Krótkopowěsće (11.03.21)
Sadźeja na lěkarske praksy
Budyšin. 1 339 ludźi wobdźěli so na masowym tesće we Wojerecach, při čimž zwěsćichu štyri pozitiwne pady. Nastupajo šćěpjenje ludnosće pře koronu sadźa Budyski krajnoradny zarjad na praksy domjacych lěkarjow, nic na dalše lokalne šćěpjenske centrumy. Wčera rozprawjachu z wokrjesa Budyšin wo 61 koronanatyknje- njach a wo incidency 93,6. RKI poda dźensa 74,4. Wokrjes Zhorjelc wozjewi 61 nowoinfekcijow a indicencu 97,73. Po RKI je tamniša incidenca dźensa 88,6.
Dalši dohlad dóstał
Budyšin. Z předsydu Domowiny Dawidom Statnikom je Budyski superintendent Tilmann Popp wčera rjad rozmołwow dale wjedł, kotryž bě z nastupom zastojnstwa před połdra lětom zahajił. Wuměna myslow słužeše mjezsobnemu zeznaću. „Mi bě to połdrahodźinska spomóžna rozmołwa a dalši dohlad do toho, što Serbow tuchwilu jima“, zdźěli superintendent našemu wječornikej.
Kedźbu před „asfaltowarjemi“
Krótkopowěsće (10.03.21)
Měrowe myto do Wostrowca
Köln. Němska biskopska konferenca je iniciatiwje Wostrowčanskeho měroweho swjedźenja katolske „Myto přećiwo njepřećelskosći napřećo cuzym a rasizmej“ spožčiła, kaž Domradio Köln informuje. Ze swjedźenjom spřećiwjeja so prawicarskemu festiwalej na kromje městačka Wostrowca mjeztym sydom lět. TCM je hižo wjacore razy wobdźělenje serbskich wěriwych organizowało.
Zdźěłuja koncept za spěšnotesty
Budyšin. W Budyskim wokrjesu dźěłaja na decentralnym koncepće za spěšnotestowanje ludnosće, kotryž ma tón tydźeń hišće předležeć. We wokrjesu zwěsćichu wčera sydom dalšich koronanatyknjenjow a jědnaće smjertnych padow. Dźewjeć z nich bě hižo minjene tydźenje. Incidenca je 100,33, po RKI dźensa 70,1. We wokrjesu Zhorjelc běchu wčera 46 nowoinfekcijow, dwaj smjertnej padaj a incidenca 86,26, po RKI dźensa 78,3.
HSV znowa jenož remis hrał
Krótkopowěsće (09.03.21)
Joachim Löw dočasnje přestanje
Frankfurt n. M. Wjelelětny trenar narodneje koparskeje wubranki Němskeje Joachim Löw zastojnstwo po europskich koparskich mišterstwach w lěću złoži. 62lětny je wo to prosył, swoje poprawom hač do lěta 2022 płaćiwe zrěčenje bjezposrědnje po skónčenju turněra rozwjazać. To zdźěli dźensa Němski koparski zwjazk, kotryž je tomu přihłosował.
Wysoka inicidenca infekcijow
Budyšin. Nowej powšitkownej postajeni hornjołužiskeju wokrjesow dowolatej wot přichodneje póndźele, muzeje, galerije a wopomnišća z knihowanjom termina do toho wotewrěć. W Budyskim wokrjesu bě wčera 18 koronanatyknjenjow. Wokrjes podawa incidencu 101,66, RKI dźensa 98,1. Wokrjes Zhorjelc měješe sydom nowoinfekcijow, tři smjertne pady a incidencu 84,68, po RKI dźensa 68,5.
Dalše Płomjo online
Krótkopowěsće (08.03.21)
Wobchody z click & meet
Budyšin. Aktualneje incidency pod 100 po Roberta Kochowym instituće (RKI) dla su w Budyskim a Zhorjelskim wokrjesu wobchody wotnětka po systemje click & meet wočinjene. W Budyskim wokrjesu zwěsćachu wot pjatka 140 koronanowoinfekcijow a tři smjertne pady. Incidenca bě po podaću wokrjesa 97, po RKI dźensa rano 98,1. We wokrjesu Zhorjelc bě wčera 26 nowonatyknjenjow a indicenca 82,30, po RKI je 66,9.
