Policija (02.07.26)
Wandalizm a padustwo
Lejno. Wodosportowy centrum při Lejnjanskim jězoru bě w nocy na wutoru cil njeznatych wandalow a paduchow. Po informaciji policije su so skućićeljo namócnje na areal zadobyli a tam wěcnu škodu načinili. Mjez druhim su njeznaći mosćik nad wodu wobškodźili. Nimo toho zhubi so z areala twarski płót, kotryž bě něhdźe 150 eurow hódny. Njeprošeni nócni wopytowarjo naparachu při tym něhdźe 500 eurow wěcneje škody. Padustwa a wobškodźenja wěcow dla Wojerowski policajski rewěr pad dale přepytuje.
Policija (30.06.26)
Zahrodowej chěžce so paliłoj
Běła Woda. Po njewšědnje horcej nocy su minjenu njedźelu rano wohnjowych wobornikow w Běłej Wodźe k hašenju wołali. W zahrodkownišću při Zhorjelskej dróze so z dotal njeznateje přičiny zahrodowej chěžce paleštej. Wobornicy płomjenja spěšnje podusychu. Do toho bě je 39lětny muž sam hašeć spytał, ale so při tym snadnje zranił. Wěcnu škodu trochuje policija na něhdźe 40 000 eurow. Dróha bě dwě hodźinje zawrjena.
Policija (25.06.26)
Woduwarjaka dla spinać dyrbjała
Budyšin. Na Friedricha Wolfowej dyrbješe wutoru 45lětna žona z awtom mócnje spinać, dokelž před njej nadobo woduwarjak na puć padny. Přičina bě, zo so w bliskim bydlenju 30lětna žona z Ukrainy na něšto hóršeše a při tym kuchinski nastroj na puć ćisny. Tuž změje so wona nětko strašneho zasahnjenja do nadróžneho wobchada dla zamołwić.
Policija (24.06.26)
Elektrokoleso přetwarjene było
Łuty. Bjez jězbneje dowolnosće a zawěsćenja, za to pak ze šmóratkom při wuchu a pod wliwom drogow bě 23lětny muž we Łutach po puću, jako jeho policisća póndźelu wječor zadźeržachu. Kaž so wukopa, bě jeho elektrokoleso přetwarjene, tak zo wone tež bjez teptanja hač do 25 km/h spěšnje jědźeše. Za to pak stej jězbna dowolnosć a zawěsćenje trěbnej. Woboje młody muž předpołožić njemóžeše. Za to pak reagowaše drogowy test pozitiwnje na konop. Muž dyrbješe tuž krej wotedać, jeho elektrokoleso zastojnicy sćazachu. Wón změje so nětko wjacorych deliktow dla zamołwić.
Policija (23.06.26)
Do sćežora prasnyła
Chrósćicy. Tójšto wěcneje škody je wuslědk wobchadneho njezboža, kotrež je so njedźelu rano při Chróšćanskim sportnišću stało. Zawinowała bě je 18lětna holca ze swojim wosobowym awtom. Na parkowanišću při wjacezaměrowej hali „Jednota“ chcyše wona krótko do 6 hodź. z awtom wróćo storkać a zrazy při tym do chorhojoweho sćežora. Zraniła so při tym na zbožo njeje. Wěcna škoda pak wučinja nimale 3 000 eurow. Při wobdźěłanju njezboža policija zwěsći, zo bě młoda žona konop brała. Nimo toho naměrichu pola njeje 1,66 promilow alkohola w kreji. Na to dyrbješe wona krej wotedać. Nětko změje so młodostna wohroženja nadróžneho wobchada dla zamołwić.
Policija (19.06.26)
W cyrkwi kradnyli
Njeswačidło. Njeprošenych wopytowarjow mějachu zawčerawšim w Njeswačanskej cyrkwi. Tam su njeznaći w času mjez 7.30 a 18.30 hodź. jałmožnicu pokradnyli. Kelko pjenjez w njej bě njeje znate. Wěcna škoda, kotruž běchu skućićeljo načinili, wučinja něhdźe 200 eurow, policija zdźěli.
Policija (15.06.26)
We wulkim stilu kradnyli
Kinspork. We wulkim stilu su njeznaći w běhu zašłeho tydźenja w Kinsporku kable kradnyli. Jich cil bě fotowoltaikowa připrawa při Wojerowskej dróze. Skućićeljo přewinychu płót, bjez toho zo bychu škodu načinili. Na to dohromady 42 kilometrow koporoweho kabla zwutorhachu. Hódnota rubizny wučinja něhdźe 50 000 eurow, kaž policija rozprawja.
Znowa wobšudźić spytali
Budyšin. Minjene dny je k wjacorym telefonatam dóšło, w kotrychž su njeznaći ludźi wobšudźić spytali. Zwjetša wudawachu so woni jako zastojnicy kriminalneje policije a ludźom napowědachu, zo běchu rubježnu cwólbu zajeli. Pola njeje namakana lisćina z mjenami wobsahowaše pječa tež mjeno zatelefonowanych. Z tutej łžu wobhonichu so skućićeljo za pjenjezami abo debjenkami w domjacnosći. Zwjetša su ludźo telefonat na to skónčili. Sobotu wječor pak so skućićelam tola poradźi, staršej žonje w Kamjencu 6 000 eurow wulišćić.
Policija (10.06.26)
Žonu wobšudźili
Biskopicy. Z woporom wobšudnikow je so minjene měsacy žona w Biskopicach stała. Kaž policija wčera zdźěli, bě 65lětna leksikony na předań poskićowała. Za nje so njeznaći po zdaću zajimowachu a so telefonisce přizjewichu. Wot žony pak žadachu sej wosebity popłatk a kawciju, wšo dohromady 8 300 eurow. Po tym zo bě Biskopičanka wšitko zapłaćiła, wona k wobšudnikam hižo žadyn kontakt nawjazać njemóžeše. Kriminalna policija pad nětko přepytuje a před tajkim wobšudnistwom wuraznje warnuje. W dwělomnych padach měli so ludźo na policiju wobroćić abo so w centrali přetrjebarjow wobhonić, zo bychu swoje wobsydstwo a zamóženje škitali.
Policija (08.06.26)
W pincy so paliło
Rakecy. Wohnjowych wobornikow z Rakec, Psowjow, Njeswačidła, Minakała a Ralbic wołachu sobotu wječor k hašenju do Rakečanskeje platoweje štwórće. Tam so w pincy wjaceswójbneho domu paleše. Ze swojim spěšnym zasadźenjom kameradojo tomu zadźěwachu, zo so płomjenja dale rozpřestrěwaja. Žadyn z wobydlerjow so zranił njeje. Wobornicy twarjenje přewětrichu, tak zo móžachu podružnicy zaso do swojich bydlenjow. Policija pad ćežkeho zapalerstwa dla přepytuje. Wěcnu škodu trochuja na něhdźe 50 000 eurow. W zašłosći je stajnje zaso k zapalerstwu w platowych domach dóšło.
Policija (05.06.26)
Druheho awta dla do štoma prasnył
Hlinowc. Na statnej dróze S 100 ze směra Pančicy-Kukow dyrbješe so předwčerawšim rano krótko před Hlinowcom 23lětny wodźer awta typa Volvo druhemu jězdźidłu wuwinyć, zo njeby do njeho zrazył. Při tym prasny na prawej kromje jězdnje do štoma. Tamne awto so zhubi. Zranił so na zbožo nichtó njeje, škoda pak wučinja něhdźe 13 000 eurow.
