Krótkopowěsće (27.03.26)
Tarifowy konflikt rozrisałoj
Drježdźany. Tarifowy konflikt w sakskim zjawnym bliskowobchadźe je rozrisany. Dźěłarnistwo Verdi je so z komunalnym zwjazkom dźěłodawarjow na nowe tarifowe zrěčenje dojednało. Mjez druhim su přistajeni štyri lěta před wupowědźenjom škitani a dóstanu wo 20 proc. wyšu lětnu přiražku. Tež přiražki za nócne dźěło maja stupać. Ze swojim žadanjom 35hodźinskeho dźěłoweho tydźenja z połnej mzdu so dźěłarnistwo přesadźiło njeje.
Pasionska hra online přistupna
Chrósćicy/Budyšin. Nahrawanje loni předstajeneje pasionskeje hry „Sćěhuj mje!“ je wot dźensnišeho na platformje YouTube přistupne, a to na kanalu studija Lucija, kotryž je produkciju zwoprawdźił. Zajimcam bjez znajomosćow serbšćiny poskićeja podtitule w sydom rěčach, mjez druhim w pólšćinje, jendźelšćinje, italšćinje a francošćinje.
Nowa wěža po 120 lětach
Krótkopowěsće (26.03.26)
Prěni słownik wudmow online
Berlin. „Dolnoserbki gódłowy słownik“ rěka delnjoserbsko-němska zběrka wudmow, kotraž je wotnětka na martin.ballaschk.com přistupna. Wona wopřijima 457 zapiskow, rjadowanych po wotrězkach kaž na přikład „Žlokać, žrać a jokać“ abo „Žónkarjo a stari sancy“. Měto Balašk je ju na zakładźe słownika Manfreda Starosty zestajił, wšako so „za tajkimi njedušnosćemi swojeje wowki njeprašeš“, awtor na swojej stronje piše.
Najmjenje pjenjez rjemjeslnikam
Kamjenc. Přerězna měsačna mzda ludźi, kiž w Sakskej połnje dźěłaja, wučinja 4 100 eurow brutto, zdźěla Sakski statistiski krajny zarjad. Najwjace zasłužeja statni rěčnicy a lěkarjo z 8 960 resp. 7 877 eurami, najmjenje rjemjeslnicy kaž třěchikryjerjo (3 126 eurow), molerjo/lakěrarjo (2 903 eurow) a mulerjo (2 844 eurow).
Kóždy štwórty z wukraja
Krótkopowěsće (25.03.26)
Pytaja najrjeńše kolekcije jejkow
Budyšin. Po zwučenym wašnju su dźěći a młodostni hač do 24 lět přeprošene, swoje kolekcije jejkow za wubědźowanje wo najrjeńše serbske jutrowne jejko zapodać. Hač do 13. apryla móža je w regionalnych běrowach Domowiny w Slepom, Wojerecach a Chrósćicach kaž tež w Serbskimaj kulturnymaj informacijomaj w Budyšinje a Choćebuzu wotedać. Dalše informacije dóstanu zajimcy pod www.sorbische-volkskultur.de.
Zastojnicy měli profitować
Drježdźany. Tež zastojnicy w Sakskej měli ze zwyšenja tarifa zjawneje słužby profitować. CDU a SPD stej za to naćisk zakonja z wotpowědnym přiměrjenjom mzdow přihotowałoj a chcedźa jón Sakskemu krajnemu sejmej předpołožić. Zakład za wyše mzdy su wuslědki tarifowych jednanjow zjawneje słužby. Wot 1. apryla dóstanu přistajeni wjace mzdy.
Muzej kompletnje ponowja
Krótkopowěsće (24.03.26)
Dźiwadło w srjedźišću festiwala
Zhorjelc. „Geschöpferisch“ je hesło lětušeho Łužiskeho festiwala, kiž wotměje so wot 25. awgusta do 13. septembra po wšej Łužicy. Ćežišćo programa twori dźiwadło ze štyrjomi nowymi inscenacijemi w Choćebuzu, Běłej Wodźe a we Wulkich Rědorjecach.
