Policija (13.10.25)
Pjenjezy z bydlenja pokradnyli
Wojerecy. Wjele pjenjez je wobsedźer bydlenja na Wojerowskej Semmelweißowej přisadźił. Sobotu popołdnju su so njeznaći najprjedy do wjacebydlenskeho domu zadobyli a so potom do bydlenja škodowaneho podali. Kaž policija rozprawja, njeběchu durje jeho bydlenja zamknjene. Njeznaći jednotliwe stwy přepytachu a pjećcyfrowu sumu pjenjez pokradnychu, kaž w rozprawje dale rěka. Nimo toho načinichu něhdźe 3 000 eurow wěcneje škody. Policija pad dale přepytuje.
Policija (09.10.25)
Koči hajzl wina był
Wojerecy. Dokelž je w bydlenskim domje na Wojerowskej Schweitzerowej wutoru chětro smjerdźało, zawołachu wobydlerjo policiju. Zastojnicy zwěsćichu, zo bě zanjerodźeny koči hajzl wina. Wobsedźerka dyrbješe nuznik wurjedźić.
Policija (08.10.25)
Po skłoninje dele zajěła
Policija (07.10.25)
Šěsć wosobow so zraniło
Budyšin. Při wobchadnym njezbožu wčera rano na zapadnej tangenće w Budyšinje je so šěsć wosobow zraniło. Po informacijach policije chcyše 46lětna wodźerka Škody nalěwo na Přišečansku dróhu wotbočić, njewobkedźbowaše pak napřećo přijěducy Fiat 61lětneje šoferki, tak zo jězdźidle do so zrazyštej. Wobě wodźerce, sobujěducy w Škodźe kaž tež tři dalše wosoby w Fiaće, mjez nimi dwě dźěsći w starobje štyrjoch lět, so zdźěla ćežko zranichu. Při wobchadnym njezbožu nasta něhdźe 30 000 eurow škody.
Policija (06.10.25)
Transporter do štomow zrazył
Prěčecy. Po wšěm zdaću njepřiměrjena spěšnosć na mokrej dróze bě přičina ćežkeho wobchadneho njezboža sobotu nawječor na statnej dróze S 100 pola Prěčec. Krótko do 17.30 hodź. přijědźe tam z Kamjenskeho směra wodźer Mercedesa Sprintera. W dołhej lěwej křiwicy wón kontrolu nad swojim jězdźidłom zhubi. 25lětny wodźer zajědźe na lěwy bok jězdnje, zwróći a zrazy do dweju štomow. Młody muž so ćežko zrani, tak zo dyrbjachu jeho z helikopterom do chorownje dolećeć. Na awće nasta po informacijach policije něhdźe 45 000 eurow škody. S 100 bě najprjedy poł hodźiny dospołnje zawrjena a na to hišće połdra hodźiny połojčnje.
Policija (30.09.25)
We wsy spěšnosć měrili
Čorny Chołmc. Byrnjež na Wjesnej dróze w Čornym Chołmcu moderny stacionarny błyskać stał, je tam policija njedźelu popołdnju přidatnje spěšnosć měriła. W běhu nimale dweju hodźin kontrolowachu 61 jězdźidłow. Při tym je 14 šoferow dowolenu spěšnosć 50 km/h překročiło. Jědnaće šoferow woteńdźe takrjec z módrym wóčkom a ma jenož warnowanski pjenjez płaćić. Třom dalšim pak kiwa pokuta. Pola najspěšnišeho naměrichu 78 km/h. Wón dóstanje jedyn dypk a ma 180 eurow płaćić.
Policija (24.09.25)
Wjele pjenjez zhubił
Wojerecy. Wobšudnicy su mužej we Wojerecach nimale 41 000 eurow wulišćili. Wón bě pjenjezy na akcijowe konto přepokazał a so wulkeho dobytka nadźijał. Jako chcyše, zo jemu diwidendu wupłaća, sej skućićeljo za to popłatki žadachu. Tež te Wojerowčan přepokaza. Slubjeny dobytk pak wón njedósta. Wosebitosć bě, zo su wobšudnicy z woporom wšón čas kontakt na whatsapp wudźeržowali, kaž policija zdźěli.
Policija (23.09.25)
Pytaja swědkow
Běła Woda. Po pokiwje swědka zwěsćichu wčera wječor na Lutherowej w Běłej Wodźe ćežko zranjenu wosobu. 30lětneho muža wožiwichu a jeho z helikopterom do chorownje dowjezechu. Po wuprajenjach policije njeje wěsta, hač wón přežiwi. Po prěnich přepytowanjach bě rozestajenje mjez dwěmaj wosobomaj přičina za njezbožo. Policija je mjeztym 34lětneho jako podhladneho zajała. Nětko pytaja dalšich swědkow, kotřiž móhli pokiwy podać (tel. 03581 468107).
Policija (22.09.25)
Njewjedro zachadźało
Hornja Hórka. Sylne njewjedro je wčera wječor něhdźe w 20 hodź. w Hornjej Hórce južnje Budyšina zachadźało. Tam so tak mócnje dešćowaše, zo z wokolnych polow błóto do wsy ćečeše. Na to alarmowachu wohnjowych wobornikow z wokolnych wsow, kotřiž błóto z pućow rumować započachu. Při tym wobydlerjo pomhachu. Najbóle potrjechenej běštej Hłowna a Wjelečanska dróha. Tam so błóto jenož na ležownosćach njerozpřestrěwaše, ale tež do pincow běžeše. Dobrowólni wobornicy běchu wjacore hodźiny zasadźeni.
Policija (18.09.25)
Cigaretowy awtomat w awće
Haselbachtal. Njewšědny nastroj chowaše so we wosobowym awće, kotrež policija wutoru wječor w gmejnje Haselbachtal zadźerža. Zastojnikam bě Opel mjez Koitzschom a Reichenbachom napadnył, dokelž žane čisło njeměješe. W jězdźidle wuhladachu cyły cigaretowy awtomat. Za wodźidłom sedźeše 23lětny muž. Dale jědźeštaj 25lětny a 18lětny sobu. Při prěnich přepytowanjach so wukopa, zo bě trójka awtomat po wšěm zdaću před hosćencom w Reichenbachu pokradnyła. Rubizna bě něhdźe 2 000 eurow hódna.
