Policija (24.07.24)
Spěšnosć kontrolowali
Zhorjelc. Na awtodróze A4 na směr Zhorjelc je wobchadna policija při parkowanišću Lubata póndźelu popołdnju předpisanu spěšnosć 80 km/h kontrolowała. W běhu šěsć hodźin je dohromady 4 068 jězdźidłow přepruwowała. 519 z nich běše jasnje přespěšnje po puću. 153 skućićelow je pjenježnu pokutnu na městnje zapłaćiło, 366 šoferow dóstanje bórze póštu wot zarjada za pokutne pjenjezy. Negatiwny rekord je wodźer Mercedesa ze spěšnosću 159 km/h docpěł. Wón dyrbi nětko ze 700 eurami pokuty, z dwěmaj dypkomaj w Flensburgu a z třomi měsacami zakazom jězdźenja ličić. Nimo toho lepichu zastojnicy jědnaće šoferow, kotřiž njeběchu zakaz přesćehnjenja wobkedźbowali.
Policija (23.07.24)
Bróžnja so wotpaliła
Radšow (Groß Radisch). W Radšowje blisko Wysokeje Dubrawy mějachu zastojnicy wohnjoweje wobory kaž tež policije sobotu w nocy ruce połnej dźěła. Z dotal njeznatych přičin je so ratarska mašina, kotruž běchu wobsedźerjo na kóncu žnjenskeho dnja w bróžni wotstajili, zapaliła. Woheń so jara spěšnje wupřestrěwaše. Bórze palachu so w bróžni wotstajeny připowěšak a wosobowe awto kaž tež twarjenje same. Wšitko so wohenja dla zniči. Fachowcy trochuja sumu škodow na něhdźe 300 000 eurow. Přepytowar policije hišće za přičinu wohenja slědźi.
Do wikow za twaršćizny so zadobyli
Budyšin. Njeznaći skućićeljo su so sobotu na dotal njeznate wašnje do twarskich wikow při Delnjokinjanskej dróze w Budyšinje zadobyli. Jednoho z nich nadeńdźe sobudźěłaćer wěstotneje firmy a informuje policiju. Najebać spěšnych pytanskich naprawow, poradźi so paducham ćeknyć. Hižo nahromadźene a składowane rubjenstwo w cyłkownej hódnoće 5 500 eurow pak njejsu sobu wzać móhli.
Policija (22.07.24)
Ćěło namakali
Šunow-Barton (Schönau-Berzdorf a. d. Eigen). Swědkojo su minjeny pjatk na zjawnym parkowanišću w Šunowje-Bartonju mortweho 65lětneho němskeho staćana namakali. Nimo policije přichwata chorobne awto kaž tež wohnjowa wobora. Spočatnje skućićel ćekny z awtom do njeznateho směra. Kriminalni technikarjo su slědy na městnje njeskutka zawěsćili. Policajske jednotki, mjez druhim z psom a helikopterom, su móžne směry ćěkanja pruwowali. Podhlad morjenja so wobkrući. Zastojnikam poradźi so morjenja podhladneho w Zhorjelcu wotkryć a zajeć. Kriminalne přepytowanja policije k pozadkam pada hišće traja. Awto skućićela, módry Suzuki SX4 ze Žitawskej wobchadnej značku, pak wona dale pyta. Tohodla prosy Zhorjelska policiska direkcija swědkow wo dalše informacije pod tel. čo. 03581-468100.
Policija (19.07.24)
Blisko Budyšina bě jězba ke kóncej
Budyšin. Zastojnicy Budyskeje slědźenskeje jednotki su srjedu rano 42lětneho šofera pokradnjeneho bydlenskeho mobila typa Fiat Challenger na A 4 krótko po parkowanišću „Am Wacheberg“ popadnyli a zajeli. Paduch ignorowaše spočatnje namołwu policije zadźeržeć. Krótko před wotjězdom Šiborćicy (Nieder Seifersdorf) zastojnicy pólskeho staćana zajachu. Přepytowanja dopokazachu, zo běše so Fiat Challenger w nocy do toho w Lipsku pokradnył. Krejny test na drogi pola skućićela reagowaše pozitiwnje na amfetaminy.
Płót pokradnyli
Budyšin. Njeznaći skućićeljo su minjeny tydźeń něhdźe 40 do 50 metrow płota, kotryž areal firmy na Nowej promenadźe w Budyšinje wobdawaše, pokradnyli. Wěcna škoda wučinja něhdźe 3 000 eurow. Lokalna kriminalna słužba přepytuje.
