Policija (09.12.21)
Bydlenja přepytali
Kubšicy. We wobłuku zhromadneho zasadźenja policistow ze Sakskeje a Braniborskeje su předwčerawšim dopołdnja najwšelakoriše dopokazy ćežkich njeskutkow našli. Nimo bydlenjow w Choćebuzu a Baršću přepytachu tež jedne w Kubšicach. Jich zaměr běchu štyrjo wobskorženi, kotrymž wumjetuja ćežke rubježne wudrěwanje w juliju 2021. Žona a třo mužojo w starobje 24 do 37 lět su čłonojo tak mjenowaneje „Brigady 8“. Policisća sćazachu wjacore mobilne telefony, kompjuterowu techniku, brónje, nože, elektrošokery a dalše nastroje.
Policija (08.12.21)
W hladarni woheń wudyrił
Budyšin. Rozpjeršenosć knježeše dźensa w nocy w Albertowym wustawje na Budyskej Schäfferowej. Krótko do połnocy je so z woknom na prěnim poschodźe kur walał. W bydlenju bě z njejasnych přičin woheń wudyrił, tak zo wołachu wohnjowu woboru, policiju a wuchowanske mocy. Objekt je bydlenska připrawa seniorow z 41 bydlenjemi. Tuž so wuchowarjo hižo na wulku ewakuaciju nastajichu. Spěšneho zasadźenja dla pak móžachu wobornicy zadźěwać, zo so płomjenja z bydlenja 80lětneje na dalše wobłuki twarjenja rozpřestrěchu. Jeno tři susodne bydlenja z třomi wobydlerjemi dyrbjachu ewakuować. Potrjechenu wobydlerku dowjezechu do chorownje, tamnych třoch su na městnje zastarali. Po aktualnych informacijach so w bydlenju najprjedy raz bydlić njehodźi. Přičinu wohenja přepytuje nětko fachowc wohnjoweje wobory.
Konop namakali
Policija (07.12.21)
Njezbožo zawinił a ćeknył
Pančicy-Kukow. 53lětny muž je předwčerawšim popołdnju po wobchadnym njezbožu w Pančicach-Kukowje ćeknył. Wón bě w nahłej křiwicy na Chróšćanskej dróze do směra na statnu dróhu S 100 na lěwy bok jězdnje zajěł, do napřećo přijěduceho awta prasnył a městno njezboža wopušćił. Přiwołani policisća mjeno muža wuslědźichu a jeho doma wopytachu. Tam wšak zwěsćichu, zo měješe wón 1,78 promilow alkohola w kreji.
Policija (06.12.21)
Zas a zaso drogi a alkohol
Budyšin. Kónc tydźenja je policija wjacorych šoferow lepiła, kotřiž stejachu pod wliwom drogow abo alkohola. Tak zadźeržachu sobotu na Budyskej Jerjowej 33lětneho, kiž bě konop brał. Samsny dźeń lepichu na Müntzerowej 62lětneho, pola kotrehož naměrichu 0,5 promilow alkohola w kreji. Hišće hłubšo do piwoweje škleńcy hladał bě 41lětny wodźer Landrovera we Wojerecach. Wón měješe 1,08 promilow intus. A we Łutach je 22lětny ze swojim Seatom sobotu nawječor do wobchadneho znamjenja prasnył, dokelž měješe 0,89 promilow alkohola w kreji.
Policija (03.12.21)
Mólby a tesaki kradnyli
Budyšin. Njewšědnu rubiznu wupytachu sej paduši, kotřiž zadobychu so w času wot minjeneje wutory popołdnja do srjedy dopołdnja do bydlenja na Budyskej Šulerskej hasy. Tam spakosćichu mólby a wjacore tesaki, kotrež słužachu w bydlenju jako dekoracija. Hač jednaše so wo originalne mólby abo kopije, je runje tak mało znate kaž cyłkowna hódnota rubizny, zdźěli Zhorjelska policajska direkcija. Wěcna škoda wučinja něhdźe 100 eurow. Kriminalni technikarjo na městnje slědy zawěsćichu. Kriminalisća tónle pad nětko dale přepytuja.
