Krótkopowěsće (04.03.19)
Dobre wuchadźišćo njedocpěł
Połčnica. Serbski kandidat za lětuše wólby Sakskeho krajneho sejma Hajko Kozel njeje za nastajenje krajneje lisćiny sakskeje Lěwicy 13./14. apryla w Lipsku dobre wuchadźišćo docpěł. W rozsudnych wólbach wo druhe preferowanje kandidata z Budyskeho wokrjesa přesadźi so Felix Muster na zhromadźiznje bazowych zastupjerjow Lěwicy sobotu w Połčnicy přećiwo Kozelej.
Nowy hotel wotewrěli
Lubnjow. Błóta su mjez turistami jara woblubowane. Po ličbje přenocowanjow leži region po cyłej Němskej na 3. městnje. Tuž tam přenocowanske poskitki turistam rozšěrja. Minjeny pjatk su w Lubnjowje nowy hotel „Při Błótowskej termje“ wotewrěli. Za cyłkownje 60 stwow je so tam hač do měrca hižo něhdźe 4 400 hosći přizjewiło.
Polak je kandidat Europy
Krótkopowěsće (01.03.19)
Ze serbskim radźićelom
Podstupim. Nowa rada Rozhłosa Berlin-Braniborska (RBB) je so wčera skonstituowała. Zastojnstwo předsydki dowěrichu znowa Friederice von Kirchbach. Zajimy Serbow zastupuje tam zastupowacy jednaćel Domowiny Marcus Końcaŕ. Wón je jedyn z 20 nowych čłonow gremija a naslěduje Babettu Zenkerowu.
Postajenje ma płaćiwosće nabyć
Drježdźany/Kamjenc. Słyšenja k sakskemu wjelčemu postajenju su wotzamknjene. Na to skedźbni serbski zapósłanc krajneho sejma Alojs Mikławšk (CDU). Potrjechene zwjazki su naležnosć wobšěrnje rozjimowali. „Wjeselu so, zo statne knježerstwo słowo dźerži a zwoprawdźi wjelče postajenje, kotrež ma hišće w měrcu w Sakskej płaćiwosće nabyć“, zapósłanc zdźěli.
Demonstracija wotprajena
Krótkopowěsće (28.02.19)
Inflacija w Sakskej konstantna
Kamjenc. Lětne podróšenje w Sakskej wučinja w februaru kaž hižo w januaru po wšěm zdaću něhdźe 1,4 procenty. Kaž Kamjenski statistiski krajny zarjad dźensa zdźěla, pokazuja so prěnje wuskutki wyšeje minimalneje mzdy. Tak přiběrachu płaćizny za frizury žonow wo 3,7 procentow, pola muži a dźěći wo 2,8. Chemiske rjedźenje płaćeše 3,5 procentow wjace hač loni w februaru.
Dźeń rědkich chorosćow
Berlin. Załožba Evy Luisy a Horsta Köhler je składnostnje dźensnišeho dnja rědkich chorosćow dr. Björna Schumachera z Uniwersity Köln ze slědźenskim mytom w hódnoće 50 000 eurow wuznamjeniła. Tak počesći angažement wědomostnika na polu přeslědźenja schorjenjow xeroderma pigmentosum (absolutna njeznjesliwosć kóždehožkuli UV-prudźenja) a cockayne syndrom (pospěšene zestarjenje dźěći).
Škoda Auto woli alternatiwu
Krótkopowěsće (27.02.19)
Wutroba a motor Łužicy
Choćebuz. Braniborske krajne knježerstwo ma dobre wuwiće Choćebuza za kluč strukturneje změny po cyłej Łužicy. Město je „wutroba a motor“ tohole procesa, kaž je to ministerski prezident Dietmar Woidke (SPD) po zhromadnym posedźenju kabineta wčera „na městnje“ z čołom radnicy delnjołužiskeje metropole pod wyšim měšćanostu Holgerom Kelchom (CDU) wujasnił.
Němske wudaće premjeru měło
Drježdźany. Benedikt Dyrlich je wčera w Literarnym domje wila Augustin němsku wersiju swojeje biografiskeje zběrki dokumentow, listow a dźenikowych zapiskow „Doma we wućekach 1“ předstajił. Čitanje w sakskej stolicy bě zdobom knižna premjera w Ludowym nakładnistwje Domowina wušłych memoarow serbskeho basnika a publicista.
Wusud UNO wo kupach Chagos
Krótkopowěsće (26.02.19)
Pojědu na 4. kongres maćicow
Budyšin. Maćica Serbska sćěhuje přeprošenje Maticy Słowakskeje na 4. kongres maćicow słowjanskich narodow w juniju w Martinje. To je předsydstwo serbskeho wědomostneho towarstwa wčera wobzamknyło. Do hłowneje zhromadźizny 9. měrca skedźbnja Maćica na spominanje w 13 hodź. při rowje swojeho bywšeho předsydy Michała Hórnika składnostnje jeho 125. posmjertnin.
Čłowjek wjelka njemorił
Waldhufen. Wjelka, kotrehož su minjeny štwórtk mortweho na ležownosći we Waldhufenje (wokrjes Zhorjelc) namakali, njeje čłowjek morił, kaž krajny kriminalny zarjad informuje. Po zdaću je jeho dalši wjelk zranił. Mortwe skoćo přepytuja nětko w Berlinskim Leibnizowym instituće za slědźenje coowowych a dźiwich zwěrjatow.