Awto zaso namakali
Policija (18.07.24)
Warnuje před wobšudnikami
Jěžow. Póndźelu wječor su wobšudnicy 78lětnu žonu w Jěžowje přelesćili a sej dohromady 22 000 eurow spakosćili. Dotal njeznaći njeskutka podhladni běchu so telefonisce ze stawiznu wo znjezboženej dźowce pola njeje přizjewili. Jedyn ze skućićelow wuda so jako zastojnik kriminalneje policije a zdźěli žonje, zo dyrbjała dźowka do jastwa. Jenož z 35 000 eurami kawciju móhła wona tomu zadźěwać. Seniorka da so wot stawizny zaslepić a je chwilu pozdźišo cyłe swoje zamóženstwo, dohromady 22 000 eurow, wot swojeho konta wotzběhnyła. Na parkowanišću při Łučinskej dróze je pjenjezy njeznatej žonje přepodała. Po wopisanju swědkow je wona 30 do 50 lět stara, něhdźe 160 cm wulka, zasadźita a pozdatnje aziskeho pochada. Policija warnuje před tutym wupruwowanym trikom wobšudnikow.
Policija (17.07.24)
Zabłudźena čorna wowca
Łuty. Wot póndźele popołdnja błudźi so ćeknjena čorna wowca kołowokoło wjeski Łuty (Lauta). Swědk je zwěrjo na parkowanišću nakupowanskich wikow při tym wobkedźbował, kak wone zas a zaso do sćěny wobchoda bodźeše. Jako policija dojědźe, běše so wowca hižo do směra Wuchodneje dróhi zminyła. Nimale tři hodźiny pozdźišo wuhladachu swědkojo zwěrjo podłu železniskich kolijow mjez Čornym Chołmcom a Wojerecami. Němska železnica je wobchad na čarje tohodla přechodnje wobmjezowała. Dalši swědk wuhlada wowcu pozdźišo při skale w Čornym Chołmcu. Po tym přebytk zwěrjeća hižo znaty njeje. Wojerowska policija prosy wo pokiwy pod tel. čo. 03571 4650.
Policija (16.07.24)
Značce na policiskim awće pokradnył
Žitawa. 23-lětny je njedźelu w nocy wobchadnej znamješce na policiskim awće lokalneho policiskeho rewěra w Žitawje pokradnył. To sčini w času, jako zastojnicy policije runje pada kaženja měra dla w domje přebywachu. Jako so wróćichu jim falowacej značce njenapadnyštej. Hakle swědk njeskutka jich na to skedźbni. Zastojnikam poradźi so, skućićela wuslědźić a w susodstwje popadnyć.
Policija (15.07.24)
Njezboža dla tunl přez Limas zawrěli
Zhorjelc. Před zapadnym zajězdom do tunla přez Limas sta so sobotu dopołdnja njezbožo, kotrehož dla je jón policija na dwě hodźinje dospołnje zawrěć dyrbjała. Pólski staćan běše ze swojim awtom typa Renault Kangoo na jězdni awtodróhi A4 do směra Zhorjelc po puću. Krótko před tunlom zajědźe z dotal njeznatych přičin na lěwy bok čary a zrazy do wodźaceje planki. Při tym so awto masiwnje wobškodźi, tak zo móžeše je hakle wotwlečenska słužba wot jězdnje wottransportować. Wuchowanska słužba wotwjeze 51lětneho šofera do chorownje, kotryž běše so wočiwidnje jenož lochce zranił. Wěcowna škoda wučinja po prěnich trochowanjach něhdźe 6 000 eurow. Fachowa firma je so wo wurjedźenje městna njezboža postarała.
Pytanska akcija wuspěšna
Policija (12.07.24)
Wopačna zdźělenka
Budyšin. Po telefoniskej zdźělence wo schowanej bombje na tankowni Aral w Strowotnej studni wčera rano, je policija bjezposrědnje ležownosć ewakuěrowała a areal kołowokoło zašlahała. Specialisća za rozbuchliny pak po systematiskim pytanju ničo njenamakachu. Kriminalna policija přepytuje nětko wopačneje zdźělenki dla.
Policija (11.07.24)
Diesel a připowěšak pokradnyli
Dźěžnikecy. Njeznaći skućićeljo su póndźelu 800 litrow diesela a připowěšak z ležownosće w Dźěžnikecach pokradnyli. Paduši su so na areal firmy podali a najprjedy wotstajene nakładne awto přeparkowali. Awtowe klučiki za nje běchu w transporteru na ležownosći namakali. Potom su z kolesowym nakładowakom tank z něhdźe 300 litrami diesela na připowěšak połožili a sej na susodnu ležownosć dojěli. Z tam wotstajeneho nakładneho awta napjelnichu dieselowy tank z dalšimi 500 litrami diesela. Cyłkowna škoda wučinja něhdźe 7 000 eurow. Kriminalny technikar je slědy zawěsćił. Zastojnicy Budyskeho policajskeho rewěra su pad wosebje ćežkeho padustwa dla sudnistwu přepodali.
