Krótkopowěsće (22.04.16)
Wokrjes ma daty wozjewić
Drježdźany/Choćebuz. Zhorjelski wokrjes ma wobswětowe daty přirodoškitneje kónčiny wozjewić, kotraž bu wot Wochožanskeje brunicoweje jamy zničena. Tole rozsudźi dźensa Drježdźanske zarjadniske sudnistwo. Skoržiła bě Choćebuska wobswětowa skupina. Vattenfall je wjele lět tomu zadźěwać spytał. Po wšěm zdaću prócuje so šwedske předewzaće zatajeć, kelko škody je wotbagrowanje brunicy načiniło.
Gauck do Zhorjelca a Žitawy
Zhorjelc/Žitawa. Zwjazkowy prezident Joachim Gauck chce přichodny štwórtk, 28. apryla, do Zhorjelca a Žitawy přijěć, zo by so wo němsko-čěsko-pólskim zhromadnym dźěle informował. Wón so tón dźeń z komunalnymi politikarjemi, čestnohamstce skutkowacymi a młodźinskimi kulturnymi towarstwami zetka. Tole zdźěli Zwjazkowy prezidialny zarjad.
Schlaraffia tola přežiwi?
Krótkopowěsće (21.04.16)
Koncepciji přihłosowali
Berlin. Rada Załožby za serbski lud je na swojim wurjadnym posedźenju dźensa w Berlinje koncept polěpšeneho nałožowanja serbskeje rěče w nowych medijach za lěta 2016 do 2018 schwaliła. Na tymle zakładźe su nětko tež w zwjazkowym etaće předwidźane srědki we wysokosći 765 000 eurow přizwolene, rjekny předsyda załožboweje rady Jan Budar.
Rezolucija schwalena
Freiberg. Sakscy kulturnicy a politikarjo SPD, Zwjazka 90/Zelenych a Lěwicy su na zetkanju njedawno w Freibergu rezoluciju nastupajo zakoń kulturneho ruma schwalili. Woni žadaja sej sprawne mzdy za na kulturnym polu skutkowacych, woprawdźitu ewaluaciju zakonja ze zaměrom, zo móhli so kulturne rumy načasnje wuwiwać, a dynamizaciju přiražkow.
Podpěru EU sej žadali
Krótkopowěsće (20.04.16)
Swětowe mišterstwa w Drjowku
Drjowk. Swětowe mišterstwa dwukonjacych zapřahow wotměwaja so lěta 2019 w Drjowku pola Choćebuza. Tole zdźěli dźensa mjezynarodna třěšna organizacija konjaceho sporta Fédération Équestre Internationale. Berlinsko-braniborski zwjazk konjaceho sporta je zamołwitym w Drjowku mjeztym k tutomu „njewšědnemu zbožu“ gratulował.
W juliju wjace renty
Berlin. Něhdźe 20 milionow rentnarjow dóstanje w lěću čujomnje wjace pjenjez. W zapadnej Němskej maja so renty 1. julija wo 4,25 procentow zwyšić, we wuchodnych krajach wo 5,95 procentow. Tole je zwjazkowe knježerstwo dźensa rozsudźiło. Rozrost je wuslědk dobreho połoženja na dźěłowych wikach a z tym zwjazanych wyšich dochodow ludźi.
Myto LEX wuwołane
Choćebuz. Hižo 13. raz je łužiska hospodarska iniciatiwa (WiL) k wubědźowanju wo myto załožerjow swójskeje eksistency namołwjało. Wo nje móža so ludźo, kotřiž su w zašłych štyrjoch lětach swójske předewzaće załožili, hišće hač do kónca awgusta požadać. Nimo pjenježnych mytow profituja zajimcy tež z najwšelakorišich zarjadowanjow WiL.
Krótkopowěsće (19.04.16)
Bamž: Ćěkancy su nam dar
Rom. Bamž Franciskus je ludźi po wšěm swěće namołwjał, so z dóńtom ćěkancow njewotnamakać, ale jich jako wobohaćenje wobhladować. „Přečasto maja was ludźo za přidatnu ćežu. Nawopak! Wy sće nam dar“ rjekny bamž dźensa w Romje składnostnje 35lětneho wobstaća jezuitskeho doma ćěkancow.
