Krótkopowěsće (07.07.25)
Rěčne prózdninske lěhwo zahajili
Wodowe Hendrichecy. Z 78 dźěćimi a młodostnymi 4. do 8. lětnika je Serbske šulske towarstwo (SŠT) sobotu swoje rěčne prózdninske lěhwo we Wodowych Hendrichecach zahajiło. Hač do přichodneje póndźele stara so šěsć čłonow organizaciskeho a dohladowanskeho teama pod nawodom koordinatorki SŠT Marlis Młynkoweje wo wotměnjawy program, mjez druhim z dźěłarničkami na polu hudźby, sporta a techniki.
Katamaran so powróćił
Zhorjelc. Z katamaranom bě muž sobotu ze swojej žonu na Bartonjanskim jězoru pola Zhorjelca po puću. Tutón so z njewujasnjenych přičin powróći. Žona móžeše so sama wuchować, muža pak sobudźěłaćerjo Čerwjeneho křiža z wody wućahnychu, reaniměrowachu a, ručež bě stabilny, do chorownje dowjezechu.
Serbska kultura ludźom wažna
Krótkopowěsće (04.07.25)
Wowčerjowa nowa dirigentka
Njebjelčicy. Njebjelčanski cyrkwinski chór změje po lěćnej přestawce nowu dirigentku. Zastojnstwo přewozmje w septembrje nachwilnje Hanka Wowčerjowa z Kozarc. Młoda žona je wučerstwo za předmjet hudźba studowała a hižo wjacore chóry dirigowała, mjez nimi chóraj „Šule Ćišinskeho“ a Serbskeho gymnazija kaž tež studentski chór.
Pomocnicy tež z druhich městow
Altenburg. Na bywšim wojerskim zwučowanišću Gohrischheide w Mišnjanskim wokrjesu wohnjowe wobory dale přećiwo wohenjej wojuja. Techniski pomocny skutk mjez druhim ze zwjazkow Budyšin, Kamjenc a Drježdźan je tohorunja na městnje. W změnach tam płomjenja hašeja.
Wjace ćahow za wuchodnu Saksku
Krótkopowěsće (03.07.25)
Najebać horcotu putnikowali
Róžant. Cyłkownje dźewjeć procesionow serbskich katolskich wosadow je so wčera na dnju Marije wopytanja najebać wulkeje horcoty na puć do Róžanta napodało. Horcoty dla su so mjez druhim družki Radworskemu a Baćonskemu procesionej hakle w Sernjanach přidružili. Hłowny celebrant Božeje mšě be Radworski farar Beno Jakubaš. Chór Meja je Božu mšu hudźbnje wobrubił.
Siegemund překwapjace dobyła
London. Němska tenisowa profihrajerka Laura Siegemund je prěni raz w swojej dołhej karjerje třeće koło we Wimbledonje docpěła. 37lětna přewiny Kanadźanku Leyluh Fernandez 2:0. W třećim kole hraje wona přećiwo Madison Keys z USA. Eva Lys zwrěšći porno tomu přećiwo Čechowce Lindźe Noskovej 1:2.
Sturm so nawróći
Krótkopowěsće (02.07.25)
Sakska gmejny zanjechała
Budyšin. Měšćanosća a wjesnjanosća Budyskeho wokrjesa so na sakskim etaće 2025/2026 postorkuja, kotryž je zašły tydźeń mjeńšinowa koalicija CDU a SPD ze Zelenymi a Lěwicu přesadźiła. Tak kritizowaše Kumwałdski wjesnjanosta Thomas Martolock (CDU), zo dyrbješe pobrachowacych pjenjez dla sobudźěłaćerjow gmejny za kulturu a turizm wupowědźić. Runočasnje kraj dalšich ludźi přistaja.
Praktikum za serbsce wuknjacych
Wulke Zdźary. Wobdźělnicy intensiwneho kursa serbšćiny w „rěčnym hnězdźe“ ZARI nazymu praktikum w serbskich institucijach złoža. To su sej Julian Nyča, nawoda rěčneho kubłanja ZARI, Katrin Suchec-Dźisławkowa (Domowina), Beata Brězanowa (Rěčny centrum Witaj), Aleksander Pólk (Serbski muzej) a Syman Pětr Cyž (Ludowe nakładnistwo Domowina) dorěčeli.
Čěska železnica a Elon Musk
Krótkopowěsće (01.07.25)
Online-galerija
Hladajo na wulke mnóstwo festiwalnych fotow w našim wčerawšim ćišćanym wudaću smy optimistiscy, zo was njedospołnje wotćišćaneho QR-coda dla njepřistupna online-galerija přejara tyšiła njeje. Na tutym městnje Wam jón hišće raz podamy.
Club z nowym předsydu
Budyšin. Lions Club w Budyšinje ma wot dźensnišeho noweho předsydu. Po tym zo bě so dotalny předsyda Rainer Welfins rozžohnował, nastupi 53lětny Stephan Kretschmar zastojnstwo prezidenta. Lions Club wostanje dale sylny partner za pomocne projekty w Budyskim regionje a angažowany dźěl organizacije Lions, kotraž je w 200 krajach po wšěm swěće aktiwna a ma wjace hač 1,4 milionow sobustawow.
Piwarnja w boju za wodu
Nošovice. Čěska piwarnja Radegast je kampanju „Bój wo wodu“ zahajiła, z kotrejž skedźbnja na woteběrace mnóstwo wody w regionje. Dobrowólnikam poskići jako myto 2 030 sudow za dešćowu wodu z wobjimom 200 litrow. Z tutymi sudobjemi móža hromadźe 8 milionow litrow wody lětnje zběrać. Cil piwarnje je, hač do lěta 2030 w krajinje wjace wody nahromadźić, hač při produkciji piwa přetrjeba.
