Krótkopowěsće (17.06.25)
Festiwal bjez hosći z Irana
Budyšin. Přihotowanski wuběrk Mjezynarodneho folklorneho festiwala Łužica – Łužyca – Lausitz je rozsudźił, iranskemu ansamblej Araz-Ildirim wobdźělenje na festiwalu wotprajić. Přičina je dlijenje při wustajenju trěbnych wizumow. Planowane wustupy tamnišu azerbajdźansku mjeńšinu reprezentowaceho cyłka bjez narunanja wupadnu. Program festiwala bu tomu přiměrjeny a je mjeztym na internetnej stronje Domowiny wozjewjeny.
Namjety prawje bórze zapodać
Budyšin. Domowina namołwja, namjety kandidatow za Myto Domowiny, Myto Domowiny za dorost a Čestne znamješko Domowiny zapodać. Wotpowědny formular je na internetnej stronje www.domowina.de wozjewjeny. Namjety hodźa so z mailku abo w zarjedźe Domowiny zapodać. Přizjewjenska doba kónči 30. junija.
Twarja truty za Ukrainu
Krótkopowěsće (16.06.25)
Wuradźuja wo přichodźe
Zhorjelc. Astrofyzikarjo z cyłeho swěta schadźuja so tónle tydźeń w Zhorjelcu. Na mjezynarodnej konferency wobdźěli so něhdźe 550 slědźerjow. Po słowach designowaneho załožerja Astrocentruma Łužica Günthera Hasingera je to najwažniše zarjadowanje swojeho razu na swěće. Mjez dr. chcedźa přichod najwjetšeho radijoweho teleskopa rozjimać.
Myto filmowemu festiwalej
Berlin. Nysowy filmowy festiwal (NFF) bu minjeny pjatk z wosebitym mytom Myta Wilhelma Frickeho wuznamjenjeny. Lawdatorka dr. Grit Lemcyna wuzběhny wosebje „resiliencu a renitencu“ towarstwa Kunstbauerkino, kotrež festiwal najebać „skandaloznje snadny budget“ w třoch krajach lěto wob lěto wuhotuje. Z mytom počesća Zwjazkowa załožba za předźěłanje diktatury SED „angažement za demokratiski dialog w zmysle europskeho dorozumjenja“.
Spytaja baćony přesydlić
Krótkopowěsće (13.06.25)
Serbska skupina zaručena
Drježdźany. Serbska dźěćaca skupina w Drježdźanskim nowym měsće je dźakowano přidatnym přizjewjenjam najprjedy hač do klětušeho zaručena. Tole zdźěli Christoph Cyž, předsyda tamnišeho towarstwa „Stup dale“, po wčerawšej rozmołwje ze zastupjerjomaj Serbskeho šulskeho towarstwa (SŠT) Romanom Grzybom a Marlis Młynkowej. SŠT je nošer skupiny dnjoweje maćerje Sabiny Wagneroweje.
SN na mjezynarodnej konferency
Nova Gorica. Zastupjerjo organizacije Midas – nowinow mjeńšinow – schadźuja so tele dny na generalnej zhromadźiznje w kulturnej stolicy Europy, słowjenskim hraničnym měsće Nova Gorica. Hosćićel je lětsa nowina Primorski dnevnik. Serbske Nowiny (SN) zastupuje tam wyša redaktorka Bianka Šeferowa. Dźensa rozjimaja čłonojo Midas połoženje nowinow mjeńšinow.
Dalši kandidat w Kamjencu
Krótkopowěsće (12.06.25)
Zhromadny signal za załožbu
Berlin. Ze zjawnym listom zasadźujetaj so ministerskaj prezidentaj Sakskeje a Braniborskeje Michael Kretschmer (CDU) a Dietmar Woidke (SPD) za dosahace financowanje Załožby za serbski lud. List zwjazkowemu kanclerej Friedrichej Merzej podpisataj jutře w Berlinje. Jednanja wo pjatym finančnym zrěčenju tuchwilu dale traja.
