Krótkopowěsće (07.05.19)

Dienstag, 07. Mai 2019 geschrieben von:

Busowi šoferojo znowa stawkuja

Budyšin. Dalšeho warnowanskeho stawka dla wostanu tež busy tzwr Regionalbus Hornja Łužica jutře, srjedu, wot ranja w dwěmaj 24 hodźin w depoće. Wot namołwy dźěłarnistwa ver.di potrjecheny je linijowy kaž tež šulerski wobchad. Dźěłarnistwo wojuje wo jasny přirost mzdy. W dotalnych třoch jednanjach njejsu so dźěłodawarjo a ver.di zbližić móhli. Štwórtk rozmołwy dale du.

Volker Braun wosomdźesatnik

Drježdźany. Sakska akademija wuměłstwow je w Berlinje bydlaceho spisowaćela Volkera Brauna k jeho wosomdźesaćinam jako časoweho swědka a chronista hódnoćiła. Rodźeny Drježdźanjan je čas žiwjenja do woprawdźitosće zapřimnył, rjekny prezident Holk Freytag wčera w sakskej krajnej stolicy. Braun, kiž słuša k najwažnišim němsko-němskim spisowaćelam powójnskeje doby, narodźi so 7. meje 1939 w Drježdźanach.

Akciski tydźeń zahajeny

Krótkopowěsće (06.05.19)

Montag, 06. Mai 2019 geschrieben von:

Premjera na mejskim nyšporje

Róžant. Mnozy wěriwi su wčera mejski nyšpor Towarstwa Cyrila a Metoda z kapłanom Jensom Bulišom w Róžeńčanskej cyrkwi dožiwili. Wobrubił je jón muski chór Delany pod nawodom Pawoła Šołty-Kulowskeho ze serbskimi a łaćonskimi kěrlušemi. Premjeru měješe choral „Panis angelicus“ z pišćelowym přewodom Chrystofa Mikławška.

Seniorojo SŠT we Wendlandźe

Budyšin. Seniorojo Serbskeho šulskeho towarstwa podachu so wčera na swoju lětušu kubłansku jězbu, a to do Wendlanda. Z přewodom muzejownika Wernera Měškanka z Choćebuskeho Serbskeho muzeja chce sej 44 čłonow SŠT a dalšich zajimcow zbližić něhdyšu słowjansku kónčinu njedaloko Hannovera a so zaběrać z Drjewjanskimi Słowjanami.

Panceraj we wobsydstwje města

Krótkopowěsće (03.05.19)

Freitag, 03. Mai 2019 geschrieben von:

Daruja za jubilej wobory

Pančicy-Kukow. Za 150. róčnicu załoženja dobrowólneje wohnjoweje wobory Pančicy-Kukow dochadźeja do gmejnskeho zarjadnistwa šćedriwe dary. Na wčerawšim posedźenju přiwzachu Pančičansko-Kukowscy gmejnscy radźićeljo daraj po 150 eurach wot inženjerskeho běrowa a metal předźěłaceho zawoda. Tež logopediska praksa je mjez druhim pjenjezy za jubilej wobory přewostajiła.

Zarjad z nowej nawodnicu

Budyšin. Wojerowčanka Katja Schimke je nawodnistwo Budyskeho financneho zarjada přewzała. Šef zarjada sakskeho financneho ministerstwa Dirk Diedrichs je ju zhromadnje z prezidentom krajneho zarjada za dawki a financy Karlom Kröllom oficialnje do zastojnstwa zapokazał. Studowana juristka Budyski zarjad hižo wot 1. decembra nawjeduje.

Wusłužene psy na předań

Krótkopowěsće (02.05.19)

Donnerstag, 02. Mai 2019 geschrieben von:

Bjez wjetšich mylenjow

Zhorjelc. Wałporna nóc w Hornjej Łužicy bě dosć měrna. To je facit policije, kaž z medijoweje zdźělenki wuchadźa. Dźesać wšelakich deliktow su zastojnicy registrowali. W Stróži pola Rakec su šesćo młodostni hosći chodojtypalenja nadběhowali a někotrych lochce zranili. W Bjezdowach (Klein Partwitz) spytachu młodostni meju wobškodźić, při čimž dóńdźe k rozestajenjam.