Policija (02.12.21)
W rostlinarni so paliło
Hlina. K hašenju wołachu wohnjowych wobornikow předwčerawšim do Hliny (Gleina) pola Malešec. Na ležownosći 69lětneho bě woheń w rostlinarni wudyrił. Po wšěm zdaću běchu kachle tak jara zatepjene, zo so wšelake blisko ležace a stejace wěcy zapalichu. Čłonojo dobrowólnych wohnjowych woborow wokolnych wsow kaž tež Budyskeje powołanskeje wobory běchu zasadźeni. Hašensku wodu klumpachu woni z bliskeje Kotołki (Kotitzer Wasser). Po informacijach policije so nichtó zranił njeje. Wěcnu škodu pak trochuja na něhdźe 7 000 eurow.
Policija (01.12.21)
Skład wurumowany
Dźěžnikecy. Móhłrjec wšo, štož móžachu dosahnyć, su njeznaći w Dźěžnikecach pokradnyli. Tam běchu so minjeny tydźeń na dotal njeznate wašnje do składowanskeje hale zadobyli. Kaž Zhorjelska policajska direkcija hakle nětko zdźěli, spakosćichu z njeje dwě kolesy, telewizoraj, tak mjenowanu soundbaru, hudźbnu připrawu kaž tež wšelki grat za dźěło w zahrodce. Po informacijach policije ma rubizna hódnotu něhdźe 7 000 eurow. Nimo toho načinichu paduši něhdźe 50 eurow wěcneje škody. Zastojnicy zawěsćichu slědy a zhotowichu wotpowědne wozjewjenje. Kriminalna słužba Budyskeho policajskeho rewěra pad nětko dale přepytuje.
Policija (30.11.21)
Wotpadki ilegalnje wotbyli
Čorny Chołmc. Z padom zanjerodźenja wobswěta zaběra so policija w Čornym Chołmcu. Tam su njeznaći minjene dny při puću Pjecarjec hora na wšěch 20 wulkich měchow z twarskimi wotpadkami wotbyli. Kedźbliwy swědk je měchi tam wuhladał a policiju informował. W čornych měchach běchu zbytki wobmjetka a dalše wotpadki, nastawace na přikład při ponowjenju bydlenja. Kriminalna słužba Wojerowskeho policajskeho rewěra so z padom nětko dokładnišo rozestaja. Kriminalisća pytaja swědkow, kotřiž su 24. abo 25. nowembra na mjenowanym puću něšto podhladneho wobkedźbowali. Móžne pokiwy přijimuja we Wojerecach pod telefonowym čisłom 0 35 71 / 46 50 a na kóždym druhim policajskim běrowje.
Policija (29.11.21)
Z woknom třělał
Budyšin. Starosćiwa wobydlerka so minjeny pjatk wječor pola policije přizjewi a zdźěli, zo je na Budyskej Hasy Liselotty Herrmann něchtó z wočinjenym woknom wjacore razy třělał. Hnydom zasadźeni zastojnicy najprjedy wokolinu bydlenskeho domu zawěsćichu. Na to su so z pomocu kolegow hotowostneje słužby z woknom do bydlenja dóstali a podhladneho skućićela dosahnyli. Prěni drogowy test reagowaše pola 37lětneho pozitiwnje na amfetaminy. Na blidźe wuhladachu policisća trašawku a něhdźe 90 patronow. Při přepytanju bydlenja zwěsćichu wjacore nože a wšelake drogi. Kriminalna policija so z tymle padom nětko nadrobnišo zaběra.
Policija (26.11.21)
Zastojnikej do rukow běžała
Budyšin. Komisar připad je předwčerawšim tomu dopomhał, zo je so padustwo w Budyskim wobchodźe cyle spěšnje wujasniło. Policist widźeše po swjatoku na Stieberowej młodu žonu z drogerije přińć a so spěšnje wotsalić. Dokelž při tym alarm wobchoda piwčeše, tukaše wón na to, zo móhło so wo padustwo jednać, a spěchaše za padušnicu. W samsnym wokomiku kriminalist w słužbje blisku tankownju wopušći, a ćěkaca jemu direktnje do rukow běžeše. Wobaj ju na to zaještaj a alarmowanym kolegam z policajskeho rewěra přepodaštaj. 22lětna bě we wobchodźe kosmetiku a parfim w hódnoće 400 eurow pokradnyła. Twory móžachu wobchodej hnydom zaso wróćić.