Zastojnstwo wotstronić
Drježdźany. Sakski kultusowy minister Conrad Clemens (CDU) ma zastojnstwo wučerjow za „zastarske“ a je do prašenja staja. Wón zasadźuje so za wotstronjenje zastojnstwa, ale jenož we wobłuku zhromadneho rozrisanja wšitkich zwjazkowych krajow. Jako přičiny mjenuje wón předewšěm napjate financne połoženje kaž tež wysoke kóšty. Tuchwilu je něhdźe 40 proc. 32 000 wuwučowacych w Sakskej w zastojnstwje. Tute rjadowanje je hač do lěta 2030 wobmjezowane.
Šulerjo na wuprawje w Pólskej
Krótkopowěsće (23.03.26)
Dalšu dźěłarničku přewjedłoj
Budyšin. Mjeztym wosmy raz běštaj Lubina a Dušan Hajduk-Veljković na literarnu dźěłarničku prosyłoj, kotraž přewjedźe so minjenu sobotu w nošerstwje Załožby za serbski lud w Budyskim Serbskim domje. Tři wobdźělniče dźěłarnički zaběrachu so z dlěšej prozu resp. krótkoromanom. Za to běchu w přihotach swójski tekst a ekspozej zapodali. Na zakładźe rěčneje a wobsahoweje analyzy naćiski rozjimowachu a wobdźěłachu.
CDU staji krajneho radu
Baršć. We wokrjesu Sprjewja-Nysa bu kandidat CDU Martin Heusler wčera z 51,5 procentami hłosow wolerjow za krajneho radu wuzwoleny. Kandidatka AfD Christine Beyer jemu z 48,5 procentami snadnje podleža. W prěnim kole wólbow bě kandidatka AfD najwjac hłosow dóstała
Hłownu zhromadźiznu wotměli
Krótkopowěsće (20.03.26)
Olympiada zakónčena
Wodowe Hendrichecy. Olympiada serbskeje rěče je so dźensa we Wodowych Hendrichecach zakónčiła. W kategoriji nastawki rěčneje skupiny 1 je Syman Brückner z Budyskeho Serbskeho gymnazija prěnje městno dobył. W rěčnej skupinje dwaj je to Josefina Metašec z Ralbičanskeje wyšeje šule docpěła. W rěčnej skupinje 3 móžeše Josepha Mersiowsky z Budyskeho Serbskeho gymnazija najlěpje wěcne teksty wobdźěłać.
Serbski dźěłowy kruh so zešoł
Kamjenc. Społnomócnjeny za serbske naležnosće w Budyskim wokrjesu, Tomaš Korch, je wčera prěni raz w tutej wólbnej periodźe dźěłowy kruh za serbske naležnosće na wuradźowanje zwołał. Wón informowaše na posedźenju w Kamjencu wo swojim dźěle, kotrež wukonja wot oktobra 2025. Čłonojo gremija chcedźa plan naprawow wudźěłać, za kotryž hižo wšelake namjety předleža.
Pacienća dóstanu zličbowanku
Krótkopowěsće (19.03.26)
Mjenje porodnych stacijow
Kamjenc. Ličba chorownjow, kiž maja porodnu staciju, je so w Sakskej wot časa přewróta wo wjac hač třećinu znižiła. Kaž Krajny zarjad za statistiku w Kamjencu zdźěli, je to dokładnje 37 procentow mjenje chorownjow. Tuchwilu móža žony w swobodnym staće w 34 domach swoje dźěćo porodźić. W lěće 1991 bě jich 20 wjace.
Wjelk w hońtwjerskim prawje
Podstupim. W Braniborskej su wjelka do hońtwjerskeho prawa přiwzali, zo móhli problematiske zwěrjata lóšo wottřělić a tak skót na pastwach lěpje škitać. Krajny sejm je tole z hłosami SPD, CDU a BSW wobzamknył. Zapósłancy AfD přećiwo tomu hłosowachu abo so hłosa wzdachu. Přirodoškitne organizacije kaž NABU změnu wotpokazuja a namołwjeja k protestej. Změny po wšěm Zwjazku dyrbi Zwjazkowa rada hišće wobkrućić.
