Krótkopowěsće (23.07.21)
Incidenca nimale njezměnjena
Budyšin/Zhorjelc. W Budyskim wokrjesu su wčera wo dwěmaj natyknjenjomaj z koronawirusom informowali. 20 wosobow je schorjenych, štyri z nich w chorowni lěkuja. W 45 ze 57 komunow žane infekcije njejsu. Incidenca po RKI je tu dźensa 4,0. We wokrjesu Zhorjelc wčera žane natyknjenje njebě. Zwěsćili su dalšu mutaciju z deltawariantu. RKI poda za Zhorjelski wokrjes incidencu 0,8.
Miliony EU za Saksku
Brüssel. Přez natwarny fonds Europskeje unije k zmištrowanju krizow REACT EU dóstanje Sakska přidatne 115 milionow eurow, kaž z aktualneho newslettera Powěsće EU wuchadźa. Wužiwać hodźa so pjenjezy za šćěpjenske centrumy korony dla, za podpěru testow kaž tež za inwesticiju do IT-infrastruktury, za digitalizaciju kaž tež za medicinske wuhotowanje uniwersitnych klinikow.
Moderne dwórnišćo ma nastać
Krótkopowěsće (22.07.21)
Dwě koronanatyknjeni
Budyšin/Zhorjelc. W Hornjej Łužicy je incidenca dale na niskim niwowje. Roberta Kochowy institut je dźensa za Budyski wokrjes hódnotu 2,3 podał, za Zhorjelski 1,2. Budyski krajnoradny zarjad informowaše wčera wo dwěmaj natyknjenjomaj z koronawirusom. We wokrjesu Zhorjelc wčera žana infekcija njebě, zwěsćili pak su tam w dalšim, hižo wobkrućenym padźe delta-wariantu.
Lubijčan sobu wicemišter swěta
Drježdźany/Lubij. Silvius Perrert, šuler Lubijskeho Gymnazija bratra a sotry Scholl, je ze štyrjomi towaršemi z Kronacha, Lörracha, Weidena a Hamelna slěbornu medalju na wirtuelnym swětowym cupje w fyzice (International Young Physicists Tournament) dobył. 17lětny přisłušeše narodnemu mustwu Němskeje, kotrež bě z Bad Honnefa po pjeć kołach wo dobyće wojowało, kaž kultusowe ministerstwo rozprawja.
CO2-bilanca wozjewjena
Krótkopowěsće (21.07.21)
Korona-prawidła dale płaća
Drježdźany/Budyšin/Zhorjelc. Sakska je wobstejace prawidła koronawirusa dla njezměnjene hač do 25. awgusta podlěšiła, kaž su wčera po posedźenju kabineta w Drježdźanach wozjewili. Budyski wokrjes informowaše wutoru wo dalšim natyknjenju, incidenca wučinja tu po RKI dźensa 2,0. Wokrjes Zhorjelc rozprawješe wo dwěmaj koronainfekcijomaj, dźensniša incidenca po RKI je tam 1,2.
Zhromadnje za akciski dźeń
Budyšin. Za wulki zaměr „ludźi pohibować“ dźěłatej Wokrjesny sportowy zwjazk Budyšin a Wobchadny zwjazk Hornja Łužica-Delnja Šleska hromadźe, štož stej wčera z podpisanjom dojednanja wobkrućiłoj. Partneraj chcetej „aktiwny dźeń“ wuwić, při čimž matej so pohibowanje w přirodźe a jězba z busom a ćahom ze sobu zwjazać. Premjera budźe 18. septembra na temu „Pućować, přirodu sej wotkrywać – z wjeselom“.
Njewšědny křiž za bamža
Krótkopowěsće (20.07.21)
Dwě dalšej koronainfekciji
Budyšin/Zhorjelc. Incidenca w Hornjej Łužicy je dale w jednocyfrowym wobłuku. Roberta Kochowy institut mjenuje dźensa za Budyski wokrjes hódnotu 2,7, a za Zhorjelski 0,8. Wobaj wokrjesaj stej wčera za dny wot minjeneho pjatka po jednym nowym natyknjenju z koronawirusom informowałoj.
