Krótkopowěsće (11.09.24)
Mała rěč ma swójski studij
Flensburg. Na Europa-uniwersiće na sewjeru Němskeje je frizišćina wot spočatka lětušeho nazymskeho semestra swójski studijny předmjet. Wučerjo a wučerki za frizišćinu njejsu nětko hižo na studij germanistiki wjazani, wšako je studij tak mjenowany wudospołnjenski předmjet. To rěka, zo móže kóždy student jón přidatnje nimo hłowneju předmjetow studować.
Rozmołwy jenož z terminom
Budyšin. Terminy za rozmołwy pola Budyskeje dźěłoweje agentury dyrbja zajimcy wot přichodneje póndźele sem knihować. Termin hodźi so online abo telefonisce dojednać. Z postupowanjom chce agentura sobudźěłaćerjow wolóžić. Zdobom maja so čakanske časy pomjeńšić. Indiwiduelne poradźowanje je na zarjedźe, telefonisce abo online móžne.
Stara wodarnja dobyła
Krótkopowěsće (10.09.24)
Rjadowak na temu lěs zestajili
Budyšin. Budyski Rěčny centrum WITAJ je nětko nowy rjadowak „Dźemy do lěsa“ wudał. Dwurěčny rjadowak wopřija mnohostronsku zběrku materiala za dźěło z dźěćimi w pěstowarni a horće k temje „lěs“. Zakład tworja doporučenja za cyłkownje jědnaće zaběrow w lěsu a wo nim, wobkedźbujo při tym stajnje tež rěčnokubłanski aspekt.
Wšitcy znowa nastupja
Běła Woda. Za druhe koło wólbow wyšeho měšćanosty w Běłej Wodźe 29. septembra chcedźa třo kandidaća znowa nastupić. Swantje Schneider-Trunsch (Klartext) je 1. septembra najwjac hłosow dóstała. Po tym sćěhowaše Katja Dietrich (njestronjanka) a David Kreiselmeier (AfD). Při přichodnych wólbach je jednora wjetšina hłosow wolerjow dosahaca.
Jednanja jutře zahaja
Krótkopowěsće (09.09.24)
Kniharnju wuznamjenili
Frankfurt nad Wódru. Zwjazkowa ministerka za kulturu Claudia Roth je wčera 118 mjeńšim kniharnjam wuznamjenjenje „Wuběrne městno kultury“ přepodała. W kategoriji „Najlěpša kniharnja“ bě mjez třomi mytowanymi tež kniharnja Robert Philipp z Kamjenca, kotraž dóstanje 25 000 eurow.
Chór Lipa w čěskej stolicy zaspěwał
Praha. Towarstwo přećelow Serbow, Kontakny běrow Swobodneho stata Sakska w čěskej a Unija čěskich spěwarskich towarstwow su wčera na dworje Praskeho Serbskeho seminara „Sorový minifestival“ wuhotowali. Nimo českeju spěwneju ćělesow Entropie a Laetitia bě chór Lipa z hosćom, kiž předstaji we wobłuku něhdźe hodźinskeho programa repertoirne ludowe a moderny pěsnje a šlagry.
Šiman žada sej změnu kursa
Krótkopowěsće (06.09.24)
Partiturje serbskeje spěwohry
Budyšin. Po prěni raz dospołnje wozjewjenej partiturje spěwohry „Smjertnica – serbska ludowa opereta w jednym jednanju“ Jurja Pilka předleži wotnětka tež klawěrny wućah krucha. Wudawaćel wobeju publikacijow je nakładnistwo Lumir. Wčera je nakładnik Měrko Šołta noty nawodźe Serbskeje centralneje bibliotece Witej Bejmakej přepodał, hdźež su zajimcam přistupne.
Młodźi ludźo su nětko prašani
Lipsk/Berlin. Němski čerwjeny křiž pyta nuznje nowych zwólniwych darićelow kreje. Krok po kroku přestawaja mjenujcy ludźo z tak mjenowaneje generacije „baby-boomerow“ krej darować. Młodźi ludźo, kiž su so po lěće 1990 narodźili, su tuž „nětko esencielni, zo by so poskitk krejnych konserwow tež w přichodźe na wysokim niwowje zdźeržał“.
Napoje wobmjezować
Krótkopowěsće (05.09.24)
35 hodźinow je maksimum
Berlin. Dźěłarnistwo IG metal žada sej za dźěłaćerjow w industriji, kotraž drjewo a plastu předźěła w Berlinje a Braniborskej, tydźenski wobjim 35 hodźinow. Z tym ma so dźěłowy čas na tón w zapadnych zwjazkowych krajach přiměrić. Tři hodźiny dołho běchu zastupjerjo dźěłarnistwa a dźěłodawarjow jednali. Wuslědka žanoho njebě. Dalše rozmołwy chcedźa w oktobrje wjesć.
Zwučowanje přewjedli
Wojerecy. We Wojerowskim klinikumje Łužiska jězorina přewjedźechu zamołwići dźensa rano njepřizjewjene wohnjoškitne zwučowanje. Dom njebě nachwilnje přistupny. Tež nuzowa stacija a čakarnje běchu potrjechene. Wohnjowa wobora bě spěšnje na městnje. Klinikum je z wuslědkom zwučowanja spokojom.
Wot 14 lět dźěłać směć
Krótkopowěsće (04.09.24)
Městno Struckoweje wohrožene
Zhorjelc. Frakcija AfD Zhorjelskeho wokrjesneho sejmika chce financnych přičin dla wjacore městna hłownohamtskich społnomócnjenych šmórnyć, mjez druhim tež te za serbske naležnosće Kati Struckoweje. Tuchwilna pozicija ma so na čestnohamtske městno přeměnić. „Je to wotewrjeny nadběh na nas jako mjeńšinu! Ćim wažniše je nětko, zo so tute městno w sakskim Serbskim zakonju zakótwi“, sej Struckowa žada.
