina njezastupjena
Krótkopowěsće (30.01.18)
Dalše myto za serbski film
Bochum. Film „Zmij (Der Drache)“ Angele Schuster je zašły tydźeń juryjowe myto wubědźowanja krótkofilmow „Linse“ 2018 Bochumskeje uniwersity dobył. Mjez druhim stej „wosobinske rozestajenje filmowče ze swojej zańdźenosću“ a „přeće, zachować kulturny pochad“, jurorow přeswědčiłoj, kaž we wopodstatnjenju rěka. Wojerowčanka Schuster zaběra so w filmje ze zachowanjom serbskosće. Zapřijate su tež serbske pasaže, kotrež rěči Celina Šołćic z delnich Sulšec.
Dobry wunošk z błyskanja
Wojerecy. Wjac hač 120 000 eurow je město Wojerecy loni z błyskanjom zasłužiło. Stacionarne błyskače wunjesechu 75 000 eurow, mobilne 46 000. Kaž Sächsische Zeitung rozprawja, běštej błyskačej na Drježdźanskej a Kulowskej dróze w Němcach najwunošnišej. Na Drježdźanskej su dohromady 1 125 přespěšnych šoferow błysknyli, na Kulowskej 1 529.
Planuja domizniski swjedźeń
Krótkopowěsće (29.01.18)
Serbja na wikach zastupjeni
Berlin/Drježdźany. Smjerdźečanska rejwanska skupina je pjatk a sobotu na Zelenym tydźenju w Berlinje wurězki ze swojeho aktualneho programa předstajiła. Prěni króć hudźiła je na wikach wčera dujerska kapała Horjany. Tež na pućowanskich wikach kónc tydźenja w Drježdźanach běchu Serbja prezentni. Nimo města Budyšina poskićeše tam pčołar Jan Šołta z Konjec swoje wudźěłki.
Přichod wosady rozjimać
Choćebuz. Dźěłowa skupina Serbska namša a předsydstwo towarstwa Serbska rěč w cyrkwi chcetej přichod serbskeje wosady na wosebitym zetkanju w aprylu w Korjenju rozjimać. Njedawno stej předewzaća lěta 2018 tematizowałoj. 17. junija chcedźa pólsko-serbske kemše w Žarojwe k 300lětnemu wudaću serbskorěčneho katechizma wuhotować.
Přetwarja łubju dwórnišća
