Policija (21.01.21)
Wobšudnistwo při telefonje
Hodźij. Sobudźěłaćerka Hodźijskeje tankownje je so předwčerawšim z woporom wobšudnika stała. Při telefonje wudawaše so muska wosoba jako serwisowy sobudźěłaćer. Wón přistajenej kazaše, zo měła jemu čisła we wobchodźe tankownje na předań poskićenych dobropisnych kartow podać. To je wažne, tak muž při telefonje žonje dale napowěda, zo móhli sumy aktualizować. Po tychle instrukcijach so sobudźěłaćerka měješe a njeznatemu jednotliwe čisła telefonisce poda. Kaž Zhorjelska policajska direkcija zdźěli, nasta tankowni na te wašnje něhdźe 900 eurow škody. Budyska kriminalna słužba pad nětko přepytuje. Policija wuraznje před tym warnuje, čisła tajkich dobropisnych kartow cuzym přez telefon přeradźić.
Policija (20.01.21)
Dwójce błyskali
Prěčecy. Dodźerženje maksimalneje spěšnosće 50 km/h su předwčerawšim dopołdnja w Prěčecach kontrolowali. 14 přespěšnych šoferow při tym lepichu. Zwjetša wosta při warnowanju, jenož jenički změje pokutu płaćić. dokelž błysknychu jeho z 78 km/h. Samsny dźeń popołdnju natwarichu policisća swoje nastroje w Błohašecach. Tam bě wot 865 jězdźidłow 16 přespěšnych. Rekord docpě Budyski Opel z 81 km/h.
Policija (19.01.21)
Lulu zaso w zwěrjencu
Běła Woda. Njewšědny pad padustwa, kiž bě so loni w awgusće w Běłowodźanskim zwěrjencu stał, je nětko wujasnjeny. Tehdy běchu so tam njeznaći zadobyli a nukla Lulu pokradnyli. Sančka měješe runje młodźata a njemóžeše je na to hižo zastarać. Na zbožo to sobudźěłaćerjo pytnychu, tak zo małe nukle přežiwichu. Lulu pak bě najprjedy raz fuk. We wobłuku přepytowanjow koncentrowachu so kriminalisća na 21lětneho muža a 22lětnu žonu. Na přikaz sudnistwa přepytachu minjeny pjatk jeju bydlenje, hdźež su pokradnjenu sančku namakali. Sobudźěłaćerka zwěrjenca ju cyle jasnje jako Lulu identifikowaše a móžeše ju wša zbožowna sobu wzać.
Policija (18.01.21)
Paduši na pohrjebnišću pobyli
Budyšin. Nic zemrětych přiwuznych wopytać, ale kradnyć bě wotpohlad njeznatych, kotřiž pobychu minjeny pjatk na Budyskim Michałskim pohrjebnišću při Mužakowskej dróze. W žarowanskej hali wotšrubowachu woni tři zapinaki swěcy a dwaj nastrojej, na kotrymajž wisa nuznikowa papjera. Nimo toho wobškodźichu na mužacym nuzniku durjowu ručicu a špihelowe wobswětlenje. Kelko škody je dohromady nastało, dotal znate njeje.
Policija (15.01.21)
Njewšědne postupowanje
Huska. Mjez Mjedźojzom (Medewitz) a Huskej (Gaußig) je so wčera popołdnju wobchadne njezbožo stało. Opel Astra suny so na hładkej dróze z jězdnje a zrazy na prawym boku dróhi do štoma. Šofer pak jědźeše z wobškodźenym awtom dale hač na parkowanišćo w Husce. Hakle tam zawoła wuchowansku słužbu, wohnjowu woboru kaž tež policiju. Po prěnich informacijach su so tři wosoby při njezbožu zranili, kak ćežko, dotal znate njeje. Awto je po zdaću dospołnje skóncowane. Sobujěduceho bě štom wotboka trjechił.
Policija (14.01.21)
Šofer nětko pěšk
Budyšin. Na Wojerowskej dróze w Budyšinje je tempo 50 km/h dowolene. Měrjerjo spěšnosće su tam wutoru pjeć hodźin dołho wobchad kontrolowali. Z něhdźe 1 540 jězdźidłow bě 77 přespěšnje po puću. 67 šoferam wuprajichu zastojnicy porok, dźesaćo dyrbja z pjenježnej pokutu ličić. Wodźer Škody z Budyskej značku bě z 98 km/h najspěšniši. Wón budźe přichodny čas směć pěši po puću być.
