Krótkopowěsće (13.05.26)
Firmy dale ćerpja
Drježdźany. Sakska industrijowa a wikowanska komora je w naprašowanju zwěsćiła, zo so mnoho předewzaćelow dale ze stupacymi energijowymi a ćěri-dłowymi płaćiznami bědźi. Wjetšina ludźi stupacych płaćiznow tworow dla mjenje nakupuje, štož hospodarstwo přidatnje poćežuje. Firmy su nuzowane inwesticije přesunyć, pjenjezy lutować a ličbu sobudźěłaćerjow redukować.
Nowe wustawki nadźěłać
Njebjelčicy. Njebjelčanska gmejnska rada je wčera wobzamknyła, hišće hač do klětušeho julija płaćace wuhotowanske wustawki za jednotliwe wsy gmejny wotstronić a nowe nadźěłać. Najebać to přihłosowachu próstwje wobydlerja ze Serbskich Pazlic, kiž chce dodźeržane twarjenje zwottorhać a na samsnym městnje garažu natwarić.
Přihotuja so na jěchanski turněr
Krótkopowěsće (12.05.26)
Wobory dešća dla zasadźene
Budyšin. Krótkeho, ale sylneho dešća dla běchu wčera popołdnju wjacore wohnjowe wobory Budyskeho wokrjesa zasadźene. Wohnjowi wobornicy ze Słoneje Boršće a Budyšina su dróhi zašlahali, zo bychu błóto z puća zrumowali. Tójšto dźěła mějachu tež při kružnym wobchadźe mjez Błohašecami a Prěčecami.
Choćebuz so derje wuwiwa
Köln. Wokrjes Mnichow je hladajo na hospodarstwo najlěpje wuwity region w Němskej. Najlěpši postup pak regis-truje tuchwilu město Choćebuz. To wuchadźa ze studije towaršnosće IW Consult Instituta za němske hospodarstwo. Łužiske město z jeničkej techniskej uniwersitu Braniborskeje hraje tam centralnu rólu w zwisku z wuwićom hospodarstwa.
Wubědźowanje zahajene
Drježdźany. Na lětuše 33. wubědźowanje wo najrjeńšu žnjensku krónu móža so wot wčerawšeho zaso towarstwa, šule, pěstowarnje abo priwatne wosoby přizjewić. Pyšne žnjenske króny budu wot 15. do 20. septembra w měšćanskej cyrkwi swj. Wenceslai we Worcynje (Wurzen) wustajene. Wopytowarjo změja zdobom móžnosć, najrjeńšu z nich sobu wuzwolić.
Krótkopowěsće (11.05.26)
Jednaćelka wuznamjenjena
Podstupim. Hižo štwórć lětstotka počesćuje Braniborska wusahowacy angažement za žiwu europsku mysl z Europskim wopismom. Mjez lětušimi 14 wuznamjenjenymi, kotrymž su dokument 8. meje přepodali, je jednaćelka Łužiskeho festiwala Maria Schulz. Ju wuznamjenichu za jeje kulturne dźěło, kiž zwjazuje, hranicy přewinje a regionej widźomnosć jako europski rum zetkawanja spožča.
Přistajeni protestowali
Čorna Pumpa. Přistajeni energijoweho koncerna LEAG su minjeny pjatk w Čornej Pumpje přećiwo planam zwjazkoweho hospodarskeho ministerstwa protestowali. Woni měnja, zo je wupisanje nowych płunowych milinarnjow njesprawne, dokelž jeničce zapadne kraje z toho profituja. Dotal je njewěste, hač smě LEAG w Čornej Pumpje nowu płunowu milinarnju natwarić.
Rěče mjeńšinow škitać
Krótkopowěsće (08.05.26)
Njedźelu w Zhorjelcu wola
Zhorjelc. Wobydlerjo Zhorjelca wola zajutřišim noweho wyšeho měšćanostu. Tuchwilny wyši měšćanosta Octavian Ursu (CDU) wospjet k wólbam nastupi. Jeho najsylniši kontrahent drje je Sebastian Wippel (AfD). Na wólbnej lisćinje stejitaj dale Sabine Christian (Lěwica) a Hagen Jeschke (njestronjan). Jelizo žadyn z kandidatow njedźelu 50 procentow hłosow wolerjow njedóstanje, zarjaduja 31. meje druhi wólbny přechod..
