Krótkopowěsće (25.03.20)
101 inficěrowany we wokrjesu
Budyšin. Z třinaće wosobami wjace hač dźeń do toho je mjeztym 101 z coronawirusom natyknjeny w Budyskim wokrjesu, kaž wčera rěkaše. Ličba dotal postajenych karantenow je na 995 rozrostła. Faktisce je nětko 775 wosobow w karantenje, dokelž su wjacore zakónčene. Z dwěmaj dalšimaj wosobomaj je so aktualnje sydom inficěrowanych wustrowiło, jedyn bě minjeny tydźeń zemrěł.
Mnohe přestupjenja zakaza
Drježdźany. W Sakskej je policija mnohe přestupjenja zakaza kontakta zwěsćiła. Tak su zastojnicy mjez druhim wjacore grilowanske partyje zakónčili. Kaž krajny policajski předsyda Horst Kretzschmar přez Twitter zdźěli, registrowachu po cyłej Sakskej dotal 83 přestupjenjow, 224 króć dyrbješe policija zakročić, zo by zakaz přesadźiła. Zwjetša ludźo twjerdźa, zo ničo wo postajenju njewědźa.
Wólby wjesnjanostow přestorča
Krótkopowěsće (24.03.20)
Smědźa wotewrjene wostać
Budyšin. Sakske knježerstwo je wobmjezowanja, haćić coronawirus, jasnišo sformulowało. Kaž ratarski minister Wolfram Günther (Zeleni) wčera zdźěli, smědźa zahrodnistwa a štomownje, w kotrychž swójske rostliny plahuja a z nimi wikuja, wotewrjene wostać. To płaći mjez druhim za Holešowske zahrodnistwo Matijasa Pěčki a za Wudworske Krollec zahrodnistwo.
Projektny dźeń wotprajeny
Budyšin. Wukaz sakskeho kultusoweho ministerstwa z 13. měrca zakazuje wšitke zwonkašulske zarjadowanja, wubědźowanja, olympiady, powołanske praktikumy, šulerske abo wučerske wuměny hač do kónca šulskeho lěta. Tak je tež projektny dźeń serbskich institucijow 14. julija k powołanskej orientaciji w Budyskim Němsko-Serbskim ludowym dźiwadle wotprajeny.
„Seniorski“ nakupowanski čas
Krótkopowěsće (23.03.20)
86 wosobow inficěrowanych
Budyšin. Ličba w Budyskim wokrjesu z coronawirusom inficěrowanych je so na 86 powjetšiła, kaž Budyski krajnoradny zarjad wčera zdźěli. To je jědnaće wjace hač dźeń do toho. Dotal postajenych karantenow je na 783 přiběrało, faktisce pak je tuchwilu 625 ludźi w karantenje, dokelž su ju wjacori zakónčić móhli. Dwě wosobje stej so zaso wustrowiłoj.
Sakski informaciski portal
Drježdźany. Za wšitke prašenja, kak mamy z coronawirusom wobchadźeć, je sakske knježerstwo na stronje www. coronavirus.sachsen.de centralny informaciski portal kaž tež wjacore wobydlerske telefony zarjadowało. Wšitcy wobydlerjo su namołwjeni, so tam wo nowych postajenjach, pokiwach a naprawach knježerstwa informować.
Němcy zakaz ranja
Krótkopowěsće (20.03.20)
Třećina wjace natyknjenych
Budyšin. Dwanaće ludźi wjace hač dźeń do toho bě wčera w Budyskim wokrjesu z coronawirusom natyknjenych, to je třećina wjace. Zwjetša su to ludźo, kotřiž su z rizikowych kónčin nawróćili. Dohromady 48 wosobow je Budyski krajnoradny zarjad wčera popołdnju jako inficěrowanych zwěsćił. Ličba postajenych karantenow pak pomjeńši so na 470. Prěni inficěrowany je so mjeztym wustrowił.
