Policija (09.07.25)
Pytaja swědkow smjertneje zražki
Běła. Wobchadne njezbožo z tragiskim wukóncom je so wutoru dopołdnja pola Běłeje (Biehla) blisko Kamjenca stało. 53lětna žona bě ze swojim VWjom na statnej dróze S 94 do směra na Njedźichow po puću. Z dotal njeznateje přičiny zajědźe wona na napřećiwnu jězdnju a zrazy tam frontalnje do Mitsubishija 64lětneje wodźerki. Žona w VWju hišće na městnje njezboža zemrě. Šoferka Mitsubishija a jeje 65lětny sobujěducy so ćežko zraništaj. Jeju dowjezechu do chorownje. Policija pyta swědkow, kotřiž su njezbožo abo tež wokomiki do toho wobkedźbowali (tel. 03591/ 36 70).
Policija (08.07.25)
Motorske pokradnyli
Haty. Paduši su minjene dny w Hatach, małej wsy we Worklečanskej gmejnje pobyli. Njedźelu popołdnju tam zwěsćichu, zo bě so motorske typa Kawasaki KLX 140 R zhubiło. Po informacijach policije bě mašina něhdźe 3 000 eurow hódna. Skućićeljo běchu so na ležownosć na Wokolnym puću zadobyli a motorske sobu wzali. Hač su z nim wotjěli abo hač su motorske z připowěšakom wotwjezli njeje znate. Kriminalna słužba Kamjenskeho policajskeho rewěra so z padom zaběra.
Policija (03.07.25)
Bjez zawěsćenja jězdźił
Budyšin. Zo trjebaš za jězdźenje z e-scooterom winowatostne zawěsćenje, wě nětko tež 63lětny muž w Budyšinje. Jeho zadźerža policija póndźelu wječor na Drježdźanskej dróze w Budyšinje. Płaćiwe zawěsćenje muž njeměješe. Tohodla jemu zastojnicy dalšu jězbu zakazachu. Nimo toho změje 63lětny pjenježnu pokutu płaćić.
Policija (02.07.25)
Spěšnosć kontrolowali
Kulow. Dlěje hač štyri hodźiny su policisća póndźelu dopołdnja spěšnosć na statnej dróze S 95 pola Kulowa kontrolowali. W potrjechenym wotrězku blisko Kulowskeje wodočisćernje směš 50 km/h jěć. 359 jězdźidłow su měrili, 82 z nich bě přespěšnych. 42 šoferow dyrbi warnowanski pjenjez zapłaćić, 40 pak dóstanje list z informaciju wo pokuće. Njesławny rekord docpě Mercedes Vito z Budyskim čisłom, pola kotrehož naměrichu 98 km/h. Za to dóstanje šofer dwaj dypkaj w Flensburgu. Dale ma 400 eurow pokuty płaćić a měsac nóžkować.
Wotpadki do lěsa ćisnyli
Sprjewiny Doł. Njeznaći su w minjenym času swoje wotpadki w lěsu pola Sprjewineho Doła wotbyli. Kaž policija zdźěli, namakachu tam tele dny wjacore drjewjane łaty a asbestowe platy. Kriminalna słužba Wojerowskeho policajskeho rewěra pad dale přepytuje.
Policija (01.07.25)
Lětadło přizemić dyrbjało
Nowe Poršicy. K nuzowej situaciji z ultralochkim lětadłom je njedźelu popołdnju w Nowych Poršicach wuchodnje Budyšina dóšło. Krótko do 16 hodź. dyrbješe tam mašina typa Icarus C 42 A na rěpikowym polu při statnej dróze S 111 přizemić. Kaž policija rozprawja, měješe lětadło po starće w Lětonju po wšěm zdaću techniske problemy z wodźidłom. 48lětny pilot so na zbožo zranił njeje. Lětadło pak bu sylnje wobškodźene. Škodu trochuja na něhdźe 70 000 eurow. Statnu dróhu dyrbjachu sčasami zaraćić.
