Krótkopowěsće (18.09.26)
Zarjaduja rjećaz ludźi za měr
Budyšin. Pod hesłom „My smy mnozy – my smy najwjace“ namołwja Budyska wobydlerska syć póndźelu, 21. septembra, w sprjewinym měsće wutworić rjećaz ludźi za měr. Wobdźělnicy zetkaja so w 16.30 hodź. na Serbskim kěrchowje při Michałskej cyrkwi. Rjećaz kołowokoło stareho města ma znamjo za měr a přećiwo přiběracemu brónjenju być. Wšitcy su wutrobnje witani.
Alstom twari logistiski centrum
Budyšin. Nowy logistiski centrum ma na Budyskim stejnišću koncerna Alstom nastać. Nowy centrum chce Alstom zhromadnje z logistiskim partnerom klětu twarić započeć. Składnostnje 180lětneho wobstaća twornje kolijowych jězdźidłow w Budyšinje přewjedu tam jutře dźeń wotewrjenych duri. W zawodźe dźěła něhdźe 1 200 přistajenych. Wob měsac zhotowja 40 wozow.
19 km po jězorinje płuwała
Krótkopowěsće (17.09.26)
Załožba směrnicy wobzamknyła
Budyšin. Na wurjadnym online-posedźenju je rada Załožby za serbski lud wčera nowej směrnicy za spěchowanje projektow a za spožčenje stipendijow wobzamknyła. Po wothłosowanju z krajnymaj ministerstwomaj za wědomosć a financy Sakskeje a ze sakskim zličbowanskim zarjadom narunaja z tym regule z lěta 2003. Detaile zhonja zajimcy w aktualnej zdźělence na internetnej stronje załožby.
Wo kulturnym herbstwje rěčeli
Choćebuz. Projekt „žiwe kulturne herbstwo w Delnjej Łužicy“ běše tema wčerawšeho wuradźowanja Domowiny ze społnomócnjenymi za serbske naležnosće w Braniborskej. Dwójce wob lěto so njezjawnje schadźuja. Regionalna rěčnica Heike Apeltowa na naprašowanje našeho wječornika zdźěli, zo prosy Stephanie Bierholdtec ze Serbskeho instituta ludźi, kotřiž maja wědu wo rjemjesle, wo pokiwy.
Zakłapnicy wuchowali
Krótkopowěsće (16.09.26)
Super-wětrnik bórze hotowy
Šejkow. Twarske dźěła na najwjetšim wětrniku swěta w Šejkowje (Schipkau) bórze zakónča. Hač do kónca tutoho tydźenja chcedźa wulke komponenty zmontěrować. Po tym přewjedźe so posledni spektakularny krok: zběhnjenje nutřkowneje wěže na doskónčnu wysokosć. Na kóncu budźe wětrnik firmoweho zwjazka GICON 365 metrow wysoki.
Zapozdźenja dale móžne
Žitawa. Dokelž běchu njeznaći w nocy na wutoru koporowy kabl skóncowali, ćahi na linijach RB61, RE2 a L7 aktualnje wupadnu abo maja zapozdźenje, železniske předewzaće Trilex zdźěli. Mjez Žitawu a Drježdźanami drje maja ćahi wot dźensnišeho zaso regularnje jězdźić, přiwšěm dyrbja sobujěducy ze zapozdźenjemi ličić.
Wotewru nowu wuhladnu wěžu
Krótkopowěsće (15.09.26)
Festiwal z pozitiwnej bilancu
Grabin. Z koncertom je němski trompetar a jazzowy pianist Sebastian Studnitzky zhromadnje z finskimi, israelskimi, němskimi a pólskimi hudźbnikami njedźelu w Grabinje lětuši Łužiski festiwal zakónčił. 33 zarjadowanjow je so wot 25. awgusta na 19 jewišćach po cyłym regionje wotměło. Hrajnišća informuja, zo běchu přerěznje po 86 procentach wobsadźene. Inkluziwnje dale přistupneju wustajeńcow liča hač do kónca lěta z dohromady 11 500 wopytowarjemi.
Znowa mjenje dźěći w Sakskej
Kamjenc. W Sakskej so lěto a mjenje dźěći narodźi. Krajny zarjad za statistiku zdźěla, zo je so loni dohromady 23 126 dźěći narodźiło, to je 6,4 procenty mjenje hač 2024. Wot lěta 2017 ličba porodow woteběra. Přerězna ličba dźěći na žonu w Sakskej je so loni dale na 1,16 dźěći znižiła, 2024 bě jich hišće 1,22, před dźesać lětami pak 1,59. Ličba porodow je po 1995 na najnišim stawje.
Biblioteka z nowym mjenom
Krótkopowěsće (14.09.26)
Towarstwo za šulu załožili
Njebjelčicy. Na zhromadźiznje su zašły pjatk w Njebjelčicach spěchowanske towarstwo Prěnjeje swobodneje serbskeje šule załožili. Jeho předsyda je předewzaćel Jan Ryćer, městopředsyda je bioratar Ignac Wjesela a pokładnica je baba Tereza Wokowa. Prěnjotnje podpěra towarstwo pedagogiske a projektowe dźěło tuchwilu nastawaceje šule. Přichodne rjadne zetkanje budźe w nowembru.
Institut pomha uniwersiće
Budyšin. Direktor Serbskeho instituta prof. Hauke Bartels je prorektorce Lipšćanskeje uniwersity za wuwiwanje talentow prof. Brigitte Latzko pjatk na rozmołwje w Budyšinje hišće wušu kooperaciju za dalše profilowanje tamnišeje sorabistiki poskićił. Kaž Bartels SN na naprašowanje zdźěli, je uniwersita fachowu kompetencu a kapacitu Serbskeho instituta spóznała.
