Krótkopowěsće (14.08.25)
Žane pokazki na njeskutk
Zhorjelc. Po nětčišim stawje přepytowanjow policija z toho njewuchadźa, zo je smjerć 13lětneho Karola wuslědk njeskutka. Młodostny, kotrehož ćěło zastojnicy po wobšěrnej pytanskej akciji předwčerawšim při železnicowej čarje mjez Łazom a Hórnikecami namakachu, je „najskerje z woporom tragiskeho njezboža“, kaž policiska direkcija Zhorjelc zdźěla.
Mjenje wučerjow z połnym dźěłom
Wiesbaden. Na sakskich powšitkownokubłacych šulach dźěła jasnje wjace wuwučowacych podźělnje hač w susodnych zwjazkowych krajach. Wotpowědna kwota wučinješe 2023/2024 40,8 proc. W Durinskej a Saksko-Anhaltskej skutkowachu porno tomu 23 proc. wučerjow w dźělnym přistajenju. Z tym je swobodny stat po informacijach Zwjazkoweho statistiskeho zarjada přiwšěm pod cyłoněmskim přerězkom, kiž je so na něhdźe 43 proc. powyšił.
Bydlenska politika njedoslědna
Krótkopowěsće (13.08.25)
Hólčeca mortweho našli
Łaz. Policiska direkcija Zhorjelc zdźěla, zo je ćěło 13lětneho Karola při železniskej čarje mjez Łazom a Hórnikecam našła. Wot minjeneje njedźele je wjace hač sto zastojnikow za hólcom pytało, kiž bě ze swojej swójbu při Slěbornym jězoru kampěrował. Přepytowanja inkluziwnje zarjadniskeje pomocy z Čěskeje, z kotrejež swójba pochadźa, běža do wšěch směrow.
Wulki strach lěsnych wohenjow
Lipsk. Strach lěsnych wohenjow dale přiběra. Wot wčerawšeho płaći we wokrjesomaj Budyšin a Sewjerna Sakska warnowanski schodźenk štyri. Přistup k lěsam je tuž wobmjezowany. Wuchodźować smě so jeničce po woznamjenjenych šćežkach; kurić a grilować je zakazane. Samozrozumliwje njeměli so lěhwowe wohenje zapalić. Jutře wočakuja po informacijach Statneho zawoda Sachsenforst zwyšenje na najwyši schodźenk.
Produkuja dale w pomniku
Krótkopowěsće (12.08.25)
Zastaranska wěstota zaručena
Pirna. Sakske rěčne zawěry su najebać tuchwilnu suchotu derje pjelnjene. Optiměrowaneho wobhospodarjenja dla wučinja staw w rěčnych zawěrach přerěznje 88 procentow, rěčnica krajneho zarjadnistwa za rěčne zawěry Katrin Schöne na naprašowanje zdźěli. „Z tym je zastaranska wěstota za ludnosć a industriju najebać aktualne jara suche wjedro zaručene.“
Wjesela so na Highfield festiwal
Lipsk. Přichodny kónc tydźenja sej wjace hač 30 000 fanow hudźby k wulkim Highfield festiwalej w regionje Lipsk dojědźe. Tutón přewjedu wot 15. do 17. awgusta při Störmthalskim jězoru. Nimo K.I.Z., Kontra K, Deichkind a Nina Chuba mnoho dalšich hudźbnikow na jewišćo přeprošuja.
Wuhladne wěže skóncowane
Krótkopowěsće (11.08.25)
Měrliwje swjećili
Grodk. Wjac hač 30 000 wopytowarjow je so kónc tydźenja na domizniskim swjedźenju w Grodku wobdźěliło. Z tym běše tradicionelny event zaso jedyn z najwjetšich ludowych swjedźenjow w južnej Braniborskej. Najebać přiběrace wušparanja z prawicarjemi w měsće njeje k mylenjam dóšło. Wjeršk běše laserowa show z wohnjostrojom, hudźbu a 12 000 přihladowarjemi.
