Policija (04.10.22)
Konje při wohenju zahinyli
Brěžki. Wulku wěcnu, ale tež emocionalnu škodu zawostajił je woheń, kiž je w nocy na póndźelu na Zdźarowskej dróze w Brěžkach wudyrił. Z dotal njeznateje přičiny paleše so tam synowa bróžnja ratarskeho zawoda. Woheń zwěsćili a wobornikow alarmowali su krótko po połnocy. Kaž policija zdźěli so synowy skład dospołnje wotpali. Traktor, kiž pódla twarjenja steješe, so tohorunja zniči. Drje najwjetša škoda za wobsedźerja pak bě, zo je šěsć koni, kotrež běchu w bróžni zaměstnjene, zahinyło. Cyłkowna škoda njeje hišće powobličena, leži pak po dotalnych informacijach w šěsćcyfrowym wobłuku. Zasadźeni běchu dobrowólni wohnjowi wobornicy wokolnych wsow kaž tež Wojerowska powołanska wohnjowa wobora. Statnu dróhu S 285 dyrbjachu za čas hašenja dospołnje zawrěć. Za přičinami wohenja policija nětko slědźi.
Policija (30.09.22)
Kolesowarka policista biła
Budyšin. Na Budyskej Tuchorskej dróze je 71lětna kolesowarka srjedu popołdnju policista nadběhowała. Zastojnicy su podawk z bodycam dokumentowali. Seniorka běše zastojnikam napadnyła, dokelž njeje so prawje zadźeržała. Na to běchu žonu narěčeli. Jej pak pobrachowaše dowidźenje, zo nima wužiwać chódnik za pěškow ale dróhu, je-li kolesujo po puću. Dale njeje chcyła swoju identitu podać. Zastojnicy jej na to zakazachu z kolesom dale na chódniku jěć. Tomu pak so žona wobaraše a swoje koleso policistam do nohow suwaše a do nich borkaše. Jednomu policistej biješe žona z ruku mjezwoči. Zastojnik njebu při tutej akciji zranjeny. Policisća zhotowichu pokutnu informaciju nadběha na zastojnika dla. Nětko so tudyša kriminalna słužba z tutym padom zaběra. Do přepytowanja maja so natočenja na bodycam zapřijeć.
Policija (29.09.22)
Njezbožo z lochce zranjenymaj
Budyšin. Na njezbožu, kotrež bě so wutoru nawječor njewobkedźbowanja předjězby dla stało, stej so wobdźělenaj lochce zraniłoj. 65lětna šoferka wosoboweho awta marki Seat chcyše z Bórkskeje dróhi dolěwa na zwjazkowu dróhu 156 do směra na Delnju Hórku wotbočić. Při tym njeje wona předjězbu 59lětneho šofera wosoboweho awta marki Opel dosć derje wobkedźbowała. Wobaj šoferaj dyrbještaj so lochkeho zranjenja dla do chorownje na lěkowanje podać. Wěcna škoda wučinja něhdźe 18 000 eurow.
Policija (28.09.22)
Po njezbožu cyle jednorje dale jěł
Delni Wujězd. Na zwjazkowej dróze B 156, mjez wotbóčku Delni Wujězd/Bjerwałd je 58lětny šofer awta marki Opel póndźelu připołdnju njezbožo zawinił. Wón bě před nim jěduce nakładne kaž tež awto marki Ford w dołhej křiwicy přesćahnył a wodźidłomaj do boka zajěł. Potom jědźeše bjez zastaća dale do směra na Hamor. Šofer Forda bě sej značku spomjatkował a ju policiji sposrědkował. Ta je na to zwěsćiła, zo bě šofer Opela zranjeny a zo bě alkohol pił.
Policija (27.09.22)
Dyrbja z pokutu ličić
Budyšin. Zastojnicy policije, skutkowacy na awtodróze A 4 mjez Drježdźanami a Zhorjelcom su zwěsćili, zo so wšitcy šoferojo na zakaz jězdźenja z nakładnym awtom na njedźelach njedźerža. Tak su zašłu njedźelu sydom přeńdźenjow zwěsćili. Ani jedyn šofer njeměješe wosebitu dowolnosć za to, zo smě njedźelu jěć. Potrjecheni mějachu suche mlokowe wudźěłki, piwo, pakćiki, regale z metala, mašiny a telewizory nakładowane, jedne bě samo bjez tworow po puću. Nětko maja z pokutu ličić.
Policija (26.09.22)
Z 2,14 promile z awtom jěła
Wojerecy. Na Grodkowskej šoseji we Wojerecach chcyše 38lětny pjatk wječor ze swojim awtom marki Renault na Halštrowsku wotbočić. Za nim jěduca 62lětna šoferka awta marki VW je, bjez toho zo by spinała, do njeho zrazyła. Jako policija dojědźe, su zastojnicy zwěsćili, zo ma žona 2,14 promilow alkohola w kreji. Muž bu zlochka zranjeny. Wěcna škoda wučinja něhdźe 10 000 eurow.
Policija (23.09.22)
Muža při wotbočenju přewidźała
Serbske Pazlicy. 37lětna wodźerka awta marki Dacia je srjedu dopołdnja w Serbskich Pazlicach do 18lětneho muža zrazyła. Při wotbočenju k sportnišću je wona muža na mopedźe marki Simson přewidźała, kiž do směra Njebjelčic jědźeše. Muža dowjezechu do chorownje. Wěcna škoda wučinja něhdźe 5 000 eurow.
Policija (22.09.22)
Padušnicu lepili
Wojerecy. We Wojerecach běchu wot awgusta hač do minjeneje wutory w hladanišćach paduši pjenjezy kradnyli. Z móšnjow běchu so přeco zaso mjeńše sumy, w cyłku něhdźe 600 eurow, zhubili. Nawodnistwo předewzaća je tuž lokalnu policiju informowała, kotraž je přepytowanja zahajiła. Wutoru běchu zastojnicy w bliskosći, hdyž padušnica znowa za pjenjezami sahny, kotrež jej njesłušachu. 18lětna młodostna je přiznała, zo je kradnyła. Žona němskeho pochada změje so nětko padustwa dla před sudnikom zamołwić. Přepytowanja zastojnikow hišće traja.
Policija (21.09.22)
Kolesy z kólnje pokradnyli
Lejno. Njeznaći su póndźelu rano mjez třoch a štyrjoch w Lejnje w gmejnje Halštrowska hola dwě elektrokolesy z kolesoweje kólnje kradnyli. Paduši su so z namocu do twarjenja zadobyli a kolesy w hódnoće něhdźe 1 600 eurow sobu wzali. Zdobom su wěcnu škodu něhdźe tysac eurow zawostajili. Nětko so Wojerowska kriminalna policija z padom zaběra.
Policija (20.09.22)
Lawba w płomjenjach
Kamjenc. Na Kamjenskej Winowej horje dyrbjachu njedźelu rano tři wohnjowe wobory woheń hašeć. Sćěny lawby běchu po hašenju połne sazow. Prawdźepodobnje je woheń tykački dla wudyrił. Wěcna škoda wučinja něhdźe 200 eurow.
Čorny bike pokradnyli
Wojerecy. Njeznaći su w nocy wot soboty na njedźelu pokradnyli we Wojerecach koleso za transport tworow Riese & Müller. Čorny bike je stał w kolesowej pincy při torhošću. Škoda wučinja něhdźe 6 300 eurow. Kriminalna policija nětko slědźi.
