Policija (25.02.22)
Wobšudnistwu zadźěwała
Spale. Dokelž chcyše 68lětny muž předwčerawšim w Kulowskej wotnožce pjenježneho instituta njewšědnje wulku sumu pjenjez wotzběhnyć, so sobudźěłaćerka dźiwaše a so za přičinu prašeše. Muž ze Spalow rozprawješe wo wukrajnymaj dźěłaćerjomaj, kotrajž staj třěchu porjedźałoj, byrnjež scyła nadawk njeměłoj. Sobudźěłaćerka banki informowaše na to policiju, kotraž rumunskeju dźěłaćerjow w Spalach lepi.
Policija (24.02.22)
Na dobyću dwělowała
Wojerecy. Prawje jednała je předwčerawšim žona we Wojerecach, jako ju njeznaći zazwonichu a jej wulke dobyće připowědźichu. Po zdaću bě 64lětna dohromady 38 500 eurow při někajkim wupisanju myta dobyła. Pjenjezy chcyštej jej pječa wěstotna firma a notarka přepodać. Za pjenježny transport pak měješe Wojerowčanka tak mjenowane google-play-karty w hódnoće 1 000 eurow wobstarać a při wupłaćenju dobyteje sumy transporterej přepodać. To zbudźi wulke dwěle pozdatneje dobyćerki, na čož je policiju informowała.
Policija (23.02.22)
Spěšnosć měrili
Běła Woda. Na zwjazkowej dróze B 156 mjez Běłej Wodu a Hamorom je policija předwčerawšim spěšnosć wobchada měriła. W běhu pjeć hodźin trajaceje kontrole přepruwowachu 550 jězdźidłow a hač jich šoferojo předpisanu spěšnosć 100 km/h dodźerža. Při tym registrowachu dwanaće přeńdźenjow. Njesławny rekord docpě Renault z Kamjenskim čisłom, kiž bě ze 128 km/h po puću. Jeho šofer ma nětko sto eurow pokuty płaćić a dóstanje jedyn dypk w Flensburgu.
Policija (22.02.22)
Morchej zajědojćena była?
Budyšin. Při latarnjach a štomach podłu Sprjewje w Budyskim Humboldtowym haju su swědcy předwčerawšim, njedźelu, po wšěm zdaću zajědojćene kuski morcheje namakali, wšitko zezběrali a policiju informowali. Kriminalisća nětko přepytuja, hač z namakankow někajki strach za zwěrinu wuchadźa.
Policija (21.02.22)
Rozestajenje zmija dla
Žitawa. Sylny wětřik je sobotu popołdnju swójba w Žitawje wužiwała a zmija pušćała. Jako padny tón na zemju, šmórny so parkowaceho Audija, ale jón njewobškodźi. 23lětna wobsedźerka awta to z bydlenja wobkedźbowaše a najprjedy na swójbu swarješe. K jězdźidłu přišedši wona 52lětnej žonje woneje swójby mjezwoči dyri a ju při tym zrani. Zranjenja ćěła kaž tež křiwdźenja dla změje so 23lětna nětko zamołwić.
Policija (18.02.22)
Palenc, wino a laptop fuk
Wojerecy. Zamkarnju we Wojerecach běchu sej paduši w nocy na srjedu wupytali. W twarskim kompleksu zadobychu so woni do běrowow a načinichu při tym něhdźe 5 000 eurow wěcneje škody. Ze skućićelemi zhubichu so tři bleše palenca, bleša wina a laptop w cyłkownej hódnoće 1 700 eurow. Namakane slědy su kriminalisća mjeztym zawěsćili.
Policija (17.02.22)
Spěšnosć kontrolowali
Bluń. Na zwjazkowej dróze B 156 blisko pěstowarnje w Blunju (Bluno), hdźež je 30 km/h dowolenych, su policisća předwčerawšim spěšnosć kontrolowali. Wot 1 290 měrjenych jězdźidłow bě 50 přespěšnych. 31 šoferow ma nětko warnowanski pjenjez zapłaćić, za 19 wodźerjow awta budźe pokuta trochu wjetša. Najspěšniši bě pólski Seat z 63 km/h.
Policija (16.02.22)
Paducha znowa lepili
Běła Woda. Znowa je policija předwčerawšim w Běłej Wodźe paducha katalyzatora lepiła. Při kontroli Fiata njewuhladachu woni jenož po wšěm zdaću pokradnjene koleso, ale tež katalyzator wosoboweho awta typa Volvo. Pola šofera jednaše so wo 32lětneho Ukrainjana, kotrehož běchu zastojnicy hižo minjeny kónc tydźenja z tajkim awtowym dźělom lepili. Sobujěducy bě 25lětny pólski staćan, za kotrymž policija hižo pytaše. Wobeju zastojnicy nachwilnje zajachu. Sudnik chcyše wčera wo dalšich chłostanskoprawniskich konsekwencach rozsudźić.
Policija (15.02.22)
Pjenjezy z bydlenja kradnyli
Budyšin. Na swětłym dnju su so njeznaći předwčerawšim na Curiejowej w Budyšinje do bydlenja zadobyli a tam pjenjezy pokradnyli. Kaž policija rozprawja, přepytachu woni wšitke rumnosće a kamory a namakachu něhdźe tysac eurow, kotrež sobu wzachu. Kak běchu so skućićeljo do bydlenja dóstali, njeje znate. Policija pad přepytuje.
Policija (14.02.22)
Paduchow katalyzatora wuslědźili
Běła Woda. Nimale wšědnje policija rozprawja, zo paduši wot wosobowych awtow katalyzator wotrězaja a pokradnu. W tychle dźělach su wosebite metale, kotrež móža skućićeljo derje wužiwać a předać. Sobotu připołdnju je policija w Běłej Wodźe třoch podhladnych wuslědźiła, kotřiž su znajmjeńša za jedyn tajki pad zamołwići. W jich awće njenamakachu jenož we Wojerecach pokradnjeny katalyzator, ale tež štyri kolesa Peugeota a drohi grat. Muža a žonu z Pólskeje w starobje 25 a 24 lět kaž tež 32lětneho Ukrainjana zastojnicy nachwilnje zajachu. We wobłuku přepytowanjow chcedźa nětko wuslědźić, hač je padušna trójka tež za dalše kradnjene katalyzatory zamołwita. Škoda we Wojerowskim padźe wučinja něhdźe 800 eurow.
