Policija (25.05.22)
Při přizemjenju znjezbožił
Kamjenc. 83lětny pilot ultralochkeho lětadła je wčera dopołdnja na Kamjenskim lětanišću znjezbožił a so snadnje zranił. Muž bě z mašinu typa Eurostar z Berlina do Kamjenca lećał. Jako bě w Lessingowym měsće hižo zaso na zemi, je so jemu po wšěm zdaću zmylk stał, tak zo mašina z prědnim dźělom doprědka padny. Wuchowanske mocy so wo rentnarja starachu. Zastojnicy wobchadneje policajskeje inspekcije přewzachu prěnje přepytowanja. Kelko škody je při njezbožu nastało, njeje znate.
Policija (24.05.22)
Pokradnjene koło w interneće
Wojerecy. Ze swojej kedźbnosću staj mandźelskaj we Wojerecach přinošowałoj, paducha kolesa dosahnyć. Pola eBay pytaštaj wonaj za nowym kolesom. Jako běštaj kmane žonjace marki Giant namakałoj, daštaj ramikowe čisło najprjedy wot policije přepruwować. Kaž so wukopa, bu poskićene koleso minjeny tydźeń we Wojerecach pokradnjene. Policija za nim hižo pytaše. Město mandźelskeju jědźechu nětko policisća k wučinjenemu přepodaću. Tam zetkachu 30lětneho znateho – a pytane koleso. W bydlenju a pincy podhladneho namakachu dalše wěcy, kotrež běchu po wšěm zdaću pokradnjene, mjez druhim wšelki grat.
52 km/h přewjele
Ottendorf-Okrilla. 172 km/h bě rekord při kontroli spěšnosće w nocy na póndźelu na awtodróze A 4 pola Ottendorfje-Okrilli. Dowolenych je tam 120 km/h. Wodźer pólskeho Citroëna ma nětko 320 eurow pokuty płaćić a njesmě jedyn měsac žane awto wodźić. Při kontroli bě dohromady 85 wodźerjow přespěšnych.
Policija (23.05.22)
Paduši so zadobyli
Łaz. Hnydom do dweju jednoswójbneju domow su so njeznaći minjeny kónc tydźenja we Łazu zadobyli. Kaž policija rozprawja, dóstachu so w nocy na sobotu, přez wokno respektiwnje zymsku zahrodu, do twarjenjow. W nimaj přepytachu wšitke rumnosće a pokradnychu dohromady wjacore stow eurow. Nimo toho wzachu domjacu nadobu w hódnoće něhdźe 600 eurow sobu. Na woknje nasta dalšich 50 eurow škody.
Policija (20.05.22)
Ćežko zranjeny mopedist
Pančicy-Kukow. Na statnej dróze S 100 mjez Pančicami-Kukowom a Hlinowcom při křižowanišću Jawora-Miłoćicy je wčera popołdnju mopedist znjezbožił. Młodostny bě ze swojej Simson z Jawory do směra na Miłoćicy po puću. Jako chcyše na křižowanišću zastać, poča so při borzdźenju na spliće suwać a zrazy do napřećo jěduceho Audija. Młodostneho dowjezechu do chorownje, šofer a sobujěduca Audija so njezraništaj. Dźesać kameradow Pančičansko-Kukowskeje wohnjoweje wobory su městno njezboža zawěsćili.
Policija (19.05.22)
Šmóraka grafitijow lepili
Budyšin. Na Budyskej Židowskej su policisća regionalneho rewěra wutoru po pokiwach lepili šmóraka grafitijow. 16lětny młodźenc němskeho pochada měješe z barbu pomazanej ruce. Wón bě do toho drje wjacore jězdźidła, sćěny a milinowe kašćiki z barbu napryskał. Nastata škoda wučinja něhdźe 10 000 eurow. Nětko so kriminalna słužba z padom zaběra.
Policija (18.05.22)
Napity po puću był
Budyšin. Na Mosće měra w Budyšinje je policistam póndźelu rano wokoło pjećich napadnył šofer wosoboweho awta. 66lětny je, wodźo awto marki Audi, napity po puću był. Po tym, zo běchu jeho zastojnicy zadźerželi, su jeho na alkohol testowali. Při tym zwěsćichu zastojnicy pola šofera němskeho pochada 0,64 promilow. Na to zakazachu mužej dalejězbu a napisachu wozjewjenku.
