Krótkopowěsće (09.04.19)
Wupisaja znowa myće
Budyšin. Maćica Serbska wupisa znowa dorostowe myto za Hornju kaž tež za Delnju Łužicu. To je předsydstwo towarstwa wčera wobzamknyło. Wopisanje mytow přichodne dny šulam a dalšim kubłanišćam rozesćelu a internetnje spřistupnja. Dale gremij wobžaruje, zo njejsu delegaća hłowneje zhromadźizny Domowiny kónc měrca namjet Maćicy přiwzali, zdźěłać analyzu a koncept wo přichodźe Budyskeho Serbskeho domu.
Pruwowanja zahajene
Budyšin/Drježdźany. Za nimale 11 000 maturantow w Sakskej je so wčera čas pruwowanjow zahajił. Jako prěnje běchu woni w předmjeće geografija wužadani. Na Budyskim Serbskim gymnaziju maja 74 maturantow. Pruwowanje w serbšćinje – w njej da so lětsa 13 dwanatkarjow pisomnje a 20 ertnje pruwować – budźe 30. apryla. Wot 7. do 27. meje budu po wšej Sakskej ertne pruwowanja.
Muzej čěsko-němskich poćahow
Krótkopowěsće (08.04.19)
Olympiada serbšćiny zahajena
Wodowe Hendrichecy. Třidnjowsku 53. centralnu olympiadu serbskeje rěče su dźensa we Wodowych Hendrichecach zahajili. Wo najlěpše wukony w serbšćinje wubědźuje so 38 šulerjow a šulerkow 6. lětnika z Delnjeje a 61 z Hornjeje Łužicy, kaž zarjadowar Serbske šulske towarstwo zdźěla. Po zazběhu z lěsnym dyrdomdejom maja serbšćinarjo jutře swoju wědu dopokazać.
Detlefa Kobjelu wopominali
Budyšin. Serbski komponist a hudźbny wědomostnik Detlef Kobjela by wčera 75. narodniny swjećił. Zastupjerjo Towaršnosće k spěchowanju Serbskeho ludoweho ansambla su na row loni zemrěteho na Budyskim Tuchorju kwěćel połožili a spominachu mjez druhim na jeho skutkowanje za SLA jako hudźbny šefdramaturg a prěni intendant po towaršnostnym přewróće.
Sćerpni a stražliwi być
Krótkopowěsće (05.04.19)
Rekordne festiwalowe myta
Großhennersdorf. Filmowy festiwal Nysa spožči lětsa přidatne myto. Za najlěpši scenarij je starosta Liberecskeho kraja Martin Půta 1 000 eurow přilubił. Hódnota nětko dźesać „Rybičkow“ je wo dohromady 9 000 na 21 000 eurow stupała. Prěni lawreat je hižo jasny. Pólskeho režisera Jana Nowickeho wuznamjenja 11. meje w Zgorzelecskim Domje kultury z čestnym mytom festiwala.
Rozprawa ma respektowana być
Grodk. Wosom wobdźělnikow komisije za rozrost, strukturnu změnu a dźěło, mjez nimi Grodkowska měšćanostka Christine Herntier (njestronjanka), je so spočatk apryla w lisće na knježerstwa Zwjazka a wuhlowych krajow wobroćiło. Wotpósłarjow jednoći starosć, zo so wobsah rozprawy mjenowaneje komisije dospołnje njezwoprawdźi.
Nasyp saněrowany
Krótkopowěsće (04.04.19)
Wjace přemysłow wotzjewjenych
Kamjenc. Loni su w Sakskej znowa wjace přemysłow wot- hač přizjewili. Porno 26 741 přizjewjenjam mějachu 28 663 wotzjewjenjow. To zdźěla Kamjenski krajny zarjad za statistiku. Saldo wučinja minus 1 922. W lěće 2017 bě 1 750 wotzjewjenjow wjace hač přizjewjenjow. Přičina za nimale 83 procentow wotzjewjenych přemysłow bě złoženje wobchodniskich aktiwitow.
Přećiwo spěšnosći 30 km/h
Choćebuz. Předewzaćeljo w měsće Choćebuz wuprajeja so přećiwo spěšnosći 30 km/h a přećiwo zawrjenju Stareho torhošća. Wo wuslědku swójskeho naprašowanja je Choćebuska Industrijna a wikowanska komora dźensa informowała. Z naprašowanych 1 500 firmow je 733 wotmołwiło. 81 procentow z nich wobmjezowanu spěšnosć 30 km/h wotpokazuje.
Hnydomny program wuhla dla
Krótkopowěsće (03.04.19)
Myto Astrid Lindgren spožčene
Stockholm. Belgisko-flamski spisowaćel Bart Moeyaert je lawreat lětušeho Myta Astrid Lindgren za dźěćacu a młodźinsku literaturu. To zdźěla Šwedska rada wuměłstwa. Najwuznamniše myto toho razu je ze 490 000 eurami dotěrowane. Mjez dohromady 246 kandidatami běštaj tež čěski ilustrator Petr Nikl a němski awtor Janosch (Horst Eckert).
Wšitke městna wobsadźene
Budyšin. Za kubłansku wuprawu wuměnkarjow Serbskeho šulskeho towarstwa wot 5. do 9. meje do Wendlanda bě za krótki čas wšitkich 44 městnow wobsadźene. Kurator Choćebuskeho Serbskeho muzeja Werner Měškank je zestajał program „Na slědach słowjanskich stawiznow we Wendlandźe“. Tamniše towarstwa a měšćanosta Łuchowa (Lüchow) Manfred Liebhaber wočakuja hosći z wosebitym programom.
