Policija (14.08.24)
Paducha při njeskutku lepili
Ćichońca. Dźakowano kedźbliwosći wobydlerjow su zastojnicy Budyskeho policajskeho rewěra w nocy na póndźelu paducha w Ćichońcy lepili, kotryž běše so do domu zadobył. Wobydlerjo su to pytnyli a hnydom policiju informowali. Jako zastojnicy přijědźechu, spyta jim 51lětny skućićel wućeknyć a skoči přez žiwy płót do rěčki. Tole pak jemu pomhało njeje – policisća jeho krótko po tym lepichu a do Budyskeho policajskeho rewěra wotwjezechu. Kriminalni technikarjo su slědy w domje zawěsćili. Wěcna škoda dotal zwěsćena njeje. Skućićel dyrbi so nětko wosebje ćežkeho padustwa dla před sudnistwom zamołwić.
Do třoch transporterow so zadobyli
Policija (13.08.24)
Pos je psa nadběhował
Rachlow. 68lětna žona sobotu popołdnju ze swojim kolesom po Rachlowje jědźeše. W korbiku při wodźidle měješe swojeho małeho psa. Nadobo přiskoči wulki Labrador ke kolesu, zwućahny z korbika małeho psa a zakusny so do njeho. Próca, psaj dźělić, so najprjedy kolesowarce a tež porikej, kotryž bě z wulkim psom po puću, njeporadźi. Jako pozdźišo psaj, jedyn wot druheho dźělachu, běše mjeńši tak zranjeny, zo z pomocu lěkarja zahiny. Tež kolesowarka a 16lětny přewodźer Labradora dyrbještaj so lěkować dać. Kriminalna policija pad nětko přepytuje.
Policija (09.08.24)
Wobškodźeny transporter
Njeswačidło. We Njeswačanskim wjesnym dźělu Nowa Wjes su dotal njeznaći wot wutory, 6. awgusta, w 16 hodź. hač do štwórtka, 7. awgusta, we 8.45 hodź. transporter marki citroen Jumper wobškodźili. Paduši zadobychu so z namocu do jězdźidła a pokradnychu elektriske nastroje w hódnoće něhdźe tysac eurow. Wěcna škoda na awće wučinja něhdźe 500 eurow.
Paduši chcedźa drje lisćo wotstronić
Radwor. Srjedu w nocy su kriminelni w Radworju nastroj za wotstronjenje lisća pokradnyli. Hódnota wučinja něhdźe 600 eurow. Dale su awto typa Fiat Doblo wobškodźili.
Elektriske nastroje kradnyli
Radwor. W Radworskim wjesnym dźělu Łupjanska Dubrawka su so njeznaći w nocy wot wutory na srjedu tohole tydźenja z namocu do transportera marki Renault master zadobyli. Pokradnychu z njeho elektriske graty w hódnoće něhdźe tysac eurow. Wěcna škoda wučinja něhdźe sto eurow.
Pytaja za 15lětnej Leju W.
Policija (07.08.24)
Z bombu hrozyli – ničo namakali
Budyšin/Zhorjelc. Zastojnicy policije su dźensa hroženja z bombu na štyrjoch šulach přijeli. Hroženja běchu w nocy z e-mejlku dóšli. Policija je wo tym rano wokoło 7 hodź. zhoniła. Zastojnicy potrjecheneju policajskeju rewěrow Budyšin a Zhorjelc su w objektach na dróze Frederic-Joliot-Curie w Budyšinje, na Karla Liebknechtowej we Łutach kaž tež w Zhorjelcu na Hilžbjećinej a Wulkej Walskej za bombami pytali. Chutnosć hroženja pak wobkrućili njejsu. Wučerjo běchu šule do toho zdźěla hižo ewakuowali, zdźěla njejsu dźensa scyła wuwučowali. Přepytowanja kriminalneje policije traja.
Policija (06.08.24)
Njeznaći su so do firmy zadobyli
Bolborcy. W Budyskim měšćanskim dźělu Bolborcy su so dotal njeznaći wot zašłeje soboty, 3. awgusta wot 16.30 hodź. na njedźelu 4. awgusta w 10 hodź. do předewzaća w Bolborcach zadobyli. Tam su woni awtowy připowěšak kaž tež dwě rampje pokradnyli. Po tym su garažu na susodnej ležownosći wočinjeli. Tam pokradnychu traktor, kosu z motorom a mašinu za rjedźenje z wysokim ćišćom. Kradnjene wěcy wučinja škodu 27 500 eurow. Wěcna škoda wučinja něhdźe 3 000 eurow. Kriminalni technikarjo zwěsćichu slědy a zastojnicy Budyskeho rewěra pad dale přepytuja.
Policija (29.07.24)
Wopity kolesowar
Połčnica. Policisća z Kamjenskeho rewěra su zašłu nóc w Połčnicy na Třělnišću wobchadnu kontrolu přewjedli. Tam su w napoł dwěmaj 55lětneho kolesowarja kontrolowali. Muž wonješe sylnje za alkoholom. Testowy nastroj pokaza 1,68 promile. Policisća přikazachu wotewzaće kreje a zakazachu mužej dalšu jězbu.