Myto za Pawołsku šulu
Drježdźany/Rakecy. Rakečanska Pawołska šula słuša z projektom „přesadźenje chěže kata wot Lišeje Hory do Łuha“ w šulskim lěće 2020/2021 k lawreatam krajneho programa „PEGASUS – šule pomniki adoptuja“. Za to dóstanje myto 500 eurow. Wužadowaceho lěta a přewšo wulkeje ličby požadarjow dla je kultusowe ministerstwo wšitkim 27 šulam, kotrež běchu kriterije programa spjelnili, premiju płaćiło.
„Epopeja“ wróćo na Morawje
Krótkopowěsće (19.07.21)
Niwow incidency dale niski
Budyšin. Incidenca po Roberta Kochowym instituće je dźensa w Budyskim wokrjesu 3,0 a w Zhorjelskim 0,4. Tam su minjeny pjatk wo jednym natyknjenju z koronawirusom rozprawjeli. Niskeje incidency dla njeposkićeja mobilne słužby w Budyskim wokrjesu wot dźensnišeho žane testowanja wjace mjez druhim w gmejnach Kubšicy, Radwor, Hodźij, Njeswačidło a Halštrowska Hola.
Podpěra za słowjanske hrodźišćo
Podstupim. Słowjanske hrodźišćo w Radušu je jedyn z cyłkownje dźesać wusahowacych muzejow, kotrež podpěruje Braniborska z dohromady 250 000 eurami strukturneho spěchowanja. Na te wašnje chce k naslědnej stabilizaciji muzejow z wosebje relewantnymi poskitkami za krajne stawizny přinošować, kaž braniborske ministerstwo za wědomosć, slědźenje a kulturu zdźěli.
„Lěsne bary“ popularne
Krótkopowěsće (16.07.21)
Nakupować bjez nahubnika
Budyšin/Zhorjelc. Incidencna hódnota w Budyskim wokrjesu je dale 2,7. Hač do wčerawšeho zwěsćichu tam dalšej natyknjeni z koronawirusom. Tuchwilu je we wokrjesu dohromady 18 wobydlerjow inficěrowanych. W Zhorjelskim wokrjesu je incidenca dale na nuli, nowonatyknjenja njejsu so žane jewili. Pozitiwneje tendency dla hodźi so w Sakskej wotnětka bjez nahubnika nakupować.
Hudźbne widejo wo brunicy
Chasow. Skupina Astronawt chce dźensa wječor swój najnowši hudźbny widejo „Brunica“ na Youtube-kanalu Serbska hudźba wozjewić. Hłownu rólu sćělesnja wuměłča Greta Čórlichec. Cyłkownje zličichu na portalu dotal něhdźe 70 000 klikow a 500 abonentow.
Dalše pady swinjaceje mrětwy
Krótkopowěsće (15.07.21)
Nowe korona-rjadowanja
Budyšin. Wot jutřišeho płaća nowe rjadowanja koronawirusa dla. Štóž njeje znajmjeńša pjeć dnjow za sobu dowola abo hinašich přičin dla na dźěłowym městnje był, ma so testować dać. Šćěpjeni a wustrowjeni su z toho wuwzaći. W Budyskim wokrjesu rozprawjachu wčera wo štyrjoch natyknjenych, mjez nimi su třo z deltawariantu, a wo dwěmaj smjertnymaj padomaj. Incidenca po RKI je tu dźensa 2,7, we wokrjesu Zhorjelc wučinja wona dale nulu.
Spěchuja aquamedialu
Podstupim/Słopišća. Lětuši festiwal přitomnostneho našočasneho wuměłstwa aquamediale 14 w Słopišćach, wokrjes Dubja-Błóta, spěchuja z lotowymi srědkami kraja Braniborskeje. Kaž kulturne ministerstwo w Podstupimje wčera zdźěli, přewostaja 10 000 eurow za přehladku, kotraž rozestaja so wuměłsce z rjemjesłom a jeho mnohostronskimi zjawami a wliwami na towaršnosć.