Šiman: Spěšnje jednać
Krótkopowěsće (02.04.19)
Štyrceći přidatnych městnow
Drježdźany. Wulkeho naprašowanja dla rozšěri sakske ministerstwo za kultus ličbu městnow za „dobrowólne socialne lěto pedagogika“ na šulach wo 40. Tak móže 200 dobrowólnikow w šulskim lěće 2019/2020 přepruwować, hač je wučerstwo jim hodźaca so powołanska perspektiwa. 1 000 sakskich šulow je na dobrowólnikach zajimowanych. Požadać so je hišće hač do 30. apryla móžno.
Wuslědki w syći přistupne
Budyšin. Dokumentacija wuslědkow lońšeho naprašowanja Domowiny je digitalnje přistupna. Zajimcy namakaja ju na internetnej stronje Domowiny w mediatece pod https://www.domowina.de/ fileadmin/Assets/Domowina/Mediathek /Nasa_Domowina/NasaDomowina_2019_01.pdf. Wobdźělnicy 19. hłowneje zhromadźizny Domowiny dóstachu wuslědki w ćišćanej formje.
Wojerowscy šulerjo mytowani
Krótkopowěsće (01.04.19)
Kolba so na wuměnk podał
Zły Komorow. Prokurist Łužiskeje a srjedźoněmskeje towaršnosće hórnistwoweho zarjadnistwa (LMBV), kotraž zamołwja tež saněrowanje we Łužicy, Manfred Kolba je so kónc měrca na wuměnk podał. Na jeho městnje skutkuje wot dźensnišeho Gerd Richter, kiž je sam mnohe lěta w brunicowych jamach dźěłał. Naposledk nawjedowaše pola LMBV wobłuk projektneho managementa wuchodneje Sakskeje.
Požadaja so wo titul UNESCO
Podstupim. Podstupim chce so wo titul „Filmowe město UNESCO“ požadać, kaž wyši měšćanosta Mike Schubert (SPD) připowědźi. Podstupim by tak prěnje „UNESCO-kreatiwne město filma“ było. Wšako ma na tym polu dobru infrastrukturu, kwalifikowany personal a wulki spektrum móžnosćow. Filmowe studijo w Babelsbergu wobsteji wot lěta 1912.
Łobjo połne mikroplasty
Krótkopowěsće (29.03.19)
Wo ewaluaciji jutře njerěča
Budyšin. Wuslědki ewaluacije serbskeje wučby w Delnjej Łužicy njebudu předmjet přednoška na jutřišej hłownej zhromadźiznje Domowiny w Chrósćicach. Namjetowany dnjowy porjad z časowych přičin dźesać- do pjatnaćemjeńšinske wuwjedźenja wo mjenowanej temje njedowola, kaž bě wot referentki a ze stron Domowiny zhonić.
Srědki serbskimaj šulomaj
Drježdźany. Šula Ćišinskeho w Pančicach-Kukowje a wyša šula Ralbicy profitujetej z fondsa k zawěsćenju přichoda, za kotryž je etatowy a financny wuběrk Sakskeho krajneho sejma cyłkownje 26 milionow eurow přizwolił. Kaž serbski zapósłanc Alojs Mikławšk (CDU) zdźěli, dóstanje Pančičanske kubłanišćo 569 000 eurow za wohnjo- a wěstotnotechniske naprawy, Ralbičanske 77 000 eurow za zatwar lifta jako bjezbarjerny přistup.
Towarstwo wuznamjenjene
Krótkopowěsće (28.03.19)
Z rozsudom njepřezjedni
Choćebuz. Ćahańca wo wobdźělenju Serbskeje wubranki na europeadźe 2020 pola Słowjencow w Awstriskej njepřestawa. Towarstwo Serbske koparje njeje přezjedne z rozsudom Zwjazkoweho předsydstwa Domowiny, měšane mustwo z Hornjeje a Delnjeje Łužicy na turněr słać. Předsydstwo župy Delnja Łužica wočakuje tuž na sobotnej hłownej zhromadźiznje třěšneho zwjazka stejišćo w naležnosći, wčera w Choćebuzu wobzamknychu.
Nowy dwurěčny zapis mjenow
Podstupim. Wot wčerawšeho předleži nowy dwurěčny zapis mjenow komunow a wjesnych dźělow braniborskeho serbskeho sydlenskeho ruma. Kaž zdźěli referent braniborskeje knježerstwoweje społnomócnjeneje za naležnosće Serbow Měto Nowak, su Serbski institut, braniborske ministerstwo za wědomosć, slědźenje a kulturu a dalši pjeć lět na nim dźěłali. Publikaciju je Kraj Braniborska financował.
Dóstanje Čěska lěpši přistaw?
Krótkopowěsće (27.03.19)
W Praze přednošowała
Praha. Trudla Malinkowa je wčera čłonam Towarstwa přećelow Serbow (SPL) w Serbskim seminarje w Praze wo serbskich wupućowarjach do Awstralskeje přednošowała. Přitomni su z wulkim zajimom faktografiskej liniji wuwjedźenjow sćěhowali, ale tež bohatej wobrazowej dokumentaciji. Wjetšinu tych je awtorka na swojim pućowanju na slědach serbskich eksulantow zhotowiła.
Zaběraja so ze Serbami
Budyšin. Šulerjo wyšich schodźenkow Friedricha Schilleroweho gymnazija w Pirnje rozestajeja so tuchwilu intensiwnje ze Serbami w změnje časow. Wčera běchu w Budyšinje, hdźež wopytachu Serbski muzej a Rěčny centrum Witaj. Mjez druhim informowachu so wo serbskorěčnym kubłanju. Dale su sej serbske wokable wobhladali, serbsce čitali a spěwali.
Zběraja daty fawny a biotopow
