Krótkopowěsće (03.09.21)
Z Biedenkopfom so rozžohnowali
Drježdźany. Sakska je so dźensa oficialnje z Kurtom Biedenkopfom, prěnim ministerskim prezidentom po znowazałoženju swobodneho stata 1990, rozžohnowała. Na žarowanskim akće w Drježdźanskej Cyrkwi našeje knjenje wobdźěli so něhdźe 300 prošenych hosći. Zwjazkowy prezident Frank-Walter Steinmeier, sakski premier Michael Kretschmer a šef CDU Armin Laschet su skutkowanje Biedenkopfa w narěčach hódnoćili.
Zaso nad kritiskej hódnotu
Budyšin. W hornjołužiskimaj wokrjesomaj je incidenca zaso nad kritiskej hódnotu dźesać. Roberta Kochowy institut mjenuje dźensa za Budyski wokrjes 10,7, za Zhorjelski 12,0. Wo dwanaće natyknjenjach z koronawirusom je wokrjes Budyšin wčera rozprawjał, wot 72 schorjenych lěkuja štyrjoch w chorowni. Zhorjelski informuje wo štyrjoch infekcijach.
Myto za Delnjoserbski gymnazij
Krótkopowěsće (02.09.21)
Zaso wjace natyknjenjow
Budyšin. W Budyskim wokrjesu su wčera wo sydom natyknjenjach z koronawirusom rozprawjeli. Wot 64 schorjenych wosobow lěkuja štyri w chorowni. Incidenca po Roberta Kochowym instituće je dźensa znowa 9,7. Wo 13 dalšich infekcijach informowachu wčera w Zhorjelskim wokrjesu. Incidenca po RKI wučinja tam dźensa 11,6 a je tak po dwěmaj dnjomaj wospjet kritisku hódnotu dźesać překročiła.
Nellessen naslěduje Grossera
Choćebuz. Dr.-ing. Philipp Nellessen je wčera zastojnstwo zamołwiteho za hórnistwo w předsydstwje energijoweho koncerna LEAG nastupił. Wón naslěduje Uwu Grossera, kiž je na wuměnk šoł, kaž předewzaće zdźěli. Grosser je funkciju wot januara 2014 wukonjał a bě tež jednanski partner Domowiny w zhromadnym dialogu z Vattenfallom a LEAG.
Proša wo azyl w Čěskej
Krótkopowěsće (01.09.21)
Wubědźowanje zahajene
Budyšin. Załožba za serbski lud je dźensa wubědźowanje „Rěč zwjazuje. Rěc zwězujo. Sorbisch verbindet“ startowała. Pytane su inowatiwne a naslědne ideje, z kotrymiž móhli serbšćinu wožiwić a we wšědnym dnju lěpje zakótwić, zo by so serbska zhromadnosć zesylniła a identita skrućiła. Projekty njech zajimcy hač do 7. nowembra pod zapodadźa.
Incidenca zaso pod dźesać
Budyšin. W Budyskim wokrjesu najprjedy žane krućiše naprawy koronapandemije dla njebudu. Roberta Kochowy institut je dźensa incidencu 9,7 podał, tak zo njebě pjaty dźeń za sobu hódnota nad 10. Wčera je tudyši krajnoradny zarjad wo sydom natyknjenjach z koronawirusom informował. Runje telko bě jich w Zhorjelskim wokrjesu. Incidenca po RKI wučinja tam dźensa 9,6.
Bjez wosebitych znamješkow
Krótkopowěsće (31.08.21)
Premjera nimale wupředata
Chrósćicy. Premjerne předstajenje popopery „Carpe noctem – Njeskónčna nóc“, 10. septembra w Chrósćicach je nimale wupředate. Jednotliwe kartki ma hišće Chróšćanski časnikar Jürgen Njek, pisa kolektiw Trio a kumple. Za dalše předstajenja kartki hišće su. Wozjewili su wčera w přihotach na operu spěw „Rozsudy“ z Helenu Hejduškec, kotryž móžeće sej pod naposkać.
