Policija (23.03.23)
Tysacy eurow za knihi płaćił
Wojerecy. Sobudźěłaćer Wojerowskeje banki je po wšěm zdaću předwčerawšim 63lětneho Wojerowčana před wulkej škodu zachował. Muž bě so hižo w minjenych měsacach z woporom wobšudnikow stał. Jako wón wutoru popołdnju do pjenježneho instituta na Einsteinowej přińdźe, zo by 17 000 eurow na wukrajne konto přepokazał, bě sobudźěłaćer banki hnydom alarmowany a informowaše policiju. Zastojnikam Wojerowčan powědaše, zo chce pjenjezy za drohotne knihi wudać a zo je za druhe knihi hižo wjacore kredity wzał. Předwčerawšim drje wón nětko žane pjenjezy přepokazał njeje, přiwšěm su jemu wobšudnicy w zašłych měsacach dohromady hižo wjacore dźesaćtysacy eurow wulišćili. Kriminalna policija přepytuje nětko přećiwo pozdatnym předawarjam knihow, kotřiž běchu Wojerowčana w jeho bydlenju wopytali a jeho pohnuwali, knihi za přewysoku płaćiznu kupić.
Policija (22.03.23)
Paduši so posłužowali
Wojerecy. W času wot soboty popołdnja hač do póndźelnišeho ranja su so njeznaći w pincy bydlenskeho domu na Wojerowskej Gagarinowej posłužowali. Tam so namócnje zadobychu a wzachu najwšelakoriši grat, elektriske nastroje, instalaciski material, črije, napoje a prózdne bleše sobu. Rubizna ma dohromady něhdźe 665 eurow hódnoty. Nimo toho načinichu skućićeljo 20 eurow wěcneje škody. Za paduchami policija nětko pyta.
Policija (21.03.23)
Dźiwja honjeńca w nocy
Mužakow. Dotal njeznata wosoba je w nocy na póndźelu mjez Mužakowom a Rózborkom před policiju ćěkała. Zastojnicy chcychu Audi w Mužakowje kontrolować, šofer pak stupi na płun a smaleše do směra na Krušwicu. Dale dźěše honjeńca z hač do 200 km/h po statnej dróze. Jako awto na polo wotboči, je policisća z wočow zhubi. Pozdźišo Audi w Rózborku wopušćeny namakachu. Kaž so wukopa, bu jězdźidło něšto hodźin do toho w Berlinje pokradnjene.
Policija (20.03.23)
Kolesowar ćeknyć chcył
Smječkecy. Z drogowym deliktom dyrbješe so policija minjeny pjatk w Smječkecach zaběrać. Tam chcychu zastojnicy něhdźe w 17 hodź. kolesowarja kontrolować. Młody muž pak so zastojnikam wuwiny a mócnje do pedalow stupaše. Při swojim ćěkanju wón pakćik marihuany preč ćisny. Bórze na to policisća 23lětneho dosahnychu. Na njeho čaka nětko chłostanske jednanje.
Twarski wóz zapalił
Chrjebja. Blisko lěsa wotstajeny twarski wóz su sobotu pola Chrjebje zapalili. Wóz so dospołnje wupali. Płomjenja přeskočichu tohorunja na lěs. Wobornicy pak wšitko zhašachu. Přiwšěm nasta 10 000 eurow škody. Policija 14lětneho jako skućićela wuslědźi.
Policija (17.03.23)
Policija (16.03.23)
Domy přećežke byli
Rödertal. Wobchadna dohladowanska słužba je wutoru dopołdnja tři transporty domow Tiny na parkowanišću Rödertal kontrolowała. Tute typy domow su kruće z jězdźacym krosnom zwjazane a njepłaća z tym jako nakładowanje. Byrnjež hišće dospołnje zarjadowane njebyło, wučinješe cyłkowna masa připowěšaka po waženju 3 790 kilogramow. To wotpowěduje „přećeženju“ 290 kilow, štož wjedźeše k zběhnjenju zawodneje dowolnosće wšitkich třoch domow. Z tym policisća dalejězbu zakazachu.
Z awtom do konja zrazyła
Kamjenc. Wutoru wječor je na dróze pola Kynitzscha k zražce z ponyjom dóšło. Šoferka wosoboweho awta njemóžeše koliziji ze zwěrjećom zadźěwać. Při tym zemrě kóń na městnje njezboža. Na jězdźidle nasta wěcna škoda něhdźe 10 000 eurow.
Policija (15.03.23)
Chrobła wurěč jemu pomhała njeje
Zhorjelc. Na awtodróze A4 blisko wotjězda Słona Boršć je policija póndźelu nakładne awto zadźeržała, kotrež běše wo 20 km/h přespěšnje po puću. Šofer wozydła pak pyrješe a huntorješe so, „zo je w transiće po puću a tuž wobchadne zakonje za njeho njepłaća. Wón smě tak spěšnje jěć, kaž so jemu lubi!“ Tajka argumentacija wšak policiju přeswědčiła njeje.
Policija (14.03.23)
Šoferow pod drogami lepili
Zhorjelc. Při swojich kontrolach na awtodróze A 4 je policija kónc tydźenja wjacorych pod drogami jěducych šoferow lepiła.
Sobotu připołdnju zadźerža 42lětneho wodźerja Opela na parkowanišću při Wachebergu. Drogowy spěšnotest zastojnikow dopokaza wysoke mnóstwo amfetaminow w kreji.
Dalša kontrola awtodróhoweje policije na njedźeli lepi 27lětneho šofera VW-ja při najězdźe na awtodróhu w Porchowje. Drogowy test dopokaza w tutym padźe substancu konop.
Policija (13.03.23)
Do hosćenca so załamali
Wojerecy. Njeznaći skućićeljo su so kónc tydźenja z namocu do hosćenca na Budyskej aleji we Wojerecach zadobyli. Nutřka rozbichu dwaj hrajnej awtomataj kaž tež dartowy awtomat, zo bychu pjenjezy wuwzać móhli. Po informacijach škodowaneho běchu to dohromady 2 000 do 3 000 eurow. Wěcnu škodu na awtomatach a na twarjenju trochuje wón na 21 520 eurow. Policija slědy na městnje njeskutka zawěsći.
Policija (10.03.23)
Fotowoltaikowe platy pokradnyli
Budyšin. Na ležownosći při Drježdźanskej dróze w gmejnje Großharthau su njeznaći srjedu w nocy dohromady 36 fotowoltaikowych modulow pokradnyli. Zapakowanski material tutych pak su škodowanym zawostajili. Policiji so poradźi, na městnje slědy zawěsćić. Trochowana škoda padustwa je 6 850 eurow.
E-awto znjezbožiło a so wupaliło
Zhorjelc. Po puću ze Žitawy je štwórtk rano 37lětny wodźer elektriskeho Mitsubishija z dotal njeznatych přičin we wjesce Mittelherwigsdorf z dróhi wujěł a do štoma zrazył. Na to so elektriske jězdźidło zapali. Prěnjej pomocnicy so poradźi, zatłusnjeneho ćežko zranjeneho z palaceho awta wuchować. Pomocna słužba bórze po tym dojědźe a znjezboženeho do chorownje dowjeze. Dróha bě cyłkownje 3,5 hodź. dospołnje zaraćena.
