Sakska za Einsteinowy teleskop

Zhorjelc. Sakska podpěruje prócu Astrocentruma Łužica (DZA), so w europskim wubědźowanju wo stejnišćo Einsteinoweho teleskopa přesadźić. To přilubi krajny minister za wědomosć Sebastian Gemkow (CDU) wčera w Zhorjelcu, hdźež su areal zarjadnišća DZA prezentowali. Teleskop „je rozsudna kročel při wuslědźenju uniwersuma“, praješe Christian Stegmann, jedyn z iniciatorow DZA.

LaSuB přećehnje do pasaže

Budyšin. Krajny zarjad za kubłanje a šule (LaSuB) poćehnje do swobodnych rumnosćow pasaže Žitnych wikow. Tole je wčera Budyski wyši měšćanosta Karsten Vogt na wobydlerskim forumje nutřkowneho města připowědźił. Hač do měrca 2025 ma zarjad přećahnyć. Vogt so nadźija, zo so nutřkowne město potom zaso trochu wožiwi.

Do zwěrjenca z mjedwjedźom

Natočene kěrluše za rozhłós

Budyšin. Serbski ewangelski wosadny zwjazk je hudźbnej redakciji Serbskeho rozhłosa prawo přewostajiło, 12 nowonatočenych kěrlušow wozjewić. Wo tym je serbski rozhłós dźensa rano rozprawjał. Chór Budyšin je kěrluše lětsa w meji natočił. Spěwarjow na pišćelach přewodźała je Yuko Ikedowa.

Přinošk dyrbja tola wusyłać

Budyšin. Rozhłosowy sćelak mdr dyrbi satiriski wabjenski přinošk strony „Die Partei“ wusyłać. Tole je wčera sakske wyše zarjadniske sudnistwo w Budyšinje rozsudźiło. Skóržbu mdr přećiwo dotalnemu wobzamknjenju zarjadniskeho sudnistwa w Lipsku bu z tym wotpokazana. Tam běchu sudnicy sćelakej kazał, zo ma so wabjenski přinošk pod nadpismom „Die Machtergreifung“ wusyłać.

Nowe kupjele so twarja

Pjenjezy za dwórnišćo

Wojerecy. Dwórnišćo we Wojerecach ma so ponowić. Tohorunja chcedźa zamołwići ćělnje zbrašenym přistup wolóžić a wotpowědne lifty zatwarić. Swobodny stat naprawy financielnje podpěra. Sakski minister za wobchad Martin Dulig (SPD) je dźensa připołdnju spěchowansku zdźělenku we wobjimje 7,35 milionow eurow přepodał.

Tójšto namocy do wólbow

Drježdźany. Hižo wjace hač 900 přeń­dźenjow zliči sakske nutřkowne ministerstwo w zwisku z komunalnymi, europskimi­ a krajnymi wólbami. Najwjace z nich, mjenujcy 815, běchu wobškodźenja wólbnych plakatow. Wosebje po­trjechenej běštej při tym AfD a SPD. Dohromady­ zličichu tež 14 namócnych njeskutkow.

Žiwjenske wočakowanje stupa

Wiesbaden. Žiwjenske wočakowanje zaso stupa. Přerězne žiwjenske wočakowanje wučinješe w Němskej w lěće 2023 za žony 83,3 lěta a za muži 78,6 lět, zwjazkowy statistiski zarjad dźensa rozprawja. Za čas korony mjez lětom 2020 do 2022 je so žiwjenske wočakowanje pola muži kaž tež pola žonow wo 0,6 lět porno lětu 2019 znižiło. Niwow z lěta 2019 pak njeje hišće docpěty.

Roglič přewza čerwjeny trikot

Dźěłarnička zahajena

Miłoćicy. Při Miłočanskej skale bu wčera mjeztym hižo 18. mjezynarodna rězbarska dźěłarnička zahajena. Dohromady dźewjeć wobdźělnikow mjez druhim z Němskeje, Kolumbiskeje, Demokratiskeje republiki Kongo a Turkowskeje chce w přichodnymaj tydźenjomaj twórby ze zornowaca, drjewa a metala zhotowić. Wudźěłki prezentuja 1. septembra na swjedźenju za swójby, zajimcy smědźa tež cyły proces nastawanja wuměłcam přez ramjo hladajo sćěhować.

Myto předewzaćelej

Budyšin. Faza nominowanja wuspěšneho Hornjołužiskeho myta za přede­wzaćelow je zahajena. Mjeztym 29. raz pyta Marketingowa towaršnosć Hornja Łužica­-Delnja Šleska w nadawku Budyskeho a Zhorjelskeho wokrjesa wusahowaceho předewzaćela. Požadanja měli akterojo hač do 17. septembra zapodać. Na internetnej stronje www.ol-up.de je wotpowědny formular podaty.

„Hrádek“ ponowjeny