Mjenje nowačkow hač loni
Drježdźany. Za dohromady něhdźe 534 000 šulerkow a šulerjow je so dźensa w Sakskej zaso šulski čas zahajił. Mjez nimi bě 37 000 šulskich nowačkow. Cyłkowna ličba šulerjow zwyši so přirunujo loni wo 10 000, šulskich nowačkow pak je 3 500 mjenje. Wo tym informuje kultusowe ministerstwo. (Wjace wo tym na 4. stronje.)
Šulerjo za sprawnosć dźěłali
Drježdźany. Akciski dźeń „genialsozial – twoje dźěło přećiwo chudobje“ je lětsa w cyłku 900 000 eurow za „globalnu sprawnosć“ wunjesł. 36 500 šulerjow z 271 šulow w Sakskej je jedyn dźeń na dobro socialnych projektow dźěłało. Šulerjo su tež rozsudźili, komu chcedźa pjenjezy darić. Mjez druhim projektej za prawa indigenych ludźi na Phillippinskej a nowotwarej předšule w Ugandźe.
Krótkopowěsće (08.08.25)
We Wětrowje oficialnje kónc
Wětrow. Wo planowanym kóncu šamotownje we Wětrowje je naš wječornik wospjet informował. Nětko je wón oficialnje wobzamknjeny, kaž Serbski rozhłós informuje. Na to su so mějićel, přistajeni a dźěłarnistwo dorozumili. Zbywacych 190 přistajenych dóstanje hač do oktobra swoju mzdu. Poslednje nadawki chcedźa pak hišće hač do klětušeho dodźěłać.
Wjesnjanosta z CDU wustupił
Wjazońca. Wjesnjanosta Wjazońcy Jens Zeiler je ze strony CDU wustupił. 54lětny praji, zo je wot politiskeho wuwića strony na zwjazkowej runinje přesłapjeny. CDU je so přiběrajcy wot spušćomneje, wobydlerjam bliskeje a pragmatiskeje politiki zdalowała. Jens Zeiler wostanje tež bjez strony dale wjesnjanosta.
Krótkopowěsće (07.08.25)
Serbska přirada so zetkała
Slepo. Čłonojo serbskeje přirady Zhorjelskeho wokrjesa su so wčera, srjedu, w Serbskim kulturnym centrumje w Slepom schadźowali. Jedyn z ćežišćow zetkanja běše naprašnik, z kotrehož pomocu chce přirada zwěsćić, hač wobydlerjo serbskeho sydlenskeho ruma we wokrjesu serbske nałožki pěstuja a do kotreje měry maja serbske korjenje.
Šejcowa nawjeduje redakciju
Choćebuz. Diana-Susanne Šejcowa je nowa nawodnica delnjoserbskeje redakcije sćelaka rbb. Wo tym informuje wjednica Choćebuskeho regionalneho studija Sandra Fritsch. Šejcowa dźěła wot lěta 2022 za serbski program a naslěduje Marion Stenselowu, kotraž bě so spočatk lěta na wuměnk rozžohnowała. Najwažniši nadawk Šejcoweje budźe zdobyće noweho personala za serbsku redakciju.
Zarjadniske słužby w serbšćinje
Krótkopowěsće (06.08.25)
Sorabija znowa w minusu
Nowoslicy. Róžeńčanska agrarna AG Sorabija měješe wčera swoju 33. hłownu zhromadźiznu. Na njej bilancowachu lěto 2024. Nawoda předsydstwa Chris Fabig, kiž wot 1. januara w tutej funkciji skutkuje, wozjewi, zo njeje Sorabija loni dobytka nadźěłała. Akcionaram tuž diwidendy wupłaćić njemóža. Nadrobniše informacije namakaće w jutřišim wudaću SN.
