Policija (23.11.20)
Awto skóncowali
Kamjenc. Złu překwapjenku dožiwi sobotu rano 20lětna wobsedźerka Fiata Panda w Kamjencu. Wječor do toho bě wona swoje jězdźidło něhdźe w 22 hodź. na Njebjelčanskej dróze wotstajiła. W nocy běchu njeznaći wobě kolesy na prawym boku překłóli a na motorowej hawbje 30 centimetrow dołhu šmaru zawostajili. Wěcnu škodu trochuja na něhdźe 300 eurow.
Policija (20.11.20)
Pokradnjene awto w lěsu stało
Sepicy. Při wuchodźowanju w lěsu pola Sepic je žona minjenu wutoru awto wuhladała. Najprjedy sej wona při tym ničo njemysleše, dokelž bě při jězdźidle marki Audi muž, kiž so jako policist wudawaše. Nazajtra na pokutnym dnju so žona tola rozsudźi, swoje wobkedźbowanje policiji zdźělić. Na to so wukopa, zo běchu njeznaći awto wutoru popołdnju w Złym Komorowje pokradnyli. Z pomocu hajnika móžachu je z lěsa wućahnyć.
Do wobchoda so zadobyć chcył
Budyšin. Wosrjedź swětłeho dnja je so předwčerawšim připołdnju njeznaty do wobchoda na Budyskej Šulskej hasy zadobyć spytał. Poradźiło pak so jemu to njeje. Přiwšěm nasta něhdźe 2 000 eurow wěcneje škody, kaž Zhorjelska policajska direkcija zdźěli.
Policija (19.11.20)
Do piwoweje zahrody prasnył
Němske Pazlicy. Na trochu hinaše wašnje do korčmy załožił je w nocy na srjedu 24lětny wodźer VWja w Němskich Pazlicach. Přijěwši z Pěskečanskeho směra z přewulkej spěšnosću do wsy wón w lěwej křiwicy swój Polo hižo pod kontrolu njeměješe a přerazy płót piwoweje zahrody wjesneho hosćenca. Młody muž a jeho 19lětna sobujěduca so při njezbožu ćežko zraništaj, tak zo dyrbjachu jeju do chorownje dowjezć. Skóncowane jězdźidło hišće w nocy z piwoweje zahrody zběhnychu a wotwlečechu. Pola 24lětneho šofera naměrichu 0,45 promilow alkohola w kreji.
Policija (17.11.20)
Wjacore delikty naraz
Budyšin. Předwčerawšim připołdnju je 35lětny wodźer Forda na Budyskej Listowej před policiju ćěkał. Ta z awtom za nim smaleše a spěšnje přičinu jeho zadźerženje zwěsći. Němski staćan scyła žanu jězbnu dowolnosć njeměješe a steješe nimo toho po wšěm zdaću pod wliwom drogow. Wotpowědny test reagowaše mjenujcy pozitiwnje na amfetaminy. W awće namakachu policisća snadne mnóstwo drogow. Na to dyrbješe młody muž krej „darić“. Wón změje so nětko mjez druhim jězdźenja bjez dowolnosće a jězdźenja pod wliwom drogow dla na sudnistwje zamołwić.
Policija (16.11.20)
W kuchni so paliło
Bronjo. Wuchowanske mocy, wohnjowu woboru a policiju wołachu sobotu dopołdnja do Bronja, dokelž bě w kuchni bydlenskeho domu woheń wudyrił. 73lětna žona chcyše tam butru škrěć. Najskerje je wona na pónoj zabyła, tak zo poča so ta palić. Na zbožo so nichtó njezrani. Wěcna škoda pak wučinja něhdźe 1 000 eurow.
Na awto jeja mjetali
Radeberg. Překwapjenku hinašeho razu dožiwi 25lětny wodźer BMWja sobotu wječor w Radebergu. Na jeho parkowane jězdźidło mjetachu njeznaći něhdźe 30 jejow a sypnychu na nje nimo toho hišće tójšto konfetija. Wěcna škoda žana njenasta, policija pad přiwšěm přepytuje.
Policija (13.11.20)
Pjenježny transporter přewodźeli
Słona Boršć. Njewšědny nadawk měješe policija předwčerawšim na awtodróze A 4 mjez Hornim Wujězdom a Słonej Boršću. Tam je so awto wěstotneje firmy, z kotrymž pjenjezy transportowachu, skóncowało, tak zo dyrbjachu wotwlečenske předewzaće wołać. Samo na sebi njeje to ničo wosebite. Dokelž pak bě w transporteru wjetše mnóstwo pjenjez, staraše so policija wo wěsty wotběh. Skóncowane awto wotwlečechu hač k awtodróhowemu wotpočnišću. Tam su pjenjezy do dalšeju jězdźidłow firmy překładowali.
Policija (12.11.20)
Spěšnosć měrili
Njebjelčicy. Na statnej dróze S 94 pola Njebjelčic su předwčerawšim připołdnju spěšnosć měrili. Na njezbožowym ćežišću kontrolowachu zastojnicy 1 700 jězdźidłow. 27 šoferow bě tam spěšnišich hač dowolenych 70 km/h. Wosomnaćo maja warnowanje płaćić, dźewjećo pokutu. Najspěšniši jědźeše ze 106 km/h nimo błyskača. Wón dóstanje nimo pjenježneho chłostanja tež hišće dypki w Flensburgu a dyrbi chwilu nóžkować.
Policija (11.11.20)
Wjele škody načinili
Wojerecy. Njewšědne městno za padustwo su sej njeznaći minjeny kónc tydźenja we Wojerecach wupytali, zadobywši so do bywšeje wotnožki banki na Hasy Liselotty Herrmann. Po informacijach policije skóncowachu woni w twarjenju wšelake twarske dźěle. Nimo toho roztřihachu kable a rozrězachu roły. Pokradnyli su alarmowu připrawu w hódnoće 100 eurow. Načinjena wěcna škoda porno tomu wučinja něhdźe 20 000 eurow. Policija pad přepytuje.
Policija (10.11.20)
Wandalojo zachadźeli
Budyšin. Tójšto wěcneje škody su njeznaći minjene dny na twarjenju na Otta Nagelowej w Budyskej Strowotnej studni načinili. Wandalojo rozbichu tam dohromady jědnaće woknow a skóncowachu nimo toho wonkownu lampu. Rozměr škody je něhdźe 4 000 eurow, kaž policija zdźěli. W bliskosći wobškodźichu w nocy na njedźelu informaciskej kašćikaj a wobswětlenje schodow. Wěcna škoda wučinja tule 400 eurow.
Lkw-je njedźelu po puću byli
Budyšin. Štyri nakładne awta je policija předwčerawšim na awtodróze A 4 lepiła. Šoferojo běchu zakaz njedźelneho jězdźenja ignorowali.
Policija (09.11.20)
Trik bjezmała fungował
Běła Woda. Wjacore razy su njeznaći minjene dny spytali, z koronowej wariantu tak mjenowaneho wnučkoweho trika ludźom pjenjezy wulišćić. W jednym padźe by to nimale fungowało. Tak je w Běłej Wodźe cuzy muž staršu žonu zazwonił a so jako jeje syn wudawał. Pječa bě so wón z koronu natyknył a rjekny jej, zo leži ćežko chory w chorowni. Za pozdatny medikament trjebaše wón wjetšu sumu pjenjez, kotruž chcyše žona na bance wotzběhnyć. Hakle sobudźěłaćerka pjenježneho instituta tomu zadźěwa a žonu před wjetšej škodu zachowa. Policija před tajkim trikom wuraznje warnuje.