Wólbne pruwowanišća

Berlin. Dohromady 13 stronam, jich zwjazkowym předsydam a načolnym kandidatam je mjeńšinowa rada wólbne pruwowanišća k wólbam Europskeho parlamenta 26. meje připósłała, informuje mjeńšinowy sekretariat w Berlinje. Wotmołwy kaž tež wućahi z wólbnych programow stron k mjeńšinopolitiskim temam chce mjeńšinowy sekretariat w interneće wozjewić.

Z nowym wobhospodarjerjom

Krótkopowěsće (30.04.19)

Dienstag, 30. April 2019 geschrieben von:

Wałporne wohenje budu

Budyšin/Zhorjelc. Móžny zakaz wałpornych wohenjow suchoty dla je z blida. Po dešću zašłych dnjow njewidźi Budyski wokrjesny wohnjowy mišter Manfred Pe­thran přičiny, je zakazać. Mjeztym su nje­znaći wjac hač 21 hromadow w Zhorjelskim a Budyskim wokrjesu dočasnje wotpalili, zdźěli Zhorjelska policajska direkcija. Mjez druhim je so w Hrubjelčicach, Kanecach, Malešecach a Złyčinje paliło.

Akciski tydźeń zahajeny

Drježdźany. Z wjacorymi zarjadowanjemi su dźensa akciski tydźeń „Zhromadne šule w Sakskej – Dlěje zhromadnje wuknyć“, kiž traje hač do 5. meje, zahajili. Wobdźělene su na tym tež Wojerecy, Kamjenc a Žitawa. Dotal předleži 33 815 podpismow, trěbne je 40 000. Zaměr iniciatiwy je, zo dźěći dlěje zhromadnje wuknu a njetrjebaja so po 4. lětniku rozsudźić, hač du na gymnazij abo nic.

Wudrjeńca zaso přistupna

Krótkopowěsće (29.04.19)

Montag, 29. April 2019 geschrieben von:

Wo Praskimaj Serbowkomaj

Praha. Hilža Bartaková a Rosalia Jelinková steještej w srjedźišću wčerawšeho zarjadowanja Towarstwa přećelow Serbow w Praskim Serbskim seminarje. Wobě žonje pochadźatej z Łužicy: Hilža Bartková z Demjan (Diehmen) pola Huski a Rosalia Jelinková ze Smjerdźaceje. 90lětnej žonje běštej po wójnje kaž mnozy dalši z Łužicy dźěła dla do susodneho kraja šłoj a hač do dźensa w Praze bydlitej.

Spěchuja kulturne projekty

Lubin. Wokrjes Dubje-Błóta spěchuje lětsa znowa 55 kulturnych projektow. Cyłkownje přewostaja za nje 190 000 eurow. Mjez přizwolenymi su tež šěsć próstwow serbskich towarstwow. Tak dóstanu mjez druhim Spěchowanske towarstwo Tšupčanskeje zakładneje šule podpěru za Witaj-projekt „bilingualne wuknjenje“, wustajeńca „Słowjenjo a Němcy“ w Lubinje a koncertny rjad Bernda Pittkuningsa a Jana Řepki w štyrjoch rěčach.

177 milionow eurow škody

Krótkopowěsće (26.04.19)

Freitag, 26. April 2019 geschrieben von:

Nětko jědźe bus šćěpjenja

Drježdźany. Sakska statna ministerka za socialne a škit přetrjebarjow Barbara Klepsch (CDU) zahaji přichodny štwórtk projekt „Bus šćěpjenja za Saksku“. Z tym kroči ministerstwo nowy, inowatiwny puć, zo by dorosćenych a młodostnych lěpje informował a lochce přistupne šćěpjenja poskićał. W přichodnych tydźenjach pojědźe bus předewšěm do powołanskich šulskich centrumow Sakskeje.

