Policija (30.01.25)
Wuspěšna němsko-čěska kooperacija
Zhorjelc/Petrovice. Dźakowano mjezy překročacej kooperaciji poradźi so zastojnikam čěskeje a němskeje policije w regionje Pardubice štyrjoch paduchow zajeć. Tući běchu wot lońšeho w namjeznych kónčinach na němskej kaž tež na čěskej stronje aktiwni. Wšitcy zajeći su čěscy staćenjo, mužej w starobje 23 a 29 lět kaž tež žonje w starobje 30 a 21 lět. W Hornim kraju běchu so skućićeljo do dohromady 18 bydlenskich domow a pensijow, mjez druhim tež we Wulkim Šunowje, zadobywali. Objekty požadosće běchu při tym trezory a klučiki awtow, kotrež pokradnychu. Na čěskej stronje mjezy su so paduši w regionach Ústí, Liberec a Hradec Děčín do 20 domskich zadobywali. Přepytowanja wšitkich njeskutkow wukonješe zhromadna němsko-čěska kriminalistiska skupina Lausche, kotraž hižo wot lěta 2019 eksistuje.
Policija (29.01.25)
Pytaja 69lětneho
Běła Woda. Policija slědźi wot póndźele za 69lětnym zhubjenym Běłowodźanom Berndom D. Swědkojo běchu jeho naposledk 22. januara w bliskosći Běłowodźanskeje lodohokejoweje hale widźeli. Dotalne prócowanja zastojnikow njejsu wuspěšne byli. Tohodla proša ludnosć wo pomoc. Bernd D. je zasadźity, něhdźe 1,65 metrow wulki a ma połdołhe włosy. Na jednej ruce jemu połdra porsta faluje. Pokiwy podajće prošu telefonisce pod 03576 2620.
Policija (27.01.25)
Tunl pod Limasom zawrjeny
Drježdźany. Tunl na awtodróze A 4 pod Limasom budźe wot srjedy, 29. januara, wječora hač do štwórtka, 30. januara, ranja twarskich dźěłow dla dospołnje zawrjeny. Wobjězdki do směra Zhorjelca kaž tež do Drježdźan budu wupisane.
Policija (23.01.25)
Bjez jězbneje dowolnosće jěł
Łaz. Dwě hodźinje su zastojnicy Wojerowskeho policajskeho rewěra wutoru kontrolowali, hač šoferojo we Łazu na dróze Při parku předpisanu spěšnosć 30 km/h dodźerža. Dohromady přepruwowachu 67 jězdźidłow. Dźesać šoferow bě přespěšnych a dyrbi nětko warnowanski pjenjez zapłaćić. We wobłuku tuteje kontrole zwěsćichu zastojnicy nimo toho dalši njeskutk. Jedyn muž, kotrehož kontrolowachu, bě mjenujcy 57lětny wodźer Forda. Jako jeho zadźeržachu, njemóžeše wón jězbnu dowolnosć předpołožić. Kaž muž na naprašowanje rjekny, njeje hišće ženje jězbnu dowolnosć wobsedźał. Za to dyrbi so wón nětko na sudnistwje zamołwić.
Policija (21.01.25)
Ze zmylka ničo nawuknyła
Wojerecy. Móhłrjec staru znatu su policisća njedźelu wječor we Wojerecach zadźerželi a kontrolowali. 44lětna žona bě tam ze swojim Opelom po puću, štož pak wona scyła njeby směła. Přetož wona steješe pod wliwom alkohola. Pola njeje naměrichu 0,5 promilow w kreji. Hórje pak bě, zo žona hižo žanu jězbnu dowolnosć njeměješe. Papjery běchu jej mjenujcy hakle před krótkim wobchadneho delikta dla wotewzali. Zo bychu dalšim jeje přeńdźenjam zadźěwali, sej policisća tónraz kluč jeje awta wobchowachu. Nimo toho zahajichu přećiwo 44lětnej jednanje dla jězdźenja bjez jězbneje dowolnosće.
Policija (17.01.25)
Nohu sej zatłusnył
Budyšin. Dźěłowe njezbožo je so wčera připołdnju na terenje bywšeje Budyskeje betonownje stało. W zawodźe Hentschke je sej muž při nakładowanju betonowych platow nohu zatłusnył. Na zbožo móžachu jeho ze situacije spěšnje wuswobodźić. Wuchowanske mocy na městnje pomhachu, tež helikopter bě přilećał.
Telewizor pokradnył
Habrachćicy. Nic na palenc, šokoladu abo parfim je so paduch srjedu w Habrachćicach (Neugersdorf) měrił, ale na wjetši techniski nastroj. We wobchodźe hrabny sej wón dopołdnja telewizor w hódnoće něhdźe 900 eurow a z nim z předawanišća ćekny. Sobudźěłaćerka hišće za nim spěchaše, ale jeho na puću z wočow zhubi. Po wšěm zdaću bě paduch do awta zalězł a z nim wotjěł.
Policija (16.01.25)
Awto so pěškow šmórnyło
Hodźij. Wobchadne njezbožo je so wutoru wječor na statnej dróze S 107 mjez Hodźijom a Žičenjom (Seitschen) stało. Tam běštaj 18lětny muž a 19lětna žona pěši po puću. Do samsneho směra bě 47lětna wodźerka Nissana po puću. Při přesćehnjenju wona z prawym špihelom do lěwje ruki muža dyri a jeho zrani. Tež jeho přewodnica so zrani, jako ju dźěle awta trjechichu. Wobaj dyrbještaj k lěkarjej.
Policija (15.01.25)
Paducha na kěrchowje wuslědźili
Běła Woda. Dokelž awtowe čisło BMWja njeeksistowaše, chcychu policisća jón wčera w Běłej Wodźe kontrolować. Šofer pak stupi na płun a wotjědźe. Jako z awtom pozdźišo do hrjebje zajědźe, muž dale pěši ćěkaše. Policajski pos jeho bórze na to na bliskim kěrchowje wuslědźi, hdźež bě so podhladny schował. Kaž so wukopa, je wón nimale 60 000 eurow drohi BMW we Wolfenbüttelu pokradnył. Na awće nasta 40 000 eurow škody.
Policija (14.01.25)
Pólski šofer smjertnje znjezbožił
Budyšin. Wčera w zažnych hodźinach je nakładne awto při parkowanišću pola Bórka na kromje Budyšina z dotal njeznateje přičiny do bliskeho lěska zajěło a při tym do wjacorych štomow zrazyło. 50lětny pólski šofer hišće na městnje njezboža zemrě. Po informacijach wobchadneje policije nasta něhdźe 20 000 eurow škody. Nětko pytaja swědkow, kotřiž móhli informacije wo wobchadnym njezbožu abo wo pólskim wodźerju podać. Štóž je něšto wobkedźbował, njech přizjewi so na Budyskim policajskim rewěrje pod 03591 3670.
Policija (10.01.25)
Pos paducha wuslědźił
Słona Boršć. Jako srjedu připołdnju napadny Audi Q 7 na wotpočnišćo Hornja Łužica pola Słoneje Boršće přijědźe a šofer motor njehasny, dołhož bě na nuzniku, je swědk policiju zazwonił. Policajski pos zastojnikam pomhaše, wodźerja awta na wotpočnišću wuslědźić. Kaž so wukopa, bě wón awto w hódnoće 35 000 eurow w Heidelbergu pokradnył. By-li wón jězdźidło hasnył, njemóhł je hižo zaso startować a dale jěć.
