Policija (17.03.21)
Paduch so sam přeradźił
Budyšin. Dokelž njeje lěpje na swoju móšeń kedźbował, je drje so 24lětny muž předwčerawšim po padustwje sam přeradźił. Wón bě dopołdnja w kupnicy na Budyskej Kamjentnej hasy wšelake twory spakosćił a na to ćeknył. Sobudźěłaćer drje spyta jeho zadźeržeć, cuzy pak so jemu wutorhny. Při tym zhubi swoju móšeń, w kotrejž bě mjez druhim personalny wupokaz. Tak je paduch policiji tójšto dźěła zalutował.
Policija (16.03.21)
Žona njemdrje zachadźała
Hermanecy. Po wšěm zdaću měšeńca alkohola a drogow je předwčerawšim zasadźenje policije w Hermanecach we Łazowskej gmejnje wuskutkowała. 37lětna žona w swojim bydlenju hewrjekaše, ćisny piwowu blešu do dalšeje žony a randalěrowaše w bydlenju. Jako policisća zakročichu, so njemdra tež do nich da, tak zo dyrbjachu ju z domu wjesć. W bydlenju namakachu marihuanu, pola žony naměrichu 2,6 promilow alkohola.
Policija (15.03.21)
Policija (12.03.21)
Po njezbožu dale jěła
Wojerecy. 19lětna kolesowarka je so při wobchadnym njezbožu předwčerawšim rano we Wojerecach snadnje zraniła. Na křižowanišću njebě 52lětna wodźerka Caddyja po wšěm zdaću předjězbu młodostneje wobkedźbowała a zajědźe do njeje. Wuchowanske awto dowjeze zranjenu do chorownju, kotruž móžeše 19lětna bórze na to zaso wopušćić. Pozdatna zawinowarka njezboža bě po informacijach policije prosće dale na dźěło jěła. Swoje personalije pak wona njezawostaji a tež na policiju čakała njeje. Přiwšěm móžachu ju identifikować, dokelž sej kedźbliwy swědk čisło jeje awta spomjatkowaše a policiji posrědkowaše. Žona změje so nětko lochkomyslneho zranjenja ćěła a ćeknjenja z městna njezboža dla zamołwić.
Policija (11.03.21)
Třělby kradnyli
Mikow. Njewšědnu rubiznu wupytali běchu sej njeznaći minjene dny w Mikowje (Mücka). W času wot pjatka popołdnja hač do wutory ranja zadobychu so tam do bydlenskeho domu. Přepytawši wšitke rumnosće pak njejsu pjenjezy abo debjenki sobu wzali, ale tři třělby w cyłkownej hódnoće něhdźe 3 000 eurow. Jako wotpowědny kamor namócnje wočinichu, načinichu nimo toho něhdźe 2 000 eurow wěcneje škody.
Drogi namakali
Kamjenc. Podhladneho kolesowarja chcychu policisća předwčerawšim wječor na Wojerowskej dróze w Kamjencu kontrolować. Tón drje najprjedy ćekny, dźakowano pokiwam wobydlerjow pak jeho pozdźišo w bydlenju znateho hromadźe z dalšimaj mužomaj lepichu. Tam wuhladachu zastojnicy na blidźe wjacore titki marihuany. Tak hišće dalšej bydleni w Lessingowym měsće přepytachu, hdźež su tohorunja drogi, zapakowanski material a za to trěbne utensilije zwěsćili. Wšitko to kaž tež mobilny telefon a kontowe wućahi policisća sćazachu. Wšitcy třo změja so nětko přeńdźenja přećiwo zakonjej wo wopojnych srědkach sudnisce zamołwić.