Köpping: Měr a swobodu škitać
Drježdźany. Sakska socialna ministerka Petra Köpping (SPD) skedźbni składnostnje dźensnišeho dnja wuswobodźenja wot nacionalsocializma, zo njedopomina 8. meja jenož na wjace hač 60 milionow woporow, ale zo nam zdobom wuwědomja, zo njejsu měr, swoboda a čłowjeske prawa samozrozumliwosć. Trjebamy angažement a solidaritu kóždeho jednotliwca, zo bychmy je škitali.
Woheń w Čěskej Šwicy zhašany
Krótkopowěsće (07.05.26)
Woda w fokusu festiwala
Choćebuz. Towarstwo Klima*Kollektiv wuhotuje wot dźensnišeho prěni Sprjewiny festiwal w Choćebuzu. Hač do njedźele steji kołoběh wody kaž tež sprawne a naslědne rozdźělenje tejele resursy w fokusu. Program wopřijima dźěłarnički, filmowe předstajenja a koncertaj skupiny Skaprifischer a spěwytwórca Jacke Schwarza kaž tež wustajeńcu Maje Nageloweje „Woda – wuhlo – Serbja“.
Wjac ludźi dźěła podźělnje
Kamjenc. Wjace hač třećina (35 procentow) přistajenych po wšej Sakskej dźěła podźělnje. Wo tym informowaše wčera Sakski statistiski zarjad w Kamjencu. Ličba je so w minjenych 20 lětach podwojiła. Regionalnje pak su wulke rozdźěle. W Zhorjelskim wokrjesu dźěła 39 procentow přistajenych podźělnje, we wokrjesu Šwikawa je to jenož 31 procentow.
Parada wupadnje
Krótkopowěsće (06.05.26)
Mjenje chorych, wjac mortwych
Drježdźany. Cyłkownje 258 ludźi je w sezonje 2025/2026 w Sakskej na gripu zemrěło, to je telko kaž hišće ženje wot spočatka ličenja padow w lěće 2001. Tole sakske strowotniske ministerstwo wčera zdźěli. Mjez zemrětymi bě 126 muži a 132 žonow. Přerězna staroba wučinješe 86 lět. Cyłkownje bu 28 550 infekcijow přizjewjenych, štož je mjenje hač we wosebje sylnej předchadźacej sezonje.
Syltsku frizišćinu wuknyć
Westerland. Sölring mjenowanu frizišćinu, kiž rěča wobydlerjo na kupje Sylt, móža sej zajimcy wotnětka online hač do niwowa A2 přiswojić. Za přizjewjenje na darmotnym kursu dosaha krótka mejlka z předmjenom, swójbnym mjenom a wužiwarskim mjenom na . W běhu něšto dnjow sćelu ći daty za přistup.
Skućićela wuslědźili a zajeli
Krótkopowěsće (05.05.26)
Kurs slepjanšćiny pokročuje
Slepo. Kurs slepjanšćiny na Njepilic statoku w Rownom dźe dale: Manfred Hermaš je zamołwitosć za to wot Juliany Kaulfürstoweje přewzał, kotraž so po wjelelětnej dźěławosći w regionje redaktorstwu kulturneho časopisa „Rozhlad“ wěnuje. 14 wuknjacych wšelakich generacijow je so wčera na konwersaciju a čitanje zešło. Chcedźa so wotnětka kóždej dwě njedźeli zetkawać, přichodny raz póndźelu, 18. meje.
