Policija (04.03.21)
Dźak sobudźěłaćerce
Wojerecy. 67lětny Wojerowčan chcyše 18. februara w lutowarni 25 000 eurow ze swojeho konta wotzběhnyć. Sobudźěłaćerka pak dwělowaše na tym, zo chce dotal njeznata žona do Němskeje přilećeć a z mužom so spřećelić. Wón drje steješe emocionalnje pod ćišćom. Dokelž skutkowaše nimo toho zamyleny, je přistajena financneho instituta hnydom policiju informowała. Ta dźakowaše so bankownicy nětko z małym darom.
Do dźěla puknjeneje wobruče zajěł
Słona Boršć. Na awtodróze A 4 mjez Słonej Boršću a Wujězdom je wutoru wječor 53lětny šofer awta marki Opel zajěł do dźěla wobruče, kotryž bě Lkw tam zhubił. Na Opelu nasta škoda něhdźe 2 500 eurow. Policija pyta za dotal njeznatym nakładnym awtom a za swědkami.
Policija (03.03.21)
Motorske znjezbožiło
Budyšin. Na Budyskej Walskej je wčera popołdnju k njezbožu dóšło. Dwě wosobje so při tym zraništej, a dyrbjachu jej do chorownje dowjezć. Wokoło 15 hodź. bě tam motorske do Opela Astra zajěło. Wosobowe awto so snadnje wobškodźi. Dróha bě něhdźe třištwórć hodźiny dospołnje zawrjena.
Policija (02.03.21)
Mlóčnu kapalinu we wodźe našli
Hornja Kina. Policija pyta za zanjerodźerjom wody. Zańdźenu sobotu běchu wohnjowi wobornicy w Hornjej Kinje na Ericha Klausnitzerowej mlóčnu kapalinu we wódnišću našli. Nablaku wutworichu tam wolijowu zawěru, zo njeby so maćizna dale wupřestrěła. Wobswětowy zarjad so z naležnosću dokładnišo zaběra.
Policija (01.03.21)
Šofer transportera ćežko zranjeny
Prěčecy. Wodźer małotransportera marki Opel Vivaro je wčera rano, krótko po sedmich na awtodróze A 4 krótko před Prěčecami do směra na Drježdźany znjezbožił. 21lětny muž němskeho pochada jědźeše krótko do mosta nad S 100 na zelenišća a přełama płót za dźiwinu. Opel přejědźe prěkowacu statnu dróhu S 100 a zwróći na jeje prawym boku na polo, při čimž so ćežko zrani. Z helikopterom dowjezechu jeho do Drježdźanskeje kliniki. Transporter so dospołnje skóncowa. Dźiwinowy płót bě po dołhosći połsta metrow wobškodźeny. Cyłkowna škoda wučinja něhdźe 30 000 eurow. S 100 běše za čas zastaranja zranjeneho kaž tež rumowanja dospołnje zawrjena.
Policija (26.02.21)
Mercedes pokradnjeny był
Budyšin. Zastojnicy zhromadneje slědźenskeje skupiny Budyšin su na awtodróze A 4 kontrolowachu wčera šofera awta. Z podpěru zwjazkoweje policajskeje patrulje wodźachu woni wodźerja Mercedesa Benz přez Limaski tunl na parkowanišćo Wiesaer Forst. Spočatnje bě 26lětny přikaz sćěhował, nadobo pak spyta z awtom do směra na polo ćeknyć. Škitny płót za dźiwinu tomu zadźěwaše. Na to muž pěši dale ćěkaše. Krótko po tym pak jeho policija zaja. Po zdaću w Badensko-Württembergskej pokradnjene jězdźidło je wjace hač 40 000 eurow drohe. Wěcna škoda wučinja něhdźe 3 500 eurow.
