Policija (08.10.20)
Z wotmachom do Lkw-ja zrazył
Porchow. Ćežke wobchadne njezbožo ze złymi sćěhami sta so wčera něhdźe w 17 hodź. na awtodróze A 4 blisko Porchowskeje wotbóčki. Do směra na Zhorjelc jěducy wodźer pólskeho wosoboweho awta je z wulkim wotmachom wotzady do nakładneho awta prasnył. Wón bu ze swojeho awta ćisnjeny, při čimž bu jemu ruka wottorhnjena. Z helikopterom dowjezechu muža do chorownje. Šofer Lkw-ja so njezrani. Awtodróha bě dlěši čas zawrjena.
Policija (07.10.20)
Jebak sej pjenjezy wulišćił
Biskopicy. 88lětny muž je so předwčerawšim w Biskopicach z woporom jebaka stał. Dotal njeznaty skućićel rentnarja na parkowanišću kupnicy narěča a jeho prošeše pjenjezy zaměnić. Dobroćiwy starc wočini swoju móšnju, w kotrejž měješe wjetšu sumu pjenjez. W tym wokomiku cuzy do móšnje sahny a pokaza na dźesaćeurowsku bankowku, wo kotruž Biskopičana prošeše. Myslo sej, zo je wotpowědne drobne pjenjezy hižo dóstał, 88lětny wone dźesać eurow cuzemu da, na čož so tón zminy. Hakle pozdźišo škodowany pytny, zo jemu wjacore sta eurow w móšni pobrachuja. Po jeho wopisanju je jebak 170 centimetrow wulki, ma swětłe, krótke włosy a ćmowu drastu. Pokiwy přijimuje policija pod telefonowym čisłom 03594/ 75 70.
Policija (06.10.20)
Kolesowarja so šmórnył a dale jěł
Budyšin. Na Ćichońskej dróze w Budyšine je minjenu sobotu popołdnju wodźer wosoboweho awta dweju kolesowarjow přesćahnył. Při tym so wón jednoho z njeju z wonkownym špihelom šmórny, tak zo kolesowar padny a so zrani. Zawinowar pak je dale jěł. Policija pyta nětko swědkow, kotřiž su snano něšto wobkedźbowali.
Policija (05.10.20)
Předpisy tež na wodźe płaća
Lejno. Zo płaća wobchadne předpisy tež na wodźe, wě nětko 57lětny muž, kotrehož je policija sobotu na Lejnjanskim jězoru (Geierswalder See) kontrolowała. Wón bě tam ze sportowym čołmikom na wodźe po puću. Při kontroli policisća zwěsćichu, zo měješe muž wjace alkohola hač dowolene w kreji, mjenujcy 0,78 promilow. Na 57lětneho čaka nětko pokutne jednanje, dokelž njeje postajenja nutřkokrajneho łódźnistwa dodźeržał.
Policija (02.10.20)
Šofer-započatkar alkohol pił
Budyšin. Při wobchadnej kontroli předwčerawšim wječor na Nowosólskej dróze w Budyšinje je policija mjez druhim VW zadźeržała. 18lětny wodźer duješe 0,64 promilow do testoweho nastroja. Za započatkarjow w probowym času resp. hač do zakónčenja 21. žiwjenskeho lěta płaći pak striktny zakaz alkohola při wodźenju jězdźidła. Na młodeho muža čaka nětko jednanje přeńdźenja přećiwo porjadej dla. Nimo toho drje so jeho probowy čas jězbneje dowolnosće podlěši, a wón změje so na natwarjacym seminarje wobdźělić.
Policija (01.10.20)
Koleso namakali a paduchow zajeli
Budyšin. Dźakowano pokiwej swědka je policija w nocy na srjedu pokradnjene koleso na Budyskej Schäfferowej namakała. Te bě něchtó srjedź septembra na Cyhelskej pokradnył. Podhladnaj staj mužej w starobje 24 a 32 lět. Jeju zastojnicy lepichu, jako nětko podarmo za pokradnjenym kolesom pytaštaj. Wobeju nachwilnje zajachu. Při kontroli młódšeho namakachu policisća wšelki grat za zadobywanja.
Policija (30.09.20)
Wuheń so palił
Ćisk. W jednym ze statokow na Ćišćanskej nawsy je so předwčerawšim wuheń palił. Jako wobydler tam kachle zatepi, nadobo płomjenja z wuhenja sapachu. Muž spyta na to woheń w kachlach z wodu hašeć, při tym pak so wuheń pukny, tak zo nasta něhdźe tysac eurow škody. Snadnje zranjeny muž dyrbješe so w chorowni lěkarsce zastarać dać. Policija pad dale přepytuje. Zawěsće pak so z nim tež přisłušny saznik zaběra.
Policija (29.09.20)
Policija (28.09.20)
Wulke zbožo měli
Porchow. Zbožo w njezbožu měješe młoda swójba wčera rano na awtodróze A 4 pola Porchowa. Wona bě ze swojim Opelom do směra na Budyšin po puću, jako 28lětny wodźer z dotal njeznateje přičiny kontrolu nad wodźidłom zhubi. Opel zajědźe najprjedy nalěwo a zrazy do srjedźneho wobhrodźenja, na to suny so na tamny bok jězdnje a wosta na prawej kromje stejo. Wodźer a jeho 33lětna sobujěduca so jeno snadnje zraništaj. Jeju na městnje lěkarsce zastarachu. Tři dźěći w starobje poł, jednoho lěta a pjeć lět so njezranichu. Opel pak so po informacijach policije dospołnje skóncowa. Nimo toho wobškodźi so wobhrodźenje awtodróhi na něhdźe 50 metrach. Dohromady nasta 20 000 eurow škody.
Policija (25.09.20)
Kolesowar so zranił
Hózk. W Hózku je srjedu wječor wodźer nakładneho awta na hłownej dróze kolesowarja přewidźał a jeho šmórny. Byrnjež z koła padnył, so škodowany na zbožo jenož lochko zrani. Zawołana policija wěcnu škodu na sto eurow trochuje.
Do firmy so zadobyli
Serbske Pazlicy. Minjeny dny běchu so njeznaći do jedneje firmy w Serbskich Pazlicach zadobyli. Kaž Zhorjelska policajska direkcija wčera w nowinarskej rozprawje zdźěli, běchu grat w hódnoće něhdźe 5 000 eurow pokradnyli. Wěcnu škodu trochuja na něhdźe 500 eurow.
Z parka palmy sobu wzali
Mužakow. W nocy na srjedu su njeznaći w Mužakowskim parku palmy pokradnyli. Jedna z eksotiskich rostlin bě po zdaću tak ćežka, zo ju policija z čworom na Zhorjelskej dróze wostajenu nadeńdźe.
Chorobne jězdźidło pokradnyli
Kamjenc. Na Jěžowskim pólnym pućiku w Kamjencu su njeznaći, kaž policija hakle wčera pisa, minjeny dny z garaže elektriski chorobny jězdny stoł typa Invacare a k tomu słušace elektriske nabiwadło pokradnyli. Ćělnje zbrašenym za žiwjenje jara wažne a trěbne jězdźidło płaći něhdźe 2 000 eurow.
