Krótkopowěsće (09.01.25)
Podpěruje Hornjołužiske kliniki Budyšin. Z dohromady 225 000 eurami chce sakske knježerstwo Hornjołužiske kliniki (OLK) podpěrować. Spěchowansku zdźělenku je statna ministerka za infrastrukturu a wuwiwanje kraja Regina Kraushaar (CDU) wčera přepodała. Z pjenjezami z fondsa simul+ InnovationHub spěchuje Sakska prócowanja OLK, nowe móžnosće mediciniskeho zastaranja ludnosće na kraju wuwiwać.
Dalše zetkanje planowane
Hodźij. Serbske ewangelske towarstwo chce lětsa w aprylu serbski ewangelski kónc tydźenja w Hainewalde w Žitawskich horinach zarjadować. Přeprošene su dźěći, młodostni, swójby, samostejacy a wuměnkarjo, kiž so na serbsku zhromadnosć wjesela. Přizjewjenja su hač do 9. měrca w serbskej superintendenturje w Hodźiju móžne.
Potajnstwa biblioteki wotkryć
Krótkopowěsće (08.01.25)
Pjenjezy za nowe drasty
Budyšin. Na swojim nowolětnym přijeću přepoda Dirk Hertle, předsyda Lionscluba Budyšin, wčera młodźinskej rejowanskej skupinje Serbskeho ludoweho ansambla, „Łužičanskej rapsodiji“, spěchowanski šek we wysokosći 1 500 eurow. Pjenjezy chcedźa za zhotowjenje trěbnych nowych drastow wužiwać. Za pjenjezy so intendant SLA, Tomas Kreibich-Nawka, wutrobnje podźakowa.
Policist žiwjenje přisadźił
Lauchhammer. Při slědźenju za paduchami awtow je zastojnik Drježdźanskeje policije wčera w Lauchhammeru zemrěł. 32lětny je so na mjezy přesahowacym zasadźenju wobdźělił. Jako chcyše awto kontrolować, tute do njeho zajědźe. Politikarjo z Braniborskeje a ze Sakskeje zwuraznichu swoje sobužarowanje. Dokładne přičiny nastupajo smjerć policista fachowcy nětko přepytuja.
Kriminalna policija přepytuje
Krótkopowěsće (07.01.25)
Pokročuja z wuznamjenjenjom
Budyšin. Wuznamjenjenje angažowanych sakskich wobydlerjow ze Sakskej kartku za čestnohamtskich so pokročuje. To zdźěli Budyski měšćanski zarjad, w kotrymž móža so namjety a próstwy za wuznamjenjenje zapodać. Mytowani maja z kartku na přikład potuńšeny zastup w muzejach, kupjelach abo w kulturnych zarjadnišćach. Wot spočatka programa je Swobodny stat hižo wjac hač 21 000 kartkow za čestnohamtskich wustajił.
Wjele padow trochowali
Drježdźany. Pobrachowacych deklaracijow za ležownostny dawk dla su financne zarjady w Sakskej hač do kónca nowembra 135 000 trochowanjow přewjedli, zdźěli nětko sakske financne ministerstwo na naprašowanje. Wjace hač 1 673 000 zdźělenkow bu w Sakskej wobdźěłanych a mějićelam ležownosćow sposrědkowanych. Nimale 600 000 znapřećiwjenjow je dóšło.
Wosebitu listowu znamku wudali
Krótkopowěsće (06.01.25)
Premjeru dožiwili
Sulšecy. Towarstwo Bratrowstwo Kulowskeje wosady je zawčerawšim w Sulšečanskim kulturnym domje swój lětny swjedźeń wotměł. Tam dožiwichu přitomni premjeru dźěćaceho dźiwadła towarstwa. Tohorunja bu tam dźiwadłowe zetkanje připowědźene. Wjace nadrobnosćow zhonja čitarjo zajutřišim w dźeniku.
Towarstwo prosy wo přizjewjenja
Drježdźany. Předsyda towarstwa „Stup dale“ Christoph Cyž skedźbnja na wohroženu serbsku dnjowu skupinu w Drježdźanskim Nowym měsće. Dokelž dohromady pjeć dźěći lětsa skupinu wopušći, hrozy strach, zo jón měšćanske zarjadnistwo rozpušći. Nowe přizjewjenja dotal njepředleža. Na poskitku zajimowani starši njech so rady pola towarstwa přizjewja.
Towaršnosć bilancuje
Krótkopowěsće (03.01.25)
Clemens chce 100 šulow wopytać
Drježdźany. Nowy sakski kubłanski minister Conrad Clemens (CDU) chce nowe lěto z turu po šulach zahajić. W běhu 100 dnjow chce wón 100 kubłanišćow wopytać a so na městnje wo mnohostronskej šulskej krajinje informować, zdźěli nětko kultusowe ministerstwo w Drježdźanach. Clemens chce z nawodami šulow, wučerjemi, zastupjerjemi staršich a šulerjemi wo aktualnych wužadanjach rěčeć.
Wjace ludźi bjez dźěła
Budyšin. We wobwodźe Budyskeje agentury za dźěło, kotremuž Budyski a Zhorjelski wokrjes přisłušatej, bě loni w decembru 19 943 bjezdźěłnych přizjewjenych. To je porno předchadźacemu měsacej 166 wosobow (0,8 procentow) wjace. Porno decembrej lěta 2023 je to 204 wosobow wjace. Kwota bjezdźěłnosće je na 7,3 procenty stupała. Před lětom wučinješe kwota 7,2 procentow.
