Policija (23.12.22)
Nuznik skóncowali
Budyšin. Zawěrno njewšědny objekt su sej minjenu wutoru wječor njeznaći wupytali, zo bychu swoje mocy wopokazali. W času wot 18.15 do 18.45 hodź. woni na Bozančanskej dróze mobilny nuznik dospołnje rozbichu. Tak mjenowany Toi Toi steješe blisko bydlenskeho domu čisło 35. Po informacijach Zhorjelskeje policajskeje direkcije nasta něhdźe 530 eurow škody. Policija pad přepytuje a pyta w tym zwisku swědkow, kotřiž su něšto wobkedźbowali. Pokiwy přijimuja pod telefonowym čisłom 03591/ 35 60.
Policija (22.12.22)
Bjez dowolnosće, ale z alkoholom
Delnja Hórka. Nadróžny wobchad strašnje wohrozył je 35lětny wodźer Passata wčera krótko po połnocy na zwjazkowej dróze B 156. Wón bě z Budyšina do směra na Delnju Hórku po puću, jako w křiwicy nalěwo kontrolu nad awtom zhubi, na prawym boku wobhrodźenje a dźiwinowy płót přełama a so po skłoninje suny. Při tym so VW zwróći. Na jězdźidle nasta něhdźe 18 000 eurow škody. Jězdźić z nim hižo njemóžeš. Na wobhrodźenju a płoće nasta 3 000 eurow škody. Na zbožo so 35lětny jeno snadnje zrani. Při wobdźěłanju njezboža policisća zwěsćichu, zo muž scyła žanu jězbnu dowolnosć njewobsedźi. Nimo toho so wukopa, zo bě pod wliwom alkohola awto wodźił. Pola njeho naměrichu mjenujcy 1,68 promilow. Za to změje so před sudnistwom zamołwić. Policija pad nětko dale přepytuje.
Policija (21.12.22)
Bjez zymskich wobručow jěła
Wojerecy. Poprawom najpozdźišo w jězbnej šuli wuknješ, zo maš při zymskich poměrach na puću swoje awto ze zymskimi wobručemi wuhotować. Fachowcy stajnje zaso zasadu poručeja, zymske wobruče najlěpje wot oktobra hač do jutrow na kolesach měć. 26lětnej žonje we Wojerecach bě to předwčerawšim dopołdnja po wšěm zdaću wšojedne. Na Heinowej bě wona ze swojim Toyota do směra na Brětnju po puću, jako so na hładkej dróze suwać započa a do płotu ležownosće zrazy. Žona so na zbožo njezrani. Na awće a na płoće nasta dohromady 2 500 eurow škody. Policisća zwěsćichu, zo bě Toyota z lěćnymi wobručemi po puću.
Policija (20.12.22)
Škody dźěry dla
Budyšin. Włóžnoty a zmjerzka dla je so předwčerawšim popołdnju awtodróha A 4 mjez wotbóčkomaj Wóspork a Budyšin wuchod roztorhnyła. Kaž Zhorjelska policajska direkcija zdźěli, je so znajmjeńša dwanaće jězdźidłow wobškodźiło, jako přez dźěru zajědźechu. Při tym nasta dohromady něhdźe 12 000 eurow škody.
Šmóratce a telefon fuk
Krušwica. Do jednoswójbneho domu w Krušwicy su so njeznaći předwčerawšim rano zadobyli. Jako wobydlerjo to pytnychu, so skućićeljo zminychu. Sobu wzali su šmóratce a móšnju. Škoda wučinja něhdźe 800 eurow.
Policija (16.12.22)
Policija (15.12.22)
Wjele pjenjez zhubiła
Budyšin. Z tak mjenowanym wobšudniskim trikom „Love Scamming“ je žona z Budyšina wysoku pjeć cyfrowu sumu pjenjez zhubiła. Kaž policija zdźěli, skućićeljo wudawachu, zo trjebaja pjenjezy, zo móhli do Němskeje zapućować a so z Budyšanku skónčnje zetkać. Wjacore lěta žona wospjet pjenjezy přepokazowaše, prjedy hač nětko policiju informowaše.
Policija (14.12.22)
Wjacore delikty naraz
Budyšin. 31lětneho wodźerja Škody su zastojnicy předwčerawšim wječor na Budyskej Cyhelskej hasy kontrolowali. Policisća so njemało dźiwachu, jako hnydom wjacore delikty zwěsćichu. Tak młody muž scyła žanu jězbnu dowolnosć njewobsedźeše. Nimo toho jeho wosobowe awto zawěsćene njebě. A skónčnje bě wuslědk přewjedźeneho drogoweho testa pozitiwny, dokelž bě 31lětny čěski staćan konop brał. Dale jěć wón wězo njesmědźeše, za to pak dyrbješe za dalše přepytowanja krej „darić“.
Policija (13.12.22)
Po zražce ćeknył
Běła Woda. Do wuchowanskeho awta, kotrež bě bjez módreje swěcy a sireny k zasadźenju po puću, je předwčerawšim w Běłej Wodźe 51lětny wodźer Seata zrazył. Zranił so na zbožo nichtó njeje. Po njezbožu muž z awta wulěze, je zamkny a so wotsali. Čehodla je to činił, policisća wuslědźichu, jako jeho doma wopytachu. Pola njeho naměrichu mjenujcy 1,56 promilow alkohola w kreji.
Policija (12.12.22)
Zražki w sněze
Hodźij. Zymskich poměrow na pućach dla su so dźensa w nocy na hornjołužiskich dróhach wjacore wobchadne njezboža stali. Tak bě awtodróha A 4 mjez Wósporkom a Budyšinom zawrjena, dokelž tam nakładne awto jězdnju blokěrowaše. Tež mjez Budyšinom wuchod a Budyšinom zapad je so njezbožo stało. W Hodźiju je wosobowe awto krótko do 4 hodź. do jězdźidła zymskeje słužby prasnyło a so chětro wobškodźiło.
Policija (08.12.22)
Konto wotrumowali
Biskopicy. Po wšěm zdaću přewjele dowěry do dochadźacych e-mejlkow měješe předwčerawšim wobydler w Biskopicach. Wón dósta e-mejlku, kotraž zdaše so wot jeho domjaceje banki być a w kotrejž jeho napominachu, swoje bankowe daty podać. Muž žane wobmyslenja njeměješe a próstwje „banki“ wotpowědowaše. Krótki čas pozdźišo wón zwěsći, zo bě něchtó 10 000 eurow z jeho konta wotknihował.
