Krótkopowěsće (26.06.24)
Narodninski „doodle“ z efektom
Budyšin. Składnostnje narodnin Miny Witkojc je platforma Google 28. meje doodle mjenowanu grafiku, zhotowjenu wot Choćebuskeje wuměłče Siggiko, wozjewiła. Jónkrótna akcija je mjez druhim wuskutkowała, zo je sej tójšto zajimcow wideja z recitacijemi basnjow Witkojc na digitalnym kanalu Zwjazka serbskich wuměłcow „SerbskiTV“ wobhladało. Dohromady zliči towarstwo jeničce na tymle dnju něhdźe 1 500 klikow, kaž předsyda Jan Bělk wčera zdźěli.
Njezbožo w konwoju
Triebel. Na wróćojězbje z wobydlerskeje rozmołwy we Vogtlandźe wčera je awto, w kotrymž bě mjez druhim sakski ministerski prezident Michael Kretschmer (CDU) z pasažěrom, njezbožo zawinowało. Jězdźidło bě so sornje wuhibnywši přewodźaceho awta dótknyło. Zranił so něchtó njeje, nasta pak wěcna škoda.
Máchovo jezero sej wotkryć
Krótkopowěsće (25.06.24)
Stup dale njepopušći
Drježdźany. Drježdźanske towarstwo Stup dale chce z nowymi wobsahami dotalnych a dalšich čłonow do dźěła wabić.
Mjez druhim chcedźa škotowy turněr přewjesć. Dale móhli sej přirodny camp za serbske swójby w lětnich prózdninach předstajić a mejlowy rozdźělak ma so ponowić. Dźěćacy kruh porno tomu chcedźa dale wjesć.
Spěchuje pólsko-sakske projekty
Drježdźany. Europska unija financuje we wobłuku spěchowanskeho programa Interreg Pólska-Sakska štyri nowe mjezy přesahowace projekty z dohromady 5,5 milionami eurow. Mjez nimi je z 1,1 milionom spěchowany projekt, w kotrymž kooperuja Pólski centrum za technologiske wuwiće z Wrócławja, TU Drježdźany a Budyski centrum załožićelow tzwr na dobro wuwiwanja MINT-kompetencow młodostnych.
Hornjołužičan nowy šef
Krótkopowěsće (24.06.24)
Lěsy tuchwilu derje zastarane
Pirna. Lěsy w Sakskej su hladajo na lěćo tuchwilu derje z wodu zastarane. Situacija je lěpša hač lěta do toho, zwurazni wčera rěčnik statneho zawoda Sakski lěs Renke Coordes. Hladajo na dlěše suche a horce periody kaž tež strowotu štomow w lěsach je to jara wažne. Sezona lěsnych wohenjow je dotal přerězna.
Dobry wothłós na zběrku
Budyšin. We wobłuku rjadu Zwjazka serbskich wuměłcow „tracTare“ je minjeny pjatk dźesać zajimcow w Budyskej kehelerni wo antologiji „Prěni raz“ diskutowało. Mjez druhim stej wudawaćelka Marka Maćijowa a awtorka Sylwija Šěnowa dotal dobry wothłós ciloweje skupiny – zběrka měri so předewšěm na čitarjow w starobje dwanaće do 14 lět – na knihu wuzběhnyłoj.
Čěska – chipowa wulkomóc?
Krótkopowěsće (21.06.24)
Kubłanisćo strukturu změni
Smochćicy. Kubłanišćo swjateho Bena ma w přichodźe prawnisku formu towaršnosće z wobmjezowanym rukowanjom być. Tole je jedna z mnohich změnow na městnje. Dale wutworja městno jednaćela, wobłukaj kubłanje a přenocowanje matej so dźělić. Dotalny nawoda poda so kónc lěta jako nawoda katolskeho kubłanja dorosćenych do Drježdźan, hdźež změje nowe sydło.
Biosfera 6 wušła
Budyšin. Za šulerjow 6. lětnika Serbskeho gymnazija je nowa serbska wučbnica biologije „Biosfera 6“ wušła. Z Licencneho wudaća nakładnistwa Cornelsen móža šulerjo wot noweho šulskeho lěta wuknyć. Serbskaj wučerjej a fachowcaj Rejza Šěnowa a Konrad Lipič staj wučbnicu, kotraž wobsahuje pjeć kapitlow, do serbšćiny přełožiłoj.
Wo Moskwu wjace njerodźa
Krótkopowěsće (20.06.24)
Na kubłansku konferencu
Budyšin. Šulerjow wukmanić, naslědnje myslić a jednać, to je tema 3. fachoweje kubłanskeje konferency Serbskeho šulskeho towarstwa. Pod hesłom „RěčMY“ přihotuje ju jednaćel SŠT zhromadnje z předsydstwom. Wučerjo, referendarojo, socialni pedagogojo a studenća pedagogiki kaž tež dalši zajimcy su štwórtk, 29. awgusta, do klóštra Marijneje hwězdy w Pančicach-Kukowje přeprošeni.
Sejm uniwersiće přihłosował
Choćebuz/Podstupim. Puć za prěnju medicinsku uniwersitu Braniborskeje, na Carla Thiemowym klinikumje w Choćebuzu, je doskónčnje zrunany. Krajny sejm je wčera jednohłósnje zakoń wo zawjedźenju statneje uniwersitneje mediciny w kraju schwalił. Projekt je wobstatk spěchowanskeho pakćika změny strukturow. Prěni studowacy maja w zymskim semestrje 2026/2027 startować.
