Krótkopowěsće (11.01.19)
Jězor bórze zaso přistupny
Rań. Złokomorowski jězor ma wot 1. apryla ludźom zaso přistupny być. To zdźěli Łužiska a srjedźoněmska towaršnosć hórnistwoweho zarjadnistwa wčera nowinarjam w Ranju. Po zesunjenju zemje na mjeńšej kupje loni w septembru běchu zamołwići jězor nachwilnje zawrěli. Kupa njeje přirodoškitnych přičin dla za zjawnosć přistupna.
Železnica zaso po planje jězdźi
Mnichow. Wobchad na železniskimaj čaromaj Drježdźany–Zhorjelc a Biskopicy–Žitawa zaso po planje běži. Wo tym informuje towaršnosć Krajne ćahi – Regentalbahn, wobhospodarjer transportneho předewzaća Trilex, na swojej internetnej stronje. Wjedrowych přičin dla su wčera wjacore jězby dospołnje wupadnyli, nimo toho dóńdźe k mnohim zapozdźenjam.
Ze zawdawkom přezjedni
Krótkopowěsće (10.01.19)
Flashmob w interneće přistupny
Budyšin. Serbski flashmob w Budyskim Centeru na Žitnych wikach móža sej zajimcy nětko pod www.youtube.com/watch?v=h8z0QIFn3Ak wobhladać. Widejo natočił je Sakski wukubłanski a wupruwowanski kanal. Dotal je sej tam filmčk nimale 2 200 ludźi wobhladało. Wutoru bě něhdźe 30 Serbow mjenje abo bóle spontanje serbski postrow na njewšědne wašnje do noweho lěto słało.
Za wjac fachowcow we wokrjesu
Zhorjelc. Regionalna fachowa alianca Zhorjelskeho wokrjesa namołwja zajimcow tež lětsa projekty za zdobyće a zawěsćenje fachowcow zapodać. Tak móhli komuny abo dalši nošerjo, kaž na přikład zhromadźenstwa, swoje naprawy pomjenować, kotrež chcyli lětsa we wokrjesu zwoprawdźić. Srědki pak maja hač do 31. decembra za projekty wužiwać.
Spěchuja přetwar kapałki
Krótkopowěsće (09.01.19)
Na olympiadu geografije
Drježdźany. Dźesatkarjej Wilhelm Lehmann, Wyša šula Bukecy, a Danny Baum, Wyša šula Łaz, kaž tež šuler 7. lětnika Leon Schwabe, Swobodna křesćanska šula Šěrachow, su mjez 30 wobdźělnikami finala 13. sakskeje olympiady w předmjeće geografija jutře w Drježdźanach. Cyłkownje 17 376 šulerjow z 211 wyšich šulow so na štyrischodźenkowym wurisanju wubědźuje.
Na kromje słónčneho systema
Houston. Swětnišćowa sonda New Horizons je minjene dny wot słónca najzdaleniši znaty objekt našeho systema „Ultima Thule“ přepytowała. Nětko wuhódnoćeja wědomostnicy Uniwersity Johns Hopkins daty, kotrež wulkeje distancy dla hakle jutře dospołnje dóńdu. Prěnje wobrazy we wulkim rozpušćenju je agentura NASA hižo wozjewiła.
Huawei haj abo nic?
Krótkopowěsće (08.01.19)
Kretschmer načolny kandidat
Drježdźany. Krajne předsydstwo CDU Sakskeje je ministerskeho prezidenta Michaela Kretschmera za načolneho kandidata k lětušim wólbam krajneho sejma 1. septembra nominowało. To zdźěli rěčnik krajneho předsydstwa wčera wječor. „Michael Kretschmer je Sakskej minjene lěto nowy rozmach spožčił“, wuzběhny generalny sekretar sakskeje unije Alexander Dierks.
Cyrkwje wušo hromadźe dźěłatej
Drježdźany. Wučba nabožiny w Sakskej nima so w přichodźe jenož jako ewangelska abo katolska, ale tež „konfesionelnje kooperatiwnje“ podawać. Krajny biskop Carsten Rentzing a Drježdźansko-Mišnjanski biskop Heinrich Timmerevers mjenowaštaj to wčera w Drježdźanach nowu formu zhromadneho dźěła, kotruž chcedźa w šulskim lěće 2020/ 2021 na třoch abo štyrjoch modelowych kubłanišćach startować.
Zahaji turu w Kufa
Krótkopowěsće (07.01.19)
Minister wopisma přepodał
Drježdźany. Sakski statny minister za kultus Christian Piwarz (CDU) je dźensa zhromadnje z prezidentom Krajneho zarjada za šulu a kubłanje (LaSuB) Ralfom Bergerom prěnje zastojnske wopisma 75 sakskim wučerjam a wučerkam w rumnosćach ministerstwa přepodał. Mjez nimi je wosom z wobłuka LaSuB Budyšin.
Lětuša tema su „korjenje“
Zhorjelc. Na třeće Mjezynarodne Messiaenske dny Zhorjelc/Zgorzelec přeprošuje towarstwo Meetingpoint Music Messian wot 11. do 15. januara. Festiwal zaběra so na wuměłskej runinje z wosebitym wokomikom regionalnych stawi- znow a wěnuje so tónraz temje „korjenje“. Lětuše wodźace prašenja su: Štó smy? Zwotkel pochadźamy? Dokal dźemy?
