Krótkopowěsće (03.11.21)
Incidenca dale dosć wysoka
Budyšin. Z wčera w Budyskim wokrjesu wozjewjenymi 87 natyknjenjemi z koronawirusom je so tu dźensa wot RKI podata incidenca na 305,4 zwyšiła. Wot 1 844 schorjenych lěkuja 67 w klinice. We wokrjesu Zhorjelc rozprawjachu wčera wo 164 dalšich infekcijach, 84 wosobow korony dla w chorowni zastaruja. Indicenca tam je po RKI dźensa 294,5.
Podróšenja lětsa kaž 2008
Kamjenc. W prěnich dźewjeć měsacach lěta dyrbjachu sakscy přetrjebarjo zdźěla sylnje zwyšene płaćizny akceptować. Rata lětneho podróšenja mjez januarom a septembrom bě přerěznje 2,4 procenty nad niwowom samsneje doby loni, kaž Statistiski krajny zarjad dźensa w Kamjencu zdźěli. Wyša inflaciska rata za prěnje dźewjeć měsacow bě naposledk w lětomaj 2007 a 2008 z 2,6 proc.
Słowjanska cyrkej w Awstriskej
Krótkopowěsće (02.11.21)
Wićaz sej bjezpłatne testy žada
Budyšin. Zastupowacy Budyski krajny rada Udo Wićaz (CDU) je sej dźensa bjezpłatne koronatesty žadał, zo móhli testowanje zaso rozšěrić. Budyski wokrjes je wčera wo 284 natyknjenjach z koronawirusom a jednym smjertnym padźe wot minjeneho pjatka informował. Incidenca po RKI je tu dźensa 278,5, we wokrjesu Zhorjelc je 304,9. Tam rozprawjachu wčera wo 261 infekcijach wot pjatka.
Kopor wudobywać we Łužicy
Grodk. Předewzaće Łužiski koporowy šćěpjel tzwr nawjazuje na swoje lěta 2018 přetorhnjene přihoty za wudobywanje kopora pola Syjka (Graustein). Klětu chce wotpowědnu próstwu zapodać zhromadnemu krajnemu planowanju Berlin-Braniborska w ministerstwje za infrastrukturu a ratarstwo, rjeknyštaj zamołwitaj projektnaj manageraj Ralph Baumann a Blas Urioste w Grodku.
Ćěriwowy „turizm“
Krótkopowěsće (01.11.21)
Incidenca dźensa jasnje nad 300
Budyšin. Natyknjenja z koronawirusom sylnje přiběraja. Za Budyski wokrjes je Roberta Kochowy institut dźensa incidencu 341,6 podał (minjeny pjatk bě ta 280,9), za Zhorjelski 376,8. Njejapkeho rozrosta infekcijow z koronawirusom dla je Budyski krajnoradny zarjad minjeny pjatk 60 přistajenych z druhich wobłukow přerjadował, zo bychu kontakty z koronu inficěrowanych sobu zwěsćili.
Z hosćom w „Studiosession“
Halle. Ze swojim debitnym albumom w němskej rěči „Riech an Blumen (und merk dir ihre Namen)“, bě Milan Grojlich alias Rokotak předwčerawšim z hosćom we wusyłanju „Studiosession“ sćelaka MDR kultura. W rozmołwje z Janom Kubonom powědaše 46lětny wo swojim hudźbnym tworjenju a rozłoži woznam serbskeho ptačeho mjena rokotak, kotrež bě sej jako pseudonym wuzwolił.
Mlokowa produkcija wuběži
Krótkopowěsće (29.10.21)
Incidenca bliži so hódnoće 300
Budyšin. Incidenca po Roberta Kochowym instituće je dźensa w Budyskim wokrjesu 280,9. Tam rozprawjachu wčera wo 157 natyknjenjach z koronawirusom. Na tysac wobydlerjow wobličene stejitej gmejnje Worklecy a Kubšicy ze 17 potrjechenymi na čole. We wokrjesu Zhorjelc informowachu wčera wo 135 infekcijach a dalšim smjertnym padźe ze 6. oktobra. Incidenca po RKI je tam dźensa 279,8.
Firmy pytaja fachowcow
Budyšin. We wuchodnej Sakskej bě w oktobrje 16 527 bjezdźěłnych, to je 547 resp. 3,2 proc. mjenje hač w awgusće. Změna porno lońšemu oktobrej je ta, zo je ličba bjezdźěłnych wo 1 356 resp. 7,6 proc. woteběrała, kaž Budyska wotnožka agentury za dźěło wčera informowaše. Rozsudne za aktualne połoženje je wulka potrjeba předewzaćow za fachowcami, agenturje předleži 5 500 jobow.
Myto za ciwilnu kuražu
Krótkopowěsće (28.10.21)
385 nowych natyknjenjow
Budyšin/Zhorjelc. We woběmaj hornjołužiskimaj wokrjesomaj incidenca korony dla dale přiběra. Za Budyski wozjewi Roberta Kochowy institut dźensa hódnotu 278,8. Wčera přizjewi wokrjes 250 nowych schorjenjow. Za Zhorjelski wokrjes podawa RKI incidencu 258,2. Tam zwěsćichu 135 dalšich infekcijow.
Šulerske filmy hišće zapodać
Drježdźany. Za sakski festiwal šulerskeho filma „film ab!“ móžeja šulerki a šulerjo swoje samoprodukowane paski hišće hač do 5. nowembra na internetnej stronje zapodać. Kultusowe ministerstwo a Sakski krajny wustaw za priwatny rozhłós a nowe medije festiwal zarjadujetej. Wuknjacy wšitkich rjadowniskich schodźenkow móža so wobdźělić. Najlěpše filmy z premijemi cyłkownje 2 100 eurow mytuja.
