Krótkopowěsće (12.02.20)
Nowa kniha Diany Hickec wušła
Berlin. Pod titulom „Nach der Einsprachigkeit – Slavisch-deutsche Texte transkulturell“ je w rjedźe „Postcolonial Perspectives on Eastern Europe“ w Berlinskim nakładnistwje Peter Lang nowa kniha slawistki dr. Diany Hickec wušła. Mjez druhim zaběra so wona ze serbskej jako splećenej literaturu. Nimo toho je cyły kapitl specifiskej poetice Jurja Brězana w romanje „Krabat“ wěnowała.
Wukładnišćo za sakske namakanki
Drježdźany. Sakski krajny zarjad za archeologiju poskići nowu internetnu platformu, na kotrejž předstaja archeologiske namakanki. Jónkrótne w Němskej je, zo woni přirunujo z podobnymi prezentacijemi tam žane fota abo rysowanki njeprezentuja, ale 3D-modele. Studenća Drježdźanskeje fachoweje wysokeje šule su internetnu prezentaciju wuhotowali. Dotal 100 namakankow tam předstajeja.
Čěske wizumy požadane
Krótkopowěsće (11.02.20)
Žadaja sej wyšu mzdu
Budyšin. W Budyskim wokrjesu maja sobudźěłaćerjo fastfood-hosćencow dóstać wjace pjenjez. Dźěłarnistwo cyroba-požitk-hosćency (NGG) žada sej z aktualnych tarifowych jednanjow znajmjeńša dwanaće eurow na hodźinu jako „mzdu přećiwo chudobje“. Dotal běchu dźěłodawarjo čujomne zwyšenje mzdy blokowali. Sobudźěłaćerjo dóstawaja dotal na hodźinu zwjetša minimalnu mzdu we wysokosći 9,35 eurow.
Wutworja wukubłanišćo
Budyšin. Budyski předewzaćel Jörg Drews je připowědźił wutworić lětsa powołansko-kubłanski centrum za potrjebu w swójskim předewzaću. Wuchadźišćo za to bě lońši dźeń wotewrjenych duri, na kotrymž běštej předewšěm mnohostronskosć rjemjesła a předstajenje jako wukubłanski zawod zajimcow přiwabiłoj. Ličba sobudźěłaćerjow rosće runje tak kaž twarske projekty a wobrot.
Zaměstnja slědźenišćo
Krótkopowěsće (10.02.20)
Złoži předsydstwo CDU
Berlin. Předsydka CDU Annegret Kramp-Karrenbauer njebudźe klětu jako zwjazkowa kanclerka kandidować a chce nimo toho zastojnstwo předsydy CDU złožić. Tole je wona dźensa w prezidiju CDU zdźěliła, rěčnik strony potwjerdźi. Jedna z přičinow wotstupa je „njejasny poměr dźěla CDU k AfD a Lěwicy“. Nadrobnosće chcyše wona w běhu dnja zdźělić.
Centrum certifikowany
Budyšin. Chirurgiska klinika Budyskich hornjołužiskich klinikow bu znowa jako regionalny trawmacentrum za Hornju Łužicu recertifikowany. Z tym spjelnja klinika wšitke žadanja za hojenje ćežko zranjenych po kriterijach Němskeje towaršnosće za njezbožowu chirurgiju a trawmasyće DGU. Nimo fachoweje kompetency posudźuja fachowcy specielne personelne a strukturelne kaž tež wuhotowanje z medicinskimi nastrojemi.
Najwjace mytow za korejski film
Krótkopowěsće (07.02.20)
Skazaja nowe nadróžne tafle
Pančicy-Kukow. Gmejna Pančicy-Kukow chce na swojim teritoriju wšitke nadróžne tafle ponowić dać. Nadawk za 10 000 eurow su gmejnscy radźićeljo wčera schwalili. Na dohromady 110 taflach budźe serbski a němski napis jenak wulki. Projekt financuja z lońšeje a lětušeje přiražki po 5 000 eurach, kotruž Swobodny stat Sakska komunam w dwurěčnym sydlenskim rumje za přidatne wudawki za serbsku rěč přewostaja.
Wuswědčenja přepodali
Drježdźany. Do zahajenja zymskich prózdnin je dźensa něhdźe 485 000 šulerkow a šulerjow w Sakskej wuswědčenja přijało. Něhdźe 34 000 holcam a hólcam 4. lětnika su zdobom poručenje za gymnazij přepodali. ADAC liči nětko w prózdninach ze zatykanymi awtodróhami a namołwja dowolnikow, časy najsylnišeho wobchada wobeńć.
Njetopyrje w bunkrach „wěste“
Krótkopowěsće (06.02.20)
Zakonske namjety předstajili
Brüssel. Zakonske namjety, złožowace so na dźewjeć dypkow europskeje wobydlerskeje iniciatiwy Minority Safepack (MSPI), su wčera w Brüsselu Europskej komisiji předstajili. Zastupjerjo MSPI zetkachu so tam z Věru Jourovej, wiceprezidentku komisije EU a komisarku za hódnoty a transparencu, a dalšimi. Z Němskeje bě čłonka wobydlerskeho komiteja Anke Spoorendonk (SSW) pódla.
Zhromadna digitalna agentura
Lipsk. MDR a ZDF budźetej přichodnje při wuwiću digitalnych poskitkow hromadźe dźěłać. Za to wutworjena Inowaciska a digitalna agentura ma 1. apryla w Lipsku z 15 sobudźěłaćerjemi dźěłać započeć. Tam chcedźa projekty kaž storytelling a datowy žurnalizm dale wuwić, kaž staj intendantaj Karola Wille a Thomas Bellut wčera připowědźiłoj.