Wobmjezowanja wotwidźeć
Budyšin. Z dźensnišej incidencu 11,4 po Roberta Kochowym instituće je dźeń a prawdźepodobnišo, zo maja so wobydlerjo Budyskeho wokrjesa wot pjatka na wobmjezowanja koronapandemije dla nastajić. Tudyša incidenca je štwórty dźeń za sobu hranicu 10 překročiła. Krajnoradny zarjad informuje wo šěsć dalšich natyknjenjach z wirusom. Incidenca wokrjesa Zhorjelc je po RKI dźensa 6,8.
Firmy zaso personal pytaja
Krótkopowěsće (30.08.21)
Incidenca třeći dźeń nad dźesać
Budyšin. Po soboće a njedźeli je Roberta Kochowy institut dźensa z incidencu 11,4 za wokrjes Budyšin třeći dźeń za sobu hódnotu nad dźesać podał. Wostanje-li wona tež jutře a srjedu, je wotpowědnje aktualnemu sakskemu korona-postajenju wot pjatka w zjawnych wobłukach zaso nahubnik trěbny. Tež w Zhorjelskim wokrjesu je z incidencu 10,4 prohowa hódnota překročena.
Po Biedenkopfje pomjenować
Drježdźany. Lětanišću sakskeje krajneje stolicy měli čestne mjeno prof. dr. Kurt Biedenkopf spožčić, namjetuje prezident Sakskeho krajneho sejma dr. Matthias Rößler (CDU). „Kurt Biedenkopf ma wo Saksku runje tajke zasłužby kaž FranzJosef Strauß wo Bayersku abo Willy Brandt wo Berlin“, rěka w informaciji zarjadnistwa sakskeho parlamenta.
Jako čerwjeny kraj zastopnjowany
Krótkopowěsće (27.08.21)
Incidenca łahodnje stupa
Budyšin. Łahodnje drje, ale štwórta žołma koronapandemije je tež w Hornjej Łužicy hižo spóznajomna. Wobaj wokrjesaj stej wčera wo zwěsćenych štyrjoch natyknjenjach z koronawirusom informowałoj. Roberta Kochowy institut mjenuje dźensa za Budyski wokrjes incidencu 9,4 a za Zhorjelski 8,4. Tam rozprawjachu wčera wo dalšich sydom wobkrućenych padach delta-warianty wirusa.
„Něšto wulkotne zdokonjeli“
Drježdźany. Sakski ministerski prezident Michael Kretschmer je so wčera na zarjadowanju w Drježdźanskim rezidencnym hrodźe mnohim pomocnikam a podpěraćelam w zwisku z koronapandemiju dźakował. Woni su so za druhich angažowali, njejsu při dźěle na časnik hladali a čuwy zhubili, rjekny politikar CDU před nimale 350 hosćimi. „Woni wšitcy su něšto wulkotne zdokonjeli.“
Projekt RKI kritizowała
Krótkopowěsće (26.08.21)
Incidenca dale pod dźesać
Budyšin. Natyknjenja z koronawirusom tež w Hornjej Łužicy pomałku přiběraja. Wo 15 padach je Budyski wokrjes wčera informował, w Zhorjelskim běchu to tři. Incidenca je po Roberta Kochowym instituće dźensa z 8,7 we wokrjesu Budyšin a z 8,0 w Zhorjelskim dale pod 10. Wot dźensnišeho płaći w Sakskej nowe korona-postajenje, po kotrymž incidenca hižo wšo rozsudźacy kriterij njeje.
Serbski informator online
Drježdźany. Drježdźanske zapisane drustwo Swobodny społk wobohaća z online-medijom wot spočatka měsaca wid na temy z Łužicy, Němskeje a ze swěta w delnjo- a hornjoserbskej, němskej a jendźelskej rěči. Wobsahowje zamołwity jako šefredaktor je Viktor Zakar, redaktorka je Hańžka Wjeselic. Serbski informator chce „polemiku a debatu w serbskim towaršnostnym žiwjenju hajić a wuwiwać“, kaž rěka.
