Wozjewjenje podpisałoj
Drježdźany. Pacienća ze Šluknovskeho wuběžka móža so nětko tež w Sebničanskej chorowni lěkować dać. To zmóžnja wozjewjenje wo zhromadnym dźěle w mjezu překročacym strowotniskim hladanju, kotrež staj sakska strowotniska ministerka Barbara Klepsch (CDU) a čěski strowotniski minister Adam Vojtĕch dźensa podpisałoj, kaž ministerstwo w Drježdźanach zdźěli.
Hórscy burja w srjedźišću
Budyšin. Wo hórskich burach w Južnym Tirolu je dr. Elisabeth Tauber ze Swobodneje uniwersity Bozen wčera w Serbskim instituće referowała. Woni płaća jako nošerjo němskorěčneje identity a su zakład mytosa Južneho Tirola jako burskeho kraja z bohatymi tradicijemi. Industrializacija ratarstwa w dolinach, masowy turizm a ekonomizacija pódy su žiwjenje burow zasadnje přeměnili.
Wo runostajenju žonow
Serbowka časne sluby złožiła
Auerbach. Sara Rječkec z delnich Sulšec je dźensa swój čas jako nowicka w rjedźe šulskich knježnow Našeje lubeje knjenje w Auerbachu zakónčiła. Jako sotra Alojsia Rječkec złoži wona dźensa dopołdnja na Božej mši swoje časne sluby, zdźěli Katolski Posoł. Hakle před lětomaj bu Sulšečanka tam zadrasćena. Za tři lěta chce wona wěčne sluby złožić.
Twarstwo postupuje
Kamjenc. Wjac přistajenych, wjac wobrota a wyše mzdy – twarskemu přemysłu w Sakskej so derje dźe. To zdźěli wčera krajny statistiski zarjad w Kamjencu. Tak su so mzdy lětsa w prěnim połlěće porno lońšemu wo 8,4 procenty zwyšili. Nimo toho je loni kónc lěta něhdźe 33 800 ludźi w twarskim wobłuku dźěłało. To je 2,9 procentow wjace hač w lěće 2017.
Studenća a seniorojo hromadźe
Ursu chce hospodarstwo skrućić
Zhorjelc. Nowy wyši měšćanosta Zhorjelca Octavian Ursu (CDU) bu sobotu w tamnišim Gerharta Hauptmannowym dźiwadle swjatočnje do zastojnstwa zapokazany. Za najwažniše temowe ćežišćo swojeho skutkowanja mjenowaše 51lětny „skrućenje hospodarstwa w měsće. Trjebamy hospodarski rozrost, zo by wobydlerstwo přiběrało a so trěbne socialne narunanje docpěło.“
Warjenska kniha znowa předleži
Budyšin. Jedna ze serbskich bestsellerow je zaso na předań. Kniha Tomaša Lukaša z titlom „Warimy z Tomašom“ bě za někotrehožkuli zajimca přespěšnje rozebrana. Nětko je edicija w dalšim nakładźe wušła, kaž Ludowe nakładnistwo Domowina zdźěla. Wona přeproša dźěći wot wosom lět kaž tež cyłu swójbu na warjenski dyrdomdej do kuchnje.
Nětko změja piwo „Winnetou“
Wudospołnjenje trěbne
Drježdźany. Sakscy Zeleni sej žadaja, zo maja so srědki za strukturnu změnu nastupajo kónc wudobywanja brunicy krok po kroku wupłaćeć. Woni kritizuja, zo maja so w prěnjej spěchowanskej dobje hač do lěta 2026 miliardy eurow wudać, bjez toho zo su woprawdźite postupy při rozžohnowanju z brunicu nuzne wuměnjenje. To je hakle wot lěta 2027 předwidźane.
Wjace kursow pólšćiny
Frankfurt nad Wódru. Wjace kursow pólšćiny chcedźa w Frankfurće nad Wódru poskićeć. W šulach měli dalše poskitki nastać, kaž stej braniborske kubłanske ministerstwo a město wčera wozjewiłoj. Dobre susodstwo je po słowach kubłanskeje ministerki Britty Ernst (SPD) wutrobna naležnosć krajneje politiki. Pólsku rěč sej přiswojić k tomu jara přinošuje.
Techniski unikat spřistupnjeny
Z łódźu po Parcowskim jězoru
Zły Komorow. Parcowski jězor ma jako přichodny za łódźe docpějomny być. LMBV wotpohladuje tam łódźnu přistawnu šćežku twarić. Dźěła za to chcedźa po tuchwilnym planje klětu nalěto zahajić, kaž LMBV na swojej webstronje informuje. Po dowukmanjenju Borborineho kanala mjez Lejnjanskim a Parcowskim jězorom móža hobbyjowi kapitanojo dalše wódnišćo wužiwać.
Spěchowanske šule z přichodom
Drježdźany. Sakski kultusowy minister Christian Piwarz (CDU) wuznawa so jasnje k spěchowanskim šulam. Z jich kompetencow čerpaja tež kubłanišća, hdźež šulerjow inkluziwnje wuwučuja. „Njebě ženje zaměr konwencije UNO wo prawach zbrašenych, w Němskej wysokowuwity system spěchowanja rozpušćić, kaž su to někotre zwjazkowe kraje činili“, pisa Piwarz w zdźělence ministerstwa.
