Policija (21.12.21)
Wospjet po měsće pochodowali
Budyšin. Něhdźe połsta ludźi bě so wčera wokoło 18 hodź. na Žitnych wikach zhromadźiło. Policisća njezamóchu pochodowacych do toho zadźeržeć, dokelž běchu jich wobešli. Zastojnicy, kotřiž ćah na wjacorych městnach zadźeržachu, přez wótřerěčaki wozjewjachu, zo njejstej pochod a zhromadźowanje dowolenej. Blokada wjedźeše k tomu, zo dyrbjachu wobdźělnicy směr ćaha wjackróć změnić. Na Hłownym torhošću so ćah skónčnje rozpušći. Nimo awtokorsa, kiž bě wokoło 17.30 hodź. na Třělnišću startował a so poł hodźiny pozdźišo na Tzschirnerowej skónčił, zwěsćichu zastojnicy šěsć dalšich zhromadźiznow w měsće. Při tym njejsu pak překročenu maksimalnje dowolenu ličbu wobdźělnikow dźesać ludźi registrowali.
Policija (20.12.21)
Woheń w hali hašeli
Lětoń. 63 kameradow Budyskeje powołanskeje a dalšich wohnjowych woborow je sobotu popołdnju přećiwo płomjenjam wojowało, kotrež w priwatnej hali w Lětonju zachadźachu. Tam steješe wotzjewjeny Chevrolet, kotryž chcyše wobsedźer restawrować. Techniski defekt w awće bě woheń zawinował. Na zbožo njebě w tym času nichtó w hali. Wobydlerjo běchu kur wuhladali a woboru informowali. Cyłkowna škoda wučinja něhdźe 12 000 eurow.
Policija (17.12.21)
„Namrěwstwo“ ze sćěhami
Ralbicy-Róžant. Z woporom internetnych wobšudnikow je so minjene dny młodostny z gmejny Ralbicy-Róžant stał. Kaž Zhorjelska policajska direkcija rozprawja, je njeznata a pječa 68 lět stara žona jeho přez Facebook narěčała a wudawała, zo je na smjerć chora. Tuž chcyše wona swoje zamóženje we wobjimje 550 000 eurow někomu darić. Zo móhł tele pjenjezy dóstać, přepokaza 19lětny w času wot 24. nowembra do 10. decembra wjacore razy něšto tysac eurow na wjacore konta. Z pjenjezami mějachu so pječa wšelake wudawki za přepokazanje wulkeje sumy zapłaćić. Přilubjene namrěwstwo pak młodostny w Delanach ženje dóstał njeje. Decernat za wobšudnistwa kriminalneje policije pad nětko dokładnje přepytuje.
Policija (16.12.21)
Nowiny kradnyli
Wojerecy. Cyle njewšědnu rubiznu běchu sej paduši w nocy na wutoru na Wojerowskim Łužiskim naměsće wupytali. Sobudźěłaćerka nowinskeho kioska informowaše policiju, zo běchu so njeznaći do kašćika zadobyli, do kotrehož dóstawa předawanišćo wšědnje aktualne nowiny dodawane. Po informacijach policije pokradnychu paduši nowiny w hódnoće 1 000 eurow. Nimo toho načinichu 50 eurow wěcneje škody.
Policija (15.12.21)
Awtowe čisło sej spomjatkował
Smječkecy. Z městna njezboža ćeknył je předwčerawšim dopołdnja 74lětny wodźer Mercedesa na puću wot Wudworja do Smječkec. Tam wón před nim jěducy BMW přesćahny. Jako so zaso na prawym boku zarjadowa, so Mercedes tamneho awta šmórny, jědźeše pak dale. Wodźer BMWja sej awtowe čisło spomjatkowaše a zawoła policiju. Tak změje so 74lětny nětko za swoje zadźerženje zamołwić. Na Mercedesu nasta něhdźe 200 eurow škody, na tamnym jězdźidle wučinja škoda něhdźe 1 700 eurow.
