Policija (20.07.26)
Wuměnkarjej pjenjezy zhubiłoj
Kamjenc. Z woporom wobšudnikow běštaj pjatk wječor wuměnkarjej-mandźelskaj pola Kamjenca. Skućićeljo na njeju zazwonichu a jimaj napowědachu, zo bě jeju syn ćežke wobchadne njezbožo zawinił. Wobšudnicy žadachu sej pjenjezy za kawciju. Bjez podhlada na wobšudnistwo přepodaštaj mandźelskaj cuzemu čłowjekej před swojimi chěžnymi durjemi něhdźe 25 000 eurow. W tym zwisku policija wospjet namołwja, zo njech wšitcy při tajkich a podobnych telefonatach kedźbliwi su. Najlěpje je, zo telefonat nablaku skónčiš a policiju informuješ. Wšojedne kotru stawizničku něchtó při telefonje powěda, nichtó njeměł cuzym ludźom swoje pjenjezy přewostajić.
Policija (16.07.26)
Na zapławjenej dróze znjezbožił
Trjebjeńca. Sylny dešćik njeje so předwčerawšim jenož wo někotre zapławjene pincy postarał, ale takrjec tež wobchadne njezbožo zawinił. Krótko do 17 hodź. bě na zwjazkowej dróze B 6 do směra na Trjebjeńcu (Steindörfel) 54lětny wodźer Škody po puću. Dokelž bě dróha połna wody, zajědźe muž z jězdnje, zrazy do dweju štomow a so přewali. Alarmowana wohnjowa wobora dyrbješe znjezboženeho z jeho awta wuswobodźić. Jězdźidło wuchowanskeje słužby dowjeze muža do chorownje. Wěcnu škodu trochuje policija na něhdźe 50 000 eurow. Zastojnicy policije njezbožo wobdźěłachu.
Policija (14.07.26)
Kedźbu před wysokej danju
Połčnica. Štóž chce swoje zamóženje rozmnožić, dyrbi so před wobšudnikami na kedźbu brać. Tole je nětko žona w Połčnicy bolostnje nazhoniła. Kaž policija zdźěli, je wona hižo spočatk junija na po wšěm zdaću seriozny poskitk reagowała, při kotrymž slubichu jej wysoku dań. Wona inwestowaše něhdźe 60 000 eurow. Jako chcyše sej minjeny kónc tydźenja pjenjezy wupłaćić dać, so wšitko jako wobšudnistwo wopokaza a žona přizjewi so pola policije. Při tym so wukopa, zo bě wona wobšudnikam tajne daty wo swojim konće přeradźiła. Kriminalna policija pad přepytuje.
Policija (13.07.26)
Bjez dowolnosće a z alkoholom
Rakecy. Za wjacore delikty zamołwić změje so 40lětny wodźer Opela, kotrehož policija sobotu w Rakecach kontrolowaše. Najprjedy wón žanu jězbnu dowolnosć předpołožić njemóžeše, dokelž žanu njewobsedźeše. Dale zwěsćichu pola njeho 0,66 promilow alkohola w kreji. A skónčnje tež drogowy test pozitiwnje na amfetaminy a konop reagowaše.
Policija (09.07.26)
Wuměnkarku wobšudźili
Kamjenc. Z woporom wobšudnikow je so wutoru popołdnju wuměnkarka pola Kamjenca stała. Njeznaći běchu na nju zazwonili a jej napowědali, zo je bratrowča ćežke wobchadne njezbožo zawiniła. Wobšudnicy žadachu sej kawciju a rentnarka přepoda před swojimi chěžnymi durjemi njeznatej wosobje 5 000 eurow. Policija w tym zwisku wospjet namołwja, podhladne telefonaty hnydom skónčić a policiju informować. Wšojedne wo kotru stawiznu so jedna – njedawajće cuzemu čłowjekej pjenjezy abo drohoćinki!
Policija (07.07.26)
Šoferka smjertnje znjezbožiła
Delni Wujězd. Tragiski wukónc měješe wobchadne njezbožo wčera popołdnju pola Delnjeho Wujězda. 49lětna wodźerka Audija chcyše na B 156 před njej jěducy VW přesćahnyć. Při tym zrazy do dweju napřećo přijěduceju nakładneju awtow a do VWja. 49lětna so tak ćežko zrani, zo hišće na městnje njezboža zemrě. 47lětna wodźerka VWja a dwaj sobujěducaj so ćežko zranichu.
Policija (03.07.26)
Wjele pjenjez zhubiła
Běła Woda. Z woporom wobšudnikow je so minjene dny žona w Běłej Wodźe stała. Wona dósta najprjedy list a po tym wjacore telefonaty pozdatneho prawiznika. Wobšudnicy žonje napowědachu, zo je wona wjacore zrěčenja za hry wo zbožo wotzamknyła. Nětko sej „prawiznik“ štyricyfrowu sumu pjenjez žadaše, zo móhł zrěčenja zaso wupowědźić. Žona da so přerěčeć a přepokaza 8 600 eurow. Kriminalna policija pad wobšudnistwa dla přepytuje.
Awto so zwróćiło
Kača Korčma. Ćežke wobchadne njezbožo sta so srjedu mjez Kačej Korčmu a Komorowom. Tam je 19lětny wodźer Forda kontrolu nad swojim jězdźidłom zhubił, z puća zjěł a so zwróćił. Młodeho muža dowjezechu ćežko zranjeneho z helikopterom do chorownje. Swědkojo, kotřiž su njezbožo wobkedźbowali, njech přizjewja so telefonisce pod 03591 3670.
Policija (02.07.26)
Wandalizm a padustwo
Lejno. Wodosportowy centrum při Lejnjanskim jězoru bě w nocy na wutoru cil njeznatych wandalow a paduchow. Po informaciji policije su so skućićeljo namócnje na areal zadobyli a tam wěcnu škodu načinili. Mjez druhim su njeznaći mosćik nad wodu wobškodźili. Nimo toho zhubi so z areala twarski płót, kotryž bě něhdźe 150 eurow hódny. Njeprošeni nócni wopytowarjo naparachu při tym něhdźe 500 eurow wěcneje škody. Padustwa a wobškodźenja wěcow dla Wojerowski policajski rewěr pad dale přepytuje.
Policija (30.06.26)
Zahrodowej chěžce so paliłoj
Běła Woda. Po njewšědnje horcej nocy su minjenu njedźelu rano wohnjowych wobornikow w Běłej Wodźe k hašenju wołali. W zahrodkownišću při Zhorjelskej dróze so z dotal njeznateje přičiny zahrodowej chěžce paleštej. Wobornicy płomjenja spěšnje podusychu. Do toho bě je 39lětny muž sam hašeć spytał, ale so při tym snadnje zranił. Wěcnu škodu trochuje policija na něhdźe 40 000 eurow. Dróha bě dwě hodźinje zawrjena.
Policija (25.06.26)
Woduwarjaka dla spinać dyrbjała
Budyšin. Na Friedricha Wolfowej dyrbješe wutoru 45lětna žona z awtom mócnje spinać, dokelž před njej nadobo woduwarjak na puć padny. Přičina bě, zo so w bliskim bydlenju 30lětna žona z Ukrainy na něšto hóršeše a při tym kuchinski nastroj na puć ćisny. Tuž změje so wona nětko strašneho zasahnjenja do nadróžneho wobchada dla zamołwić.