Nowy abiturny předmjet
Schwerin. Mecklenburgsko-předpomorski minister za kubłanje, Mathias Brodkorb (SPD) chce, zo stanje so nižoněmčina z předmjetom za maturu. Wot 7. lětnika móhli sej šulerjo nižoněmčinu jako druhu cuzu rěč přiswojić a na wu-zwolenych gymnazijach hač do matury wuknyć. Za to chce Brodkorb wotpowědne wučbnicy wuwiwać dać.
Pišćele za Praski hród
Praha. Pišćele w katedrali swjateho Víta na Praskim hrodźe njejsu kmane, cyły rum łódźe ze zynkom wupjelnić. Wotpomhać měł natwar noweho mócnišeho instrumenta z 10 000 pišćelowymi pišćałkami. Trěbnych 2,6 mio. eurow chcyło Praske arcybiskopstwo tež z pomocu zběrki zhromadźić. Idealnje móhli nowe pišćele k 100. róčnicy załoženja Čěskosłowakskeje w lěće 2018 hotowe być.
Sezonu z wuspěchom zakónčili
Krótkopowěsće (18.04.16)
Serb na diakona wuswjećeny
Drježdźany. Emeritowany biskop Joachim Reinelt je sobotu w Drježdźanskej katedrali Floriana Mróza a Thomasa Wiesnera na diakonow wuswjećił. 26lětny Mróz pochadźa z Kulowca, je w Erfurće studował a wukonješe swój pastoralny praktikum zašłe měsacy w Budyskej tachantskej wosadźe. Klětu swjatki ma Serb měšnisku swjećiznu přijimać.
Na šulerskej wuměnje w Čěskej
Mělnik/Ralbicy. Wot dźensnišeho přebywaja šulerjo 5. lětnika Ralbičanskeje wyšeje šule w Mělniku. Srjedu nawróća so z tamnišimi šulerjemi do Ralbic, hdźež wječor zhromadnje w šuli swjeća. Štwórtk dojědu sej wšitcy na kulturnu kupu Einsiedel a pjatk budźe zabawne dopołdnjo na šuli. Lětušu wuměnu zakónča z wulětom do Małeho Wjelkowa.
Serbske popołdnjo wuspěšne
Krótkopowěsće (15.04.16)
Próstwa Turkowskeje přizwolena
Berlin. Chłostanske jednanje přećiwo satěrikarjej Janej Böhmermannej ranjenja turkowskeho prezidenta Recep Tayyipa Erdoğana dla je móžne. Zwjazkowe knježerstwo je dźensa próstwje Turkowskeje wotpowědowało. Tole zdźěli zwjazkowa kanclerka Angela Merkel (CDU) nowinarjam w Berlinje.
Wjace wobchadnych njezbožow
Zhorjelc. Ličba wobchadnych njezbožow je w Budyskim a Zhorjelskim wokrjesu loni prěni króć po třoch lětach zaso přiwzała. Tole wuchadźa z wozjewjeneje bilancy Zhorjelskeje policajskeje direkcije. Cyłkownje běchu 15 799 zražkow zličili (2014: 15 598). Při tym so 35 ludźi smjertnje zrani, pjećo wjace hač 2014. Hłowne přičiny běchu smalenje, njedosahacy wotstawk a alkohol.
Wotstawk dźeń a wjetši
Berlin. Aktualna roprawa UNICEF pokazuje, zo bywa wotstawk mjez chudymi a bohatymi dźěćimi w industrijnych krajach dźeń a wjetši. Najlěpje wotrěznje w mjezynarodnym přirunowanju mjez 41 krajemi Europskeje unije a OECD Danska. Němska zarjaduje so na 14. městnje. Přepytowali běchu wobłuki, zasłužbu, strowotu abo spokojnosć ze žiwjenjom.
Krótkopowěsće (14.04.16)
Zetkanje z jednaćelom MGO
Budyšin. Prěnje zetkanje noweho jednaćela Marketingoweje towaršnosće Hornja Łužica-Delnja Šleska (MGO) Olafa Franki z předsydu Domowiny Dawidom Statnikom je so wčera w Budyšinje wotměło. Wone słužeše wosobinskemu zeznaću a wuměnje nazhonjenjow. Wobě stronje chcetej dotalne dobre zhromadne dźěło pokročować a je z dalšimi zetkanjemi přisporić.