Policija (25.02.21)
Młodostny holcomaj hrozył
Budyšin. Na Tuchorskej w Budyšinje je předwčerawšim, wutoru, młodostny dwě młodostnej, pozdatnje jeju pochada dla, křiwdźił. Holcy w starobje 16 a 17 lět stej so na busowym zastanišću wadźiłoj. Tam tohorunja přebywacy młodostny jej křiwdźeše a jimaj samo hrožeše, poćahujo so při tym na jeju nabožny wonkowny napohlad. Statny škit naležnosć nětko přepytuje, a to podhlada našćuwanja luda kaž tež hroženja dla.
Policija (24.02.21)
Drogi a pjenjezy namakali
Wojerecy. Policija je we Wojerecach podhladneju zajała, kotrajž měještaj cyły kilogram marihuany při sebi. Po wobšěrnych slědźenjach běchu zastojnicy póndźelu awto marki BMW na Thomasa Müntzerowej zadźerželi. 31lětny sobujěducy hišće spyta titu z drogami schować. W bydlenju měješe muž dalše sto gramow marihuany. W jeho kaž tež w bydlenju 35lětneho šofera namakachu nimo toho 1 500 eurow.
Policija (23.02.21)
Psa z tupym předmjetom bili
Rěčicy. 66lětny mějićel psa w Rěčicach dyrbješe minjenu sobotu policiju w Běłej Wodźe swojeje wowčerskeje psycy dla informować a na ranjenje zakonja wo škiće zwěrjatow skedźbnić. Wón bě ju hižo štwórtk na swojej zahrodźe zranjenu nadešoł. Skótny lěkar mužej rjekny, zo bě psa něchtó z tupym předmjetom na hłowu bił. Dotal hišće jasnje rjec njemóža, hač so psyca wustrowi.
Wo zranjenu žonu so njestarałoj
Łaz. Při Třižonjanskim jězoru we Łazu je so njedźelu popołdnju 63lětna ze swojim psom wuchodźowała. Tam nadpadny jeju dalši pos, při čimž so žona zrani. Porik, kotremuž pos słušeše, so bjez toho zo byštaj so wo žonu starałoj, wotsalištaj. Kriminalna policija wobaj padaj nětko přepytuje.
Policija (22.02.21)
Dróha zawrjena była
Šešow. Sobotu něhdźe w 23.30 hodź. je 26lětna šoferka awta marki VW Golf na wokrjesnej dróze ze Šešowa do směra na zwjazkowu dróhu B 96 z jězdnje zjěła a do štoma zrazyła. Při tym je so awto wo 180 stopnjow zwjertło a do směra na Šešow stejo wostało. Njeswačanska dróha bě dlěje hač hodźinu zawrjena. Ćežko zranjenu žonu lěkuja w chorowni.
Policija (19.02.21)
Třoch podhladnych zajeli
Nadźanecy. W zašłej nocy je patrulja Budyskeje policije w Nadźanecach (Nadelwitz) třoch Polakow w starobje 29 a 49 lět zajała, po tym zo bě słužbna straža wobkedźbowała, kak woni dźěłowe graty z předawanišća noša. Zawołana patrulja jědźeše za awtom podhladnych, jako woni ležownosć wopušćichu. Na Krakečanskej wona VW Passat zadźerža. Zastojnicy nimo toho zwěsćichu, zo steješe 29lětny šofer pod wliwom drogow.
Wjacorym ludźom porok wuprajili
Rakecy. Zastojnicy policije zwěsćichu w nocy wot srjedy na štwórtk přeńdźenja nastupajo škitne naprawy přećiwo koronje. Tak su w Rakecach wjacorym ludźom porok wuprajili a jich na korektne wužiwanje nahubnika skedźbnili. Dwaj wobydlerjej měještaj lěkarski atest.
Wojerecy. Na Wojerowskej Hasy měra warnowachu policisća srjedu wječor tři wosoby ze wšelkich domjacnosćow. Napadnyło wobydlerjam domu bě, zo so mužej a žona w starobje 35 do 40 lět wótře wadźa a hudźbu poskaja. Na to wołachu policiju.