Hudźbne dny zaso přestorčene
Wojerecy. 55. Wojerowske hudźbne swjedźenske dny, kotrež běchu wot 11. apryla do 2. meje planowane, su zamołwići znowa wo lěto přestorčili. Kaž zdźěli nawoda Łužiskeje hale Dirk Rolka jako zarjadowar, su přičina połoženje korony dla a z tym zwisowace škitne naprawy. Njewěste dale je, hač smědźa so přeprošeni wukrajni wuměłcy wobdźělić. Zastupne lisćiki wostanu płaćiwe.
Matura bjez pruwowanjow?
Krótkopowěsće (05.03.21)
Dalše podhlady mutacije dla
Budyšin. Wokrjes Budyšin informowaše wčera wo dalšich 55 natyknjenjach z koronawirusom a wo 15 smjertnych padach, z kotrychž bě dwanaće z februara. Wot wokrjesa zwěsćena incidenca wučinješe 99. W laborach zwěsćichu 65 podhladow na wirusowu mutaciju. W Zhorjelskim wokrjesu bě 36 nowych infekcijow a jedyn smjertny pad. Tam mějachu wčera incidencu 73,60.
List krajnemu biskopej
Choćebuz. Spěchowanske towarstwo za serbsku rěč w cyrkwi je wčera w lisće sakskemu krajnemu biskopej Tobiasej Bilzej swoju starosć wo aktualnym konflikće nastupajo Hodźijsku wosadu strukturneje změny dla zdźěliło. Zo měł Serbski wosadny zwjazk nětko w naležnosći skoržić, „nimamy za přistojne wobchadźenje mjez bratrami a sotrami“, w lisće rěka.
Prawopisna kontrola
Krótkopowěsće (04.03.21)
Incidenca bliži so marce 100
Budyšin. Z incidencu 93,66 bliži so Budyski wokrjes zaso marce 100. K tomu přinošowało je wčera zwěsćenych 81 koronanatyknjenjow. Statistika za december wujewja dalšich 27 smjertnych padow, tak zo je cyłkowna ličba w zwisku z koronu zemrětych na 749 rozrostła. Zhorjelski wokrjes rozprawješe wčera wo 38 infekcijach. W jednym padźe dopokazachu britisku mutaciju wirusa. Incidenca tam wučinješe 67,66.
Serbski muster z app
Choćebuz. Delnjoserbske wopisanje a přitřihowy muster za delnjoserbsku bluzu maja zajimcy wotnětka na šmóratku k dispoziciji. Z pomocu digitalneje techniki Augmented Reality móža sej wužiwarjo muster z aplikacije Pattarina zdobom direktnje na płat přenjesć. App wuwiło je Choćebuske startup-předewzaće Pattarina. Zaměr je, zajimcam tradicionalnu wědu lochce spřistupnić.
Pomoc ze Sakskeje přijimali
Krótkopowěsće (03.03.21)
Masowy test dale wjedu
Budyšin. Wo zwěsćenych jědnaće natyknjenjach z koronu a sydom smjertnych padach, kotrež złožuja so nimo jednoho na přiměrjenje statistikow, je Budyski wokrjes wčera rozprawjał. Incidenca bě 87,66. Masowy test w Radebergu wulkeho zajima ludnosće dla dźensa a jutře dale wjedu. W Zhorjelskim wokrjesu registrowachu wčera 42 dalšich infekcijow, tři z nich wopokazachu so jako mutacija britiskeje warianty wirusa. Wot wokrjesa podata incidenca bě 68,45.
