Krótkopowěsće (03.08.20)
Prěni serbski hiphop-widejo
Chasow. Přez YouTube-stronu Serbska hudźba kaž tež přez Instagram-stronu skupiny Astronawt wozjewichu wčera nawječor prěni serbski hiphop-widejo pod titulom „Straight Outta Łužica“. Spěw napisałoj staj Lil Handrij a FloJ, produkował je jón Syman Hejduška. Wozjewjenje hudźbneho wideja je skupina serbskich młodostnych w Chasowje woswjećiła.
Zbližeja sej serbsku rěč a kulturu
Litomyšl. Serbski ferialny kurs su kónc tydźenja blisko Litomyšla w regionje Pardubice zahajili. 20 Čechow njewuknje tam jenož serbšćinu. Hač do pjatka spřistupnjeja sej woni tež serbske stawizny a kulturu. Po 30 lětach je to prěni raz, zo tam tajki lětni kurs wotměwaja. Towarstwo přećelow Serbow jón wuhotuje.
Maja noweho wjesnjanostu
Krótkopowěsće (31.07.20)
Adwentne wiki maja so wotměć
Drježdźany. Sakska ministerka za kulturu a turizm Barbara Klepsch (CDU) je so za to wuprajiła, zo měli adwentne wiki lětsa wotměć. „Wone su wuznamny kulturny podawk w Sakskej z tradiciju, rozpřestrěwacy so po cyłym swobodnym staće. Zdobom maja wulki hospodarski a turistiski wuznam.“ Pandemije dla planuje wona forum z komunami.
Wot jutřišeho nowy prezident
Lipsk. Sakske wustawowe sudnistwo změje wot jutřišeho noweho prezidenta. Po tym zo je z Wanne-Eickela pochadźaca Birgit Munz 13 lět sudnistwo w Lipsku nawjedowała, naslěduje ju nětko dr. Matthias Grünberg. 59lětneho je krajny sejm 10. junija z dwěmaj třećinomaj hłosow wuzwolił. Grünberg pochadźa z Mannheima a skutkuje wot lěta 1996 w Sakskej. Wot 2008 bě wiceprezident Wyšeho zarjadniskeho sudnistwa w Budyšinje.
Rekordny dobytk
Krótkopowěsće (30.07.20)
Algow dla so w jězorje njekupać
Budyšin. Strowotniski zarjad tuchwilu wotradźa, kupać so w Budyskim spjatym jězorje sylneho rozpřestrěća módreje mokricy (Blaualge) dla. Woda je zdźěla hižo mutna. Módra mokrica produkuje jědy a škodźi strowoće. Wosebje w sensibelnych ludźoch móže sliničce (Schleimhaut) škodźeć a alergiske reakcije kože zbudźić. Někotre družiny bakterije wuwabjeja samo běhawu, hdyž wodu póžěraš.
Znowa wuznamjenjena
Bórkowy. Němski turistiski zwjazk je znowa turistisku informaciju w Bórkowach na přichodne tři lěta z certifikatom i-Marke wuznamjenił. Sobudźěłaćerki a sobudźěłaćerjo su pruwowanje z „jara derje“ wobstali. Dohromady je Bórkowska turistiska informacija 95 ze 100 móžnych dypkow dóstała. K pozitiwnym wuslědkam mjez druhim słušeše, zo je informacija tež zwonka wotewrjenskich časow docpějomna.
Wjetša bjezdźěłnosć w juliju
Krótkopowěsće (29.07.20)
Hižo žane infekcije
Budyšin. Połoženje nastupajo infekciju z koronawirusom je w Budyskim wokrjesu dale stabilne. Nichtó njeje tuchwilu schorjeny a w minjenych sydom dnjach njejsu ani jeničku infekciju zwěsćili. Posledni test bě póndźelu. Dwacećo su hišće w karantenje. Dohromady je Budyski wokrjes dotal 503 infekcije zwěsćił, 483 ludźi je so wustrowiło.