Michael Apel zaso župan
Krótkopowěsće (11.09.26)
Zeibina 70 lět
Bóšicy. Předewzaće Zeibina kumštne maćizny a technika w Bóšicach swjeći tele dny swoje 70lětne wobstaće. Hižo w třećej generaciji swójba předewzaće nawjeduje. Zeibina ma stejnišća w Bóšicach, Pólskej a Słowakskej. Tam zhotowjeja precizne dźěle z kumštnych maćiznow. W Hornjej Łužicy je předewzaće wot lěta 1965 zasydlene.
Wola wosadne předsydstwa
Drježdźany. W sakskich ewangelskich wosadach maja so nowe předsydstwa wolić. Wólby wotměja so 20. septembra, zdźěli zarjad krajneje cyrkwje. W přichodnej legislaturje so ličba předsydstwow jasnje pomjeńši. Přičina je zjednoćenje wosadow. Jich ličba je so wot 549 w lěće 2020 na 272 wosadow a wosadnych zwjazkow w lěće 2026 redukowała.
Přezmjezne lěkowanje zmóžnić
Krótkopowěsće (10.09.26)
Staršiske přinoški zniža
Radwor. Radworska gmejna klětu staršiske přinoški za žłobik, pěstowarnju a hort w swojich kubłanišćach zniži. To je gmejnska rada na swojim wčerawšim posedźenju wobzamknyła. Radźićeljo su sej toho wědomi, zo z tym kóšty za gmejnu stupaja. Přiwšěm je jim wažne, staršich wolóžić a jim signalizować, zo su dźěći w gmejnje witane. Klětu ma so pruwować, kak so tole na etat wuskutkuje.
Prezidij deleguje chór a brigadu
Chrósćicy. Prezidij Domowiny je wčera wobzamknył, chór Budyšin na 30. spěwanje sakskich chórow 12. decembra w Lipšćanskej sukelnicy delegować. 1. serbska kulturna brigada so klětu wot 16. do 20. junija na 30. festiwalu Alta Pusteria w Južnym Tirolu wobdźěli. Přichodne posedźenje zwjazkoweho předsydstwa budźe 25. septembra w Chrósćicach.
Tři filmy z Hornjeje Łužicy online
Krótkopowěsće (09.09.26)
Mjenje wučby wupadnyło
Drježdźany. Na sakskich statnych šulach dźeń a mjenje wučby wupaduje. To wuchadźa ze statistiki, kotruž je kultusowe ministerstwo dźensa dopołdnja wozjewiło. Po wšej Sakskej je w zašłym šulskim lěće 11,4 procenty mjenje hodźinow wupadnyło hač hišće lěto do toho. Na serbskich zakładnych šulach we Worklecach, Pančicach-Kukowje a Chrósćicach kaž tež na wyšimaj šulomaj we Worklecach a Ralbicach je porno tomu zdźěla wo wjele wjace hodźinow wupadnyło hač w šulskim lěće do toho.
Zawěsćenje budźe tuńše
Drježdźany. Wjele wobsedźerjow awtow změje po nowej regionalnej statistice w přichodźe mjenje za zawěsćenje swojeho jězdźidła płaćić. W Budyskim a Zhorjelskim wokrjesu kaž tež w Kamjenicy a Lipsku dohromady 315 000 wobsedźerjow z połnokaskowym zawěsćenjom z toho profituje. Tole je Zwjazk němskich zawěsćernjow dźensa zdźělił.
Přepruwuja techniku
Krótkopowěsće (08.09.26)
Towarstwa a iniciatiwy podpěrali
Budyšin. Wokrjes Budyšin je loni dohromady 226 towarstwow a čestnohamtskich iniciatiwow z cyłkownje 153 000 eurami podpěrał. Pjenjezy buchu přewažnje w projektach we wobłuku hladanja domizny a nałožkow zasadźene. Jeničce za to su zamołwići 62 000 eurow wudali. Srědki je Budyski wokrjes z etata Sakskeje wzał. Podpěra za jednotliwe projekty wučinješe 500 do 1 500 eurow.
Mjenje padow boreliozy
Drježdźany. W aktualnej sezonje je so w Sakskej wo wjele mjenje ludźi z boreliosu inficěrowało hač loni, jako fachowcy rekord zwěsćichu. Hač do kónca awgusta zličichu 1 240 padow, Krajny přepytowanski wustaw (LUA) dźensa informowaše. To je nimale štwórćina mjenje hač před lětom, jako registrowaše LUA w samsnej dobje nimale 500 padow wjace.
Chce w pjeć jězorach płuwać
Krótkopowěsće (07.09.26)
Zasadźa tři přidatne ćahi
Budyšin. Železniske předewzaće trilex wot dźensnišeho tři přidatne ćahi mjez Drježdźanami – Biskopicami – Zhorjelcom zasadźa. Kapacity chcedźa tak hač do januara powyšić. Zaměrowy zwjazk wuchodna Sakska (ZVVO) bě za to trěbne financne srědki wobzamknył. Předewzaće ODEG je ćahi k dispoziciji stajiło. Bliše informacije wo jězbnym planje zhonja sobujěducy na internetnej stronje .
Timmereversa rozžohnowali
Drježdźany. Heinricha Timmerversa su zawčerawšim swjatočnje jako biskopa Drježdźansko-Mišnjanskeho biskopstwa rozžohnowali. Mjez přitomnymi Božeje mšě w Drježdźanskej Dwórskej cyrkwi běchu serbscy duchowni, wěriwi ze serbskich wosadow, kaž tež sydom družkow. Próstwy je mjez druhim družka serbsce přednjesła.
Češa a biblioteki