Krótkopowěsće (30.06.25)
Nabožny tydźeń zahajeny
Budyšin. W nimale wšitkich serbskich katolskich wosadach je so dźensa nabožny prózdninski tydźeń zahajił. Hesło lětušeho tydźenja je „Wěc wutroby“. Zarjadowarjo w jednotliwych wosadach so z dźěćimi tele dny ze wšelakimi začućemi, kaž na přikład z dźakom, zrudobu abo zadwělowanjom zaběraja. Syła čestnohamtskich pomocnikow dźěći přewodźa.
Na horcotu so nastajić
Budyšin. Po cyłej Němskej a tež w Sakskej maja so ludźo tele dny na wysoke temperatury nastajić. Meteorologojo wěšća zajutřišim temperatury hač do 34 stopjenjow celsiusa. Tuchwilu fachowcy z toho wuchadźeja, zo so situacija hač do srjedy krok po kroku přiwótři. Tež w nocy tropiske temperatury knježa. Z tym strach lěsnych wohenjow přiběra.
Oest za přiradu nominowany
Krótkopowěsće (27.06.25)
Etat skónčnje wobzamknjeny
Drježdźany. Sakski krajny sejm je po dołhich diskusijach wčera wječor etat za lěće 2025 a 2026 wobzamknył. Załožba za serbski lud dóstanje lětsa a klětu dohromady 8,2 milionaj eurow. Cyłkownje chce swobodny stat we woběmaj lětomaj 50,2 miliardow eurow wudać. Nowe dołhi předwidźane njejsu. Zastupjerjo frakcijow AfD a BSW stej přećiwo etatej hłosowali.
Njewjedro zachadźało
Choćebuz. W Berlinje, Podstupimje a we Łužicy je wčera wječor sylne njewjedro zachadźało. W Choćebuzu su powalene štomy a hałuzy dróhi blokowali. Kaž tamniša regionalna wuchowanska straža zdźěli, so nichtó zranił njeje. Wohnjowa wobora a policija pak měještej z wjace hač 400 zasadźenjemi ruce połne dźěła. Po cyłej Braniborskej naličichu straže wjac hač 1 000 zasadźenjow.
Móšnju Romjanow namakali
Krótkopowěsće (26.06.25)
Móst měra chcedźa wupyšić
Budyšin. Budyski Móst měra ma so k wosebitym přiležnosćam wupyšić. Na Dnju Hornjeje Łužicy 21. awgusta maja so módro-žołte banćiki přičinić a na Dnju němskeje jednoty 3. oktobra budu tole čorno-čerwjeno-złote banty. Namjet je frakcija AfD wčera na posedźenju Budyskeje měšćanskeje rady zapodała. Wjetšina zapósłancow je přihłosowała. Serbske barby pak so jewić njebudu.
Nowa nawodnica muzeja
Wojerecy. Peg Koedel je nowa nawodnica Wojerowskeho Konrada Zusoweho kompjuteroweho muzeja ZCOM. W Rostocku rodźena je „nazhonita ekspertka za digitalne archiwowanje a digitalne kubłanje“, w zdźělence institucije rěka. Koedel chce wuspěšne dźěło swojeje předchadnicy Andreje Pittmann dale wjesć a muzej jako inowatiwne wuknjenske a dožiwjenske městno za wšitke generacije sylnić.
„Chlěb republiki“ napjekli
Krótkopowěsće (25.06.25)
Zjednoćenju přihłosowali
Budyšin. Po tym, zo běše wokrjesny sejmik w Zhorjelcu zjednoćenju Zaměroweho zwjazka Hornja Łužica-Delnja Šleska (ZVON) a Wobchadneho zwjazka Hornje Łobjo (VVO) přihłosował, su so póndźelu tež radźićeljo Budyskeho wokrjesneho sejmika za to wuprajili. Čłonojo zwjazka VVO su fuziji w minjenym tydźenju přihłosowali, čłonojo ZVON plan na pjatkownišim posedźenju schwala. Fuzija zmóžnja mjez druhim jednotny wobchadny tarif za wuchodnu Saksku kaž tež zhromadny informaciski system.
Online-galerija zaso přistupna
Budyšin. Problemow na serweru dla njeje QR-code w přinošku Předźenaka wo Chróšćanskim swjedźenskim ćahu składnostnje 800. róčnicy přez kónc tydźenja spušćomnje fungował. Online-galerija je nětko zaso přistupna.
Brechowa nakładnistwo wopytała
Krótkopowěsće (24.06.25)
Marathon do přestawki
Drježdźany. Sakski krajny sejm ma do lětnjeje přestawki hišće marathon posedźenjow zmištrować. Jutře a štwórtk chce parlament doskónčnje wo dwójnym etaće wuradźować. Dźensa wobjednawaja najprjedy druhe temy. W aktualnej hodźinje so zapósłancy wo wuskutkach horcoty kaž tež wo slědźenju w swobodnym staće dorozumja. Po tym frakcije wo wjacorych próstwach stronow rozsudźa.
Železniska čara je zawrjena
Kamjenc. Twarskich dźěłow na nastupišću Bischheim-Gersdorf dla wostanje čara linije S8 mjez Połčnicu a Kamjencom hač do 8. awgusta dospołnje zawrjena. Kaž Němska železnica zdźěla, zarjaduja za potrjecheny wotrězk narunanski transport z busami. Městna w tychle jězdźidłach su wobmjezowane, tak zo kolesa sobu njebjeru.
Serbski institut podpěrać
