Krótkopowěsće (24.04.18)
Dalše koło ma rozsudźić
Baršć. Krajny rada wokrjesa Sprjewja-Nysa Harald Altekrüger (CDU) dósta na njedźelnych krajnoradnych wólbach jeno 40 procentow hłosow. Tohodla dyrbi 6. meje w rozsudnym kole přećiwo Steffenej Kubitzkemu z AfD nastupić, kotryž docpě 28 procentow. We wokrjesomaj Łobjo-Halštrow a Hornje Błóta-Łužica staj so mějićelej zastojnstwa z wjetšinu wjace hač 50 procentow přesadźiłoj.
Trěbnych komparsow namakali
Budyšin. Němsko-Serbske ludowe dźiwadło je za inscenaciju lětušeho lětnjeho dźiwadła „Olsenowa cwólba wotzběhnje“ trěbnych komparsow namakało. Dźewjeć mužow je so na wčerawšim castingu za róle bodyguardow „čorneho barona“ požadało. Šesćoch su přiwzali. Zbytnym su dalše, mjeńše róle poskićili. Lětnje dźiwadło wotměje so lětsa wot 14. junija do 22. julija.
Mała čěska knihownja
Krótkopowěsće (23.04.18)
Fryco Wojto počesćeny
Podstupim. Wjelelětneho wjesnjanostu Hochozy Fryca Wojta je prezidentka Krajneho sejma Braniborskeje Britta Stark (SPD) pjatk w Podstupimje z Medalju krajneho sejma počesćiła. Tak hódnoći braniborski parlament jeho zasadźenje za žiwu serbsku rěč a kulturu w komunje. „Wšako animěruje Wojto wšudźe, so najprjedy w maćeršćinje rozmołwjeć“, rěkaše mjez druhim w lawdaciji.
Nowa zwukowa dokumentacija
Choćebuz. Mjeztym třeći dźěl zwukoweje dokumentacije delnjoserbskeje rěče steji bjezposrědnje před prezentaciju. Brošurka z dwěmaj CDjomaj je nastała w zamołwitosći Šule za delnjoserbsku rěč a kulturu a wobsahuje něhdźe 60 lět stare hudźbne dokumenty kaž serbske ludowe arije, bamžički jako kěrluše. Wone chowaja w Serbskim kulturnym archiwje w Budyšinje.
Železnisku čaru wožiwić
Krótkopowěsće (20.04.18)
Serbski institut w Drježdźanach
Drježdźany. Na konferency „Slědźenski design 4.0“ Instituta za sakske stawizny a ludospyt w Drježdźanskej Sakskej krajnej bibliotece je so wčera tež nawoda Serbskeho instituta dr. Hauke Bartels wobdźělił. Jutře přednošujetaj tam mjez druhim dr. Annalena Schmidt a Marek Slodička. Zaměr konferency je, wuskutki medializacije slědźenja na wědomostne dźěło rozjimać.
Ample na lětanišću?
Brno. Rjadowanje lětadłoweho wobchada w morawskej stolicy Brno móhło so z (nimale) swětowej raritu stać. Přihotowana trasa wobjězdki města ma zdźěla tež do koridora tamneho lětanišća Tuřany sahać. Planowarjo tuž chutnje wo tym rozmysluja, – z móžnosću znatej hižo z Gibraltara – wobchad awtow při starće a přizemjenju lětadłow z pomocu amplow rjadować.
FSG wicemišter
Krótkopowěsće (19.04.18)
Wothłosowanje wo kubłanju
Ralbicy. Předsydstwo Serbskeho šulskeho towarstwa je wčera w klubowni Ralbičanskeje šule z nawodami serbskich zakładnych šulow, tam skutkowacymi koordinatorami 2plus a nawodnicami serbskich pěstowarnjow wuradźowało. Mjez druhim zaběrachu so přitomni z wočakowanjemi na přichodnych šulskich nowačkow a móžnosćemi za jednotne postupowanje při zarjadowanju dźěći do rěčnych skupinow na šuli.
