Policija (07.03.24)
Spěšnosć kontrolowali
Lěskej/Delni Wujězd. Wutoru kontrolowachu zastojnicy na zwjazkowej dróze 156 mjez Lěskej a Delnim Wujězdom, hač so šoferojo na maksimalnje dowolenych 70 km/h dźerža. W běhu šěsć hodźinow bě 940 awtow po puću. 47 z nich njebě so na wobmjezowanje spěšnosće dźeržało. Na 22 wodźerjow čaka nětko porokowy pjenjez na tamnych chłostanski pjenjez. Najspěšniši bě Polak po dróze smalił: Wón chwataše ze 113 km/h na swój cil. Na njeho čaka nětko pokuta we wysokosći 200 eurow a jedyn dypk w registru kmanosće jězdźenja.
Policija (05.03.24)
Skućićel čeknył – swědkojo pytani
Němske Pazlicy. 36lětna bě njedźelu swój čerwjeny Citroën na parkowanišću při wulkohaće wotstajiła. W času mjez 10.45 hodź. a 14.15 hodź. buchu durje awta, pozdatnje přez ranžěrowanje druheho jězdźidła, wobškodźene. Skućićel pak bě městnosć njeskutka cyle jednorje wopušćił. Nětko pyta policija swědkow njezboža. Je-li něchtó tole wobkedźbował, njech so na Kamjenskim policajskim rewěrje přizjewi.
Nakładne awta kontrolowali
Budyšin. Na awtodróze A 4 su zastojnicy njedźelu kontrolowali, hač so nakładne awta na zakaz jězdźenja njedźelu dźerža. Cyłkownje 15 LKWjow wuhladachu, kiž so na to dźerželi njeběchu. Na šoferow čaka nětko 120 eurow pokuty.
Policija (01.03.24)
Policistow skřiwdźił
Wulka Dubrawa. Srjedu popołdnju je wobydlerka Wulkodubrawskeho dwórnišćoweho sydlišća policiju wołała. Znaty njebě jeje bydlenje, tež po tym zo bě jeho wjacore razy k tomu namołwiła, wopušćił. Zastojnikaj jeho na to k durjam přewodźeštaj. To so mužej po wšěm zdaću njelubješe, a wón jeju skřiwdźi. Nětko wumjetuja jemu zadobyće do domu kaž tež skřiwdźenje zastojnikow. Kriminalna policija pad přepytuje.
Do transportera so zadobyli
Porchow. Njeznaći su so wutoru do transportera w Porchowje zadobyli. Tam pokradnychu někotre graty. Škoda padustwa wučinja 3 200 eurow. Policija tež tónle pad nětko přepytuje
Policija (29.02.24)
Wobšudnicy po puću
Budyšin. W Budyskim wokrjesu běchu minjene dny wobšudnicy zaso jara aktiwni. Dwěmaj škodowanymaj napřećo wudawachu so jako sobudźěłaćerjo jeju domjaceje banki. Po zdaću běchu w swojej róli tak přeswědčiwi, zo přepodachu jim wopory wosobinske přistupne daty swojich kontow. Po tutym puću wotknihowachu skućićeljo pjenjezy z konta woporow.
Policija (28.02.24)
Z alkoholom do přirowa
Pančicy-Kukow. Na wokrjesnej dróze 9238 pola Pančic-Kukowa je w nocy na wutoru k wobchadnemu njezbožu dóšło. 25lětny wodźer VW bě z dotal njeznateje přičiny w prawej křiwicy na lěwy bok puća zajěł a so do přirowa sunył. Při tym nasta něhdźe 5 000 eurow škody. Při wobdźěłanju njezboža policisća zwěsćichu, zo měješe wodźer awta 1,04 promile alkohola w kreji. Na to njedyrbješe wón jenož krej, ale tež swoju jězbnu dowolnosć wotedać.
Kolesa zaso přišrubowali
Bretnig. Kuriozne padustwo je so kónc tydźenja w Bretnigu stało. Njeznaći su wot Opela najprjedy štyri kolesa wotšrubowali a na to spinadła wottwarili. Skónčnje wšitke kolesa zaso přišrubowachu a so hakle potom zminychu.
Policija (27.02.24)
Pos njeskutki wuslědźił
Biskopicy. Policajski pos je njedźelu w Biskopicach wjacore njeskutki wuslědźił. Najprjedy bě so na Neustadtskej wobchadne njezbožo stało, při kotrymž motorski do awta zrazy. Po zražce wodźer motorskeho ćekny. Při wobdźěłanju njezboža zasadźichu mjez druhim policajskeho psa. Tón wjedźeše zastojnikow do zahrodkownišća, hdźež bě so 36lětny zawinowar zražki schował. Wón přizna, zo bě njezbožo zawinił. Kaž so wukopa, njebě motorske přizjewjene a tež nic zawěsćene. Hamtske čisło njebě płaćiwe. Jězbnu dowolnosć muž njeměješe. Nimo toho steješe wón pod wliwom drogow.
Policija (26.02.24)
Z nowymi črijemi ćeknył
Budyšin. Stare črije na nowe zaměnił je muž sobotu w nakupowanišću na Budyskej Delnjokinjanskej dróze. Jako chcyše kupnicu bjez płaćenja wopušćić, jeho sobudźěłaćer narěča. Na to muž strowotne problemy wudawaše, so wutorhny a ćekny. Nowe črije běchu něhdźe 45 eurow hódne. Hač při pytanju za skućićelom stare črije něšto pomhaja, njeje znate.
Policija (21.02.24)
Wjacore njedostatki zwěsćili
Wóspork. Policija je póndźelu pola Wósporka ukrainski Mercedes Sprinter z připowěšakom kontrolowała a při tym wjacore njedostatki zwěsćiła. Tak bě awto 85 procentow přećežko nakładowane. Na připowěšaku zwěsćichu samo 150 procentow přewjele. Prědnje wokno Mercedesa bě wjacekróć puknjene, čehoždla wodźer přez nje scyła prawje hladać njemóžeše. Nimo toho běchu wobruče jězdźidła ze spikesami wuhotowane, štož w Němskej dowolene njeje. Dale pobrachowaše awtomatiske registrowanje jězbnych datow.
Policija (20.02.24)
Wroble alarm zawinili
Wojerecy. Awtomatiski alarm je wčera rano we Wojerecach zasadźenje policije wuskutkował. Sobudźěłaćerjo wěstotneje słužby zdźělichu, zo su alarm w nakupowanišću při Kamjenskim kole registrowali. Na městnje policisća „skućićelow“ spěšnje wuslědźichu. Jednaše so wo wjacore wroble, kotrež běchu w nakupowanišću zamknjene, w nim tam a sem lětachu a na te wašnje alarm zawinichu. Z tym bě za zastojnikow zasadźenje wotzamknjene. W běhu wčerawšeho dnja móžachu ptački zaso do swobody lećeć.
Policija (19.02.24)
W domje kable kradnyli
Miłoraz. W nocy na sobotu su so njeznaći do jednoswójbneho domu na Wochožanskim puću w Miłorazu w Trjebinskej gmejnje zadobyli. W domje wotstronichu namócnje wjacore koporowe kable kaž tež wšelake nastroje a wzachu je sobu. Rubiznu trochuje policija na něhdźe 3 000 eurow, wěcna škoda wučinja něhdźe 5 000 eurow. Hač jedna so wo twarjenje, z kotrehož su wobydlerjo přesydlenja wsy dla wućahnyli, z policajskeje rozprawy njewuchadźa.