Krajna wustajeńca přestorčena
Drježdźany/Zwickau. Za 25. apryl planowane wotewrjenje 4. krajneje wustajeńcy „Boom – 500 lět industrijna kultura w Sakskej“ je wotprajene. To staj sakska ministerka za kulturu Barbara Klepsch (CDU) a direktor Němskeho hygienoweho muzeja prof. Klaus Vogel wčera w Drježdźanach zdźěliłoj. Na wjacorych městnach w Zwickauwje wotměwacu so přehladku nětko na njewěsty termin přestorča.
Vietnamska ludnosć pomha
Krótkopowěsće (19.03.20)
Europeada přestorčena
Flensburg/Budyšin. Federalistiska unija europskich narodnych mjeńšin za lětsa planowanu koparsku europeadu na klětu přestorči. To zdźěli nowinski rěčnik Domowiny Marcel Brauman. Přičina je połoženje coronawirusa dla. Kaž ze zdźělenki wuchadźa, wotměje so europeada tuž klětu w juniju pola Korutanskich Słowjencow w Awstriskej.
36 natyknjenych we wokrjesu
Budyšin. Ličba z coronawirusom inficěrowanych we wokrjesu Budyšin raznje přiběra. Kaž Budyski krajnoradny zarjad wčera popołdnju zdźěli, je dotal ze 36 wosobami dwanaće wjace hač dźeń do toho z nowym wirusom natyknjenych. Z toho pochadźa wosom z Wojerowskeje, třinaće z Kamjenskeje a 15 z Budyskeje kónčiny. Dwě wosobje stej ćežko schorjełoj. Jej w klinice zastaruja.
Serbski muzej zawrjeny
Krótkopowěsće (18.03.20)
Nowa rektorka uniwersity
Drježdźany. Rozšěrjeny senat Drježdźanskeje Techniskeje uniwersity je wčera psychologowku a profesorku dr. Ursulu M. Staudinger za rektorku wuzwolił. Staudinger je po cyłym swěće připóznata slědźerka na polu staroby. Tuchwilu ma profesuru za sociomedicinske wědomosće na Columbia Aging Centeru New-Yorkskeje uniwersity, kotryž je lěta 2013 załožiła. Wona naslěduje prof. dr. Hansa Müllera-Steinhagena, kiž dźe na wuměnk.
Kurs přestorčeny
Budyšin. Lětuši ferialny kurs za dźěći Rěčneho centruma WITAJ dyrbi coronawirusa dla wupadnyć. Na to stej so nawodnica RCW dr. Beata Brězanowa a zamołwita za projekt Michaela Hrjehorjowa póndźelu připołdnju dojednałoj. Projekt klětu w jutrownych prózdninach dale powjedu. Je to jenički móžny termin, dokelž maja tón tydźeń dźěći nimale po wšej Němskej prózdniny.
Forum wotprajili
Krótkopowěsće (17.03.20)
Olympiada přestorčena
Budyšin. 54. centralnu olympiadu serbskeje rěče, kotraž bě za spočatk apryla planowana, přestorča. Přizjewiło je so 14 wučerjow a 83 šulerjow, mjez nimi 31 z Delnjeje Łužicy. Nowy termin za olympiadu planuje Serbske šulske towarstwo w oktobru. Potom budu so šulerjo nětčišeho 6. lětnika wubědźować. Dale přestorči SŠT za 27. měrc planowanu prezentaciju delnjoserbskeje webstrony www.dyrdomdej.de.
Towarstwo so njeschadźuje
Praha/Budyšin. Towarstwo přećelow Serbow (SPL) w Praze je wšitke swoje planowane zarjadowanja na wěsty čas wotprajiło, štož płaći za přichodne tydźenje. Jasne tež njeje, hač budu jutry na wuprawje we Łužicy. Kaž hižo zańdźene lěta chcychu z busom na křižerjow přijěć. Hłownu zhromadźiznu SPL runje tak přestorči kaž předwidźane wustajeńcy a přednoški w Praze a Liberecu.