Baćony so z myšemi nasyćeja
Inwesticiske naprawy rozłožił
Trjebin. Šef sakskeje statneje kenclije Oliver Schenk je dźensa dopołdnja w Trjebinje infrastrukturne inwesticije w gmejnomaj Slepo a Trjebin rozłožił. Naprawy bě sakski kabinet hakle wčera w Drježdźanach wobzamknył. Změny rewěroweho koncepta za Wochožansku jamu a njewotbagrowanja dźělow mjenowaneju gmejnow dla dyrbja na wsach nětko masiwne infrastrukturne zastatki nachwatać.
50 000 eurow wjac za projekty
Drježdźany. Wulkeho wothłosa dla rozšěri sakske ministerstwo za wědomosć a wuměłstwo (SMWK) fonds za małe kulturne projekty na wsach wo dalše 50 000 eurow. Dotalne spěchowanske srědki dohromady 200 000 eurow, kotrež bě SMWK Sakskej kulturnej załožbje w meji přewostajiło, su z połsta přizwolenymi próstwami hižo wučerpane.
Lupina kóncuje domjace kwětki
Zapřijmu portrety Serbowkow
Zhorjelc. Na 5. Zhorjelskim fotowym festiwalu „Schauplätze“, kotryž so pjatk za tydźeń zahaji, zapřijmu zdźěla tež wustajeńcu „Prjedy hač woteńdźeš“ Maćija Bulanka z portretami serbskich žonow w drasće. Nimo fotografa SN chcetaj basnica Róža Domašcyna a hudźbnik Měrćin Weclich wotewrjenje festiwala wobrubić. Lěta 2011 je LND knihu a CD „Prjedy hač woteńdźeš“ z přinoškami mjenowanych wuměłcow wudało.
Čłonka dohladowanskeje rady
Budyšin. Přirjadnica Budyskeho krajneho rady Birgit Weber zastupuje wokrjes Budyšin jako čłonka w dohladowanskej radźe Łužiskeho hospodarskeho regiona tzwr. Wotpowědny namjet zarjadnistwa je wokrjesny sejmik tydźenja na swojim konstituowacym posedźenju wobkrućił. Birgit Weber zamołwja w krajnoradnym zarjedźe mjez druhim hospodarske spěchowanje.
Knihi w Němskej wotkisaleja
Stipendij dobyła
Drježdźany/Radwor. Sakske kultusowe ministerstwo je dźensa 35 wuknjacym wyšich šulow stipendije za štyritydźenski přebytk we wukraju přepodało. Mjez nimi bě tež šulerka Radworskeje šule, kotraž chodźi do 9. lětnika. Wona poda so w oktobru do Wulkeje Britaniskeje, hdźež chce sej rěč a kulturu cuzeho kraja dale zbližić.
Politiske plakaty Klausa Staecka
Budyšin. „Kedźbu, wuměłstwo!“ rěka wustajeńca Klausa Staecka, kotruž su minjeny pjatk w Budyskim wobchodźe „Zeleny kućik“ w přitomnosći wuměłca wotewrěli. Widźeć su politiske plakaty, zhotowjene wot bywšeho prezidenta Berlinskeje akademije za wuměłstwo w pjeć lětdźesatkach. Staeck je w Bitterfeldźe wotrostł a 1956 do zapada ćeknył.
Nowy farar zapokazany
Za Hórnikowu knihownju
Drježdźany/Praha. Sakske knježerstwo podpěruje Hórnikowu biblioteku w Praze z 80 000 eurami. Šef sakskeje statneje kenclije Oliver Schenk (CDU) chce zdźělenku wo spěchowanju přichodnu wutoru na městnje w čěskej stolicy přepodać. Statna kenclija w Drježdźanach na to skedźbnja, zo so Domowina hižo mnohe lěta za zachowanje a wožiwjenje Hórnikoweje knihownje angažuje.
Dwurěčne nadróžne tafle
Malešecy. Nowe dwurěčne nadróžne tafle připrawi gmejna Malešecy w septembrje w Malešecach, Přiwćicach a Budyšinku. Do nadawka date hižo su. Nawoda gmejnskeho hłowneho zarjada Jörg Förster mjenuje to prěnju kročel, za kotruž nałoža 4 000 eurow ze serbskeje komunalneje pawšale. Tu Sakska komunam w serbskim sydlenskim rumje přewostaja. Klětu wokoło Hućiny dale póńdźe.
Wjele próstwow dóšło
Europeada z 32 mustwami
Flensburg. Na klětušej koparskej europeadźe awtochtonych mjeńšin Europy wobdźěli so 32 mustwow. To zdźěli Federalistiska unija europskich narodnych mjeńšin, kotraž wubědźowanje organizuje. Cyłkownje 17 narodnych mjeńšinow wubědźuje so pola muži. Hosćićeljo su klětu Korutanscy Słowjency.
Boršć jako kulturne herbstwo
Kamjenc. Město Kamjenc prócuje so wo to, zo Kamjensku Boršć do němskeje lisćiny imaterielneho kulturneho herbstwa přiwozmu. Hač do kónca oktobra chcedźa próstwu zapodać, kotruž ma mjez druhim konferenca kultusowych ministrow a němska komisija UNESCO hódnoćić. Něhdźe dźesać wosebitych regionalnych swjedźenjow su wot lěta 2014 do němskeho imaterialneho kulturneho herbstwa přiwzali.
Sakska w kubłanju najlěpša