Thespis-centrum nachwilnje wěsty
Halle nad Solawu. „LOKAL – program za kulturu a angažement“ je iniciatiwa, z kotrejž spěchuja Kulturna załožba Zwjazka, Zwjazkowa centrala za politiske kubłanje a Europska kulturna załožba kulturnych akterow „předewšěm w mjeńšich městach a wjesnych kónčinach Němskeje“. Mjez prěnimi 13 institucijemi a zjednoćenstwami je Budyski Thespis-centrum w nošerstwje Němsko-Serbskeho ludoweho dźiwadła. Jemu, kaž tež tamnym 12 kandidatam přilubja přichodne štyri lěta stajnje 240 000 eurow.
Čěscy wojacy do Kenije
Krótkopowěsće (11.06.25)
Dalše zarjadowanja planowali
Wojerecy. Župa „Handrij Zejler“ Wojerecy je na wčerawšim zeńdźenju wšelake zarjadowanja planowała. Tak je 23. awgusta kubłanska jězba do Njechornja a Hrodźišća předwidźana. Župa chce so na jězbje ze skutkowanjom Měrćina Nowaka-Njechorńskeho a Janom Awgustom Měrćinkom rozestajeć. Hižo 24. julija chce župa „rěčnu swětłownju“ přewjesć, hdźež steji pisana Bretoniska w srjedźišću.
Pytaja spěwarjow za festiwal
Baršć. Łužiski festiwal, kotryž wotměje so wot 25. awgusta do 14. septembra po cyłej Łužicy, pyta za spěwarkami a spěwarjemi za wobydlerski chór. Cyłk změje w inscenaciji „Es kotzt mich an. Ihr Kroppzeug!“ Jürgena Kuttnera „wuznamnu rólu“. Proby zahaja 21. julija w Baršću, zajimcy njech so hač do 22. junija z mailku pod přizjewja.
Jednanja spěšnje zakónčić
Krótkopowěsće (10.06.25)
Spěšnik z nowym mjenom
Choćebuz. Dobrych 22 lět bě ICE Němskeje železnicy (DB) z woponami a mjenami města Choćebuz na němskich kolijach po puću. Wotnětka nowy a wulce moderny ICE 4 nadawk wulkopósłanca přewozmje. Z wodu kórkow bu ICE minjeny pjatk w nowym zawodźe DB na mjeno Choćebuz wukřćeny. Za to bě samo braniborski ministerski prezident Dietmar Woidke (SPD) do města přijěł.
Noweju rěčnikow wuzwolili
Budyšin. Krajny dźěłowy kruh „Serbja“ sakskeje SPD je so minjeny pjatk w Budyšinje schadźował. Na posedźenju su čłonojo noweju rěčnikow wuzwolili. Nimo wospjet wuzwoleneho dr. Měrćina Krawca z Budyšina je Gerhild Kreuziger z Vierkirchena nowa rěčnica. „W našim dwurěčnym regionje njemóže jeničce nadawk Serbow być, so za serbske naležnosće angažować. Tež my Němcy dyrbimy jim bratrowsce poboku stać“, wona wopodstatni.
Memoary Angele Merkel čěsce
Krótkopowěsće (06.06.25)
Minority Safe Pack njepłaći
Luxemburg. Europske sudnistwo je wčera doskónčnje skóržbu FUEN a partnerow přećiwo rozsudej Europskeje komisije wotpokazało, z iniciatiwy „Minority Safe Pack“ (MSPI) žane prawniske konkluzije njesćahnyć. Wjac hač milion ludźi bě MSPI za lěpše spěchowanje kultury a rěče narodnych mjeńšin podpisało, tež Domowina europsku wobydlersku iniciatiwu sylnje podpěrowaše.