China so mjerza
Krótkopowěsće (27.10.21)
83 koronapadow w klinikach
Budyšin. W hornjołužiskich chorownjach lěkuja tuchwilu 83 na koronu schorjenych. Incidenca je po Roberta Kochowym instituće dźensa w Budyskim wokrjesu 234,9 a w Zhorjelskim 215,5. Wokrjes Budyšin je wčera wo 220 dalšich natyknjenjach z koronawirusom informował. We wokrjesu Zhorjelc rozprawjachu samsny dźeń wo 173 infekcijach.
Myto přichoda do Njebjelčic
Drježdźany. Projekt „Wnučkokmane energijowe hospodarstwo za gmejnu Njebjelčicy“ wuznamjeni sakske ministerstwo za energiju, škit klimy, wobswět a ratarstwo z Mytom přichoda 2021 w kategoriji eku. Z tym zwjazany je mytowanski pjenjez 10 000 eurow, kaž projektowy team eku Njebjelčanskeho wjesnjanostu Tomaša Čornaka tele dny informowaše.
Yücel na čole PEN-centruma
Krótkopowěsće (26.10.21)
Natyknjenja sylnje přiběraja
Budyšin. Ličba z koronawirusom natyknjenych wosobow w Hornjej Łužicy dale sylnje přiběra. Za dobu kónca tydźenja je Budyski wokrjes wčera wo 235 padach informował, wot 1 273 schorjenych tam 41 w klinice lěkuja. Wokrjes Zhorjelc za samsnu dobu wo 177 infekcijach rozprawješe, tam maja 40 korona-pacientow w klinice. Techniskeho njedostatka dla njeje RKI hač do připołdnja dźensniše incidency wozjewił.
Matthias Kießling zemrěł
Žylow. Znaty Choćebuski folkowy hudźbnik, komponist a producent Matthias Kießling je minjenu njedźelu, dnja 24. oktobra, njejapcy w starobje 65 lět w swojim domje w Žylowje zemrěł. Lětdźesatki je wón nowe spěwy za delnjo- a hornjoserbski rozhłós produkował. Wosebje ze spisowaćelom Jurjom Kochom je wón zhromadnje dźěłał.
Šćedriwy dar coowej
Krótkopowěsće (25.10.21)
Incidenca nětko nad 200
Budyšin. Přez kónc tydźenja je incidenca w hornjołužiskimaj wokrjesomaj hódnotu 200 překročiła. Za Budyski wokrjes je Roberta Kochowy institut dźensa 259,7 podał, za Zhorjelski 218,3. Minjeny pjatk je Budyski wokrjes wo 349 dalšich natyknjenjach z koronawirusom a 21 wosobach rozprawjał, kotrež w chorowni lěkuja. We wokrjesu Zhorjelc bě 97 infekcijow, 27 pacientow w klinice hoja.
Přihotuja kursaj
Raduš. Seminaraj wo stawiznach, kulturje, tradicijach, žiwjenju a rěči Serbow přihotuje Turistiski zwjazk Błóta w Radušu. Prěni chcedźa spočatk nowembra wotměć, zdźěla delnjoserbski rozhłós. Myslenej stej kursaj za turistiske institucije, sobudźěłaćerjow hotelow a hosćencow a poskićowarjow wólnočasnych zaběrow. Zapřijaty je zdobom kurs k nawuknjenju wšědnych serbskich wobrotow.
Dobyćerjo wubědźowanja jasni
Krótkopowěsće (22.10.21)
Incidenca znowa stupa
Budyšin/Zhorjelc. Chróšćanska a Bóščanska gmejna nimatej tuchwilu žanych na koronu schorjenych. Za tamne serbske a dwurěčne komuny zdźěleja přiběracu ličbu natyknjenjow. Tež incidenca w Budyskim a Zhorjelskim wokrjesu zaso stupa. Dźensa podawa RKI za Budyski 139,9, wčera zličichu tu 159 infekcijow. Incidenca za Zhorjelski wokrjes wučinja po RKI dźensa 166,8.
Udo Zimmermann njeboh
Drježdźany. Komponist, dirigent a bywši intendant Lipšćanskeje opery Udo Zimmermann a generalny intendant Němskeje opery Berlin je njeboh. Kaž ze stron swójby rěka, je wón w nocy na dźensniši pjatk w ródnym měsće Drježdźanach w starobje 78 lět zemrěł. Za swój žiwjenski skutk bu mjez druhim ze Zwjazkowym zasłužbowym křižom a Narodnym mytom NDR počesćeny.
ABBA z třećim nowym spěwom
Krótkopowěsće (21.10.21)
Rozdźělne wuwiće
Budyšin/Zhorjelc. Incidenca hódnota w Budyskim a Zhorjelskim wokrjesu so rozdźělnje wuwiwa. Prěni raz po dlěšim času zdźěli RKI dźensa za Budyski z 93,6 hódnotu pod 100, wčera zličichu tu wosom natyknjenjow. Incidenca za Zhorjelski wokrjes je dale přiběrała, ju podawa RKI dźensa ze 148,1. Zličili su tam wčera 109 dalšich infekcijow.
Zhromadnje na knižnych wikach
Frankfurt nad Mohanom. Na wčera zahajenych Frankfurtskich knižnych wikach předstaja so zhromadnje z towaršnosću Sakske hospodarske spěchowanje na stejnišću „Sachsen-live“ dźesać wustajerjow ze swobodneho stata, mjez druhim tež Lipšćanske knižne wiki. Dohromady 1 700 wustajerjow z wjace hač 70 krajow so hač do njedźele w Frankfurće prezentuje.
Zběhnu nadhódnotowy dawk?