Wozjewjenje wo wólbach rady

Podstupim. Listowe wólby za nowu Radu za naležnosće Serbow w Braniborskej skónča so dnja 28. septembra w 9 hodź. Wothłosowanja woprawnjeni su k wólbam Krajneho sejma Braniborskeje wólbokmani Serbja. Próstwa wo zapisanje do wolerskeho registra ma so pisomnje hač do 21. septembra w běrowje wólbneho wuběrka podać. Wo tym je wólbny nawoda Jan Masnik hižo wutoru informował.

„Piwowe wino“ wuwili

Krótkopowěsće (25.04.19)

Donnerstag, 25. April 2019 geschrieben von:

Myto do Choćebuza

Berlin/Choćebuz. Z lětušim Dźiwadłowym mytom Zwjazka wuznamjenja kulturna statna ministerka Monika Grütters (CDU) Choćebuske dźiwa­dło Piccolo. Z tym připóznaja jeho činohrajne, rejwanske a klankodźiwadłowe inscenacije, kotrež su „politiske, přistupne a přeco na čuwje časa“, kaž jury zwěsći. Jewišćo je jedne z cyłkownje jědnaće lětsa počesćenych. Myto přepodadźa 27. meje w Gerje.

Podpěra za kubłanje dźěći

Pirna. Sakski kultusowy minister Christian­ Piwarz (CDU) je wčera w Pirnje připowědźił, zo program „Dźěći sylnić“ hač do oktobra 2021 podlěša. W ramiku programa dóstanje 146 sakskich dźěćacych dnjowych zarjadnišćow přidatnu pedago­gisku fachowu móc na 30 hodźin wob tydźeń ze srědkow Europskeje unije a Sakskeje. Wone podpěruja dźěći ze słabosćemi při wuknjenju a w žiwjenju.

Spěchuja socialne projekty

Krótkopowěsće (24.04.19)

Mittwoch, 24. April 2019 geschrieben von:

Sakska rozmołwa w Kamjencu

Kamjenc. Sakska rozmołwa z ministerskim prezidentom Michaelom Kretsch­merom (CDU) wróći so 29. apryla do Budyskeho wokrjesa. W Kamjenskim Lessingowym gymnaziju nochcedźa so wón a dalši čłonojo kabineta jenož z woby­dlerjemi rozmołwjeć, ale zdobom wotbłyšćować, što je so po prěnim tajkim zarja­dowanju změniło a hdźe je hišće dalša potrjeba jednać.

Woblubowana hrajka za slepych

Mnichow. LEGO skupina a załožba stej zhromadnje ze wšelakimi zwjazkami za sle­pych Braille-pismo na kamuški za hrajkanje přenjesłoj. Wot lěta 2020 móža potrjechene slepe abo mało widźace dźěći kamuški z podpěru wubranych organizacijow bjezpłatnje dóstać. Předwidźane je, 250 wšelakich kamuškow produkować. Zaměr naprawy je, potrjechene dźěći při čitanju spěchować.

Spočatny podhlad njepředleži

Krótkopowěsće (23.04.19)

Dienstag, 23. April 2019 geschrieben von:

Zahrodkowa přehladka wabi

Frankenberg. 8. krajna zahrodkowa přehladka Sakskeje přeprošuje wot minjeneje soboty hač do 6. oktobra zajimcow do srjedźosakskeho Frankenberga. Sakski ministerski prezident Michael Kretschmer (CDU) mjenowaše wustajeńcu při wotewrjenju „mustrowy přikład za naslědnje měšćanske wuwiće“. Organizatorojo su ze za­zběhom spokojom, wšako předachu prěnjej dnjej 4 700 dnjowych a 139 trajnych zastupnych lisćikow.

Podpismo za škit klimy

Njebjelčicy. Njebjelčanski wjesnjanosta Tomaš Čornak (CDU) je jako prěni podpisał namołwu za zhromadne stejnišćo němskich měšćanostow a wjesnjanostow w naležnosćach demonstrowacych šulerjow a šulerkow za lěpši škit klimy. Z dalšimi zastupjerjemi komunow žada sej wón wot politikarjow Zwjazka a krajow trěbne naprawy zawjesć.

Daloki puć do lěkarnjow

Serbska debata

Neuheiten LND