Widejo wo wuznamje Ochranowa
Budyšin. „Sydlišća Ochranowskeje bratrowskeje wosady“ rěka animěrowany krótkofilm, kiž w pjeć mjeńšinach pozadki transnacionalneho swětoweho namrěwstwa a cyłoswětny wuznam městačka wobswětluje. W nadawku Marketingoweje towaršnosće Hornja Łužica-Delnja Šleska (MGO) produkowany pask je na YouTube přistupny. Na mjezynarodnych podtitlach hišće dźěłaja.
Wjac policije při mjezy
Krótkopowěsće (05.08.25)
Milinarnje z wěstosću twarja
Grodk. Zwjazkowa hospodarska ministerka Katherina Reiche je Łužicy twar nowych płunowych milinarnjow připrajiła. Tole wozjewi wona na wopyće energijoweho koncerna LEAG wčera (SN rozprawjachu). Zwjazkowe knježerstwo chce Łužicu jako tradicionelnu kónčinu za produkciju miliny zachować a garantuje tohodla wěstotu planowanja za nowe milinarnje.
Žně žita wohrožene
Drježdźany. Wjele dešćika w poslednich tydźenjach wohroža žně žita w Sakskej. Mnoho spadkow dla zhubi žito swoju kwalitu a potom so jenož hišće jako pica hodźi. Rezultat toho, je financielna strata mnoho ratarjow. Cyłkownje so žně w Sakskej dlija. Na tamnym boku profitujetej kukurica a cokorowa rěpa wot dešćika.
Busy zdźěla po planje njepojědu
Krótkopowěsće (04.08.25)
Wuspěch a eklat
Torgau. Wohnjowej woborje z Chrósta a Blunja stej so kónc tydźenja na lětušim němskim mišterstwje wohnjowych woborow wobdźěliłoj. W hašenju wudobyštej sej 11. a 12. městno. Wjace hač 600 wobornikow bě so wobdźěliło. Na zahajenju zarjadowanja běchu pjatk město němskeje hymny prěnju štučku spěwa Němcow zahrali. Tole zwjazk woborow raznje kritizuje.
Jenički Serb na kursu
Čěske Budějovice. Tež lětsa přewjedu na uniwersiće w Českich Budějovicach zaso intensiwny rěčny kurs čěšćiny. Stipendiat Rěčneho centruma WITAJ je Róžeńčan Jan Hrjehor, kotryž je zdobom jenički Serb. Čěske knježerstwo poskićuje kóžde lěto zajimowanym Serbam stipendij, zo bychu so na kursu wobdźělili.
Wudrjeńca zaso přistupna
Hřensko. Tři lěta po wulkim wohenju w narodnym parku Čěska Šwica je Edmundowa wudrjeńca turistam zaso přistupna. Tež woblubowane čołmikowanje na rěce Kamenice je zaso móžne. Wokomiknje pak móža ludźo wudrjeńcu z wěstotnych přičin jenož při přihódnym wjedrje wopytać, a to wšědnje maksimalnje pjećdźesat wosobow.
Poražce za Budyšin a Biskopicy
Krótkopowěsće (01.08.25)
Wo slědźerskim centrumje rěčeli
Berlin. Sakska statna ministerka Regina Kraushaar (CDU) je so wčera ze zwjazkowej ministerku za twarstwo Verenu Hubertz (SPD) zetkała. Jedna tema běše planowane stejnišćo Zwjazkoweho slědźerskeho centruma za klimaneutralne a nastupajo resursy eficientne twarjenje. W rozmołwje dźěše předewšěm wo to, kajku hódnotu by stejnišćo za Budyšin měło. Budyski krajny rada Udo Witschas je Kraushaar přewodźał.
Myta za dorost wupisane
Budyšin. Maćica Serbska wupisa lětsa zaso tři myta za dorost. Za gymnaziastki a gymnaziastow Delnjeje a Hornjeje Łužicy stej to myće Bogumiła Šwjele a Michała Hórnika a za studentki a studentow myto Arnošta Muki. Hač do 30. nowembra měli zajimče a zajimcy swoje dźěła zapodać. Dokładniše informacije su na webstronje Maćicy wozjewjene.
Leipner kritizuje policiju