Šćedriwy dar wopomnišću
Krótkopowěsće (02.01.25)
Getrud Wincarjowa zemrěła
Čorny Chołmc. Dołholětna wjesnjanostka a wjesna předstejićerka Čorneho Chołmca je minjenu njedźelu w starobje 84 lět zemrěła. W lěće 1991 bě wona krótki čas zapósłanča CDU w sakskim krajnym sejmje. W Čornym Chołmcu je wona wjele zeskutkowniła. Na jeje iniciatiwu je we wsy Krabatowy młyn nastał. W nowembrje lěta 2016 dósta wona za swój čestnohamtski angažement zasłužbny rjad Zwjazka.
Mike Hauschild nominowany
Budyšin. Swobodni wolerjo Budyskeho wokrjesneho zjednoćenstwa su swojeho kandidata za wólbny wokrjes 155/Budyšin 1 wolili. Čłon Budyskeje měšćanskeje rady, radźićel Budyskeje wokrjesneje rady a samostatny rjemjeslniski mišter Mike Hauschild budźe zaměry a hódnoty Swobodnych wolerjow we wólbnym boju wo sydło w zwjazkowym sejmje zastupować.
Dóstanu wjace mzdy
Krótkopowěsće (30.12.24)
Komuny we wuwzaćnym stawje
Drježdźany. Města a gmejny w Swobodnym staće maja po informacijach Sakskeho zwjazka městow a gmejnow (SSG) prěni raz dźěru w etaće, kotraž dohromady wjace hač jednu miliardu eurow wučinja. Komuny su we wuwzaćnym stawje, SSG tele dny zdźěli. Mjeztym zo dochody dawkow inflacije dla njepřiběraja, wudawki dale stupaja.
Žane nowe pady zwěsćili
Drježdźany. W Sakskej njejsu fachowcy w minjenych štyrjoch měsacach žadyn nowy pad afriskeje swinjaceje mrětwy zwěsćili. Naprawy přećiwo wupřestrěću mrětwy su tuž wuspěšne, zdźěli nětko sakske socialne ministerstwo. Předewšěm na sewjeru Budyskeho wokrjesa běchu wjele aktiwnych padow. W Budyskim a Zhorjelskim wokrjesu pak zawěranske pasma dale wobsteja.
Knižnu „archu“ přepodali
Krótkopowěsće (23.12.24)
Michel a Herbst na čole
Drježdźany/Kamjenica. Łužiska zapósłanča SPD w zwjazkowym sejmje Kathrin Michel je načolna kandidatka swojeje strony w Sakskej w dočasnych wólbach. Delegaća su Michel, kotraž je tež krajna předsydka strony, z 85 procentami hłosow na prěnje městno krajneje lisćiny wolili. Jako načolny kandidat FDP w Sakskej bu kónc tydźenja Torsten Herbst woleny, kiž je parlamentariski jednaćel.
Dróha z nowym mjenom
Tšupc. Na česć regionalneho nałožka bu w Tšupcu puć mjez tamnišim busowym zastanišćom Tšupc najs a Cyrkwinskej předwčerawšim oficialnje na Zapustowa gaska/Fastnachtsgässchen přemjenowany. Iniciator je Zapustowe towarstwo Tšupc, kotrež chce z akciju na „nałožk skedźbnić, kotryž so hižo 200 lět w Delnjej Łužicy pěstuje“. Přemjenowanje twori „zazběh jubileja“, kotryž ma so klětu „z kopicu zarjadowanjow woswjećić“.
Ponowjenu cyrkej wotewrěli
Krótkopowěsće (20.12.24)
Město kołu přistupi
Choćebuz. Město Choćebuz je wot noweho lěta sobustaw Łužiskeho koła. Zastupjerjo měšćanskeje rady hłosowachu zawčerawšim za přistup města do zhromadneho zwjazka komunow. Kaž Choćebuski wyši měšćanosta Tobias Schick zwurazni, je město lokomotiwa změny strukturow a tuž běše přistup logiska konsekwenca. Łužiskemu kołu budźe wot 1. januara 57 komunow přisłušeć.
Płaćizny znowa stupali
Kamjenc. Twarić je w Sakskej dźeń a dróše. Hladajo na loni je indeks twarskich płaćiznow za bydlenske domy wo 3,3 proc. stupał, zdźěli wčera krajny statistiski zarjad Kamjenc. Hižo loni zwěsćichu statistikarjo rozrost wo 10,5 proc. Předewšěm je wutwar domu droha naležnosć.
Serbske powěsće z pomocu KI
Krótkopowěsće (19.12.24)
Jednanja wobkrućili
Zhorjelc. Kaž z rešeršow sćelaka MDR Investigativ wuchadźa, mějićel Zhorjelskeje twornje Alstom hižo měsacy z brónjenskim koncernom KNDS jedna. Tole je Alstom nětko samo wobkrućił. Detaile hišće žane znate njejsu. Po informacijach MDR pak chcedźa tam mjez druhim dźěle za pancer typa Boxer zhotowić.
Dalši móst zawrjeny
Großenhain. Po pruwowanju mosta B101 na juhu Großenhaina we wokrjesu Mišno, je twar wotnětka za wobchad zawrjeny. Nětko tam krótkodobnje spotorhanje mosta přihotuja, zdźěli krajny zarjad za dróhotwar. Z toho potrjechene su šoferojo jězdźidłow a zwisk Němskeje železnicy mjez Drježdźanami a Berlinom. Po tym, zo je so Drježdźanski Caroliny móst sypnył, fachowcy w Swobodnym staće mosty přepruwuja.
„Ludowědne“ kachle wuchowali
