Policija (08.08.25)
Swětły dźeń bager pokradnyli
Biskopicy. Nic w ćěmnej nocy, ale na swětłym dnju su njeznaći wutoru w Biskopicach kradnyli. W času mjez 7 a 14 hodź. zadobychu so woni na ležownosć a pokradnychu z njeje zamknjeny minibager. Nimo toho wzachu skućićeljo mašinu za syčenje kaž tež 200 litrow hydrawliskeho wolija sobu. Cyłkowna škoda wučinja nimale 17 000 eurow.
Pčołki dla kontrolu zhubiła
Brěžki. Zo njesměš so wot pčołki w awće zamylić dać, wě nětko 35lětna žona, kotraž bě srjedu popołdnju na Mučowskej dróze w Brěžkach po puću. Kaž policija rozprawja, je so wona pčołki nastróžiła a kontrolu nad swojim Opelom zhubiła. Jězdźidło zajědźe z puća, zrazy do płota a wosta hakle w přirowje stejo. Na zbožo so šoferka zraniła njeje. Wěcna škoda na jeje awće a na płoće pak wučinja dohromady něhdźe 8 000 eurow.
Policija (07.08.25)
Kolesowarka znjezbožiła
Brětnja. Ćežke wobchadne njezbožo stało je so wutoru popołdnju pola Brětnje. Kaž policija rozprawja, bě tam 42lětna žona na lěsnym pućiku z kolesom po puću a spytaše spłóšiwe konje popadnyć. Při tym wona najskerje přez korjeń štoma zajědźe, njezbožownje padny a so ćežko zrani. Žonu dyrbjachu z helikopterom do chorownje lećeć. Policija pad dale přepytuje.
Policija (06.08.25)
Z městna njezboža ćeknył
Budyšin. Wobchadne njezbožo je so póndźelu popołdnju na awtodróze A 4 mjez Budyšinom a Wósporkom stało. Tam je njeznate jězdźidło do wobchadneju znamjenjow na twarnišću zajěło. Při tym nasta něhdźe 600 eurow škody. Pozdatny zawinowar pak z městna njezboža ćekny. Nětko pytaja swědkow, kotřiž su snano něšto wobkedźbowali. Pokiwy přijimuja pod 03591/ 36 70.
Policija (01.08.25)
Prózdny dom so palił
Kózły. K hašenju wołali su wohnjowych wobornikow wčera připołdnju w Kózłach (Cosul), wjesnym dźělu gmejny Budestecy. Tam je so prózdny bydlenski dom palił. Zo móhli jón hašeć, dyrbjachu wobornicy něšto stow metrow hadźicow kłasć, prjedy hač mějachu dosć hašenskeje wody. Přiwšěm woni tomu zadźěwachu, zo płomjenja na susodnu bróžnju přeskoča. Čehodla je so twarjenje paliło, njeje znate. Po prěnim trochowanju policije nasta něhdźe 50 000 eurow škody. Za přičinami wohenja nětko slědźa.
Policija (31.07.25)
Z alkoholom w kreji znjezbožiła
Stróža. Wobchadne njezbožo z tójšto wěcnej škodu bě wutoru popołdnju w Stróži pola Rakec. Tam chcyše 36lětna wodźerka Forda z nabóčneje na hłownu dróhu zajěć. Při tym pak njewobkedźbowaše předjězbu 69lětneje šoferki Golfa. Při zražce drje so nichtó zranił njeje, wěcna škoda pak wučinja 20 000 eurow. Při přepytowanju njezboža policisća zwěsćichu, zo měješe zawinowarka 0,58 promilow alkohola w kreji.
Policija (30.07.25)
Na twarnišćomaj kradnyli
Čorny Chołmc. Hnydom na dwěmaj twarnišćomaj na zwjazkowej dróze B 96 su njeznaći w minjenych dnjach kradnyli. Kaž policija zdźěli, bě to we Łutach a w Čornym Chołmcu. Pokradnyli su wabjensku taflu twarskeje firmy a cyłkownje tysac litrow diesela. Ćěriwo běchu skućićeljo z wjacorych twarskich mašinow wotklumpali. Rubizna je dohromady něhdźe 3 000 eurow hódna. Nimo toho nasta sto eurow wěcneje škody.
Policija (28.07.25)
Płujadło znjezbožiło
Narć. Wo njewšědnym njezbožu rozprawja Zhorjelska policajska direkcija z Narća. Tam je pjatk po připołdnju płujadło na lětanišću znjezbožiło. Po wšěm zdaću je pilot kontrolu nad mašinu zhubił, jako přizemi. Při tym je so mašina rozłamała, kaž w rozprawje rěka. Wěcna škoda wučinja něhdźe 20 000 eurow. Zranił pak so na zbožo nichtó njeje.
Awto do štoma prasnyło
Kulow. Na statnej dróze S 95 mjez Kulowcom a Němcami je so pjatk popołdnju ćežke wobchadne njezbožo stało. 66lětny muž bě ze swojim Audijom do směra na Kulowc po puću. Z dotal njeznateje přičiny zhubi wón w lěwej křiwicy krótko před Kulowcom kontrolu nad swojim awtom, zajědźe předaloko na prawy bok jězdnje a prasny do štoma. Ćežko zranjeneho šofera dowjezechu do chorownje. Na awće nasta 11 000 eurow škody.
Policija (25.07.25)
Policistow slepił a ćeknył
Wojerecy. Z jednoreho zasadźenja wobsadki policajskeho awta silwesterskich praskotakow dla je so srjedu we Wojerecach honjeńca za njeznatym mopedistom wuwiła. Tón je po wšěm zdaću zastojnikow z laserpointerom slepił a so na to zminył. Policisća smalachu za nim. Mopedist ćěkaše z wulkej spěšnosću po wjacorych dróhach a při tym zdźěla chódniki wužiwaše. Wšitke signale policajskeho awta, zo ma zastać, muž ignorowaše. Policisća dyrbjachu samo nahle zaborzdźić, zo njeby podhladny do nich zrazył. Skónčnje so njeznaty w parku na Starej Berlinskej dróze zhubi. Jako so zastojnicy na poprawne městno zasadźenja wróćichu, nańdźechu tam třoch młodostnych a w bliskosći wužiwany laserpointer.
Policija (22.07.25)
Z přetwarjenym mopedom ćěkał
Zemicy-Tumicy. 16lětny młodostny je njedźelu wječor w Zemicach-Tumicach před policiju ćěkał. Ze swojim mopedom docpě wón při tym spěšnosć hač do 100 km/h, kaž policija rozprawja. Zastojnicy jeho skónčnje tola dosahnychu. Kaž so wukopa, młodostny žanu jězbnu dowolnosć njeměješe, moped njebě zawěsćeny a nimo toho tak přetwarjeny, zo wyšu spěšnosć docpěwa.
Policija (21.07.25)
Při wočerstwjenišću kradnyli
Niža Wjes. Njeprošeny wopyt mějachu w nocy na sobotu při wočerstwjenišću w Nižej Wsy pola Rakec. Tam su so njeznaći namócnje do bydlenskeho woza zadobyli a wšelake wěcy w hódnoće 40 eurow pokradnyli. Po wšěm zdaću zachadźachu chětro rabiatnje, přetož wěcna škoda wučinja na wšěch 500 eurow, kaž policija rozprawja.
