Smjertny wopor njezboža

Hrodźišćo. Tragiske wobchadne njezbožo ze smjertnym wukóncom je so njedźelu připołdnju na statnej dróze S 111 mjez Budyšinom a Wósporkom na křižowanišću do Hrodźišća stało. 28lětna wodźerka Opela bě do směra na Wóspork po puću a chcyše na křižowanišću nalěwo do Hrodźišća wotbočić. Dokelž měješe napřećiwny wobchad, dyrbješe zastać. 73lětny wodźer Saica a 33lětny šofer Renaulta za njej tohorunja zastaštaj. 84lětny wodźer Škody pak po wšěm zdaću přepozdźe pytny, zo awta steja, a bjez borzdźenja do Renaulta prasny. Tón bu do awta před nim storčeny a te do Opela cyle prědku. Wodźer Škody a jeho sobujěduca so ćežko zraništaj. 84lětna žona hišće na puću do chorownje zemrě. Při zražce nasta nimale 30 000 eurow škody. Policija pyta nětko swědkow, kotřiž móhli pokiwy k njezbožu dać. Tohorunja proša prěnich pomocnikow so pola wobchadneje policajskeje direkcije pod telefonowym čisłom 03591/ 36 70 přizjewić.

Rentnarjow wobkradnył

Kamjenc. Paduch je srjedu w Kamjencu porik rentnarjow wobšudźił. Wonaj pušćištaj muža do swojeho bydlenja, kotryž so jimaj jako sobudźěłaćer hladanskeje słužby předstaji. Njeznaty da sej kontowe wućahi a pjenježnu kasetu pokazać. Z njeje wza wón 4 000 eurow. Na to so muž zhubi. Policija pyta nětko swědkow, kotrymž je srjedu popołdnju w Kamjencu 30- do 35lětny muž w zymskim pjezlu napadnył.

Awtodróha dźěrata była

Słona Boršć. Wuskutki kruteje zymy su nětko na awtodróze A 4 k škodam na wosobowych awtach dowjedli. Hłubokich dźěrow dla buchu mjez Słonej Boršću a Hornim Wujězdom wutoru tři awta wobškodźene. Připołdnju bě 50lětny ­wodźer Škody do Drježdźan po puću. Jako přez hłuboku dźěru zajědźe, nasta na ­awće 500 eurow škody. Podobnje zeńdźe so popołdnju 29lětnemu šoferej Opela na samsnym městnje. Wobě lěwej kolesy jeho awta buštej wobškodźenej, wón přisadźi něhdźe tysac eurow. A skónčnje so tež Opel 33lětneho skóncowa, jako so jemu krótko po 18 hodź. to samsne sta. To płaći jeho 500 eurow. Na zbožo so nichtó zranił njeje. Awtodró­howa mištrownja je dźěry na awto­dróze mjeztym zapłatała.

Šofer agresiwnje wustupował

Hórnikecy. Zastojnicy Wojerowskeho policajskeho rewěra su srjedu popoł­dnju 51lětneho wodźerja transportera typa Mercedes zadźerželi, kotryž bě w Hórnikecach na dróze Při stadionje po puću. Najprjedy muž na signal policistow scyła njereagowaše, skónčnje pak tola zasta. Dokelž so dźiwnje zadźeržeše zastojnicy tukachu, zo bě muž drogi brał. Wotpowědny test pak wón wot­pokaza. Kaž w rozprawje Zhorjelskeje policajskeje direkcije dale rěka, bu muž přiběrajcy agresiwny. Tuž policisća přikazachu, zo ma 51lětny krej wotedać. Nimo toho zahajichu woni jednanje dla podhlada jězdźenja pod wliwom drogow.