Nowy teleskop w swětnišću
Cape Canaveral. Nowy swětnišćowy teleskop „TESS“ je dźensa swój puć do orbita nastupił. W nadawku NASA je priwatne předewzaće SpaceX nastroj z raketu typa Falcon-9 we Floridźe startowało. „TESS“ je naslědnik teleskopa „Kepler“ a ma nadawk, za planetami zwonka našeho słóncoweho systema pytać.
Worklečenjo dyrbja dele
Krótkopowěsće (18.04.18)
Šulerska nowina wušła
Budyšin. Na Budyskej Serbskej wyšej šuli je wušło dźensa prěnje wudaće šulerskeje nowiny pod titlom „Přestawka!“. Ideju k tomu měł je šuler 6. lětnika. Mjeztym skutkuje w skupinje młodych redaktorow pjeć šulerjow sobu. Mjez mnohimi přinoškami stej tež dwaj w serbskej rěči. Projekt podpěrujetej wučerce Sabine Demuthowa a Kerstin Klingnerowa kaž tež redaktorka Miriam Schönbach.
Serbowce na rěčnej olympiadźe
Ralbicy. Šulerce 8. lětnika Serbskeje wyšeje šule Ralbicy Davinia Brězanec a Nora Zahrodnikec stej so wuspěšnje za Saksku olympiadu rušćiny kwalifikowałoj. 3. meje pojědźetej wonej na wubědźowanje najlěpšich šulerjow-rušćinarow sakskich wyšich šulow do kultusoweho ministerstwa w Drježdźanach. Tam změjetej Ralbičanskej šulerce pisomne a ertne nadawki spjelnić.
Garbe Pakoßnicka přesćahnył
Krótkopowěsće (17.04.18)
Myto Róži Domašcynej
Drježdźany. Sakske statne ministerstwo za wědomosć a wuměłstwo je Róži Domašcynej Sakske literarne myto připóznało. Z 10 000 eurami dotěrowane wuznamjenjenje přepodadźa basnicy we wobłuku rjada „Landnahme“, kaž dźensa zdźělichu. Ministerka dr. Eva-Maria Stange (SPD) wobkrući rozsud tež z tym, zo „zwjazuje spisowaćelka serbske a němske wuměłstwo na wulkotne wašnje.“
Pruwowanja zahajene
Drježdźany. Na sakskich gymnazijach su dźensa abiturne pruwowanja zahajili. Po cyłej Němskej dadźa so cyłkownje 10 639 šulerjow w 24 předmjetach pruwować. Dźensa běštej předmjetaj towaršnowěda/hospodarstwo/prawniske kubłanje a geografija na rjedźe. Na Budyskim Serbskim gymnaziju je dźensa jenički šuler pisomne pruwowanske nadawki w předmjeće geografija spjelnić měł.
Serbski duchowny budźe nawoda
Krótkopowěsće (16.04.18)
Dešno a Drjowk dobyćerjej
Lubin. Wjesny dźěl Dešno gmejny Dešno-Strjažow a město Drjowk stej dobyćerjej třećeho wubědźowanja „Rěči přichilena komuna – serbska rěč je žiwa“ w Braniborskej. Wiceprezident Krajneho sejma Braniborskeje Dieter Dombrowski (CDU) je jimaj myće na wuznamjenjenskim zarjadowanju pjatk w Lubinje přepodał. 17 městow a gmejnow a jedyn zarjad běštej so požadałoj.
„Zmij“ wospjet mytowany
Lipsk. Wojerowska filmowča Angela Schuster a kamerownik Martin Rattke buštaj wčera na wubědźowanju krótkofilma „Kurzsuechtig“ w Lipsku we wobłuku fikcija z dorostowym mytom wuznamjenaj. Wonaj běstaj so ze swojej twórbu „Zmij“ na wurisanju wobdźěliłoj. Film předstajeja mjez druhim přichodny štwórtk w Budyšinje.
