Krótkopowěsće (05.08.26)
Milina wupadnyła
Dźensa rano krótko po wosmich běchu wjacore wsy zarjadniskeho zwjazka Při Klóšterskej wodźe nachwilnje bjez miliny. Po informacijach SachsenEnergie traješe wupad jenož dźesać mjeńšinow. Dohromady bě wjace hač 2000 domjacnosćow potrjechenych. Přičina běše zmylk w přepinarni (Umspannwerk) w Kamjencu.
Nowy wobsedźer fabriki
Hnašecy. Čěske předewzaće Czechoslovak Group (CSG) je w Hnašecach fabriku za rozbuchliny wot firmy Maxam přewzało. CSG chce tam spočatnje nitroglycerin produkować, perspektiwisce tež municiju. Za to inwestuja sto milionow eurow a zarjaduja něhdźe 125 dźěłowych městnow. CSG je čěski brónjenski koncern ze sydłom w Praze.
Bórze kmańša mobilna syć
Njebjelčicy. Po dźewjeć lětach je Telekom w Njebjelčicach městnosć našła, hdźež hodźi so antena za mobilnu telefonowu syć nastajić. Kaž Telekom zdźěli, chcedźa na ležownosći kormjernje rancow techniku za 4G a 5G instalować. Z tym ma so špatna syć w Njebjelčicach a wokolinje polěpšić. Hdy so twar zahaji, njeje hišće jasne. Aktualnje so wo wšitke dowolnosće prócuja.
Krótkopowěsće (04.08.26)
Wjac hač 50 projektow zapodatych
Budyšin. 56 próstwow wo spěchowanje su zajimcy Załožbje za serbski lud hač do minjeneho pjatka zapodali. Cyłkowny wobjim projektow wučinja 2,2 milionaj eurow. Mjez zapodatymi próstwami su projekty, kotrychž nošerjo proša wo stoprocentowske spěchowanje. Tole pak móžno njeje, tuž so suma na kóncu zniži. Mjez próstwami su na přikład spěchowanje Katolskeho Posoła a za kulturneho managera.
W horće nowe žaluzije
Pančicy-Kukow/Wojerecy. W horće w Pančicach-Kukowje su nowe žaluzije instalowane a wužiwajomne. Tole zdźěli nošer zarjadnišća, Křesćansko-socialny kubłanski skutk (CSB). Dźěła w pěstowarni „Při zwěrjencu“ we Wojerecach, hdźež tučasnje horni poschod ponowja, maja kaž planowane hač do kónca awgusta wotzamknjene być.
Wutwarja přibrjóh za turistow
Krótkopowěsće (03.08.26)
20 hodźinow bjez miliny
Pěskecy. Zašły kónc tydźenja sedźachu wobydlerjo Pěskec wjacore hodźiny bjez miliny w bydlenjach. Přičina za to bě zmylk kabla, kotryž je 28 domjacnosćam swěcu a druhe elektroniske nastroje zhašał. Krótko po wozjewjenju problema w centrali podachu so sobudźěłaćerjo „SachsenNetze“ do Pěskec a pytachu hnydom za zmylkom. Hakle w nocy mějachu wobydlerjo zaso milinu.
Nowa šula za medicinu
Budyšin. 1. septembra wotewrja w Budyšinje Hornjołužisku powołansku fachowu šulu za wukubłanje šulerjow a šulerkow strowotniskich powołanjow. Šula je dźěl towarstwa Hornjołužiske kliniki tzwr (OLK). Stabilne strowotniske zastaranje wužada kwalifikowany personal, tak OLK-Chef Jörg Scharfenberg. Z hladanskej šulu spěchuja mediciniski dorost regionalnje, tak wukubłuja tam w prěnim lěće 70 žonow a mužow.
