Policija (30.08.24)
Spomóžne sobudźěło
Habrachćicy. Kedźbliwi swědkojo su srjedu dopołdnja pozdatneho paducha při swojim njeskutku na Sakskej dróze w Habrachćicach mylili. Woni běchu zwuki zasłyšeli, jako spyta njeznaty durje do bydlenskeho domu rozłamać. Jako njeskutka podhladny zwěsći, zo bu wobkedźbowany, ćekny. Wot swědkow na pomoc zwołanym zastojnikam policije pak poradźi so, muža w bliskosći městna njeskutka popadnyć. Spěšneho sobudźěła swědkow dla njebě zadobyće 23lětneho čěskeho staćana wuspěšne. Tež wulka wěcna škoda njeje nastała. Wukopa so, zo je skućićel mnohich dalšich zadobywanjow w Hornim kraju podhladny. Po zapodaću statneho rěčnistwa je so štwórtk hižo jatbowy sudnik z padom zaběrał. Wón wukaza přepytowansku jatbu za skućićela.
Policija (29.08.24)
Njesćerpnosće dla njezbožo zawiniłoj
Słona Boršć. Wopačne zadźerženje w situaciji kopjenja wobchada je wutoru rano njezbožo na zwjazkowej awtodróze A 4 zawinowało. 71lětny muž běše ze swojim wosobowym awtom typa Audi do směra Zhorjelc po puću. Před wotjězdku Budyšin-zapad kopješe so njezboža dla wobchad. Šofer Audija pak nochcyše čakać a zajědźe na za wobchad zakazane bóčne pasmo, zo by dale jěć móhł. Tohorunja njesćerpny běše 46lětny němski šofer, kotryž ze swojim awtom typa Tesla w kolonje steješe a na zakazane pasmo wujědźe. Tak zrazy do bližaceho so Audija. Zranił so při njezbožu nichtó njeje. Nasta pak wěcna škoda w rozměrje něhdźe 25 000 eurow. Wobaj šoferaj mataj so tohodla nětko zakazaneho wužiwanja bóčneho pasma dla před sudnistwom zamołwić.
Policija (27.08.24)
Z piłu wólbne plakaty wobškodźił
Załom. Ze samotwarjenej wosebitej piłu je 66lětny muž w nocy wot njedźele na póndźelu při Hłownej dróze w Załomju wjacore wólbne plakaty wobškodźił a zničił. Připadnje nimo jěducy zastojnicy Załomskeho policiskeho rewěra jeho při njeskutku lepichu. Skućićel pak spyta jim twochnyć, tola přesćěhańca njetraješe dołho a policisća jeho popadnychu. Policisća wotewzachu mužej „grat njeskutka“ a zwěsćichu identitu němskeho staćana. Kriminalna słužba je nětko přepytowanja podhlada wěcneho wobškodźenja dla zahajiła.
Policija (26.08.24)
Njewšědny nakup
Wojerecy. 84lětna žona so sobotu dopołdnja we Wojerecach na Teschenowej dróze njemało dźiwaše, jako wona po nakupje wokoło 9 hodź. swój połny nakupowanski wóz před wulkim předawanišćom wotstaji. Cuzy muž składnosć wužiwaše a je cyle jednorje twory z nakupowanskeho woza do swojeho awta połožił. Přichadźacy šofer taksija jej pomhaše a napominaše muža twory wróćić, štož so tež sta. Na to pak dotal njeznaty muž ćekny. Kriminalisća nětko za nim, podhlada pospytneho rubježnistwa dla, slědźa.
Policija (23.08.24)
We wobchodźe kradnyli
Ćisk. Dotal njeznaći su so wot wutory wječora w 19.30 hodź. hač do srjedy ranja w 5.45 hodź. do wobchoda w Ćisku zadobyli. Woni přepytachu rumy a pokradnychu wjacore sta eurow. Wěcna škoda wučinja něhdźe 1 000 eurow. Kriminalni technikarjo zwěsćichu na městnje njeskutka slědy. Wo dalše přepytowanja staraja so kriminalisća.
Policija (22.08.24)
Dyrbja bjez cigaretow wuńć
Hornja Hórka. Dotal njeznaći su wutoru nawječor cigaretowy awtomat při Hłownej dróze w Hornjej Hórce skóncowali. Awtomat měješe hódnotu něhdźe 5 000 eurow. Jasne njeje, kelko cigaretow su so pokradnyli.
Policija (21.08.24)
Warnowanje před wobšudnikami
Zhorjelc. Zhorjelska kriminalna policija warnuje před wopačnym online-shopom pod adresu www.fahrradhandel-kramer. de. Wot 29. julija su tam škodowani kolesa skazali, njejsu pak dotal ničo přijeli. Skućićeljo znjewužiwaja daty wobchoda „Fahrradhandel Kramer“.
Policija (20.08.24)
Dwórnišćo so paliło
Čorny Chołmc. Swědcy su w Čornym Chołmcu njedźelu wječor wobkedźbowali, zo po zdaću zamyleny muž na kolijach přebywa, a policiju zazwonili. Na to je so Rumunjan do twarjenja dwórnišća podał a tam ležace wotpadki zapalił. Tak je woheń wudyrił. Policisća 56lětneho blisko zachoda do twarjenja namakachu a z kura wućahnychu. Wuchowanska słužba je lochce zranjeneho zastarała. Po tym su jeho zastojnicy zajeli. Dalši ludźo tón čas na dwórnišću byli njejsu. Rumunjan je po zajeću jednu nóc pola policije přebywał. Po wukazu statneho rěčnistwa su jeho póndźelu zaso pušćili. Wěcna škoda na dwórnišća wučinja něhdźe 5 000 eurow. Kriminalna policija pad přepytuje.
Policija (19.08.24)
Njezbožo ze štyrjomi mortwymi
Fischbach. Na B 6 w Arnsdorfje, we wjesnym dźělu Fischbach, je sobotu popołdnju k ćežkemu wobchadnemu njezbožu dóšło. Při přesćehnjenju je Audi Q7 z VW Passatom hromadu zrazył. Audi na to do štoma zrazy a so na druhim boku jězdneje přewali. 61lětnu sobujěducu sanitetarjo ćežko zranjenu do chorownje dowjezechu. 64lětny šofer awta a třo sobujěducy pak na městnje njezboža wudychachu.
Policija (16.08.24)
Z falšowanym dokumentom po puću
Zhorjelc. 38lětny pólski staćan běše srjedu wječor ze swojim wosobowym awtom na Krölowej dróze w Zhorjelcu po puću. We wobchadnej kontroli wotkrychu zastojnicy policije wjacorych podhladnych detailow w dokumenće dla, zo je jězbna dowolnosć šofera sfalšowana. Po dalšich přepruwowanjach zwěsćichu, zo muž scyła płaćiwu jězbnu dowolnosć njewobsedźi. Zastojnicy konfiscěrowachu njepłaćiwy dokument a zakazachu mužej dale jěć. Pad přepytuje nětko statne rěčnistwo sfalšowanja dokumentow a jězdźenja bjez płaćiweje jězbneje dowolnosće dla.
Muž při kupanju zemrěł