Policija (26.06.25)
Traktor do murje zrazył
Přiwčicy. Z njewšědnym wobchadnym njezbožom dyrbješe so wutoru policija w Přiwćicach w Malešanskej gmejnje zaběrać. Tam bě 40lětny wodźer traktora typa Fendt něhdźe w 7.30 hodź. we wsy po puću. Najskerje strowotniskeho problema dla zajědźe wón ze swojim jězdźidłom na prawy bok jězdnje. Na to zrazy mašina do bydlenskeho domu. Šofer so na zbožo jenož snadnje zrani. Na domje nasta něhdźe 25 000 eurow škody, na traktorje pak na wšěch 150 000 eurow, kaž policija zdźěli.
Policija (25.06.25)
Znowa so paliło
Rakecy. W Rakecach je po wšěm zdaću zaso zapaler po puću. Póndźelu popołdnju je so tam 500 kwadratnych metrow lěsa při Nowowješćanskej dróze paliło. Minjene tydźenje policija wjacekróć rozprawješe, zo je něchtó woheń zamiškrił – mjez druhim tež w platowych bydlenskich domach. Wjesnjanosta Swen Nowotny wobydlerjow tuž naležnje namołwja, zo tež najmjeńši pokiw policiji zdźěla. Pozdatne maličkosće móhli za přepytowanja wažne być. Dotal hišće žanoho podhladneho wuslědźili njejsu. Za Nowotneho je to „znjeměrnjowace“. Hižo wjacore lěta su w Rakecach stajnje zaso zapalerstwa Tak je so w zachodźe wjaceswójbneho domu hižo raz křesło paliło. Tute bě njeznaty z nowinami zapalił.
Policija (24.06.25)
Do traktora so załamali
Minakał. Njeznaći su so pjatk w nocy do traktora w Minakale zadobyli a z njeho 20 000 eurow hódnu computerowu techniku pokradnyli. Wěcna škoda na jězdźidle wučinja 500 eurow. Policija je slědźenje ćežkeho rubjenstwa dla zahajiła.
Policija (19.06.25)
70lětny smjertnje znjezbožił
Wojerecy. Před twarskimi wikami nakupnicy Globus na južnej kromje Wojerec je wčera popołdnju wokoło 17.15 hodź. muž smjertnje znjezbožił. Při wuparkowanju zaměni 71lětny šofer w swojim awće prawdźepodobnje płun a borzdźidło a zrazy z wotmachom do před nim parkowaceho awta. Za tutym pak steješe 70lětny wobsydnik awta, kotryž padny ze swojim nakupowanskim wozyčkom dozady do při nimo jěduceho jězdźidła. Najebać reanimaciske pospyty na pomoc zwołanych sobudźěłaćerjow wuchowanskeje słužby a spěšneho transporta do chorownje zemrě muž tam jenož krótki čas pozdźišo. Dalše wosoby so zranili njejsu. Zhorjelska policajska direkcija pad přepytuje.
Policija (18.06.25)
Njezbožo ze šěsć zranjenymi
Porchow. Při wotjězdce Porchow z awtodróhi A 4 zrazy zawčerawšim popołdnju 73lětny šofer ze swojim wosobowym busom marki Iveco do wotlěwa přichadźaceho wosoboweho awta na Zwjazkowej dróze B 98. Na tutu dróhu chcyše šofer do směra na Ramnow wujěć. Při zražce so šofer wosoboweho awta marki Ford ćežko zrani. Na pomoc zawołana wuchowanska słužba je jeho do chorownje dowjezła. W busu sobujěducy pjeć dźěći so lochko zranichu. Po prěnim pohódnoćenju wučinja wěcna škoda něhdźe 15 000 eurow. Zastojnicy wobchadneje policajskeje inspekcije pad přepytuja. Woni proša swědkow wobchadneho njezboža wo nazorniše informacije nastupajo wosobowy bus a wosobowe awto. Tući njech so pod telefoniskim čisłom 03591 3670 abo w najblišim policajskim rewěrje přizjewja.