Łódźnicy njemóža na dźěło
Krótkopowěsće (16.03.20)
Žane kursy a seminary
Budyšin. Kursy a seminary Budyskeje ludoweje uniwersity (KVHS) po „zarjadniskim postajenju znajmjeńša hač do 9. apryla wupadnu“, rěka na internetnej stronje KVHS. Hač a hdy su poskitki znowa přistupne, tuchwilu hišće jasne njeje.
Zawru statne muzeje
Drježdźany. Sakske ministerstwo za kulturu a turizm zdźěla, zo su wšitke muzeje w nošerstwje swobodneho stata wotnětka zawrjene. Naprawa ma „spomalenju rozšěrjenja wirusa covid-19 polěkować“ a płaći „najprjedy raz hač do kónca jutrownych prózdnin 19. apryla.“ Tež krajna centrala za politiske kubłanje je w tym zwisku w mjenowanym času wšitke zarjadowanja wotprajiła.
Nachwataja mytowanje klětu
Lipsk. Kuratorij Lipšćanskeho knižneho myta za europske dorozumjenje, zestajany ze zastupjerjow Swobodneho stata Sakskeje, města Lipska, bursoweho towarstwa němskich knižnych wikowarjow a Lipšćanskich wikow, je so z lětušim lawreatom Lászlóm L. Földényijom na to dojednał, mytowanje klětu nachwatać. Zjawna swjatočnosć lětsa wotprajenych knižnych wikow dla wupadnje.
Krótkopowěsće (13.03.20)
Hišće ničo njewotprajene
Flensburg. Lětušu koparsku europeadu w Awstriskej coronawirusa dla najprjedy ani njewotpraja ani njepřestorča. To zdźěli wčera zarjadowar wurisanja FUEN. Hišće hač do 3. apryla płaća w Awstriskej wobmjezowanja wirusa dla. Hač do kónca apryla zamołwići potom rozsudźa, kak dale póńdźe. Tak dołho maja wobdźělnicy kaž planowane postupować a pozitiwnje myslić, z Flensburga rěka.
Seidel nowy předsyda rady
Stróža. Rada biosferoweho rezerwata Hornjołužiska hola a haty ma noweho předsydu. Radworskeho wjesnjanostu Wincenca Baberšku, kiž je sydom lět angažowany radźe předsydował, naslěduje Malešanski wjesnjanosta Matthias Seidel. Seidela kaž tež Hamorskeho wjesnjanostu Achima Junkera jako naměstnika su minjenu póndźelu wuzwolili, kaž zarjadnistwo rezerwata informuje.
Sćazany spiritus zwužitkuja
Krótkopowěsće (12.03.20)
Lawreatow wozjewili
Lipsk. Myto Lipšćanskich knižnych wikow dóstanje w Durinskej wotrostły Lutz Seiler za roman „Stern 111“, kaž su dźensa w sćelaku „Deutschlandfunk Kultur“ wozjewili. W kategoriji wěcowna literatura doby Bettina Hitzer myto za knihu „Krebs fühlen – Eine Emotionsgeschichte des 20. Jahrhunderts“, a za přełožk wuznamjenichu Pieku Biermann za roman Fran Ross „Oreo“.
Stawk za tarifowe zrěčenje
Drježdźany. Wjacore sta sobudźěłaćerjow Drježdźanskeho stejnišća předewzaća Globalfoundries su wčera a dźensa stawkowali. Woni wojuja wo to, zo by nawodnistwo koncerna domowe tarifowe zrěčenje podpisało, štož sej dźěłarnistwo hórnistwo, chemija, energija žada. Globalfoundries to wotpokazuje, poskićejo sobudźěłaćerjam samo pjenjezy, hdyž so stawka wzdadźa.
„Greta“ město „Dołhož fenki ...“