Serbsku kulturu spěchować
Krótkopowěsće (31.07.26)
Bulank njeje hižo wjesnjanosta
Njebjelčicy. Doba Andreja Bulanka jako wjesnjanosta Njebjelčic so dźensa skónči. Po štyrjoch lětach Bulank z wosobinskich přičin dočasnje wotstupi. Worklečanski wjesnjanosta Clemens Poldrak komentowaše na facebooku, „zo drje budźe Njebjelčanska gmejna ewentualnje přichodnje wnučkokmana, zmylkow z časa do Bulanka dla pak za to bankrotna“.
We Łužicy dźeń a mjenje wody
Łaz. Sakska a Braniborska chcetaj sej mjez sobu pomhać, falowacu wodu we Łužicy narunać. Na to staj so wobswětowej ministraj wobeju zwjazkoweju krajow Georg-Ludwig von Breitenbuch (CDU) a Hanka Mittelstädt (SPD) při wopyće rěčneje zawěry Łaz II dojednałoj. Mjez druhim chcetaj model dnowneje wody we Łužicy zdźěłać dać, kotryž ma rjadować, kak z wodu w regionje wobchadźeja.
Wjele dróhow zaso wotewrjenych
Krótkopowěsće (30.07.26)
Mjenje busow we wokrjesu
Budyšin. Wot přichodneho tydźenja hač do kónca lěta budźe w Budyskim wokrjesu na wjace hač 40 čarach kónc tydźenja a swjate dny mjenje busow zasadźenych. Lutowansku naprawu běše wokrjesny sejmik kónc meje wobzamknył, zo móhł porodowu staciju w Kamjenskej chorowni hač do kónca lěta financować. Přehlad zwiskow wozjewja krajnoradny zarjad online na stronje www.landkreis-bautzen.de/fahrplanaenderungen-11922.php.
Mólbu Dürera bórze restawruja
Praha. Jenož hišće něšto tydźenjow maja zajimcy składnosć, sej wołtarny wobraz „Róžowcowy swjedźeń“ Albrechta Dürera w Praze wobhladać. Mólbu z lěta 1506, kotraž je z wobstatkom zběrki Narodneje galerije, chcedźa wot septembra restawrować, štož traje něhdźe pjeć lět.
Institut na nowym kanalu
Krótkopowěsće (29.07.26)
Myto Zejlerja Rejzy Šěnowej
Drježdźany. Lětuša lawreatka Myta Zejlerja je Rejza Šěnowa. Tole je sakske ministerstwo za kulturu a turizm dźensa dopołdnja wozjewiło. Jury bě Šěnowu jeje prócowanja na polu kubłanja, přełožowanja a publicistiki dla namjetowała. Myto, kotrež je z 5000 eurami dotěrowane, spožča jej 9. septembra w Kamjencu.
Wukazaja zajeće eksplozije dla
Zhorjelc. W zwisku ze sypnjenom doma w Zhorjelcu, při kotrymž su w meji třo wobydlerjo swoje žiwjenje přisadźili, je statne rěčnistwo, kiž pad přepytuje, zajeće podhladneju wukazało.
Mužej w starobje 27 resp. 33 lět staj podhladnaj, zo staj za płunowu eksploziju zamołwitaj, kotraž je po posudku fachowcow z „nanajprawdźepodobnišej přičinu njezboža“, w zdźělence powěsćernje dpa rěka.
Kubłanišćo swj. Bena předadźa
Krótkopowěsće (28.07.26)
Serbski sejm: Prawa njedosahaja
Budyšin. Dotalne zakonske rjadowanja „njezaručeja prawo na to, zo so dźěći w serbskej rěči wuwučuja“, měnja zapósłancy Serbskeho sejma Měrćin Krawc, Aneta Zahrodnikowa a Hagen Domaška w pismje, kiž su našemu wječornikej sposrědkowali. Serbske kubłanišća su přejara wot wole statnych zarjadow wotwisne, tam rěka. Tohodla sej žadaja, zo so UNO-konwencija ILO 169 wo prawach domoródnych ludow na Serbow nałožuje.