Póndźelu zaso dźeń młynow
Budyšin. Wustajeńcy a stare rjemjesło móža wopytowarjo přichodnu póndźelu w mnohich młynach w Sakskej dožiwić. Po cyłym Swobodnym staće so něhdźe 100 młynow na zarjadowanju wobdźěli. Na dnju młynow wobdźělitej so znowa wětrnikaj na kózłach pola Chasowa a w Němcach. Młyn w Barće pak wostanje lětsa zawrjeny.
Sakske koło kulturne herbstwo?
Krótkopowěsće (05.06.25)
Myto Ćišinskeho Weclichej
Budyšin. Myto Ćišinskeho 2025 Załožby za serbski lud spožči so nazymu Měrćinej Weclichej za jeho skutkowanje jako pućrubar serbskeje popularneje hudźby a zaměrne spěchowanje spěwneho dorosta. Ze spěchowanskim mytom Ćišinskeho wuznamjenja Juliana Nyču za jeho wurjadne zasłužby při zapřijeću serbšćiny a serbowědnych temow w digitalnych medijach. Tole rozsudźi kuratorij k spožčenju Myta Ćišinskeho na swojim posedźenju wčera w Budyšinje.
Astrocentrum dale přepytuje
Zhorjelc. Astrocentrum Łužica (DZA) chce dale z wosom točenjemi optimalne stejnišćo za planowany podzemski labor namakać. Tole nam rěčnik DZA Stephan Witschas dźensa wobkrući. Při tym dźe wo najměrniše městno we łužiskim zornowcu, hdźež chcedźa grawitaciske žołmy ze swětnišća přeslědźić. Dotal hišće jasne njeje, kotre konkretne městno w našim regionje so jako najlěpše wukopa.
Dom njedostatkow dla zawrěli
Krótkopowěsće (04.06.25)
Wo prawach informować
Stróža. Serbski prawiznik Hajko Kozel ze Stróže informuje wot nětka w njestajnych wotstawkach zajimcow z mejlku wo wšelakich prawniskich a prawniskopolitiskich prašenjach. Wažne su jemu při tym zwiski do łužiskeho regiona a wubrane temy, kotrež su juristiske ćežišćo jeho skutkowanja. Prěnje wudaće zaběra so mjez druhim z prawami dźěći w zakładnym zakonju Němskeje.
Myto za MINT
Kamjenc. Jessica Holland, šulerka Kamjenskeho Gotthold-Ephraim-Lessing-gymnazija je dobyćerka wosebiteho myta w zwjazkowym finale „Młodźina slědźi“. 18lětna je so w kategoriji biologija z lehnjenskimi ptačkami w Kinsporkskej holi zaběrała. Jako myto, kotrež přepoda jej Zwjazkowy prezident Němskeje, Frank-Walter Steinmeier, smě so na Mjezynarodnej wuměnje Wildlife Research w Šwicarskej wobdźělić.
„Kingdom Come“ syły přiwabi
Krótkopowěsće (03.06.25)
Prózdninske lěhwo wotprajene
Budyšin. Lětsa předwidźane prózdninske lěhwo w čěskim Harrachovje je předsydstwo Serbskeho šulskeho towarstwa (SŠT) wčera wotprajiło. Přičina je, zo faluje towarstwu personal za dohlad dźěći a młodostnych. Na wospjetne wabjenje za dohladom njebě so žadyn zajimc přizjewił. Dalše prózdninske lěhwo we Wodowych Hendrichecach spočatk julija pak SŠT kaž planowane přewjedźe.
Firma Fit ma noweho mějićela
Žitawa. Španiska BlueSun-skupina je Žitawske předewzaće za wopłokowanske srědki Fit přewzała. Hižo dlěši čas běše dotalny mějićel Wolfgang Groß starobnych přičin dla naslědnika pytał. Španiske předewzaće chce Fit tzwr, kotrež měješe loni cyłkowny wobrot 377 milionow eurow, jako samostatnu marku dale wjesć a wšitkich 290 dźěłowych městnow zdźeržeć.
Błysk wjaceswójbny dom zapalił