„Zymske jewišćo na hrodźe“
Krótkopowěsće (05.02.20)
Saksojo wjele dźěłaja
Kamjenc. Sakskojo wosebje wjele dźěłaja, zdźěli wčera krajny statistiski zarjad ze sydłom w Kamjencu. Tak je přistajeny w lěće 2018 přerěznje 1 431 hodźin dźěłał. To je 41 hodźin wjace hač cyłozwjazkowy přerězk. Najwjac dźěłali su w sakskim twarstwje, tam zličichu statistikarjo na jednotliwca 1 627 hodźin.
Wjace na gripu schorjenych
Budyšin. Ličba na gripu schorjenych w Budyskim wokrjesu je minjeny tydźeń wo 77 na 145 wosobow přiběrała. To je najwjetši přirost w aktualnej gripowej sezonje z cyłkownje 273 padami, kaž z informacije krajnoradneho zarjada wuchadźa. Samsny čas loni bě dohromady 188 na gripu schorjenych. W strowotniskim zarjedźe maja dosć šćěpiwa za tych, kotřiž chcedźa so hišće šćěpić dać.
Nadźijeja so noweho sněha
Krótkopowěsće (04.02.20)
Znowa pawšala komunam
Drježdźany. Třeće lěto za sobu přewostaja sakske financne ministerstwo kóždej wokrjesam přisłušacej komunje pawšalu 70 000 eurow za wólne wužiwanje, cyłkownje 30 milionow eurow. Pjenjezy hodźa so za běžne projekty runje tak kaž za inwesticije w šulach a pěstowarnjach wužiwać. Sakski sejm bě 2018 tak mjenowany zakoń wo pawšalach wobzamknył, z kotrymž skruća hač do lěta 2020 z podatej sumu gmejny zwonka metropolow.
BUND doskónčnje zwrěšćił
Choćebuz. Braniborski hórniski zarjad je předewzaću Łužiska energija a milinarnje LEAG dowolił, wužiwać wodźizny w zwisku z brunicowej jamu Wjelcej-juh. Přirodoškitna organizacija BUND bě přećiwo tomu skoržiła, ale po cyłkownje jědnaće lět trajacej rozkorje doskónčnje zwrěšćiła.
W februaru bjez alkohola
Krótkopowěsće (03.02.20)
Nowa wopytowarska adresa
Budyšin. W přetwarjenym a njedawno přepodatym nowym Budyskim dwórnišću su wot dźensnišeho socialny a młodźinski zarjad kaž tež zarjadaj za přizwolenje jězdźidłow a za jězbnu dowolnosć Budyskeho krajnoradneho zarjada přistupne. Wopytowarjo maja 70 krótkočasowych parkowanskich městnow k dispoziciji, z nich šěsć za zbrašenych.
Koalicija šansu zapasła
Budyšin. Zwjazkowy sejm je minjeny pjatk próstwu frakcije FDP wotpokazał, w kotrejž sej mj. dr. žadachu železnisku čaru Drježdźany-Zhorjelc elektrifikować a na prioritnu lisćinu přiwzać. Čara słuša k 13 projektam z narodnym wuznamom, a tak móhli jón ze zakonjom wo spěšnišim planowanskim jednanju zwoprawdźić. Šansu pak je koalicija zapasła.
Wobmjezuje posłužby
Krótkopowěsće (31.01.20)
Wušo hromadźe dźěłać
Hradek nad Nisou. Zwjazkowa policija chce z čěskimi kolegami w Liberecskim kraju wušo hromadźe dźěłać. Zastupjerjo wobeju stronow su wčera w pomjeznym Hradeku nad Nisou stejnišćo za přichodne zhromadne policajske słužbne zarjadnišćo wopytali. Tehdy je tam policija za cuzych swój domicil měła, kaž mjenuja zarjad za wukrajnikow w Čěskej.
BUND peticiju přepodał
Drježdźany. Swoju peticiju „Brunicu stopować – jamy pomjeńšić“ je Zwjazk za wobswět a přirodoškit Němskeje (BUND) w Sakskej prezidentej krajneho sejma Matthiasej Rößlerej (CDU) srjedu oficialnje přepodał. Peticiju z lońšeje pózdnjeje nazymy je njecyłych 1 300 ludźi podpisało, kotřiž so za kónc wudobywanja a wužiwanja wuhla a tak přećiwo klimowej změnje zasadźeja.
Jamu Turów njerozšěrić
Krótkopowěsće (30.01.20)
Bjezdźěłnosć přiběrała
Budyšin. W januaru je ličba bjezdźěłnych we wuchodnej Sakskej wo 1 687 (+10,1 procent) na 18 411 widźomnje přiběrała. Kaž Budyska agentura za dźěło dźensa informuje, běchu w prěnich tydźenjach lěta 2020 předewšěm dźěławi z wobłukow zahrodnistwa, krajinotwarstwa kaž tež twarstwa potrjecheni. Nimo toho su mnohe dźěłowe zrěčenja we wikowanju, zarjadnistwje, hotelownistwje a gastronomiji wuběželi.
Imunita Gaulanda zběhnjena
Berlin. Zwjazkowy sejm je imunitu předsydy frakcije AfD Alexandera Gaulanda zběhnył. Plenum přihłosowaše próstwje statneho rěčnistwa w Frankfurće nad Mohanom. Tam běchu loni přećiwo Gaulandej přepytowanja „priwatneho dawkoweho zmylka“ dla zahajili. W tym zwisku planuja tež bydlenja a běrowy přepytać. To pak je jenož móžno, jeli sejm tomu wuraznje přihłosuje.
LEAG dale čaka
