Policija (09.05.23)
Podhladnych za hranicu lepili
Krušwica. Do metal předźěłaceje firmy chcychu so njeznaći předwčerawšim w Krušwicy zadobyć. Při tym jich sobudźěłaćer myleše a policiju zazwoni. Podhladni z awtom do Pólskeje ćěkachu. Na tamnym boku hranicy so němskim zastojnikam poradźi, skućićelow dosahnyć. Jednaše so wo muži w starobje 26 a 47 lět kaž tež wo 36lětnu žonu. Wšitcy třo běchu pólscy staćenjo. Kaž pólscy policisća při dalšim přepytowanju zwěsćichu, předležeše přećiwo 26lětnemu skućićelej přikaz zajeća. Jeho dowjezechu do jastwa. W Němskej změja so lepjeni pospytneho zadobywanja dla zamołwić.
Policija (08.05.23)
Drohi e-bike pokradnyli
Wojerecy. Zo je stajnje lěpje, koleso k štomej, wobchadnemu znamjenju, płotej abo podobnje přizamknyć, wě nětko wobsedźer e-bikea we Wojerecach. Wón bě 2 100 eurow drohe elektrokoleso před kupnicu ze zamkom zamknył. Jako pak so z wobchoda wróći, dyrbješe zwěsćić, zo běchu njeznaći koleso scomt zamkom sobu wzali.
Policija (05.05.23)
Jako bratr so wudawał
Budyšin. Wodźerja Jeepa bjez jězbneje dowolnosće je policija předwčerawšim na Budyskej Róžowej lepiła. Dokelž běchu wuprajenja 38lětneho dwělomne, sej policisća pad bliže wobhladachu. Kaž so wukopa, bě muž při kontrolach w zašłosći wjacore razy personalije swojeho bratra podał. Tónraz móžeše jeho jedyn ze zastojnikow dokładnje identifikować.
Policija (04.05.23)
Drogi a zabijak namakali
Budyšin. Zastojnicy Budyskeho jastwa su zawčerawšim pola wopytowarki drogi namakali. Na to informowachu policiju. 35lětna žona měješe 0,5 gramow konopa a jednu tabletu ecstasy při sebi. Pola jeje 20lětneho přewodźerja namakachu zabijak. Na to přepytachu zastojnicy tež zhromadne bydlenju wobeju podhladneju. Hač su tam něšto namakali, znate njeje.
Policija (03.05.23)
Parašutist znjezbožił
Wojerecy. K njewšědnemu zasadźenju wołachu policiju předwčerawšim připołdnju we Wojerecach. Tam bě na křižowanišću Stara Berlinska dróha/Einsteinowa parašutist znjezbožił. 54lětny sportowc bě z dotal njeznateje přičiny ze swojim parašutom najprjedy do štoma a na to na zemju padnył. Při tym so wón ćežko zrani, tak zo dyrbjachu jeho do chorownje dowjezć. Jeho wuhotowanje nětko na techniske njedostatki pruwuja.
Policija (02.05.23)
Tři wosoby so zranili
Janecy. Wobchadne njezbožo z třomi zranjenymi je so předwčerawšim wječor w Janecach (Jannowitz) w Hodźijskej gmejnje stało. Z Bolborc jěduca 75lětna wodźerka VWja započa so ze swojim jězdźidłom na statnej dróze suwać a zrazy do napřećo jěduceho jězdźidła samsneho typa. Rentnarka, 45lětna wodźerka tamneho awta a jeje jědnaćelětna sobu jěduca so při zražce zranichu. Wšitke tři dowjezechu do chorownje. Wobě awće dyrbjachu wotwlec. Statna dróha S 107 bě na městnje njezboža něhdźe połdra hodźiny zawrjena. Policija nětko za dokładnymi přičinami zražki slědźi.
Policija (28.04.23)
Policija prosy wo pomoc!
Běła Woda. Srjedu dopołdnja dóńdźe k ćežkemu wobchadnemu njezbožu w Běłej Wodźe z dwěmaj ćežkozranjenymaj (SN rozprawjachu). Zawinowar njezboža pak ćekny. Mjeztym je 78lětna sobujěduca swojich ćežkich zranjenjow dla w chorowni zemrěła. Policija pyta nadal nuznje za swědkami. Štó wě wjace wo zawinowarju kaž tež wo jeho awće? Prawdźepodobnje je to małe běłe nakładne awto. Informacije podajće prošu pod čo. 03591 367 0.
Paducha lepili
Zhorjelc. Srjedu wječor staj so paduchaj do nakupowanišća na Goethowej dróze zadobyłoj. Policija jednoho ze skućićelow lepi a sćaza jemu „dobytwu“, mjez druhim něhdźe 140 eurow drohi gratowy kófer.
Policija (27.04.23)
Njezbožo zawinował a ćeknył
Běła Woda. K ćežkemu njezbožu dóńdźe srjedu dopołdnja na Mužakowskej dróze w Běłej Wodźe. 81lětny šofer a 78lětna pasažěrka běštaj z Opelom do směra na Mužakow po puću. Do awta storči napřećo přijěduce awto tak, zo z puća zjědźe a do štoma zrazy. Zawinowar njezboža pak ćekny. Wohnjowa wobora dyrbješe pasažěrku a šofera Opela z awta wuswobodźić. Wobaj běštaj ćežko zranjenaj. Policija pyta za swědkami njezboža, z informacijemi wo zawinowarju.
Wopojeny po puću ...
Rakecy. ...běše wutoru dopołdnja 33lětny młodostny wodźer Toyoty, jako jeho policija při kontroli zadźerža. Drogowy test reagowaše pozitiwnje na amfetaminy. Jězba młodostneho bě z tym zakónčena. Wón dyrbi nětko z pokutu ličić.
Policija (26.04.23)
Jězdźidło z ćěkancami zadźerželi
Zhorjelc. Transporter z něhdźe 29 ćěkancami je sakska policija po přesćěhanju pola Zhorjelca zadźeržała. Zastojnicy chcychu jězdźidło wčera wječor kontrolować, tola 50lětny šofer ćekny, dźensa rěčnik zwjazkoweje policije zdźěli. Po něšto kilometrach zrazy transporter w Markersdorfje do awta policije. Po prěnich dopóznaćach so nichtó njezrani. Po informacijach zwjazkoweje policije jedna so pola ćěkancow wo muži, žony a dźěći ze Syriskeje. Zarjady jich nětko registruja. Jelizo woni wo škit w Němskej proša, dowjezu ćěkancow do wotpowědnych přebywanišćow. 50lětny wodźer transportera pak ma nětko z chłostanskim jednanjom ličić.
Policija (25.04.23)
Pytaja za mužom
Biskopicy. Wot minjeneho štwórtka popołdnja pyta policija w Biskopicach za 26lětnym Christianom Bartschom. Wón bě wokoło 16 hodź. bydlenje za hladanje na Augusta Königowej dróze wopušćił. Młody muž je duchownje wobmjezowany a trjeba medikamenty. Dotal je policija ze wšelakimi naprawami za nim pytała, tola bjez wuspěcha. Policija tuž nětko ludnosć wo pomoc prosy. Christian Bartsch je něhdźe dwaj metraj wulki a ma brune dlěše włosy. Woblečeny je wón žołty kabat, čorne joggingowe cholowy a sportowe črije. Štóž ma informacije, hdźe Christian Bartsch přebywa, abo štóž móže dalše informacije podać, njech so na Budyskim policajskim rewěrje pod telefonowym čisłom 03591 3560 abo na dalšich direkcijach přizjewi.