Wobzamknjenje cyle jasny signal
Budyšin. Wobzamknjenje wokrjesneho sejmika Sprjewja-Nysa, přewostajić studentam wučerstwa za předmjet serbšćinu stipendij, mjenuje předsyda Domowiny Dawid Statnik „znowa cyle jasny signal z Delnjeje Łužicy, skrućić jónkrótnosć našeho regiona“. Statnik dźakuje so zapodawarjam namjeta a wokrjesnemu sejmikej za zmužity rozsud.
Ponowjeja němske tramwajki
Krótkopowěsće (02.03.21)
Sydom mutacijow wobkrućenych
Budyšin. W Budyskim wokrjesu je dotal 54 podhladnych padow na mutaciju koronawirusa. Sydom króć je sekwencija genoma podhlad wobkrućiła, štyri razy britisku mutaciju wirusa, kaž krajnoradny zarjad zdźěli. Wčera zwěsćichu tam štyri nowonatyknjenja a incidencu 87,33. Wokrjes Zhorjelc rozprawješe wo dalšej infekciji, wo wosom smjertnych padach a wo incidency 72,81.
Wjace swobodnych městnow
Budyšin. We wuchodnej Sakskej bě w februaru 19 833 bjezdźěłnych, 125 wjace hač měsac do toho. Kaž Budyska agentura za dźěło dźensa informuje, je dźěłodawarski serwis dohromady 733 nowych dźěłowych městnow zwěsćił, 113 wjace hač w januaru. Postup pokazuje, zo předewzaćeljo tež w tymle wužadowacym času sobudźěłaćerjow přistajeja.
Wšěch wučerjow šćěpić
Krótkopowěsće (01.03.21)
Masowy test jutře w Radebergu
Budyšin. Natyknjenja z koronawirusom so we wokolinje Radeberga kopja. Tohodla poskića krajnoradny zarjad jutře w sportowni tamnišeho BSZ wot 9 do 17 hodź. masowy test. W Budyskim wokrjesu informowachu přez kónc tydźenja wo 146 natyknjenjach a 81 smjertnych padach. Wčerawša incidenca bě 88. Zhorjelski wokrjes wozjewi 15 natyknjenjow, incidenca tam wučinješe 72,41.
Třo so wo jednaćelstwo požadali
Choćebuz. Staršich sylnišo do skutkowanja SŠT zapřijeć bě jedne ćežišćo klawsury předsydstwa SŠT kónc tydźenja w Choćebuzu. Kaž SŠT zdźěli, dojednachu so tam na wobsahi skutkowanja. Zaběrali su so tež z třomi požadanjemi wo jednaćelstwo SŠT a z aktualnymi prašenjemi wjednicow kubłanišćow. Za wuměnu z Delnjej Łužicu maja prěnje ideje, mjez druhim zetkawanski kónc tydźenja swójbow.
Domowina pomoc přilubiła
Krótkopowěsće (26.02.21)
Dalšej mutaciji zwěsćili
Budyšin. W Budyskim wokrjesu su wčera wo 39 dalšich natyknjenjach z koronawirusom rozprawjeli. Aktualnje je 320 schorjenych (+27), z kotrychž 26 (+3) w chorowni lěkuja. Wuprajenej stej 1 002 karantenje (+113), sydomdnjowska incidenca bě 79,66. W Zhorjelskim wokrjesu zwěsćichu 21 nowoinfekcijow. Ličba tajkich z britiskej mutaciju je so wo dwě na 15 powjetšiła. Dale přizjewichu šěsć smjertnych padow a incidencu 68,06.
Wjace konopa z Łužicy
Choćebuz. Koncern Łužiska energija a milinarnje (LEAG) chce wjace konopje w regionje plahować, a tuž přestrjeń rozšěrja. Přichodnje ma trójce telko płonin k dispoziciji być, předewzaće předwčerawšim zdźěli. Loni zahajeny projekt z ratarjemi regiona měł tomu słužić, nowe wobchodniske ideje za brunicowy region wuwić. Loni su burja na něhdźe wosom hektarach konop plahowali.
FDP knježerstwo namołwja