Alternatiwne rjadowanje wuběži
Krótkopowěsće (25.08.21)
Sten Nadolny w Haninej cyrkwi
Kamjenc. 8. Kamjensku narěč změje w Berlinje bydlacy spisowaćel Sten Nadolny. Zarjadowanje budźe 1. septembra w 19 hodź. w Haninej cyrkwi Lessingoweho města, kaž organizowace dźěłanišćo za recepciju Lessinga zdźěli. Jedne prašenje, kotremuž chce so Nadolny přiwobroćić, je: „Móže tónle Lessing nam dale abo snano wróćo pomhać?“ Zastupne lisćiki su w Kamjenskej informaciji na předań.
Župna „hłowna“ simultana
Wojerecy. Přichodna hłowna a wólbna zhromadźizna župy „Handrij Zejler“ Wojerecy budźe pjatk, 17. septembra, w załoženskim domje Domowiny, na žurli Kulturneje fabriki při torhošću stareho města. Prěni raz chce župa „hłownu“ ze simultanym tołmačenjom přewjesć, zo móhli wjac Domowinjanow regiona do sobudźěła zapřijeć. Župne předsydstwo je na wčerawšim wuradźowanju hłownu zhromadźiznu přihotowało.
Połoženje dale wotputane
Krótkopowěsće (24.08.21)
Mało dalšich natyknjenjow
Budyšin. Incidenca po Roberta Kochowym instituće wučinja dźensa w Zhorjelskim wokrjesu 2,8, w Budyskim je snadnje na 7,7 postupiła. Tu informowachu wčera wo sydom natyknjenjach z koronawirusom přez kónc tydźenja. Aktualnje je 54 wosobow schorjenych, z kotrychž štyri w chorowni lěkuja. W Zhorjelskim wokrjesu zwěsćichu sobotu a njedźelu dohromady štyri dalše infekcije.
Ze Sakskeje serbska delegatka
Drježdźany. Dr. Lubina Malinkowa z Rakec je jedna z dweju delegatkow ze Sakskeje, kotrejž wobdźělitej so na 11. plearnej zhromadźiznje Ekumeniskeje rady cyrkwjow (ÖRK) klětu wot 31. awgusta do 8. septembra w Karlsruhe. Kaž krajny cyrkwinski zarjad w Drježdźanach wčera zdźěli, je ÖRK serbsku stawiznarku jako zastupjerku etniskich mjeńšin pomjenowała. Korony dla njeje zarjadowanje lětsa móžne a bu přestorčene.
Móst budźe skromniši
Krótkopowěsće (23.08.21)
Tudyša incidenca dale niska
Budyšin. Z hódnotu 3,2 po Roberta Kochowym instituće je dźensa Zhorjelski jedyn z pjeć wokrjesow z najnišej incidencu w Němskej. Ta wokrjesa Budyšina je dźensa 7,3. Minjeny pjatk je tamniši krajnoradny zarjad wo dwěmaj natyknjenjomaj z koronawirusom a dalšim smjertnym padom rozprawjał, w Zhorjelskim wokrjesu mějachu jednu infekciju.
Eksperća Łužicu wopytaja
Choćebuz. Poradźowacy wuběrk za ramikowe zrěčenje wo skiće narodnych mjeńšin přebywa 26. awgusta we Łužicy. Kaž Domowina informuje, chcedźa so eksperća w Žylowskej pěstowarni „Mato Rizo“ w nošerstwje Serbskeho šulskeho towarstwa rozhladować. Tu je wuměna wo wužadanjach a perspektiwach bilingualneho kubłanja předwidźana. W Domizniskim muzeju Dešno zhonja hosćo wo projekće imersije dorosćenych „Zorja“.
Dotal 180 padow ASP zwěsćili