DiCaprio njeje w Čěskej
Krótkopowěsće (18.03.26)
Twarske dźěła zahajili
Choćebuz. Nimale dwaj kilometraj dołha šćežka za pěškow a kolesowarjow ma Liškowski jězor na sewjerowuchodźe Choćebuza z centrumom města zwjazać. Twarske dźěła za tak mjenowanu „jězorowu wósku“ su zahajene, zdźěli měšćanske zarjadnistwo. Šćežka nastanje zdźěla na bywšej železniskej čarje. Za to dźěłaćerjo wuhibki a prěkuše wotstronja. Pućik budźe asfaltowany.
Jězorina we wudaću magacina
Zły Komorow. Nowe wudaće magacina Łužiska jězorina 2026/2027 předleži, turistiski zwjazk jězoriny informuje. 76 stron wopřijacy zešiwk skići čitarjam stawizny, pokiwy a inspiracije kónčiny. Magacin z nakładom 140 000 eksemplarow je najwažniši ćišćany medij za turistiske zwičnjenje jězoriny. Brošurku dóstanu zajimcy w připóznatych turistiskich běrowach regiona.
Seniorka njezbožo zawinowała
Krótkopowěsće (17.03.26)
Serbja w koaliciskim zrěčenju
Podstupim. We wčera podpisanym koaliciskim zrěčenju SPD a CDU w Braniborskej wěnuje so wotrězk tež Serbam. Koalicija zwuraznja, zo su Serbja njeparujomny dźěl identity Braniborskeje. Tradicije Serbow a jich rěč su kulturne namrěwstwo kraja. Tole chce koalicija tež w přichodźe podpěrować. Zhromadnje ze Zwjazkom a Sakskej Braniborska Załožbu za serbski lud dale spušćomnje financuje. Hišće lětsa ma so wukubłanje wučerjow serbšćiny w Złym Komorowje zahajić.
Kóžde druhe hróšatko ze Sakskeje
Kamjenc. Sakscy ratarjo produkuja w Němskej něhdźe połojcu hrocha, wo tym informuje Krajny zarjad za statistiku w swojej aktualnej přehladce wo plahowanju zeleniny. 7 960 wot cyłkownje 16 484 tonow hrocha běchu loni w swobodnym staće žnjeli. Hladajo na ekologisku produkciju zeleniny w Sakskej pokazuje statistika: Podźěl płoninow za to je so porno 2024 wo 40 procentow na 828 hektarow zwyšił.
„Swoboda kiwa!“ w Budyšinje
Krótkopowěsće (16.03.26)
Bliskowobchad stawkuje
Lipsk. Jutře móhło we wuchodnej Sakskej k wupadam busowych zwiskow dóńć. Přičina su stawki w zjawnym bliskowobchadźe. Na nimi wobdźěla so sobudźěłaćerjo Omnibusoweho wobchada Hornja Łužica, Regionalneho busa Hornja Łužica, DB Regio bus kaž tež wobchadneju zawodow w Zhorjelcu a Wojerecach. Dokładniše informacije su na onlinowych stronach wobchadnych zawodow wozjewjene.
Lětopis 2025 w ćišćanej wersiji
Budyšin. Ludowe nakładnistwo Domowina zdźěla, zo je wotnětka ćišćana wersija aktualneho wudaća wědomostneho časopisa Lětopis na předań. Publikacija Serbskeho instituta wopřijima přinoški rěčespyta, literaturowědy, kulturnych a přirunowacych mjeńšinowych wědomosćow mjez druhim Roberta Lorenca, Jeana-Rémija Carbonneauwa kaž tež Sophie Rädel a Lutza Laschewskeho.
Wusyłanje do wukraja wohrožene
