Balkon so sypnył

Budyšin. Dźewjeć wosobow je so wčera wječor na Budyskej Paulijowej zdźěla ćežko zraniło, jako so balkon na třećim poschodźe bydlenskeho domu sypny a na balkon poschod niže padny. Mjez zranjenymi běštej dwě dźěsći. Po informacijach po­licije su tam narodniny swjećili. Hosćo stupichu krótko po 20 hodź. runočasnje na balkon, štož konstrukcija njewudźerži. Za dokładnej přičinu nje­zboža nětko slědźa.

Sud piwa fuk

Rakojdy. Njewšědnu měšeńcu rubizny spakosćichu njeznaći předwčerawšim w Rakojdach (Rakel) w Malešanskej gmejnje. Tam zadobychu so do twarjenja na Bartskej dróze. Z njeho pokradnychu laptop, telewizor a sud piwa. Rubizna ma hódnotu něhdźe 2 500 eurow. Bohužel z policajskeje rozprawy njewuchadźa, kak wulki sud bě, a hač bě wón połny abo nic. Přiwšěm policija slědy zawěsći a nětko za paduchami pyta.

Z awtom do štoma prasnył

Čornjow. Zaso raz bě alkohol wina na wobchadnym njezbožu, kotrež sta so předwčerawšim wječor pola Čornjowa (Zschorna) w Bukečanskej gmejnje. 67lětny wodźer awta Subaru bě tam z wo­krjesneje dróhi zajěł a do štoma prasnył. Jeho dowjezechu do chorownje. Tam namě­richu pola njeho 1,16 promilow alko­hola w kreji. Wěcna škoda wučinja nimale 8 000 eurow.

Dźěćo z woknom skočiło

Budyšink. Dramatiske sceny su so dźensa rano w Budyšinku wothrali. Krótko po 7.30 hodź. bě tam we wjaceswójbnym domje na Cyrkwinskim puću woheń w by­dlenju na prěnim poschodźe wudyrił. Dwaj dorosćenej a dwě dźěsći móžachu bydlenje po schodźe wopušćić. Jedne dźěćo pak pobrachowaše. Štyrilětny hólčec bě na zadnim boku twarjenja najskerje w žiwjenskim straše z woknom skočił. Při tym so wón tak ćežko zrani, zo dyrbjachu jeho z helikopterom do chorownje dowjezć. Tamnych štyrjoch swójbnych kaž tež dalšeju wobydlerjow z domu dyrbjachu tohorunja lěkarsce zastarać, dokelž běchu kur do so dychali. Čehodla je woheń w bydlenju wudyrił, njeje znate.