Kolesowar znjezbožił
Wojerecy. Na zbožo bu kolesowar jenož lochko zranjeny, jako je wčera we Wojerecach znjezbožił. Popołdnju wokoło třoch zawiny 83lětny šofer awta typa Seat z měšćanskich wikow z Kinajchtskeje dróhi na statnu dróhu S 108. Při tym je po wšěm zdaću 70lětneho kolesowarja přewidźał a direktnje do njeho zrazył. Po zražce dowjezechu kolesowarja, kiž bu lochko zranjeny, do chorownje. Wěcna škoda na awće a na kolesu wučinja dohromady tysac eurow.
Policija (17.05.22)
Njeznaći su značku pokradnyli
Budyšin. Na Dwórnišćowej w Budyšinje su dotal njeznaći wot policajskeho awta zadnju značku pokradnyli. Awto typa VW běše njedźelu w nocy před policajskim rewěrom parkowane. Hódnota pakosćeneje znački wučinja 30 eurow. Zastojnicy su DNA-slědy zwěsćili a chłostajomny skutk wozjewili. Kriminalna słužba rewěra budźe so dale z podawkom zaběrać.
Do nakładneho awta zrazyła
Wóspork. Na S 112 njedaloko Wósporka stej wčera dopołdnja wosobowe awto typa VW a nakładne awto hromadu prasnyłoj. 49lětna wodźerka Polo jědźeše w křiwicy z dotal njeznatych přičin runjewon a prasny do nakładneho awta typa Volvo. 55lětny šofer bu lochko zranjeny. Žonu dyrbjachu z ćežkimi zranjenjemi do chorownje dowjezć.
Wosa njezbožo zawiniła
Čorny Chołmc. Na S198 njedaloko Čorneho Chołmca je šofer awta marki Seat njedźelu nawječor do wobchadopřewodneho stołpa prasnył. Přičina za to bě wosa, kotruž bě wón spytał z jězdźidła wuhnać.
Policija (16.05.22)
Bjez zawěsćenja po puću
Horni Wujězd. Policistam bě sobotu nawječor mały transporter na awtodróze A4 napadnył, kiž bě do směra na Zhorjelc jěł. Z njeho wisachu dźěle jězdźidła dele. Zastojnicy su 49lětneho pólskeho staćana w Hornim Wujězdźe napominali, z awtodróhi wotjěć. Tam kazachu šoferej njedostatki na awće marki VW wotstronić. Při kontroli zwěsćichu, zo njebě wozydło zawěsćene. Tuž šoferej dalšu jězbu, njewobkedźbowanja winowatostneho zakonja k zawěsćenju dla, zakazachu.
Bjez jězbneje dowolnosće
Malešecy. Zastojnicy policajskeho rewěra Budyšin su w nocy na njedźelu, krótko do połnocy kontrolowali wobchad w Malešecach na Hućinjanskej krajnej dróze. Při tym su zadźerželi 39lětnu šoferku wosoboweho awta marki Ford. Žona bě bjez jězbneje dowolnosće po puću była. Test na drogi pokaza na wužiwanje amfetaminow. Za jězbu pod wliwom drogow ma šoferka z pokutu we wysokosći 500 eurow a z dwěmaj dypkomaj we Flensburgu ličić. Nimo toho njesmě na jedyn měsac jězdźidło wodźić. Přidatnje ma z chłostanskim jednanjom ličić.
Pod wliwom alkohola jěł
Policija (13.05.22)
Njeprošeny žnjenski pomocnik
Hory. Za čas hromakoweje sezony so po wšěm zdaću tež paduši za tule wosebitu zeleninu zajimuja. Wčera rano su tajkeho njeprošeneho žnjenskeho pomocnika pola Horow blisko Wojerec lepili. Pólny dźěłaćer bě jeho wuhladał a policiju informował. 41lětny skućićel bě sej hižo hromak w hódnoće 30 eurow na bok połožił. Nětko změje so wón padustwa dla zamołwić.
Policija (12.05.22)
Po wohenju do chorownje
Brětnja. K hašenju wohenja w kuchni su předwčerawšim 26 wobornikow do Brětnje wołali. 83lětna žona bě butru zeškrěła a potom na hornc zabyła. Płomjenja rozpřestrěchu so hač pod třěchu, wobornicy pak je spěšnje zhašachu. Rentnarku a jeje 81lětneho mandźelskeho dowjezechu do chorownje.