Twarskej mašinje pokradnjenej
Budyšin. W Budyskim předewzaću na Nowosólskej su so njeznaći w nocy wot soboty na njedźelu z namocu zadobyli. Woni pokradnychu platowy připowěšak a nakładowak typa Kramer. Cyłkowna škoda wučinja něhdźe 24 000 eurow. Kriminalna policaja Budyskeho rewěra nětko dalše přepytowanja přewjedźe.
Njezbožowny manewer
Budyšin. Na Wojerowskej we Budyšinje je sobotu popołdnju krótko do napoł třoch 68lětny šofer awta marki VW Golf rozsudźił, před nim jěducy Mercedes Vita přesćahnyć. Při tym je muž awto 26lětneje šoferki šmórnył. Na to je wón kontrolu nad swojim awto zhubił a do chódnika zajěł a so latarnje dótknył. Potom wosta w přirowje stejo. Zastojnicy policije trochuja škoda na něhdźe 8 000 eurow.
E-bike pokradnyli
Policija (26.07.24)
Konjacy zapřah znjezbožił
Wulke Ždźary. Na dróze Při jězoru we Wulkich Ždźarach je srjedu wječor konjacy zapřah znjezbožił. Njejapke zwuki běchu konjej pozdatnje tak spłóšili, zo 70lětny pohonč kontrolu nad nimaj zhubi. Korejta so spowróći, pohonč so lochce zrani a dyrbješe do chorownje. K wěcownej škodźe dotal informacije njepředleža.
Do cyrkwje so zadobyli
Rakecy. Njeznaći skućićeljo su so srjedu do Rakečanske cyrkwje zadobyli. Tamniši wosadny farar je w běhu dopołdnja w cyrkwi rozbite wokno a wotewrjene durje do sakristije nadešoł. Po zdaću pak zadobywarjo ničo „trěbneho“ namakali njejsu – njeběchu ničo pokradnyli. Wěcna škoda wučinja 250 eurow. Kriminalna słužba pad přepytuje.
Policija (25.07.24)
Njezbožo z ćežko zranjenymi
Spytecy. 38lětna šoferka awta typa Opela běše na hłownej dróze wot Hodźija do směra Spytec po puću a zjědźe z dotal njeznatych přičin 70 metrow před Spytecami na napřećiwnu čaru. Tam storči frontalnje do přichadźaceho awta marki Peugeot. Šoferka Opela a sobujěducej holcy w starobje 5 a 10 lět kaž tež šoferka Peugeota so ćežko zranichu a dyrbjachu do chorownje. Wěcna škoda na jězdźidłomaj wučinja něhdźe 32 000 eurow. Policija prosy swědkow njezboža, jej dokładniše informacije telefonisce zdźělić a to pod čisłom: 03591-3670.
Policija (24.07.24)
Spěšnosć kontrolowali
Zhorjelc. Na awtodróze A4 na směr Zhorjelc je wobchadna policija při parkowanišću Lubata póndźelu popołdnju předpisanu spěšnosć 80 km/h kontrolowała. W běhu šěsć hodźin je dohromady 4 068 jězdźidłow přepruwowała. 519 z nich běše jasnje přespěšnje po puću. 153 skućićelow je pjenježnu pokutnu na městnje zapłaćiło, 366 šoferow dóstanje bórze póštu wot zarjada za pokutne pjenjezy. Negatiwny rekord je wodźer Mercedesa ze spěšnosću 159 km/h docpěł. Wón dyrbi nětko ze 700 eurami pokuty, z dwěmaj dypkomaj w Flensburgu a z třomi měsacami zakazom jězdźenja ličić. Nimo toho lepichu zastojnicy jědnaće šoferow, kotřiž njeběchu zakaz přesćehnjenja wobkedźbowali.
Policija (23.07.24)
Bróžnja so wotpaliła
Radšow (Groß Radisch). W Radšowje blisko Wysokeje Dubrawy mějachu zastojnicy wohnjoweje wobory kaž tež policije sobotu w nocy ruce połnej dźěła. Z dotal njeznatych přičin je so ratarska mašina, kotruž běchu wobsedźerjo na kóncu žnjenskeho dnja w bróžni wotstajili, zapaliła. Woheń so jara spěšnje wupřestrěwaše. Bórze palachu so w bróžni wotstajeny připowěšak a wosobowe awto kaž tež twarjenje same. Wšitko so wohenja dla zniči. Fachowcy trochuja sumu škodow na něhdźe 300 000 eurow. Přepytowar policije hišće za přičinu wohenja slědźi.
Do wikow za twaršćizny so zadobyli
Budyšin. Njeznaći skućićeljo su so sobotu na dotal njeznate wašnje do twarskich wikow při Delnjokinjanskej dróze w Budyšinje zadobyli. Jednoho z nich nadeńdźe sobudźěłaćer wěstotneje firmy a informuje policiju. Najebać spěšnych pytanskich naprawow, poradźi so paducham ćeknyć. Hižo nahromadźene a składowane rubjenstwo w cyłkownej hódnoće 5 500 eurow pak njejsu sobu wzać móhli.