Testować so dać
Drježdźany. Wot 1. awgusta chce Sakska na woběmaj lětanišćomaj Lipsk/Halle a Drježdźany dobrowólne a bjezpłatne testy na koronawirus zmóžnić. Testować dać móža so ludźo, kiž so z jězby wróća a kotřiž w Sakskej bydla. Testy poskićeja wosebje tym, kotřiž so z rizikoweje kónčiny nawróćeja a dyrbja do karanteny. Hač do 72 hodźin po nawróće móžeš so tež na lokalnym strowotniskim zarjedźe darmotnje testować dać.
Tež iniciatiwa namołwja
Krótkopowěsće (28.07.20)
Sakske myto biblioteki 2020
Drježdźany. Biblioteka w Ebersbachu-Neugersdorfje dóstanje z 10 000 eurow dotěrowane Sakske myto biblioteki 2020, dokelž „přikładnje pokazuje, kak profesionalne bibliotekarske dźěło a čestnohamtski angažement hromadźe skutkujetej, zo byštej kulturnu mnohotnosć tež na wsy a přez krajne mjezy wuprudźałoj“, zdźěli dźensa ministerka za kulturu Barbara Klepsch (CDU).
Warnuja před Barcelonu
Berlin. Přiběracych koronainfekcijow w Španiskej dla wonkowne ministerstwo wotradźa, so na turistisku jězbu do wšelakorych regionow najwoblubowanišeho dowoloweho kraja Němcow podać. To płaći za Katalonsku ze stolicu Barcelonu a přibrjohi na Costa Brava kaž tež za kónčinje Aragón a Navarra, nic pak za Baleary z kupu Mallorca a za Kanary.
Hladaja rowy wótčincow
Praha. Wjacore rowy wuznamnych wosobinow čěskeho narodneho žiwjenja su dźensa zapusćene abo wohrožene, zo je spušća. W tym zwisku na přikład w Praze jednotliwcy, towarstwa abo ródne gmejny mjeztym 220 tajkich městnow poslednjeho wotpočinka hladaja a trěbne popłatki płaća.
Krótkopowěsće (27.07.20)
Wosom nowych karantenow
Zhorjelc. Korony dla su w Zhorjelskim wokrjesu minjeny pjatk wosom nowych karantenow postajili. Jedna so wo kontaktne wosoby, kotrež su so ze sportoweho lěhwa w Čěskej nawróćili, hdźež mějachu wuski zwisk ze schorjenej wosobu. Dotal njeje hišće žana infekcija zwěsćena, wšitke wuslědki testow pak hišće njepředleža.
Hans-Jochen Vogel njeboh
München. Bywši předsyda SPD Hans- Jochen Vogel je wčera 94lětny w Mnichowje zemrěł. Kanclerka Angela Merkel (CDU) hódnoćeše jeho jako „jednu z najwažnišich wosobinow powójnskeho časa“. W Göttingenje rodźeny studowaše prawnistwo a zastupi 24lětny do SPD. Dźesać lět po tym sta so z wyšim měšćanostu Mnichowa, pozdźišo bě minister w zwjazkowym sejmje a po přewróće prěni předsyda zjednoćeneje SPD.
Póštu digitalizować
Krótkopowěsće (24.07.20)
SLM ma noweho jednaćela
Lipsk. Dr. Hardy Sieglitz budźe wot 1. awgusta nowy jednaćel Sakskeho krajneho medijoweho wustawa (SLM). „Wjeselimy so, zo nimamy z dr. Sieglitzom jenož wosebje kompetentneho partnera, ale nadźijamy so, zo dr. Sieglitz na wosebite wašnje ke konstruktiwnej komunikaciji mjez gremijemi a sobudźěłaćerkami a sobudźěłaćerjemi přinošuje“, rjekny předsyda zhromadźizny SLM Dawid Statnik.