Nakładne awto z puća zjěło
Nadźanecy. Wutoru wječor je nakładne awto, kotrež bě na zwjazkowej dróze B 156 w Budyskim měšćanskim dźělu Nadźanecy po puću, z jězdnje zjěło. W křiwicy dolěwa suny so Lkw na prawy bok puća a přejědźe wjacore nabóčne planki a štomy. Na skłoninje zwróći so nabok. Čěski šofer so njezrani, nastała pak je wulka wěcna škoda něhdźe 50 000 eurow. Wohnjowa wobora dyrbješe wobškodźene štomy podrězać. Nakładne awto bu wotwlečene.
Paduši wuspěšni byli
Policija (13.01.21)
Zawlečenje inscenowane było
Budyšin. Inscenowane zawlečenje je pjeć ludźom w Sakskej hněw z policiju wobradźiło. Kaž rěkaše, bu póndźelu při Budyskej tankowni młoda žona do awta zawlečena, na čož šofer z wulkej spěšnosću wotjědźe. 22lětny přećel žony informowaše policiju a je sam ćěkacych přesćěhał. Policija zamó jich zadźeržeć. Štož zastojnicy słyšachu, bě chětro njewšědne, a woni spěšnje zapřimnychu, zo bě zawlečenje jenož inscenowane. Žona chcyše sej tak prawdźepodobnje dopokaz lubosće přećela wunuzować. Wobdźěleni maja nětko z přizjewjenjom znjewužiwanja nuzoweho telefonata kaž tež zranjenja škitnych naprawow korony dla ličić.
Padustwu zadźěwał
Rychwałd. Dźakowano pokiwej wobydlerja je policija njedźelu wječor njedaloko Rózborka padustwu kolesoweho nakładowaka zadźěwała. Swědk bě so nócneje jězby Lkw-ja dla dźiwał. Jako jón zastojnicy zadźeržachu, sedźeše za wodźidłom 32lětny Polak, kiž bě awto po wšěm zdaću krótko do toho pokradnył.
Wopity ćeknył
Policija (12.01.21)
Zhromadźenje dowolene było
Holešow. Njedźelu dopołdnja běchu so na wjacorych městnach zwjazkoweje dróhi B 96 ludźo zhromadźili. W Budyskim policajskim rewěrje zličichu něhdźe 40 wosobow. Pjatnaćo su so we Wuhančicach-Koblicy zhromadźili. Jeničce w Holešowje a Žitawje bě tajka zhromadźizna dowolena. Na žanym městnje pak njezwěsćichu zastojnicy někajke zranjenje postajenjow korony dla.
Policija (11.01.21)
Z Kretschmerom diskutowali
Wulki Šunow. Njedźelu dopołdnja je skupina něhdźe 30 ludźi před priwatnej ležownosću sakskeho ministerskeho prezidenta Michaela Kretschmera (CDU) we Wulkim Šunowje demonstrowało. Kretschmer, kiž w tym času tam přebywaše, je z nimi woměrje diskutował. Wjetšina wobdźělenych měješe nahubnik, často pak trěbny wotstawk njedodźeržachu. Zastojnicy policije zwěsćichu wosobinske daty někotrych demonstrantow. Zdobom pruwuja, hač su so wobdźělnicy přećiwo prawu zhromadźowanja přešli.
Awta bjez kolesow
Budyšin. Njeluboznu překwapjenku dožiwił je wobsedźer Audija A 4 sobotu dopołdnja w Budyšinje. Jeho awto steješe na parkowanišću na cyhelach a bjez kolesow. Zastojnicy Budyskeje policije pak móžachu jemu zdźělić, zo běchu zastojnicy zwjazkoweje policije w nocy na awtodróze A 4 we wosobowym awće marki Renault kolesa jeho awta namakali. Šofer běše 28lětny Polak.
Policija (08.01.21)
Postajenja kontrolowali
Budyšin/Zhorjelc. Policija je wčera we wokrjesomaj Budyšin a Zhorjelc kontrole nastupajo korona-postajenja přewjedła. Při tym zwěsći 70 přeńdźenjow wukaza. Wjace hač sto zastojnikow bě we wobłuku kontrolow zasadźenych.
Demonstrowacych napominali
Budyšin. Na Budyskim Mosće měra je policija wčera zwěsćiła njepřizjewjene zhromadźenje. Něhdźe 25 wobdźělnikow z transparentami a swěčkami drje měješe nahubnik a dźeržeše so na postajeny wotstawk. Přiwšěm pak wobsteješe podhlad, zo njejsu zakoń wo zhromadźowanju wobkedźbowali.