Bretonojo su znowa hosćo
Krótkopowěsće (13.04.18)
Institut na datowych wikach
Lipsk. Budyski Serbski institut wobdźěli so na tak mjenowanym kulturnym hackathonje Coding da Vinci. Na jutřišim zarjadowanju zetkaja so wuwiwarjo software a hardware w Lipšćanskej uniwersitnej bibliotece. Zaměr je, na zakładźe swobodnje přistupnych digitalizatow nowe kompjuterowe programy tworić. Institut přewostaji za to daty „statistiki Serbow“ a historiske fota.
Deklaracija Łužiskeje aliancy
Landshut. Za lětuši kongres Europskeje swobodneje aliancy (EFA) je Łužiska alianca deklaraciju zapodała. W njej namołwja Němsku, Saksku a Braniborsku, zo bychu wutworjenje demokratisce legitimowaneho ludoweho zastupnistwa Serbow aktiwnje podpěrali. Nimo toho je EFA prošena, pósłać mjezynarodnych wólbnych wobkedźbowarjow na zjawne wuličenje hłosow. Kongres EFA je dźensa a jutře w bayerskim Landshuće.
Wowčerjo peticiju přepodali
Krótkopowěsće (12.04.18)
Wustajeńca wo Minje Witkojc
Bórkowy. W Domizniskej stwě Bórkowy su wčera wosebitu wustajeńcu, mjez druhim priwatnych fotow a listow, wuznamneje basnjerki Miny Witkojc k jeje 125. posmjertnym narodninam wotewrěli. Přehladka wobsahuje tež nahrawanja, na kotrychž je Delnjoserbowka słyšeć. Ludowe nakładnistwo Domowina přihotuje w tym zwisku słuchoknihu.
Literarne dny zahajene
Zhorjelc. Pod hesłom „Crossing borderlands (mjezy překročić)“ su wčera lětuše Literarne dny podłu Nysy zahajili. Hač do njedźele wotměwaja so na woběmaj bokomaj Nysy mjez druhim pólsko-němske čitanja, matineje a podijowe diskusije. Wjeršk budźe němskorěčna prapremjera dokumentarneho filma Łukasza Chwałka „Jacob Böhme – Žiwjenje a skutk“.
Busowe dwórnišćo ponowja
Varnsdorf. Žadanjam časa hižo njewotpowědowace busowe dwórnišćo w centrumje Varnsdorfa ma so lětsa ponowić. Jeho modernizacija w hódnoće 1,65 milionow eurow je pak hakle spočatk cyłkowneje rekonstrukcije Naměsta Edvarda Beneša, kotrež měło po planowanym dotwarje nowy a wjele dostojniši napohlad dóstać.
Krótkopowěsće (11.04.18)
Za wjace serbskosće w cyrkwi
Podstupim. Rada za serbske naležnosće Braniborskeje je so wčera w Podstupimskim krajnym sejmje schadźowała. Mjez hosćimi bě dr. Hartmut Leipner, předsyda Spěchowanskeho towarstwa za serbsku rěč w cyrkwi, kaž předsyda rady Torsten Mak SN zdźěli. Leipner sej přeješe, zo by so serbskosć w cyrkwjach sylnišo jewiła.
Skruća financnu móc komunow
Drježdźany. Wokrjesam přisłušne komuny maja za lěta 2018 do 2020 stajnje 70 eurow za prěnje tysac wobydlerjow dóstać, maksimalnje 70 000 eurow. To předwidźi naćisk zakonja wo přizwolenju pawšalnych připokazankow k skrućenju wjesneho ruma, kotryž je sakski kabinet wčera schwalił. Hač do lěta 2020 podpěruja financnu móc sakskich komunow dohromady z 90 milionami eurow.
Romojo so sami ličili
