Policija (08.07.22)
Trik bohužel fungował
Bukecy. Zaso raz su njeznaći socialne syće za wobšudnistwo znjewužiwali. Tónraz je so starša žona w Bukecach z woporom stała. Z powěsću w messengerowej słužbje 72lětnej nabarbichu, zo ma jeje syn nowe telefonowe čisło a zo trjeba nuznje pjenjezy, zo móhł swój nowy mobilny telefon wužiwać. Wěrjo do toho, zo swojemu synej pomha, Bukečanka 2 400 eurow přepokaza. Hakle pozdźišo wona pytny, zo bu wobšudźena a informowaše policiju. Zastojnicy tuž wospjet nuznje warnuja, pjenjezy na cuze konto přepokazać. Najlěpje je, stajnje wosobinsce z přiwuznymi rěčeć.
Policija (07.07.22)
Pomałe jězdźenje napadnyło
Budyšin. Normalnje dyrbja ći šoferojo z chłostanjom ličić, kotřiž přespěšnje jědu a kotrychž při tym lepja. Z nawopačnym padom je so nětko policija w Budyšinje zaběrała. Předwčerawšim popołdnju wuhladachu zastojnicy na Budyskej Hegelowej VW, kotryž napadnje pomału jědźeše. Při kontroli so móžna přičina za to spěšnje wukopa. Kaž drogowy test wunjese, steješe 32lětny čěski staćan pod wliwom amfetaminow, kotrež bě do toho brał. Dalše wodźenje wosoboweho awta jemu zastojnicy zakazachu a přikazachu, zo ma młody muž krej wotedać. Nimo toho zahajichu policisća pokutne jednanje, tak zo změje so lepjeny za swój delikt zamołwić.
Policija (06.07.22)
Kolesowar znjezbožił
Mučow. Při wobchadnym njezbožu předwčerawšim na zwjazkowej dróze B 96 mjez Wojerecami a Mučowom je so kolesowar ćežko zranił. 20lětna wodźerka Peugeota bě tam najprjedy druhe awto přesćahnyła, hačrunjež to na tym městnje dowolene njebyło, a na to nalěwo nimo wobchadneje kupy jěła. Runje w tym wokomiku tam 39lětny kolesowar dróhu přeprěči. Jeho dowjezechu z helikopterom do chorownje.
Policija (05.07.22)
Mopedistka do traktora zrazyła
Pančicy-Kukow. Ćežke wobchadne njezbožo je so wčera w Pančicach-Kukowje stało. Wodźerka žołteje Łastojčki jědźeše tam něhdźe w 16 hodź. po Chróšćanskej dróze do směra na Kukow. W tym wokomiku wujědźe z klóšterskeho kubła traktor, do kotrehož mopedistka zrazy. Při tym so młoda žona ćežko zrani. Ju dowjezechu z helikopterom do chorownje.
Dobyće žane njebě
Jiwow. Z woporom wobšudnika je so minjeny dny muž w Jiwowje (Eibau) w gmejnje Kottmar stał. Jeho bě njeznaty zazwonił a zdźělił, zo je nimale 100 000 eurow dobył. Zo móhli pjenjezy přichodne dny na konto 57lětneho přepokazać, bě jeničce trěbne, transport pjenjez takrjec zawěsćić. Za to žadaše sej cuzy při telefonje Google-Play-karty resp. na nich wotćišćane tajne čisła. Jiwowčan kupi na to tajke karty w hódnoće 8 600 eurow a při telefonje wotpowědne čisła přeradźi. Hakle pozdźišo wón pytny, zo bě so z woporom wobšudnikow stał a informowaše policiju.
Policija (04.07.22)
Palčikaj a sowu pokradnyli
Budyšin. Njewšědnje chrobłe padustwo sta so sobotu wječor w Budyšinje. Krótko do 19 hodź. přijědźe wosobowe awto na ležownosć při Lubijskej dróze. Sobujěduca žona wulěze, wza sej zahrodowej palčikaj kaž tež sowu a sydny so zaso do awta, kotrež na to wotjědźe. Wšitke tři figury běchu z keramiki. Škoda wučinja něhdźe 60 eurow. Wobsedźerka ležownosće je padustwo wobkedźbowała a sej na zbožo awtowe čisło spomjatkowała. Kriminalna słužba Budyskeho policajskeho rewěra pad nětko přepytuje.
Policija (01.07.22)
Tykanc podhladny był
Njedźichow. Po tym zo běštej alkohol piłoj a tykanc jědłoj, dyrbještej so předwčerawšim 18lětnej holcy z Njedźichowa strowotniskich problemow dla do chorownje dowjezć dać. Policisća mějachu podhlad a na městnje slědźachu, hač bě snano něchtó wopojne jědy do tykanca měšał. A woprawdźe namakachu woni slědy konopje a zawěsćichu tohorunja zbytki tykanca. Tón nětko w laborje dale přepytuja.
Policija (30.06.22)
Njeznaći muža wobšudźili
Delni Wujězd. Muž je so předwčerawšim w Delnim Wujězdźe z woporom wobšudnikow stał. 64lětny dósta přez WhatsApp powěsć, zo ma jeho syn nowe šmóratko. Zo by je wužiwać móhł, pak trjeba nimale 2 000 eurow. Tule sumu sej wón nětko wot nana wuprosy. Delnjowujězdźan pjenjezy na nižozemske konto přepokaza. Bórze na to muž wot swojeho woprawdźiteho syna zhoni, zo jednaše so wo wobšudnistwo.
Policija (29.06.22)
Rubježnika lepili
Běła Woda. 45lětny muž chcyše předwčerawšim w Běłej Wodźe kupnicu wurubić. Při kasy wućahny wón na pistolu podobny nastroj a sobudźěłaćerce hrožeše. Žona so wustróži a njereagowaše. Na to muž z awtom ćekny. Dźakowano dobreho wopisowanja swědkow wuhladachu jeho pozdźišo při hraničnym přechodźe w Mužakowje a jeho zajachu. Dalšich rubježnych deliktow dla předležeše přećiwo 45lětnemu hižo přikaz zajeća.
Policija (28.06.22)
Tři delikty naraz
Budyšin. Nimale wšitko wopak činił je 43lětny wodźer nakładneho awta, kotrehož zadźeržachu policisća předwčerawšim připołdnju na awtodróze A 4 mjez Budyšinom a Słonej Boršću. Wón bě z Lkw-jom njedźelu po puću, hačrunjež za to dowolnosć njeměł. Nimo toho běchu spinadła jězdźidła skóncowane. A skónčnje so wukopa, zo měješe wodźer 1,94 promilow alkohola w kreji.
Policija (27.06.22)
Pokradnjeny Lkw namakali
Wojerecy. Běłe nakładne awto typa MAN su njeznaći w nocy na minjeny štwórtk z twarnišća při Čornym Halštrowje na Spalowskej dróze we Wojerecach pokradnyli. Jězdźidło bě 40 000 eurow hódne. Něšto hodźin pozdźišo wuhlada wobydler Lkw z Lubijskim čisłom we Łutach a informowaše policiju. Z jězdźidła pobrachowaše jeničce nastroj za registrowanje awtodróhoweho popłatka. Po zwěsćenju slědow Lkw wobsedźerjej wróćichu.
