Policija (03.11.21)
Tobołku pokradnyli
Kamjenc. Z njewšědnym padustwom zaběra so policija w Kamjencu. We wobchodźe na Cyrkwinskej hasy je so předwčerawšim připołdnju tobołka z rumnosće za sobudźěłaćerjow zhubiła. Po informacijach policije bě w tobołce móšeń z wupokazami, kartami a něhdźe 800 eurami. We wobchodźe běštej w tym času dwě žonje. Něhdźe dwě hodźinje pozdźišo wuhladachu samsnu tobołku w druhim wobchodźe. Pjenjezy pak w njej hižo njeběchu. Nětko pyta policija swědkow, kotřiž su předwčerawšim na Kamjenskej Cyrkwinskej hasy snano něšto podhladneho wobkedźbowali.
Bjez dowolnosće a zawěsćenja
Wojerecy. Hnydom wjacore delikty skućił je šofer Volvowa, kotrehož policisća předwčerawšim we Wojerecach kontrolowachu. 46lětny sprěnja scyła žanu jězbnu dowolnosć njeměješe. Zdruha jeho jězdźidło přizjewjene a střeća tež zawěsćene njebě. Dale jěć Wojerowčan wězo njesmědźeše.
Policija (02.11.21)
Z rewěra do jastwa
Wojerecy. To drje sej 25lětny Wojerowčan předwčerawšim rano myslił njeje, zo budźe hišće samsny dźeń w jastwje přenocować dyrbjeć. Wón zjewi so na Wojerowskim policajskim rewěrje, zo by ramikowe čisło kolesa přepruwować dał. Pječa chcyše tele koleso pola eBay kupić. Policisća zwěsćichu, zo bě groćany konik pokradnjeny a zo za nim pytaja. Ale tež młody muž sam bu z přikazom zajeća pytany, tak zo dowjezechu jeho do jastwa. Pokradnjene koleso namakachu pozdźišo pola njeho doma a nic pola eBay. Nětko móža koleso prawemu wobsedźerjej zaso wróćić.
Policija (01.11.21)
Wulka škoda lisća dla
Manjow. Zasadźenje dobrowólnych wohnjowych wobornikow a wulka wěcna škoda běštej wuslědk ideje, kotruž měješe sobotu popołdnju muž w Manjowje (Mönau) pola Delnjeho Wujězda. Wón chcyše na swojej ležownosći lisćo spalić. Jako so krótki čas wot wohenja wotsali, přeskočichu płomjenja wětřika dla na fasadu pódlanskeho twarjenja. Ta bu na to sylnje wobškodźena. K hašenju přijědźe nimale 60 kameradow wokolnych wohnjowych woborow. Kelko škody je dokładnje nastało, njejsu fachowcy hišće wobličili, trochuja pak ju na wjacore 10 000 eurow.
Wopity z awtom jěł
Lejno. Dobry čuch mějachu sobotu popołdnju policisća w Lejnje, jako tam nimojěducych šoferow zadźeržachu a kontrolowachu. Mjez druhim dyrbješe 57lětny wodźer Peugeota zastać. Jako jeho zastojnicy narěčachu, jim napadny, zo muž chětro za alkoholom wonješe. Při alkoholowym tesće naměrichu pola njeho 1,14 promilow alkohola w kreji. Na to policisća přikazachu, zo ma muž krej wotedać, zo móhli dokładnje zwěsćić, kelko bě wón pił. Jeho jězbnu dowolnosć zastojnicy wězo sćazachu.
Policija (29.10.21)
Něchtó na bus třělił
Wulke Ždźary. Njemało stróžił je so předwčerawšim wječor něhdźe w 20 hodź. wodźer busa na Kobličanskej dróze we Wulkich Ždźarach. Wosrjedź jězby zasłyša 59lětny wutřěl pistole a samsny wokomik so jedne z woknow jeho busa rozbi. Přiwołana policija namaka w škleńcy wokna zatřělowu dźěru, kotruž kriminalni technikarjo bliže přepytowachu. Hač su tež projektil namakali, z policajskeje rozprawy njewuchadźa. Wěcna škoda wučinja něhdźe 2 000 eurow. Tónle pad přepytuje policija nětko přećiwo njeznatej wosobje pospytneho strašneho zranjenja ćěła dla.
