Policija (07.06.22)
Při telefonje wobšudźili
Wojerecy. 37lětny muž z Wojerec je so minjeny dny z woporom telefonowych wobšudnikow stał a dźěl swojich nalutowanych pjenjez zhubił. Njeznaty bě so při telefonje jako sobudźěłaćer banki wudawał a zdźělił, zo bu z konta 37lětneho wjace hač 2 400 eurow wotknihowanych. Z tajnym čisłom, tak mjenowanej TAN móhł Wojerowčan wobkrućić, zo so suma zaso na jeho konto wróći. Do toho muž přizwoli. Z tym pak buchu pjenjezy hakle z jeho konta wotknihowane. Bórze na to so cuzy při telefonje znowa přizjewi a chcyše mějićela konta wospjet k přepokazanju pohnuć. Do toho wšak tón hižo njepřizwoli a informowaše policiju, dokelž bě drje pytnył, zo bu wobšudźeny.
Policija (02.06.22)
Njezbožo wosy dla
Łuty. Wosy w swojim awće dla so 54lětny wodźer Opela předwčerawšim we Łutach prawje na wobchad koncentrować njemóžeše. Insekt bě so na mjezwočo muža sydnyło. Jako chcyše wón jeho wućěrić, zajědźe přez wobchadnu kupu. Na wobchadnym znamjenju a awće nasta dohromady 16 000 eurow škody.
Policija (01.06.22)
Traktor do přirowa zajěł
Pančicy-Kukow. W přirowje skónčiła je so jězba młodeho traktorista předwčerawšim z Pančic-Kukow do směra na Wotrow. Na wokrjesnej dróze K9238 zajědźe 31lětny z dotal njeznateje přičiny na prawy bok jězdnje a skónčnje do přirowa. Traktorist so snadnje zrani. Škoda na jězdźidle wučinja něhdźe 11 000 eurow.
Do busa zrazyła
Malešecy. Dokelž njeje předjězbu wobkedźbowała, je 78lětna žona předwčerawšim w Malešecach z kolesom wotboka do busa zrazyła a so snadnje zraniła. Škoda na kolesu wučinja 250 eurow.
Policija (31.05.22)
Kolesa pokradnyli
Lejno. Při Lejnjanskim jězoru běchu minjeny kónc tydźenja paduši kolesow po puću. W Lejnom (Geierswalde) su njeznaći w nocy na njedźelu dohromady tři kolesa typa Giant w cyłkownej hódnoće 3 500 eurow pokradnyli. Kolesa słušeja dowolnikam, kotřiž so tam kónc tydźenja wočerstwichu. Wojerowscy policisća pad přepytuja.
Policija (30.05.22)
We wikowanišću so kuriło
Bělšecy. Krótko do připołdnja informowachu sobotu integrowanu wuchowansku dispatcharnju wo kurje na terenje twaršćiznoweho wikowanišća w Bělšecach (Ebendörfel). K hašenju přijědźechu wobornicy z Rašowa (Rascha), Bělšec a Budestec (Großpostwitz). Pod twarskim kontejnerom wuhladachu so palace drjewjane třěški. Kameradojo wšitko zhašachu a tomu zadźěwachu, zo płomjenja na bliski skład a wjacore jězdźidła přeskočichu. Policija nětko přepytuje, hač je snano něchtó naspomnjene drjewjane třěski wotpohladnje zapalił.
Policija (27.05.22)
Woheń zamiškrić spytali
Budyšin. Njeprošeny wopyt mějachu w nocy na srjedu pola rentoweho zawěsćerja, kiž ma swoje rumnosće na Budyskej Kamjentnej hasy. Tam su so njeznaći namócnje zadobyli a wjacore rumnosće za hódnotnymi wěcami přepytali. Skónčnje zamiškrichu tež hišće woheń. Na zbožo pak so jenož dymješe a płomjenja so dale njerozpřestrěchu. Zapalerjo wzachu laptop, tak mjenowanu dockingowu staciju kaž tež kompjuterowej wobrazowce sobu. Hódnota rubizny wučinja po informacijach policije něhdźe 1 200 eurow.
Policija (25.05.22)
Při přizemjenju znjezbožił
Kamjenc. 83lětny pilot ultralochkeho lětadła je wčera dopołdnja na Kamjenskim lětanišću znjezbožił a so snadnje zranił. Muž bě z mašinu typa Eurostar z Berlina do Kamjenca lećał. Jako bě w Lessingowym měsće hižo zaso na zemi, je so jemu po wšěm zdaću zmylk stał, tak zo mašina z prědnim dźělom doprědka padny. Wuchowanske mocy so wo rentnarja starachu. Zastojnicy wobchadneje policajskeje inspekcije přewzachu prěnje přepytowanja. Kelko škody je při njezbožu nastało, njeje znate.
Policija (24.05.22)
Pokradnjene koło w interneće
Wojerecy. Ze swojej kedźbnosću staj mandźelskaj we Wojerecach přinošowałoj, paducha kolesa dosahnyć. Pola eBay pytaštaj wonaj za nowym kolesom. Jako běštaj kmane žonjace marki Giant namakałoj, daštaj ramikowe čisło najprjedy wot policije přepruwować. Kaž so wukopa, bu poskićene koleso minjeny tydźeń we Wojerecach pokradnjene. Policija za nim hižo pytaše. Město mandźelskeju jědźechu nětko policisća k wučinjenemu přepodaću. Tam zetkachu 30lětneho znateho – a pytane koleso. W bydlenju a pincy podhladneho namakachu dalše wěcy, kotrež běchu po wšěm zdaću pokradnjene, mjez druhim wšelki grat.
52 km/h přewjele
Ottendorf-Okrilla. 172 km/h bě rekord při kontroli spěšnosće w nocy na póndźelu na awtodróze A 4 pola Ottendorfje-Okrilli. Dowolenych je tam 120 km/h. Wodźer pólskeho Citroëna ma nětko 320 eurow pokuty płaćić a njesmě jedyn měsac žane awto wodźić. Při kontroli bě dohromady 85 wodźerjow přespěšnych.
Policija (23.05.22)
Paduši so zadobyli
Łaz. Hnydom do dweju jednoswójbneju domow su so njeznaći minjeny kónc tydźenja we Łazu zadobyli. Kaž policija rozprawja, dóstachu so w nocy na sobotu, přez wokno respektiwnje zymsku zahrodu, do twarjenjow. W nimaj přepytachu wšitke rumnosće a pokradnychu dohromady wjacore stow eurow. Nimo toho wzachu domjacu nadobu w hódnoće něhdźe 600 eurow sobu. Na woknje nasta dalšich 50 eurow škody.
Policija (20.05.22)
Ćežko zranjeny mopedist
Pančicy-Kukow. Na statnej dróze S 100 mjez Pančicami-Kukowom a Hlinowcom při křižowanišću Jawora-Miłoćicy je wčera popołdnju mopedist znjezbožił. Młodostny bě ze swojej Simson z Jawory do směra na Miłoćicy po puću. Jako chcyše na křižowanišću zastać, poča so při borzdźenju na spliće suwać a zrazy do napřećo jěduceho Audija. Młodostneho dowjezechu do chorownje, šofer a sobujěduca Audija so njezraništaj. Dźesać kameradow Pančičansko-Kukowskeje wohnjoweje wobory su městno njezboža zawěsćili.