Kritizuja jednaćelku chorownje
Kamjenc. Radźićeljo Kamjenskeje měšćanskeje rady a Budyskeje wokrjesneje rady su w zhromadnym wozjewjenju wuprajenja jednaćelki Kamjenskeje chorownje Jany Uhlig kritizowali. Wona jednostronsce na debatu wo zawrjenju porodneje stacije a kliniki za gynekologiju reaguje. Zdobom skedźbneja woni na Sakski serbski zakoń, kotryž swobodny stat a wokrjesy zawjazuje, dalewobstaće Serbow w swojim sydlenskim rumje we wšěch žiwjenskich wobłukach škitać. To wopřijima bydlenju blisku porodnu pomoc.
Ponowja trasu pitneje wody
Krótkopowěsće (04.05.26)
Georg Baselitz zemrěł
Salzburg. Georg Baselitz je njeboh. Jako Hans-Georg Bruno Kern lěta 1938 w Němskich Pazlicach narodźeny tworjacy wuměłc, jewišćowy wuhotowar a wysokošulski docent zemrě 30. apryla w Salzburgu. Wosebje swojich mólbow dla bě po wšěm swěće jako jedyn z najwuznamnišich načasnych wuměłcow připóznaty.
Woheń w Čěsko-Sakskej Šwicy
Děčín. Wot soboty so w narodnym přirodowym parku w Čěskej Šwicy pali. Wohnjowa wobora wojuje tež z pomocu kolegow ze Słowakskeje, kiž su helikopteraj wupožčili, na nimale 100 ha wulkej płoninje přećiwo wohenjej. Woheń drje njeje so dźensa dale rozšěrił, pod kontrolu pak hišće njeje. „Zawinił drje je jón čłowjek – cigareta abo njedowolene wohnišćo“, rjekny nowinski rěčnik parka. Loni su něhdźe 300 wohnišćow wotstronili.
Azerbajdźana dla pistu powjetša
Krótkopowěsće (30.04.26)
„Herbstwo Łužicy“ předstajili
Drježdźany. Nošerjo imaterielneho kulturneho herbstwa Sakskeje su so wčera w Drježdźanach zešli. Cyłkownje 21 kulturelnych formow ma w Sakskej tónle titul, mjez nimi su tež Serbja. W twarskej hěće Zwingera předstaji Susann Troppa projekt ,,Herbstwo Łužicy“, při čimž wosebje rólu imaterielneho kulturneho herbstwa Serbow wuzběhny.
Wulki nowy dołh za Saksku
Drježdźany. Načolni politikarjo koalicije CDU a SPD w Sakskej su so wčera (po redakciskim kóncu SN) tola hišće na kompromis za zakłady etata swobodneho stata za lěće 2027/28 dojednali. K tomu słuša přidatne zadołženje Sakskeje we wysokosći 1,4 miliardow eurow, štož bě CDU do toho wotpokazała. Nimo toho chcedźa hač do lěta 2040 w krajnej słužbje 8 773 dźěłowych městnow wottwarić.
Dźěławosć derje zaběžała
Krótkopowěsće (29.04.26)
Dom Njechorńskeho ponowja
Budyšin. Wuběrk Zwjazkoweho předsydstwa Domowiny je wčera wobzamknył, zo ma so Dom Měrćina Nowaka-Njechorńskeho ponowić. Twarska dowolnosć wot měrca předleži. W meji maja so twarske dźěła zahajić. Murje domskeho su włóžne a zahroda nima hižo charakter, kajkiž bě jej serbski wuměłc swój čas dał. Dom ma dale jako muzej a zetkanišćo słužić.
Sakski etat dale njejasny
Drježdźany. W běhu tři dny trajacych jednanjow njeje sakska koalicija CDU a SPD konflikty w zwisku z planowanym etatom kraja za lěće 2027 a 2028 rozrisała. Wčerawšu nowinsku konferencu wo wuslědkach su bjez noweho termina wotprajili. Knježerstwu pobrachuje po rozprawach medijow 2,9 hač do 4,5 miliardow eurow. Tohodla diskutuja wo wottwarje 11 000 dźěłowych městnow w zjawnej słužbje kraja.
Jastwo njewottorhaja