Policija (10.03.21)
Wjelkow dla so nabojeli
Sepicy. Za třoch dyrdomdejnikow skónči so předwčerawšim wječor geocachingowy wulět na wojerskim zwučowanišću w Sepicach (Schwepnitz) z přizjewjenjom pola policije. Mužojo w starobje 24 do 33 lět běchu tam ze swojimi techniskimi nastrojemi po puću a za wěstymi dypkami w krajinje pytachu. Kaž woni pozdźišo rozprawjachu, słyšachu w bliskosći wjelki ruć. Z toho so woni mócnje nabojachu, njezwěrichu sej hižo wróćo k awtu a su radšo policiju zazwonili. Zastojnicy Kamjenskeho policajskeho rewěra nańdźechu trójku strowu a čiłu, ale wjelki tam žane njewuhladachu. Dokelž pak je na wojerskim zwučowanišću přebywać zakazane, změja so geocachingarojo nětko mylenja domoweho měra dla zamołwić.
Policija (09.03.21)
„Wudźerjej“ granatu namakałoj
Delnja Hórka. Tak mjenowane magnetowe wudźenje ma po wšěm zdaću tež w Hornjej Łužicy přiwisnikow. Tejle zaběrje staj so mužej předwčerawšim w Delnjej Hórce wěnowałoj a ze sylnym magnetom w Sprjewi za pokładom pytałoj. Namakałoj pak staj něšto cyle hinaše, mjenujcy powostanku z Druheje swětoweje wójny. Z magnetom wućahnyštaj tam 30 centimetrow dołhu a wosom centimetrow šěroku granatu z rěki. Rozbuchadło ruskeho pochada přizjewištaj namakarjej pola policije. Fachowcy granatu přewzachu a wotwjezechu.
Policija (08.03.21)
Wopity wokoło so třělał
Wojerecy. Wobydler we Wojerecach je sobotu wječor zdźělił, zo na Heinowej něchtó w bydlenju třěla. Zastojnicy móžachu tam 42lětneho muža přewinyć a jeho trašawku kaž tež wotpowědnu municiju sćazać. Za bróń wón žanu dowolnosć njeměješe, měješe pak chětro wjele alkohola w kreji. Pola njeho naměrichu mjenujcy 2,2 promilej.
Policija (05.03.21)
Z dróhi runu smuhu do jastwa
Budyšin. Na awtodróze A 4 pola Budyšina zwěsći policija tele dny při kontroli, zo bě šofer małotransportera bjez jězbneje dowolnosće po puću. Za 30lětnym hižo pytachu, dokelž njebě pokutu wjacorych stow eurow płaćił. Dokelž njemóžeše ju zapłaćić, dowjezechu jeho do jastwa.
Njerjad rěčku zanjerodźił
Budyšin. Wohnjowu woboru z wokoliny sprjewineho města su wčera rano na Budyski puć Při Špitałskich łukach wołali. Tam běchu wobydlerjo wolij na Albrechtowce wuhladali. Přičina bě wočiwidnje preč ćisnjeny njerjad pod mostom při zaliwje do rěčki. Wobornicy připrawichu wotpowědnu zawěru. Pad zanjerodźenja policija nětko přepytuje.
Policija (04.03.21)
Dźak sobudźěłaćerce
Wojerecy. 67lětny Wojerowčan chcyše 18. februara w lutowarni 25 000 eurow ze swojeho konta wotzběhnyć. Sobudźěłaćerka pak dwělowaše na tym, zo chce dotal njeznata žona do Němskeje přilećeć a z mužom so spřećelić. Wón drje steješe emocionalnje pod ćišćom. Dokelž skutkowaše nimo toho zamyleny, je přistajena financneho instituta hnydom policiju informowała. Ta dźakowaše so bankownicy nětko z małym darom.
Do dźěla puknjeneje wobruče zajěł
Słona Boršć. Na awtodróze A 4 mjez Słonej Boršću a Wujězdom je wutoru wječor 53lětny šofer awta marki Opel zajěł do dźěla wobruče, kotryž bě Lkw tam zhubił. Na Opelu nasta škoda něhdźe 2 500 eurow. Policija pyta za dotal njeznatym nakładnym awtom a za swědkami.
