Mósćanska firma nominowana

Podstupim. Za lětuše Braniborske myto přichoda bu dohromady dwanaće předewzaćow nominowanych. Mjez kandidatami je firma ERIDES z Mósta. Zawod zhotowja meble za běrowy, hotele a hladanske domy regiona. Mějićel Martin Gründer je jón „na přichod nastajił, digitalizaciju procesow nastorčił a dźiwa kruće na naslědnosć“. Dobyćerjow prezentuja 22. nowembra w Berlinje.

Za muzeje a domizniske stwy

Budyšin. Dalekubłanje za akterow muzejow a domizniskich stwow wotměje ZARI, syć za serbsku rěč a regionalnu identitu, štwórtk, 28. nowembra w Stróžanskim Domje tysac hatow. Přizjewić móža so zajimcy hač do 22. nowembra pod (03591) 3163853. Na programje steja wodźenje po šulskim muzeju, prezentacija woprašowanja a referat zastupjerja iniciatiwy „Łužiska muzejowa krajina“.

Čěska pyta lawa 

Słowjenjo so schadźuja

Košice. Seminar słowjanskich mjeńšin so wot dźensnišeho hač do njedźele w słowakskich Košicach wotměwa. Třěšny zwjazk narodnych mjeńšin w Europje FUEN zarjadowanje z towarstwom Čechow w Słowakskej organizuje. Na nim wobdźěleja so ze stron Domowiny městopředsyda Hartmut Leipner, hłowna jednaćelka Judit Šołćina a referent za kulturu a wukraj Clemens Škoda.

Mytuja humanitarny angažement

Zhorjelc. Prezidentka Mjezynarodneho komiteja čerwjeneho křiža Mirjana Spolaric Egger je z lětušej lawreatku Mjezynarodneho mostoweho myta europskeho města Zhorjelc-Zgorzelec. Z 2 500 eurami dotěrowane wuznamjenjenje spožča jej za „wusahowacy angažement a wulku wušiknosć jako mostytwarča mjez ideologijemi a nabožinami.“ Mjez druhim zasadźuje so Egger za dodźerženje humanitarneho prawa we wójnje.

Pad „Monika“ póńdźe dale

Druhe městno dobyli

Budyšin. Město Budyšin je we wobłuku krajneho wubědźowanja „Ab in die Mitte“ 2. městno a z tym 40 000 eurow dobyło. Město je so z iniciatiwu „Sagen machen Handel Bautzen. Sagenhaft wandelbar“ na wurisanju wobdźěliło. Z projektom chcedźa zamołwići serbske figury powěsćow w měsće dožiwjenja połne spřistupnić.

Dobroćelski cil docpěty

Budyšin. Rezonanca na 4. Budysku chórowu akademiju generacijow zakónčacy beneficny koncert w Cyrkwi Marje a Marty (SN rozprawjachu) bě „hladajo na wuměłski wukon runje tak kaž na dobroćelski­ cil přewšo pozitiwna“. Po informacijach­ projekt wuhotowaceho ser­wisoweho kluba Rotary Bautzen-Budyšin zezběrachu dohromady 5 031 eurow na dobro dźěći a wosebje syrotow w Ukrainje.

Wotćišć zadka trěbny

Přechodne rozrisanje našli

Kamjenc. Spěchowanska šula w Bambruchu wot jutřišeho přechodnje do Kamjenskeho Lessingoweho gymnazija přećehnje. Tole su zamołwići zastupjerjo Budyskeho wokrjesa z krajnym zarjadom za šule a kubłanje a šulskim nawodu organizowali. Šulerjo změja tuž wot jutřišeho zaso prezencnu wučbu. Na twarskich dźěłach při woknach su dźěłaćerjo minjeny tydźeń škódnu maćiznu zwěsćili, čehoždla njebě twarjenje šule hižo přistupne.

Tunl jutře dospołnje zawrjeny

Budyšin. Tunl zwjazkoweje awtodróhi A4 pod Limasom jutře wot 8 do 17 hodźin dospołnje zawru. Přičina toho su hladanske dźěła. Wobchad chcedźa zamołwići po znatych wobjězdkach wodźić. Dźěłaćerjo tunl tuchwilu saněruja. Tohodla je jedna z dweju čarow zašlahana. Jutře pak stej wobě čarje potrjechenej.

Wjele přidružnikow přistajili