Policija (14.12.21)
Hodowne dary kradnyli
Wojerecy. Po wšěm zdaću cyle zaměrnje zadobychu so paduši w nocy na njedźelu do pincy wjaceswójbneho domu na Wojerowskej Schweitzerowej. Woni pokradnychu wšitke tam schowane a zdźěla hižo zapakowane hodowne dary, kotrež bě sej wobydlerka spřihotowała. Rubizna měješe hódnotu něhdźe 1 000 eurow. Nimo toho načinichu skućićeljo wěcnu škodu 300 eurow.
Policija (13.12.21)
Z jěduceho awta skočił
Budyšin. Wobsedźer bydlenskeho mobila w Drježdźanach informowaše sobotu wječor policiju, zo bě jón něchtó pokradnył. Zastojnicy wuhladachu jězdźidło na awtodróze A 4 pola Budyšina a chcychu je zadźeržeć. Paduch pak signale ignorowaše a město toho wotboka do policajskeju awtow zrazy, zo njemóhli jeho zastojnicy dale přesćěhać. Dokelž pak njebě wuspěšny, rozsudźi so za riskantny manewer. Wón swoju spěšnosć pomjeńši a z jěduceho bydlenskeho mobila skoči. Tón hišće něšto metrow dale jědźeše, prjedy hač jón policajske awto zadźerža. Paduch pak z awtodróhi ćekny a so do ćmy zhubi. Při pytanju za nim zasadźichu nimo helikoptera tež policajskeho psa, njemóžachu pak skućićela namakać. Na dwěmaj policajskimaj jězdźidłomaj a na bydlenskim mobilu nasta něhdźe 25 000 eurow škody.
Policija (10.12.21)
Drogi w awće našli
Měrkow. Při kontroli wosoboweho awta w Měrkowje pola Radworja su policisća w nocy na štwórtk drogi našli. W Citroënje 32lětneho Radworčana zwěsćichu kokain, konop, dalšu maćiznu kaž tež wšelki grat za jich konsumowanje.
Policija (09.12.21)
Bydlenja přepytali
Kubšicy. We wobłuku zhromadneho zasadźenja policistow ze Sakskeje a Braniborskeje su předwčerawšim dopołdnja najwšelakoriše dopokazy ćežkich njeskutkow našli. Nimo bydlenjow w Choćebuzu a Baršću přepytachu tež jedne w Kubšicach. Jich zaměr běchu štyrjo wobskorženi, kotrymž wumjetuja ćežke rubježne wudrěwanje w juliju 2021. Žona a třo mužojo w starobje 24 do 37 lět su čłonojo tak mjenowaneje „Brigady 8“. Policisća sćazachu wjacore mobilne telefony, kompjuterowu techniku, brónje, nože, elektrošokery a dalše nastroje.
Policija (08.12.21)
W hladarni woheń wudyrił
Budyšin. Rozpjeršenosć knježeše dźensa w nocy w Albertowym wustawje na Budyskej Schäfferowej. Krótko do połnocy je so z woknom na prěnim poschodźe kur walał. W bydlenju bě z njejasnych přičin woheń wudyrił, tak zo wołachu wohnjowu woboru, policiju a wuchowanske mocy. Objekt je bydlenska připrawa seniorow z 41 bydlenjemi. Tuž so wuchowarjo hižo na wulku ewakuaciju nastajichu. Spěšneho zasadźenja dla pak móžachu wobornicy zadźěwać, zo so płomjenja z bydlenja 80lětneje na dalše wobłuki twarjenja rozpřestrěchu. Jeno tři susodne bydlenja z třomi wobydlerjemi dyrbjachu ewakuować. Potrjechenu wobydlerku dowjezechu do chorownje, tamnych třoch su na městnje zastarali. Po aktualnych informacijach so w bydlenju najprjedy raz bydlić njehodźi. Přičinu wohenja přepytuje nětko fachowc wohnjoweje wobory.
Konop namakali