Knihownja mytowana
Wojerecy. Biblioteka Brigitty Reimann we Wojerecach bu jako biblioteka lěta małych komunow a regionow počesćena. Ze strategiskim konceptom štyrjoch jednanskich wobłukow – demokratija, kubłanje, naslědnosć a participacija – je knihownja jurorow přeswědčiła a sej myto 7 000 eurow zawěsćiła.
E-recepty bórze tež z Němskeje
Krótkopowěsće (27.07.26)
Nowa spěchowanska perioda
Stróža. Towarstwo Hornjołužiska hola a haty startuje swoju dźewjatu projektowu namołwu spěchowanskeje periody. W horncuje něhdźe 1,5 milionow eurow za zwoprawdźenje lokalnych strategijow na dobro wuwića komunow. Spěchuja zakładne zastaranja, kaž žiwjensku kwalitu. Hač do kónca septembra móža komuny swoje planowanja zapodać.
Powaleny štom zrumowali
Lejpold. Wohnjowych wobornikow z Hórkow a Chrósćic su dźensa rano krótko do sedmich alarměrowali. Kaž nawodnica Hórčan wobornikow Juliane Suchowa zdźěli, je štom blisko małeje skały na směr Lejpold na drohu padnył. Po poł hodźinje bě štom zrumowany a droha zaso swobodna, tak Suchowa.
Do jastwa z 13 lětami?
Praha. Čěski justicny minister Jeroným Tejc chce starobnu hranicu chłostanskoprawneje zamołwitosće wot tuchwilnych 15 na 13 lět znižić. Po jeho namjeće njeje to powšitkowne zniženje – wone by jenož za najwažniše złóstnistwa a namócne chłostanske skutki płaćiło. Minister chce naprawu wot lěta 2028 zawjesć. Opoziciscy zapósłancy kaž tež dźěćacy ombudnik namjet wotpokazuja.
Krótkopowěsće (24.07.26)
Podróša jězdźenki
Budyšin. Wot 1. awgusta zaměrowy wobchadny zwjazk Wuchodna Sakska (ZVVO) płaćizny jězdźenkow wo 7,3 procenty powyši. Tole je zwjazkowa zhromadźizna na minjenym posedźenju wobzamknyła. Wot toho wuzamknjene su kubłanske a seniorowe jězdźenki, kaž tež płaćizny za šulerske skupiny a cyłoněmska jězdźenka. Stupacych kóštow za personal, energiju a ćěriwo dla je zwjazk nuzowany płaćizny zwyšić.
Spěchowanje za sakske města
Drježdźany. Štyri sakske města dóstanu lětsa wjacore miliony eurow za spěchowanje swojeje infrastruktury, mjez druhim Biskopicy a Łuty. Z něhdźe 19 milionami eurow chcedźa w Biskopicach stare město wožiwić. We Łutach inwestuja pjenjezy do pěstowarnjow a za zelenišća a pućiki, kotrež chcedźa ponowić.
Čěski pawiljon wottorhaja
Krótkopowěsće (23.07.26)
Ludźo smědźa zaso domoj
Budyšin. Woheń, kiž bě wutoru popołdnju w štyrjoch z baterijemi pjelnjenych kontejnerach na Schliebenowej wudyrił, je zhašany. Wčera wječor běchu wohnjowi wobornicy warnowanje zběhnyli. Dźensa popołdnju smědźa ewakuowani wobydlerjo zaso do swojich bydlenjow. W běhu dźensnišeho dnja chcychu spalene kontejnery zrumować a za móžnej přičinu wohenja slědźić, tak rěčnik policije.
Direktorka so wobara
Budyšin. Direktorka Philippa Melanchthonoweho gymnazija Monika von Broen je skóržbu přećiwo wozjewjenju lěwicarskoekstremistiskeje skupiny „Antifa Elbflorenz“ zapodała. Po SN tydźenja su nětko tež Sakske Nowiny wo tym informowali, zo tči za politiskimi wumjetowanjemi přećiwo direktorce skupina, kotraž je po posudku krajneho zarjada za škit wustawy ekstremistiska.
Gzuz a Capital Bra we Łužicy
