Policija (04.11.20)
Solarny panel sobu wzali
Wulke Ždźary. Njewšědnu rubiznu běchu sej njeznaći skućićeljo w nocy na póndźelu při Hórnikečanskim jězoru blisko Wulkich Ždźarow wupytali. Na tamnišim wulkotwarnišću pokradnychu woni solarny panel. Kaž policija zdźěli, dodawaše tónle nastroj trěbnu milinu za měrjensku techniku, kotraž je na tamnišich nasypnišćach instalowana. Paduši pak njejsu jeničce solarny panel w hódnoće něhdźe 2 500 eurow sobu wzali, ale tež hišće bateriju, kaž w policajskej rozprawje rěka.
Policija (03.11.20)
Žně wotedać dyrbjał
Ćisk. Štóž něšto plahuje, wjeseli so na žně. Tomu bě tež w padźe 61lětneho muža w Ćisku tak. Problematiske bě, zo je wón konop plahował, štož njeje dowolene. Přiwšěm je wón předwčerawšim dopołdnja swoje rostliny žnjał a hižo na připowěšak składował, jako policija přijědźe a wšitko sćaza. Po wšěm zdaću běchu zastojnicy wot někoho wotpowědny pokiw dóstali. Muž změje so nětko ilegalneho plahowanja drogow dla zamołwić.
Policija (02.11.20)
Do Lkw-ja zrazyła
Kulowc. Wšo druhe hač rjany bě minjeny pjatk zazběh do kónca tydźenja za 34lětnu žonu w Kulowcu. Wona bě na statnej dróze S 95 do směra na Wojerecy po puću, jako ze swojim wosobowym awtom typa Toyota z dotal njeznateje přičiny na lěwy bok jězdnje zajědźe. Tam prasny wona do napřećo jěduceho beton měšaceho nakładneho awta a wosta hakle při muri chěže stejo. Přiwołani wohnjowi wobornicy žonu z jeje jězdźidła wuswobodźichu. Wěcna škoda wučinja po informacijach Zhorjelskeje policajskeje direkcije něhdźe 12 500 eurow.
Policija (30.10.20)
Wjacorych ludźi zranił
Budyšin. Při rozestajenjach je předwčerawšim 43lětny muž w Budyšinje wjacore wosoby zranił. Najprjedy da so Libyčan na Žitnych wikach do 28lětneho a jeho zrani. Policija zwěsći pola wobeju wjace hač promil alkohola w kreji. Pozdźišo bě 43lětny na rozkorje na Wonkownej Lawskej wobdźěleny a tam dweju 16lětneju a 20lětneho zrani. Swědk zazwoni policiju a zranjenym pomhaše. Jednoho z nich dowjezechu do chorownje.
Policija (29.10.20)
Doma drogi plahował
Wojerecy. Dokelž bě hudźba w susodstwje jara wótře, wołachu předwčerawšim policiju na Wojerowsku Schweitzerowu. Tam 42lětny slubi, zo budźe nětko měr. Wospjetne telefonaty ludźi wšak swědčachu wo napřećiwnym. Tónraz pak muž njewočini, tak zo dyrbješe policiji klučowa słužba pomhać. W bydlenju namakachu 300 gramow konopje a samo natwarjenu plahowansku staciju drogow. Policisća wšitko sćazachu, mjez druhim tež strašny nóž. Sudniske jednanje slěduje.
Policija (28.10.20)
Dwójce z drogami
Běła Woda. Hnydom dwójce je 18lětny wodźer motorskeho w nocy na wutoru policistam Běłowodźanskeho rewěra napadnył. Najprjedy lepichu jeho w Běłej Wodźe a zwěsćichu, zo steješe pod wliwom drogow. Młodostny dyrbješe krej wotedać a njesmědźeše dale jěć. Lědma dwě hodźinje pozdźišo pak samsne motorske policistam w Trjebinje napřećo přijědźe a znowa bě drogowy test pozitiwny. Tónraz kluč sćazachu.
Policija (27.10.20)
Municiju město hribow namakał
Sepicy. Nadźijejo so prawje rjanych eksemplarow so tele dny něchtóžkuli do lěsa poda, zo by hriby pytał. Předwčerawšim popołdnju chcyše sej tež muž w Sepicach (Schwepnitz) někotre nazběrać. Njemało pak so wón dźiwaše, jako před swojimaj nohomaj nadobo wjacore granaty a kartuše ležachu. Fachowcy namakanku wotstronichu.
E-bike z pincy fuk
Wojerecy. Z pincy wjacebydlenskeho domu we Wojerecach su njeznaći w nocy na njedźelu e-bike marki Winora Sima pokradnyli. Brune koleso ma hódnotu něhdźe 2 300 eurow.
Policija (26.10.20)
Kabl hižo přihotowany měł
Rowno. Něhdźe 500 metrow milinoweho kabla w hódnoće něhdźe 20 000 eurow chcyše 36lětny muž w nocy na sobotu w Rownom kradnyć. Kabl bě wón hižo do krótšich kruchow rozrězał. Po awtomatiskim alarmje pak muž najprjedy ćekny. Z pomocu helikoptera jeho za štomom schowaneho lepichu a zajachu.
Policija (23.10.20)
Wotpadki wotbyć chcyła
Brězowka. Swědk wobkedźbowaše srjedu při Brězowčanskim jězoru, kak chcyše žona runje štyri měchi połne wotpadkow ilegalnje wotbyć. Wón zazwoni policiju. Zastojnicy zwěsćichu w awće 65lětneje dalši měch. Žona dyrbješe wšitko zaso sobu wzać a změje so za to zamołwić.
Policija (22.10.20)
Młodostny trójce napadnył
Wojerecy. Z njepowučomnym paduchom dyrbješe so předwčerawšim policija we Wojerecach hnydom trójce w běhu popołdnja zaběrać. 18lětneho lepichu najprjedy we wobchodźe na Curiejowej, hdźež chcyše žiwidła za dwaj euraj spakosćić. Hodźinu pozdźišo měrješe so wón w kupnicy na Łužiskim naměsće na słódčizny za dwaj euraj. Něhdźe we 18 hodź. młodostny znowa na Łužiskim naměsće napadny, dokelž spytaše chipsy a napoje za 13 eurow pokradnyć.