Ratarjo wočakuja pomoc
Göhren-Lebbin. Zwjazk ratarjow žada sej hladajo na trajacu krizu statnu pomoc na dobro plahowarjow dejkow a swini. Na zarjadowanju před schadźowanišćom konferency ratarskich ministrow Zwjazka a krajow w mecklenburgskim Göhrenje-Lebbinje rjekny prezident zwjazka Werner Hilse, zo su politikarjo na tuchwilnej krizy sobu wina.
EU zhromadnje z mócnarjemi?
Krótkopowěsće (13.04.16)
NSLDź z hosćom w Danskej
Tønder/Tinglev. Wot wčerawšeho je Němsko-Serbske ludowe dźiwadło z hosćom třěsneho zwjazka němskeje mjeńšiny w Danskej. Zwjazk němskich Sewjeroschleswigčanow (BDN) bě lěto 2016 jako „Serbske lěto“ pomjenował a Budyske dźiwadło z němsko-serbskej inscenaciju „Zgubjone a namakane“ do šulow přeprosył. Štyri króć předstajichu ju wčera šulerjam w Tønderje a dźensa w Tinglevu.
Wjace njemandźelskich dźěći
Praha. W Čěskej republice ličba zwonkamandźelskich porodow přiběra. Lětsa narodźi so najskerje prěni raz w stawiznach kraja wjace dźěći nježenjenym poram hač zmandźelenym. Z nowym zakonjom chcedźa nětko samostejacym maćerjam staršiski pjenjez kaž tež druhe socialne lěpšiny bjez přihłosowanja nana dźěsća zmóžnić.
Tydźenje lěsa zahajene
Krótkopowěsće (12.04.16)
Poćežowanje ludźi dale wulke
Berlin. Poćežowanje dźěławych wotedawkow dla je loni zaso snadnje přiběrało. Tole je wuslědk přepytowanja organizacije OECD. Po tym dyrbješe nježenjeny přistajeny z přerěznej mzdu 49,4 procenty swojeje bruttomzdy za dawki a socialne wotedawki nałožić. Němska zaběra tak třeće najwyše městno mjez 34 čłonskimi industrijnymi krajemi OECD. Lěta 2014 běchu to hišće 49,3 procenty.
Za samsnu rentu
Schwerin. Knježerstwowi šefojo wuchodoněmskich zwjazkowych krajow žadaja sej wot zwjazkoweho knježerstwa jasne wuznaće k přibliženju wuchodnych rentow runinje zapadnych. Tole rjekny ministerski prezident Mecklenburgsko-Předpomorskeje Erwin Sellering (SPD) dźensa w Schwerinje. Jutře chcedźa ze zwjazkowej kanclerku Angelu Merkel (CDU) wo tym wuradźować.
Kongres wo mobiliće přichoda
Krótkopowěsće (11.04.16)
Fischer nowy wjesnjanosta
Dobruša-Huska. Gmejna Dobruša-Huska ma noweho wjesnjanostu. Při wčerawšich wólbach zamó so Alexander Fischer (CDU) přećiwo swojemu kontrahentej přesadźić. Za Fischera wupraji so 59,9 procentow ludźi. Maik Schittko z Hnašec dósta 40,1 procent, zdźěli gmejnski wólbny wuběrk. Jenož połojca wolerjow (49,8%) so na druhim kole wobdźěli.
Wobraz wo Sakskej polěpšić
Drježdźany. Sakski ministerski prezident Stanisław Tilich (CDU) planuje po informacijach Lipšćanskich nowin nowu kampanju za Saksku, zo by so špatnemu zaćišćej, kotryž tuchwilu po wšej Němskej wo Sakskej maja, wobarał. Knježi „zahubne měnjenje wo Sakskej, kotrež hospodarstwu, kulturje, turizmej a zhromadnosći w towaršnosći škodźi“.
Kurdiske zastupnistwo w Čěskej