Dobyćerski hosćenc je z Łutow
Krótkopowěsće (04.01.19)
Přećiwo dawkej na transakcije
Drježdźany. Sakski financny minister Matthias Haß (CDU) dawk na financne transakcije wotpokazuje. „Ideja, tak pola bankow kasěrować, daloko dosć njesaha. Na kóncu dadźa sej to banki wot swojich klientow zapłaćić“, rjekny 51lětny powěsćerni dpa w Drježdźanach. Wotpohlad dawka bě, spekulacijam zadźěwać a tak financne wiki stabilizować, ale tež přidatne dochody docpěć.
Nowa krajej zwjazowaca linija
Wojerecy. Wot 1. januara płaći za busowu liniju mjez Choćebuzom a Wojerecami nowy jězbny plan. Z přidatnymi jězbami a lěpšimi přizamknjenjemi je linija prěni nadregionalny a dwaj zwjazkowej krajej zwjazowacy PlusBus w Němskej. Linija 800 jězdźi wšědnje kóždu hodźinu. Po sobotach, njedźelach a swjatych dnjach poskićeja do kóždeho směra šěsć jězbow w dwuhodźinskim takće.
Češa do němskeho wójska?
Krótkopowěsće (03.01.19)
Wusyłać njemóhli
Budyšin. Serbski rozhłós njemóžeše dźensa rano swój zwučeny program wusyłać. Přičina bě techniski problem eksterneho poskićowarja syće. Wot toho potrjechene běchu tohorunja němske regionalne powěsće z Budyšina. Hač do kónca redakciskeho časa zamołwići studija z toho wuchadźachu, zo móža jutře rano zaso w zwučenym času serbsce kaž němsce wusyłać.
Na ćěmnym boku měsačka
Peking. Prěni raz je swětnišćowa sonda na zemi wotwobroćenym boku měsačka wuspěšnje přizemiła. Wědomostny projekt chinskeje agentury CNSA „Chang’e 4“ wopřijima mjez druhim na Uniwersiće Kiel wuwity wosebity detektor neutronow. Prěnje wobrazy a daty su dźensa rano dóšli, kaž chinska statna powěsćernja Xinhua zdźěla.
Kulturnikow we wukraju škitać
Krótkopowěsće (02.01.19)
Kwisowu app rozšěrja
Budyšin. Skupina Serbska murja chce aplikaciju QuizSerb, kotruž běchu na lońšej schadźowance předstajili, rozšěrić. To rozprawja Radijo Satkula. Wjace hač 300 ludźi je sej app hižo instalowało. Hra z wjace hač tysac prašenjemi bu w nadawku Załožby za serbski lud wuwita. Nětko prosy Serbska murja wo dalše prašenja abo namjety, app polěpšić.
Pjenjezy za projekty
Drježdźany. Sakske ministerstwo za hospodarstwo, dźěło a wobchad chce lětsa a klětu nawabjenje fachowcow financielnje dale a sylnišo podpěrać. Za to chce ministerstwo wokrjesam a bjezwokrjesnym městam w tak mjenowanych regionalnych budgetach na lěto 4,55 milionow eurow přewostajić. Z toho profituje mjez druhim tež Budyski projekt „Wukubłanje z napjećom“.
Dresuru zwěrjatow zakazać?
Krótkopowěsće (28.12.18)
Angažement za FUEN skónčiła
Flensburg. Susann Šenkec skónči po dźesaćlětnym profesionelnym angažemenće za FUEN, naposledk jako amtěrowaca generalna sekretarka, swoju dźěławosć za europsku mjeńšinowu organizaciju. To stej Federalistiska unija europskich narodnych mjeńšin a Susann Šenkec dźensa w Flensburgu wozjewiłoj. Tehdyši prezident prof. Hans Heinrich Hansen bě Serbowku w lěće 2008 do centrale organizacije powował.
Serbski Sokoł znowa załoženy
Hórki. Dźensa před 25 lětami, 28. decembra 1993, su w Młynkec hosćencu w Hórkach Serbski Sokoł, třěšny zwjazk serbskich sportowčow a sportowcow, znowa załožili. Do noweho předsydstwa wuzwolichu Michaelu Mošowu jako starostku, za městostarostu Achima Kowarja, Pětra Šołtu za jednaćela, Pawoła Hejdušku za pokładnika a Mikławša Krawca za rěčnika a redaktora Sokołskich Listow.
Wučerjo stanu so zastojnicy
Krótkopowěsće (27.12.18)
Nowe towarstwo Škit
Hrubjelčicy. Nowe serbske towarstwo Škit je so 4. adwent w Hrubjelčicach załožiło. 16 sobustawow je Roberta Krawca za předsydu wuzwoliło. Čłonojo towarstwa chcedźa serbske wuměłstwo, hudźbu a rěč škitać a podpěrać kaž tež digitalne poskitki za skrućenje identity našeho ludu rozšěrić. Wotpohladuja so wo status zapisaneho towarstwa prócować.
Twarić w Sakskej dźeń a dróše
Kamjenc. Štóž chce w Sakskej twarić, ma za to dźeń a wjace pjenjezy nałožić. Kaž Statistiski krajny zarjad w Kamjencu dźensa zdźěla, su w přerězku lěta twarske kóšty za bydlenske twarjenje wo 5,4 procenty přiběrali. Porjeńšace reparatury w jednym bydlenju so wo 6,2 procentaj, naprawy k zwuporjedźenju na bydlenskich twarjenjach wo 6,1 procent podróšachu.
Pytaja za čěskej symboliku