Policija (28.10.21)
Awtomat rozbuchnyli
Budyšin. Cigaretowy awtomat na Budyskej Weinertowej su njeznaći we wčerawšich rańšich hodźinach rozbuchnyli. Pjenjezy a cigarety woni sobu wzachu a so do njeznateho směra zminychu. Hódnota rubizny njeje hišće doskónčnje zwěsćena. Wot swědka informowani wzachu policisća zbywace cigarety a skóncowany awtomat sobu.
Policija (27.10.21)
Tobak při puću ležał
Krušwica. Paket hrubeho tobaka je předwčerawšim popołdnju w Krušwicy policajske zasadźenje zawiniło. Swědcy namakachu paket při kromje puća, kotryž wjedźe k hraničnemu mostej, a informowachu policiju. Po wšěm zdaću bě paket z transportera abo nakładneho awta padnył. Kaž bě z nalěpka wučitać, jednaše so wo 33 kilogramow tobaka. Policisća wzachu wšitko sobu a informowachu swojich kolegow-cłownikow. Woni maja nětko nadrobniše wobstejnosće namakanki wuslědźić.
Policija (26.10.21)
Katalyzator pokradnyłoj
Běła Woda. Dźeń a časćišo so paduši na katalyzatory wosobowych awtow měrja. Najnowši tajki pad sta so předwčerawšim w Běłej Wodźe. Tam su njeznaći wot Mercedesa katalyzator a wot Audija wobě čisle pokradnyli. Hnydom alarmowana wobsadka policajskeho awta wuslědźi na to muži w starobje 25 a 31 lět. Při jeju Audiju A6 běštej spakosćenej čisle přičinjenej. W awće samym namakachu zastojnicy pokradnjeny katalyzator kaž tež wotpowědny grat. Policisća wšitko sćazachu a wzachu paduchow sobu na policajski rewěr. Tam jich z fotami a porstowymi wotćišćemi kriminalistisce registrowachu. Pad nětko dale přepytuja.
Policija (25.10.21)
Granatu namakali
Chrósćicy. Dźěći, kotrež sej sobotu připołdnju w Chrósćicach hrajkachu, namakachu na Puću měra jim njeznaty nastroj. Dokelž so jim metalowy objekt dźiwny zdaše, dowěrichu so wone na zbožo swojim staršim. Ći informowachu hnydom policiju. Najprjedy přijědźe wobsadka policajskeho awta, kotraž na to fachowcow za wotstronjene rozbuchadłow přiwoła. Eksperća wzachu 30 centimetrow dołhu granatu sobu.
Policija (22.10.21)
Kwětki kradnyć chcył
Běła Woda. Kwěćel je njeznaty muž předwčerawšim w Běłowodźanskim kwětkowym wobchodźe pokradnyć chcył. Předawarka jeho na parkowanišću před předawanišćom dosćahny a jemu kwěćel zaso wotewza. Paduch pak njepopušći a dźěše za předawarku wróćo do wobchoda. Jako chcyše wona na to policiju wołać, dóńdźe k rozestajenju z mužom. Swědka předawarce pomhaše, na čož njeznaty skućićel ćekny.
Policija (21.10.21)
Pod drogami njezbožo zawinił
Zdźěr. Při wobchadnym njezbožu předwčerawšim w Zdźěri je 21lětny zawinowar po wšěm zdaću pod drogami z awtom po puću był. Ze swojim Daciju jědźeše wón po Mužakowskim puću do směra na zwjazkowu dróhu B 156. Při tym njewobkedźbowaše předjězbu Hyundaja a do njeho zrazy. Při přepytowanju so wukopa, zo steješe młody muž pod wliwom konopje. Policisća jemu jězbnu dowolnosć nablaku sćazachu.