Rěčna politika w fokusu
Mannheim. Leibnitzowy institut za němčinu wuhotuje wot dźensnišeho fachowu konferencu „Sprach(en)politik in Deutschland – Perspektiven auf Sprachminderheiten- und Mehrsprachigkeitskonstellationen“ w Mannheimje. Mjez referentami stej slědźerce projekta ZARI Cordula Ratajczakowa a Nicole Dołowy-Rybińska z přednoškom „Serbska rěčna politika so změni – wot wobchowanja k ‚serbšćinje za wšitkich‘.“
Bórze tež w Pólskej putnikować
Krótkopowěsće (03.09.24)
Ličba hosći jasne přiběra
Zły Komorow. W prěnim połlěće 2024 je sej wo tójšto wjace hosći do Łužiskeje jězoriny dojěło, hač hišće loni w samsnym času. Wo tym piše turistiski zwjazk Łužiska jězorina w nowinskej zdźělence. W Braniborskim dźělu jězoriny stupaše ličba hosći wo 10,3 procenty na 102 504. Cyłkownje 291 369 nocow přebywachu tući w hotelach a hospodach, z tym přiběra tuta ličba wo 9 procentow.
Registracija wotnětka móžna
Zhorjelc. Za klětuši „Tydźeń wotewrjenych zawodow w Sakskej“ móža so zajimowane zawody wotnětka přizjewić. Wo tym informuje Zhorjelski krajnoradny zarjad. Kóžde lěto w měrcu maja šulerki a šulerjo wot 7. lětnika móžnosć so w běhu tutoho tydźenja wo perspektiwach a poskitkach zawodow w regionje informować. Zawody, kotrež so registruja, měli zajimcam wěcy poskićeć, kotrež su blisko realiće na dźěle.
Dźiwadło wabi podobnje sportej
Krótkopowěsće (02.09.24)
Njerozsudne wólby
Běła Woda. Po wčerawšich wólbach wo zastojnstwo noweho wyšeho měšćanosty w Běłej Wodźe njeje rozsuda. Ani Swantje Schneider-Trunsch (Klartext, 35,31 proc.), Katja Dietrich (njestronjanka, 34,75 proc.) a David Kreiselmeier (AfD, 29,97 proc.) njejsu absolutnu wjetšinu hłosow wolerjow dóstali. Wobydlerjo města su namołwjeni 29. septembra znowa wolić.
Kursaj zakónčenaj
Čěske Budejowice. Tři tydźenje dołho je nimale sto zajimcow z 35 krajow zhromadnje čěšćinu nawuknył. Mjez nimi běchu tež tři Serbowki, kotrež bě Rěčny centrum WITAJ na kurs sposrědkowało. Dźěłarnički a ekskursije běchu runje tak wobstatk kursa, kaž klasiska rěčna wučba. Tež w Praze tajki kurs do toho hižo poskićachu. Za wobaj kursaj přewza čěske knježerstwo popłatk.
Mrowje ludźi wustróžili
Krótkopowěsće (30.08.24)
Podpěraja Marka Šimana
Budyšin. Dźesać nawodow wažnych regionalnych zawodow je w namołwje a nawěšku ludźi prosyło, z prěnim hłosom Marka Šimana wolić. Woni jeho podpěraja, „dokelž so za sylne hospodarstwo a wěste dźěłowe městna w Hornjej Łužicy zasadźuje“. Dale skutkuje za ludźi w regionje. We wólbnym wokrjesu 56/Budyšin 5 ma Šiman njedźelu mandat přećiwo wjednikej sakskeje AfD zakitować.
Wabi za serbske zajimy w Chinje
Budyšin. Krajny rada Budyskeho wokrjesa Udo Wićaz (CDU) a delegacija zastupjerjow kónčiny přebywa tele dny w Chinje w měsće Shanxi. Ćežišćo wuprawy su kooperacije we wobłuku mediciny a turizma, za kotrež w Chinje wabja. Sobudźěłaćer Serbskeho kulturneho turizma Franc Golchert je tohorunja mjez delegatami a serbske zajimy zastupuje.
Sakska wospjet dobyła
Krótkopowěsće (29.08.24)
Wučerjo njech so požadaja
Budyšin. Předsydstwo Serbskeho šulskeho towarstwa (SŠT) namołwja serbskich wučerjow so požadać wo aktualnje wupisane dźěłowe městna. To su mjez druhim městno koordinatora za serbske naležnosće w krajnym zarjedźe za šulu a kubłanje (LaSuB) a wjednistwje Serbskeju zakładneju šulow Chrósćicy a Budyšin. Kaž předsydka SŠT Katharina Jurkowa zdźěli, móža so zajimcy z prašenjemi na SŠT wobroćić.
Braniborska přewza jězory
Podstupim/Zły Komorow. Kraj Braniborska je předwčerawšim mjezywužiwanske zrěčenje z Łužiskej a srjedźoněmskej towaršnosću hórnistwoweho zarjadnistwa (LMBV) za štyri jězory Łužiskeje jězoriny podpisała. Su to: Sedlišćanski a Rański jězor kaž tež braniborskej dźělej Parcowskeho a Lejnjanskeho jězora. Zrěčenje je zakład za wotewrjenje a wužiwanje jězorow wot lěta 2026.
Rakety měli Rusow zamylić