„Denkzeit Event“ zahajeny
Drježdźany. Sakska je wubědźowanje „Denkzeit Event“ zahajiła. Za nowe a inowatiwne koncepty za zarjadowanja pod wuměnjenjemi korony přewostaji swobodny stat 1,5 milionow eurow. Najlěpše ideje chcedźa z 1 000 do 50 000 eurami mytować. Hač do 21. awgusta móža so zajimcy přizjewić.
Situacija dale napjata
Krótkopowěsće (23.07.20)
Wustawowa medalja Ermerej
Njedźichow. Prezident Sakskeho krajneho sejma je Njedźichowskeho pjekarskeho mištra Rolanda Ermera wčera ze sakskej wustawowej medalju počesćił. Z njej wuznamjenjeja wosoby, kotrež so wosebje wo swobodne demokratiske wuwiće Sakskeje prócuja. Ermer je krajny wyši mišter pjekarskeho zjednoćenstwa Saxonia a prezident Sakskeho rjemjeslniskeho zwjazka.
Mjezynarodni hudźbnicy pytani
Zhorjelc. Składnostnje 80. róčnica prapremjery twórby „Kwartet za kónc časa“ Oliviera Messiaena januar 2021 wupisa Zhorjelske towarstwo Meetingpoint Messiaen wubědźowanje. Pytaja ansambl, kotryž twórbu we wobłuku klětušich 5. mjezynarodnych dnjow Messiaena Zhorjelc-Zgorzelec předstaji. Hudźbnicy maja ze znajmjeńša dweju krajow, najlěpje z Pólskeje, Francoskeje a Němskeje być.
Pokazuja film wo Havelu
Krótkopowěsće (22.07.20)
Nowe myto wupisane
Choćebuz. Město Choćebuz je prěni króć „Integraciske myto Leimöl“ wupisało. Z nim chce čestnohamtski angažement wo migracisku towaršnosć hódnoćić. Myto přewostaji jednotliwcam, skupinam a towarstwam kaž tež projektam w třoch kategorijach. Hač do 6. septembra móža Choćebuženjo namjety měšćanskemu zarjadnistwu zapodać. 26. septembra chcedźa myto spožčić.
Měsće dóstanjetej pjenjezy
Drježdźany. Sakske knježerstwo přewostaji městomaj Drježdźanam a Žitawje 200 000 eurow, zo móhli swoje kulturne projekty z požadanja kulturneje stolicy 2025 zwoprawdźić. Wobě měsće stej wulkotne ideje wuwiłoj ze zaměrom europsku zakładnu mysl a měšćanske zhromadźenstwa skrućić. Druhe koło wubědźowanja pak njejstej bohužel docpěłoj.
Čěsko-słowakske kwasy
Krótkopowěsće (21.07.20)
Turistiska branša ćerpi
Kamjenc. Turistiska branša w Sakskej ćerpi pod koronapandemiju. Kaž krajny statistiski zarjad w Kamjencu wčera zdźěli, bě w meji 76 procentow mjenje ludźi Saksku wopytało. Wosebje wukrajni turisća njemóžachu zawrjeneje mjezy dla do regiona přińć. Wot 15. meje wšak móža hotele, pensije a dalše přebywanišća hosći zaso witać. Ličby so tuž poněčim pozitiwnje wuwiwaja.
Čestny hamt měsaca
Kumwałd. Šefredaktora Domizniskeje nowiny Czorneboh-Bieleboh Matthiasa Hempela je Budyski krajny rada Michael Harig (CDU) nětko za „čestny hamt měsaca“ wuznamjenił. Wot lěta 1990 wuchadźa nowina jako hamtske łopjeno gmejny Kumwałd w zamołwitosći nawody hłowneho zarjada Hempela. Lěta 2007 poda so Hempel na předwuměnk, wěnujo pak so dale gmejnskej nowinje, kotraž hač do 24 stron wopřijima.
Knihownja přećehnje