Zwěrjenc starši hač wočakowany
Krótkopowěsće (25.02.19)
Spalene knihi w atlasu
Budyšin. Iniciator projekta „Spalene městna“ Jan Schenk přebywaše kónc tydźenja w Budyšinje. Sobotu sfotografowa wón skału na Lubijskej, hdźež běchu nacionalsocialisća 1933 knihi spalili. Wobrazy wozjewi w digitalnym atlasu, dokumentowacym dotal něhdźe 70 tajkich městnosćow „Akcije přećiwo njeněmskemu duchej“ w Němskej a Awstriskej.
Serbaj mjez kandidatami
Budyšin/Kamjenc. Z načolnymaj kandidatomaj Steffenom Grundmannom w Budyšinje a Marion Junge w Kamjencu nastupi Lěwica k wólbam měšćanskeju radow 26. meje. Pod hesłom „Město Budyšin wuhotować – socialnych problemow so jimać – prawicarskemu populizmej so spřećiwjeć“ staj mjez dźesać kandidatami Měrćin Bałcar a Handrij Nowak. W Kamjencu je 13 kandidatow.
Burski zwjazk so wobara
Krótkopowěsće (22.02.19)
Přinošk Europy k škitej mjeńšin
Berlin. Społnomócnjeny Němskeje za narodne mjeńšiny prof. dr. Bernd Fabritius je wčera ekspertowu komisiju Europskeje rady k škitej Sintow a Romow Ad hoc Comitee of Experts on Roma and Traveller Issues (CAHROM) přijał. Na dźěłowej rozmołwje chwaleše Fabritius prócowanja Europskeje rady a wuzběhny wuznam ramikoweho dojednanja wo škiće narodnych mjeńšin.
Spěchuja wutwar Sakskeho koła
Drježdźany. Swobodny stat Sakska spěchuje wutwar wubědźowanišća motorskich Sakske koło. Kaž financne ministerstwo wčera zdźěli, móža přizwolene 900 000 eurow za přetwar znateje wubědźowanskeje čary motorskich nałožić. Ze spěchowanja profituje tež tamniši centrum za wobchadnu wěstotu. Modernizacija ma k přichodnym mišterstwam spočatk julija wotzamknjena być.
Přezmjezna inspiracija
Krótkopowěsće (21.02.19)
Digitalny pakt přińdźe
Drježdźany. Sakski kultusowy minister Christian Piwarz (CDU) wita dojednanje mjez Zwjazkom a krajemi, tak mjenowany digitalny pakt. „Je to dobra powěsć našim šulam“, Piwarz dźensa rjekny. Sakska ma za wutwar IT-infrastruktury na kubłanišćach něhdźe 250 milionow eurow dóstać. We wadźeńcy wo spěchowanje wutwara su so Zwjazk a kraje wčera na změnu Zakładneho zakonja a na wurjadne rjadowanja dojednali.
Wusud wo wólbnym prawje
Karlsruhe. Zwjazkowe wustawowe sudnistwo je dźensa wusud wozjewiło, w kotrymž wobmjezowanje wólbneho prawa za zbrašenych jako wustawje njewotpowědowace wotpokazuje. Tež po sudniskim wukazu psychiatrisce zastarani jeći njesmědźa so „z demokratiskeho procesa wuzamknyć“, w spisu dale rěka.
Chinsku medicinu zběhnu
Krótkopowěsće (20.02.19)
Miliony za wokrjesne dróhi
Kamjenc. Za wuporjedźenje zymskich škodow na dróhach přewostaji Sakska wokrjesej Budyšin 2,8 milionow eurow. To zdźěli dźensa zapósłanc krajneho sejma Alojs Mikławšk (CDU). Tež serbske komuny z toho profituja. Tak dóstanu Pančicy-Kukow 35 300 eurow, Chrósćicy 30 600, Njebjelčicy nimale 30 000 eurow, Ralbicy-Róžant 25 000 a Worklecy něhdźe 18 000 eurow, kaž z Kamjenskeho běrowa zapósłanca rěka.
Nowa spěchowanska směrnica
Drježdźany. Sakske knježerstwo je na swojim póndźelnym posedźenju wobzamknyło, směrnicu za spěchowanje sporta w swobodnym staće ponowić. Hladajo na „demografisku změnu, globalizaciju a hinaše žiwjenske wobstejnosće“ chcedźa zjawny sport přichodnje „fleksibelnišo a mjenje běrokratisce“ podpěrać. Lětsa inwestuja dohromady 60,3 miliony a klětu 59 milionow eurow.
Statysacy galaksisow wotkryli
Krótkopowěsće (19.02.19)
Za zhromadny kubłanski wjeršk
Ćisk. Serbski sejm je Zwjazkowe předsydstwo Domowiny, županki a županow na kubłanski wjeršk přeprosył. Zaměr je wuhódnoćić studiju wo serbskich kubłanskich poskitkach na braniborskich šulach, w přeprošenju rěka. Předsydka wuběrka za kulturu a kubłanje Serbskeho sejma Aneta Zahrodnikowa namołwja, wobsahowe a strukturne prašenja rozjimać a trěbne naprawy zhromadnje zwoprawdźić.
Přidatna podpěra muzejam
Drježdźany. Sakska podpěruje muzeje, kotrež njejsu w statnym nošerstwje, přidatnje z něšto wjace hač milionom eurow. To zdźěli dźensa statna ministerska za wědomosć a wuměłstwo dr. Eva-Maria Stange (SPD). Lětsa předwidźi swobodny stat za to wjac 700 000 eurow. Prěni raz spěchuje Sakska tež předewzaća digitalizacije a inkluzije, za čož je lětsa a klětu 250 000 eurow k dispoziciji.
Powjetša jadrowu milinarnju