Wožiwja stare tramwajki
Krótkopowěsće (14.07.21)
Žane dalše natyknjenja
Budyšin/Zhorjelc. Nastupajo staw infekcijow z koronawirusom njeje so ani w Budyskim ani w Zhorjelskim wokrjesu porno wčerawšemu ničo změniło. Nowonatyknjenja njejsu žane zwěsćili. Incidencna hódnota wučinja po Roberta Kochowym instituće 0,0 za wokrjes Zhorjelc resp. 2,3 za Budyšin. We woběmaj wokrjesomaj tuchwilu dohromady jenož hišće třoch pacientow stacionarnje lěkuja.
Krawcowy „Statok“ w němčinje
Budyšin. Na předań je w Ludowym nakładnistwje Domowina wušła kniha Křesćana Krawca „Was wir in uns tragen – Sorbische Lebenswege“. Publikacija je němska wersija tohorunja wot LND wudateje zběrki portretow „Sej statok stajili“ z wosebitym kapitlom wo Chróšćan zběžku. Awtor sam bě so wo přełožk swojeje knihi postarał.
Alimenty nachwilnje stat zaruna
Praha. Płaćenje alimentow za małolětnych nastupajo zličeja w Čěskej republice tučasnje 120 000 dołžnikow. Wot započatka julija je pak móžno tele pjenjezy wot stata zarunane dóstawać. Maksimalnje jedna so wo měsačnje 3 000 krónow na dwě lěće. Wupłaćenu sumu sej stat potom wot dołžnikow wróćo žada.
Krótkopowěsće (13.07.21)
49 komunow bjez korony
Budyšin/Zhorjelc. W Zhorjelskim wokrjesu je incidenca po RKI dale na nuli. Budyski wokrjes informowaše wčera wo dodatnym přizjewjenju dweju korona-natyknjenjow z minjeneho tydźenja. Incidenca po RKI je tu dźensa 2,3. Něhdźe 111 000 wosobow je prěni raz šćěpjenych, 90 000 hižo dospołnje. 49 ze 57 komunow Budyskeho wokrjesa je aktualnje bjez korony, kaž wčera rěkaše.
Šiman přiradźe dale přisłuša
Budyšin/Berlin. Zapósłanc Sakskeho krajneho sejma Marko Šiman (CDU) přisłuša hač do klětušeho přiradźe Němsko-čěskeho rozmołwneho foruma. Zwjazkowy wonkowny minister Heiko Maas (CDU) je Serba znowa powołał. Gremij sta so w swojim nimale 25lětnym skutkowanju z krutym wobstatkom němsko-čěskich stykow. Zhromadne dźěło dale zesylnić je tež dale zaměr Šimana.
Funkcionaram režima nišu rentu
Krótkopowěsće (12.07.21)
Kreuz znowa wuzwoleny
Pančicy-Kukow. Wolerjo w Pančicach-Kukowje su Markusa Kreuza (CDU) při wčerawšich wólbach wjesnjanosty w zastojnstwje wobkrućili. Kaž wólbna komisija zdźěli, docpě wón 82,9 procentow wotedatych płaćiwych hłosow. Wólbne wobdźělenje pak bě z jenož 28,9 procentami chětro słabe. Kreuz bě jenički kandidat a wukonja zastojnstwo po lěće 2014 nětko dalše sydom lět.
Incidenca lědma změnjena
Budyšin/Zhorjelc. Dźensniša incidenca po Roberta Kochowym instituće je w Budyskim wokrjesu 2,3 a w Zhorjelskim znowa nula. Wo wuwiću korony přez kónc tydźenja wobaj wokrjesaj hakle popołdnju informujetej. Kaž Budyski strowotniski zarjad minjeny pjatk rozprawješe, mějachu tam jedne natyknjenje a jedyn pozdźišo přizjewjeny smjertny pad.
Podpěra šulerskim nowinam