Dwaj měsacaj prjedy zakónčili
Krótkopowěsće (19.06.24)
Elewojo wostanu na dalše lěto
Budyšin. Aquina Žurec, Bernadet Šnajdrec a Ole Schmidt budu na dalšu hrajnu dobu elewojo při Němsko-Serbskim ludowym dźiwadle w Budyšinje. Tole dźiwadło wčera zdźěli. W aktualnej hrajnej dobje běchu woni inscenaciju „Zhub so, baby, zhub so“ předstajili, kotruž chcedźa přichodnu hrajnu dobu tež němsce zahrać. Tuchwilu skutkuja woni w lěćnym dźiwadle sobu.
Wokno Lěwicy wobškodźili
Budyšin. W nocy wot póndźele na wčerawšu wutoru su njeznaći wokno běrowa wokrjesneho zwjazka Lěwicy na Budyskej Šulskej hasy z plesternakom wobškodźili. Wokrjesna jednaćelka Lěwicy Jana Lübeck je wčera policiju informowała. Dotal je njeznate, na koho je so njeskutk měrił. Prawdźepodobnje pak ma to politiski pozadk. Politikarjo Lěwicy nadběh raznje zasudźa.
Městnosć projekta tajna
Krótkopowěsće (18.06.24)
Nowe wukubłanske móžnosće
Berlin. W zwisku ze změnu strukturow w brunicowych regionach na wuchodźe Němskeje su tři nowe wukubłanske poskitki wutworili. Tak chcedźa dualne wukubłanje fachowcow we wotpowědnych kónčinach spěchować, zdźěli wčera zwjazkowe hospodarske ministerstwo. To potrjechi wukubłanske směry we wobłukach hladanje, mechatronika a digitalizacija.
Dóstanu wjace mzdy
Budyšin. Dźěłaćerjo twarskeje branše w Budyskim wokrjesu dóstanu w přichodźe wjace mzdy. Přerěznje budźe tomu 260 do 380 eurow wjace na měsac, zdźěli dźěłarnistwo IG BAU wuchodna Sakska, kotrež so nad nowym tarifowym wobzamknjenjom wjeseli. Dźěło je z tym dale a atraktiwniše. Mjeztym so zaso wudani w twarskim wobłuku dźěłać.
Trjebaja 35 milionow eurow
Krótkopowěsće (17.06.24)
Spěw „dźěćiny“ přistupny
Radwor. Spěw „Radworska dźěćina“ su wčera wječor na wšěch streamingowych platformach na kanalach Noweje Doby wozjewili. Čłonojo skupiny su spěw napisali a produkowali. Interpretowali pak su jón dźěći z Radworja a wokolnych wsow. Refren spěwa projektny chór nazymskeho eksperiMINT-campusa a štučki rapuje Julian Bejmak. Nadawk za produkciju je Radworska staršiska iniciatiwa spožčiła.
Chcedźa wušo hromadźe dźěłać
Berlin. Sakski ministerski prezident Michael Kretschmer (CDU), jeho braniborski kolega Dietmar Woidke (SPD) a knježacy měšćanosta Berlina, Kai Wegner (CDU), chcedźa hladajo na zastaranje z wodu we Łužicy hišće wušo hromadźe dźěłać. To zwuraznichu woni na wurjadnej rozmołwje w zastupnistwje Swobodneho stata Sakskeje minjeny pjatk w Berlinje. W přichodźe čakaja dale a wjetše wužadanja nastupajo zastaranje z wodu.
Prawicarjo ležownosće kupuja
Krótkopowěsće (14.06.24)
Kruh dźěła zaměrnje dale
Mužakow. Łužica chce so z regionom zeleneje energije stać, kotryž je po cyłej Europje jónkrótny. Wčera su so zastupjerjo Łužiskeho kruha w Mužakowje zešli a so na dalše postupowanje dojednali. Hač do nazymy maja so konkretne namjety zdźěłać. Zdobom je dalše zeńdźenje ze zastupjerjemi EU w Brüsselu předwidźane.
Domowina prosy wo namjety
Budyšin. Zwjazkowe předsydstwo Domowiny namołwja župy, serbske towarstwa, druhe cyłki a jednotliwcow, namjety kandidatow za wólby noweje Rady za serbske naležnosće Sakskeje hač do 15. žnjenca zapodać. Namjety njech pósćelu z wupjelnjenym a podpisanym naprašnikom za kandidatow, kotryž je na internetnej stronje Domowiny přistupny, na .
Wokrjes dyrbi lutować
Krótkopowěsće (13.06.24)
Wićaz nikoho njewumjezuje
Budyšin. Budyski krajny rada Udo Wićaz (CDU) chce ze wšěmi „legitimnje wolenymi wokrjesnymi radźićelemi“ kooperować, tež z tymi, kotřiž su z mandatom AfD abo „Swobodnych Saksow“ woleni. To zdźěli Wićaz w interviewje ze Sakskimi Nowinami. Wuslědki wólbow je wočakował, ludźo so tomu wobaraja, zo spytaja strony a medije jim nanuzować, kak dyrbiš myslić a z kim směš rěčeć.
Prezident wopyta Łužicu
Choćebuz/ Lubnjow. Zwjazkowy prezident Frank-Walter Steinmeier (SPD) wopyta dźensa, štwórtk, Łužicu. Na zetkanju na BTU w Choćebuzu chce so mjezynarodna delegacija, kotraž Steinmeiera přewodźa, wo změnje strukturow we Łužicy informować. Dale stej jězba z čołmikom a přijeće ministerskeho prezidenta Dietmara Woidke planowanej.
Projekty w regionje spěchuja
Rakecy. 15 projektow w regionje dóstanje lětsa spěchowanje přez tak mjenowany LEADER-rum Hornjołužiska hola a haty. Na swojim posedźenju 10. junija je wotpowědny gremij tole rozsudźił, pisa OHTL na swojej internetnej stronje. Dohromady 14 500 eurow woni za projekty nětko nałožuja.
